Luka 7

Maola kapena vita ve sarufa karu

(Mataio 8:5–13)

1Soka areve ovoro foromai la karu sa mapai vei mei mei kaleipe soa ve aite voa, are Kaperanauma voa isei oropōpe. 2Oropi, maola kapena vita aea ve sarufa, are haikakare rovaea leiape vita, eka lei opai vei leipe. 3Lea kapena vita Iesu ve fari la mapi, are Iuda opasora‐sora la Iesu tai itapi, are koti areve sarufa karu la lei makuri leiti vei loki leipe. 4Ere Iesu tai foreri, arero loki lei taupi mō ōpe, Are karu lareva, a mea etau are vei leitita haura; 5ipi are ereitave toruipi la haikaea vovea, aea mea karikara ve sunako uvi la lei turōpe vita reha. 6Lō mei, Iesu ere ita fareho au terōpe. Te are uvi haekao voa forerōpe soa, lea maola kapena vita maeapavora karu hea la arero tai ata itapi mō ōpe, Papuvita e, heafo levi leitia, ipi ara usoso kasirau, a arave uvi voa oropai vei, 7ara ta lareva kao arave elore maea sa aro tai forerai vei. A—, o sa haria mei, arave sarufa vita la lōri lei lareva eapo leiti vei. 8Ipi papukoru hea ta arave arori voa ia, aeata arave ipi voa maola karu hea ta ia; ara karu farakeka aea la mō aritōva, Teraia, are terai roi; aeata karu aea la, Koti o moita soa, are ta koti roi; aea arave sarufa karu aea la mō aritōva, Mea la leitia, aea are leiti roi. 9Soka Iesu lea o la mapi, are vei haihava lei, aiterori a’, arero aitetei roroaiape karu sitavu la mō ōpe, Ara ero o mō la auai, ara Israela karu voa mōfeare sukaerereaita haiiri la eavai sore. 10Soka lea meu karu sa maola kapena vita ve uvi voa ata keroripe lea mea, ere areve sarufa vita eka kaleipe la eavōpe.

Iesu opōpe karu la lei makuri leipe

11Soa taheka aite voa are karikara aea rare Naini voa isaipe, areve satiriaraita karu aea karu sitavu are ita farehoria. 12Karikara otiape voa haekao leipe soa, karu hea opōpe karu aea la taiovi koti forerōpe, ua vitōva aea ve atute farakeka. Karikara karu sitavu rovaea lea ua vitōva ita farehoria kotipe. 13Koti, Papuvita arero ofae eavōpe soa voa are arero maeaforoe lei mō ōpe, Fi hopa levi aria. 14Are te sofa posa la mai sa paea, posa la taiovi roroaiape karu sukatei pōvi, are mō ōpe, Harokou e, ara aro o mō la auai, Itoia. 15Lō mei opōpe vita itei laua sukōvi, Iesu arero areve lou la ata miarōpe. 16Soka karu foromai tore rovaea lei, Ualare la maeati mō ōpe, Peroveta vita rovaea ereitave aru voa foreraita meha, o aeata, Ualare sa areve karu tai foreri mea. 17Soka lea leipe mai ve fari Iudea foromai aeata eakoa toepōpe mea foromai voa fafarapōpe.

Ioane Bapatiso Vita ve horahora

(Mataio 11:2–6)

18Soka Ioane ve satiriaraita karu lea etau foromai ve fari arero omoipe. 19Lea mea Ioane areve satiriaraita karu oraka la isa, ereukaro Papuvita tai itapi lalasi lei mōri moi vei, Lea forerai vei o oita vita a meha ei, ō ela karu aea la tai roi ei? 20Soka lea karu oraka kei Iesu tai foreri mō ōpe, Elakaro Ioane Bapatiso Vita sa aro tai itapi mō auai, Lea forerai vei o oita vita a meha ei, ō ela karu aea la tai roi ei? 21Lea soa kofa voa Iesu karu rauapo ve maea eka maea paika aea harisu maealolo sa toaiape karu ita la lei lareva lei, ofae kuku karu rauapo ve ofae ta lei ovava lei vovo meiape. 22Meme are ereukaro tava o mō ōpe, Auka isei euka sa ofae eovi mapaipeta mea fari Ioane la moia: ofae kuku karu ve ofae ovava lei, mora pui karu mora kerori, pokea eka karu ovava lei, ōvasuru karu o mapi, opai karu la lei itei, karu merava Ovoro Lareva ta la mapaipea.#Isa 35:5–6; 61:1 23Aea ara vei horahora auke leita lea karu lareva ia.

Iesu ve marase o Ioane Bapatiso Vita vei

(Mataio 11:7–19)

24Soka Ioane ve meu karu oraka sa ata isaipe soa ve aite voa, Iesu karu sitavu la Ioane vei laua mō sukavōpe, E furuka merava voa lekōru la ofae ruri vei kavaiape ei? Mea sa toa miava‐miava arita sirivo ei? 25E leiro ofae eavai vei maria voa kavaiape ei? Puta mafumafu lareva sa mopaiape vita ei? Kakaeite, puta sosorusosoru mopi larietau tapare lareva la laloita lea karu, ere harofave karu ve uvi voa pepea vovea. 26Soka e leiro ofae eavai vei kavaiape ei? Peroveta vita ei? Alōva’! ara ero o mō la auai, Peroveta karu foromai la sapataita vita reha. 27Are vei o mō ukōpe vita reha,

Mapaia, ara arave meu ave omopa voa itapi,

are ave otiharo la ave omopa voa lei kekese leiti roi.#Mala 3:1

28Ara ero o mō la auai, Uamori ve ére voa mi ape karu foromai voa Ioane ve rovaea la sapataita vita aea kasirau; etau farakeka, Ualare ve basileia voa aite kofa meita lea karu, are sa Ioane ve rovaea la sapatai.

29Karu foromai aea takis karu ita lea o la mapōpe soa, ere Ualare ve leita mai vei haura o ōpe reha, ipi Ioane sa erero bapatiso leiape eavia.#Mat 21:32; Luk 3:12 30A—, Farisea karu aea Safu Karoro ore karu ita Ioane ve bapatiso la haiarara lei, Ualare sa haikaeaita mai la lōri sukavuteaiape.

31Iesu ata mō ōpe, Mea taotao karu vei ara lekōru la topiari seseōvai roi, aea ere ita usoso etau larelekōru? 32Ere usoso karikara pisiri voa havōu avi leitita atutemori fefeare, ere itai firu la isa moita poporu o mōfeare:

Ela e vei mioho fōfōaita, a—, e e‐oia kasirau,

ela tepe savoita, a—, e fi a’ ovororo sisapaia kasirau.

33Ipi Ioane Bapatiso Vita larietau avoha lei, uaina lari auke ita forerōpe, a—, eve o meha, Are harisu maealolo ia. 34A—, Karu ve Atute foreri, larietau ma ita larō vovo mea, a—, eve o meha, Larietau uaina rauapo ita laloita lealea vita meha, takis karu aea iri kaiae karu ita ve moraitai. 35A—, Ualare ve haiovoro ve okofa la kakeva leita karu foromai sa haria ore leititore.

Iesu Simona Farisea karu ve uvi voa

36Soka Farisea karu aea larietau are ita fareho lari vei lalasi leipe. Lei, are te lea Farisea karu ve uvi voa oropi larietau lari vei avōpe. 37Soka lea karikara voa ua aea peiape, are saruka ua. Are Iesu larietau lari vei Farisea karu ve uvi voa aiseseiape lea fari la mapōpe soa, are tapare muforoe sa soōpe fave kōku‐uto la ovi iti,#Mat 26:7; Mak 14:3; Ion 12:3 38areve aite koti eakoa mora ipi voa seseari ovororo ita pavōpe. Are areve mora la areve ovororo ma sa uka, areve haro‐tui sa areve mora la roroapi arara lei, mora la evera sisi, tapare muforoe sa turaiape. 39Soka arero larietau lari vei isōpe lea Farisea karu, are lōfeare mai la ofae eavōpe soa, are areve elore haiiri voa mō ōpe, Mea vita are peroveta karu kofa oria, arero mai paeaipeta mea ua ve eite la ore leiti lare, ipi are saruka ua.

40Lea mea Iesu arero mō moipe, Simona e, ara o aro eapo moita leafeare? Lō mei are tava o mō ōpe, Papuvita e, o lekōru? 41Soka are mō ōpe, Pisoso karu aea voa karu orakoria abitorea lei, karu aea kina 500 ovōpe, karu aea fifty. 42Ereuka auka tava arero ata miarai vei usoso auke leipe; soka are ereukave abitorea la au sasukōpe. Ereuka voa arero leisa haikakare rovaea leiti roi? 43Simona tava o mō ōpe, Arave haiiri abitorea rovaea la sasukōpe lea vita varo. Iesu arero mō ōpe, A sa seseōvaita lea haiiri haura.

44Aite are lea ua tai eakoa, Simona la mō ōpe, A mea ua la ofae eavai ei? Ara ave uvi voa oropaita soa, a ma arave mora la maukai vei miarai kasirau, a—, are arave mora oraka la areve ovororo ma sa uka areve haro‐tui sa roroapi arara loi. 45A araro ta evera sisi kasirau, a—, ara oropaita soa itiiti faitora are arave mora oraka la evera la sisipea paraeaia kasirau. 46A arave harofave ta teoru sa veveti kasirau, a—, are arave mora oraka la tapare muforoe sa veveti. 47Lea vei ara aro o mō la auai, areve kaiae, lea kaiae rauapo sasuka mutapaita reha, ipi are sa haikakare rovaea leipeta eavia. A—, areve kaiae farafarapo la sasuka mutapaita lea vita, are haikakare seika lei vovea. 48Lea mea Iesu lea ōvu la mō ōpe, Ave iri kaiae la sasuka mutapaita reha.

49Lea mea are ita fareho larietau posa voa aipepeiape lea karu ere elore elore evera‐iri laua mō sukavōpe, Iri kaiae la sasuka mutapaipeta mea vita leisa? 50A—, Iesu lea ōvu la mō ōpe, Ave sukaerereaita haiiri sa aro lei makuri loita meha; eapo tairu ita teraia.

Currently Selected:

Luka 7: TQO1983

Highlight

Copy