Mataio 11

1Soka Iesu areve satiriaraita karu twelve la satiriōri roroka lei, are lea oti kiripi, ereve karikara metameta voa satiriōri aea itoro ōvovo terōpe.

Ioane Bapatiso Vita ve meu karu

(Luka 7:18–35)

2Soka Ioane dibura uvi voa Keriso sa leipe mai ve fari la mapi, are areve satiriaraita karu hea la itapi arero lalasi lei mōri moi vei, 3Lea forerai vei o oita vita a meha ei, ō ela karu aea la tai roi ei? 4Iesu tava o erero mō ōpe, Isei, e mapi ofae eavaipeta mea fari Ioane la moia: 5ofae kuku karu ve ofae ovava lei, mora pui karu mora kerori, pokea eka karu ovava lei, ōvasuru karu o mapi, opai karu la lei itei, karu merava Ovoro Lareva ta la mapaipea.#Isa 35:5–6; 61:1 6Aea ara vei horahora auke leita lea karu lareva ia.

Iesu Ioane la marase ōpe

7Soka lea karu ata isaipe soa, Iesu karu sitavu la Ioane vei laua mō sukavōpe, E furuka merava voa lekōru la ofae ruri vei kavaiape ei? Mea sa toa miava‐miava arita sirivo ei? 8E leiro ofae eavai vei maria voa kavaiape ei? Puta mafumafu lareva sa mopaiape vita ei? Kakaeite; puta mafumafu sa mopaita karu harofave karu ve uvi voa pepea vovea. 9E leiro ofae eavai vei kavaiape ei? Peroveta vita ei? Alōva! ara ero o mō la moi, Peroveta karu foromai la sapataita vita reha. 10Are vei o mō ukōpe vita reha,

Mapaia, ara arave meu ave omopa voa itapi,

Are ave otiharo la ave omopa voa lei kekese leiti roi.#Mala 3:1

11Okofa ara ero o la moi, Uamori ve ére voa mi ape karu foromai voa Ioane Bapatiso Vita ve rovaea la sapataita karu aea forerai kasirau. Etau farakeka, kauri ve basileia voa aite kofa meita lea vita, are sa Ioane ve rovaea la sapatai. 12Ioane Bapatiso Vita ve soa itiiti faitora kauri ve basileia irori mai vei heafo lei, irori karu ta arero ovi aierai vei seseōvai vovea.#Luk 16:16 13Ipi soa Ioane sa forerōpe soa, peroveta karu ve o aea Mose ve Safu O ita ve ipi kauri ve basileia vei; 14aea e lea o la mapai haikaeai oria, koti o oita Elia eite Ioane reha.#Mala 4:5; Mat 17:10–13; Mak 9:11–13 15Karu mapaita ōvauta ita oria, lea o la mapaia.

16Mea taotao karu vei ara lekōru la topiari seseōvai roi? Ere usoso karikara pisiri voa havōu avi leitita atutemori fefeare, ere itai firu la isa moita poporu o mōfeare:

17Ela e vei mioho fōfōaita, a—, e‐oia kasirau;

ela tepe savoita, a—, e fi a’ ovororo sisapaia kasirau.

18Ipi Ioane larietau avoha lei, uaina lari auke ita forerōpe; a—, ereve o meha, Are harisu maealolo ia. 19Karu ve Atute foreri, larietau ma ita larō vovo mea, a—, ereve o meha, Larietau uaina rauapo ita laloita lealea vita meha, takis karu aea iri kaiae karu ita ve moraitai. A—, Ualare ve haiovoro ve okofa la kakeva leita karu sa muia vovea.

Sukaerereai auke karikara karikara

(Luka 10:13–15)

20Aite are areve haihava leita etau rauapo la ere voa leiape lea karikara karikara la o haiiri ōpe, ipi ere haiiri kerori auke eavia. 21Korasini e, ahai‐e a vei! Betesaida e, ahai‐e a vei! ipi euka voa leivota lea siahu etau etau Turo aea Sidono ita voa leitit’ oria, ereukave karu pute puta mopa mopa a’, afutae voa ava ava a’, haiiri evera kerori lare.#Isa 23:1–18; Esek 26:1—28:26; Ioe 3:4–8; Amos 1:9–10; Seka 9:2–4 22Ara eukaro o mō la moi, Seseōvi tava miaraita sare voa Turo ita Sidono ita kaiae ve tava pasoa ovai roi, a—, e kaiae ve tava pasou ovai roi. 23A ta reha, Kaperanauma e, a kauri voa moravi patai roi ei? Kakaeite, aro mearovaeka ve hiairi voa sukavutea faukai roi. Ipi a voa leivota lea siahu etau etau Sodoma voa leitit’ oria, lea karikara itiiti iso sare voa aisesei lare.#Isa 14:13–15; Gen 19:24–28 24Ara aro o mō la moi, Seseōvi tava miaraita sare voa Sodoma ve otioti kaiae ve tava pasoa ovai roi, a—, a kaiae ve tava pasou ovai roi.#Mat 10:15; Luk 10:12

25Lea mea Iesu o mō moipe, Oa, kauri ita mearovaeka ita ve Papuvita e, ara aro maeati ipi a mea etau la haiore ita haiiri pisasa ita karu voa arorisa laisisea, a—, erero haiiri tero karu la muiai. 26Oa e, okofa ipi a sa maeaforoe leiti haikaeaita mai reha.

27Etau foromai la arave Oa sa araro miōri laisisea. Karu farakeka aea Atute ve eite kofa la ore kasirau, a—, Oa sa haria; aea karu farakeka aea Oa ve eite kofa ta ore kasirau, a—, Atute sa haria, aeata Atute sa Oa la muiai haikaeaita lea karu ta reha.#Ion 3:35; 4:18; 10:15

28Araro tai kotiria, heafo rovaea leita karu e, aea etau pasou la taiovaita karu e, aea ara ero lei haiorai roi. 29Eve avea‐ipi voa arave tola la miavai haikaeaia aea arave mai la satiriōri ore leitia, ipi ara haimafu aea haiiri‐ipi, aea e eve ove vei haiorai soa la ovai roi.#Iere 6:16 30Ipi arave tola taiovaita heafo kao, aea ara taiovai vei miaraita etau pasoa.

Currently Selected:

Mataio 11: TQO1983

Highlight

Copy