Luka 22

Iesu la paeai laua

(Mataio 26:1–5; Mareko 14:1–2; Ioane 11:45–53)

1Soka Fefesi auke Faloa ve Sosoka haekao leipe, lea Sosoka ve rare Foapaita Sosoka reha.#Eso 12:1–27 2Lea mea maso harofave karu aea Safu Karoro ore karu ita Iesu la paeai vei otiharo eliape; ipi ere karu la tore leipe eavia.

3Lea soa Satani are Iudasi Isakariota ve iri voa oropōpe; lea vita are ta twelve karu farakeka aea reha. 4Soka Iudasi te maso harofave karu aea Maso Uvi ve papukoru ita laua sukavōpe, are sa Iesu la kivaia lei erero miarai vei. 5Ere hailareva lei, tava moni arero miarai vei otoare ōpe. 6Are ta haiiri farakeka lei, usoso leita soa vei au taiape, karu sitavu auke soa voa arero kivaia lei miarai vei.

Foapaita Sosoka la kekese leita tivi

(Mataio 26:17–25; Mareko 14:12–21; Ioane 13:21–30)

7Soka Fefesi auke Faloa ve Sosoka ve sare forerōpe, Foapaita mamoe mere la savaita lea sare. 8Lea mea Iesu are Petero auka Ioane ita la itapi mō ōpe, Euka te Foapaita Sosoka ve etau la ereita vei pisosi kekese leitia, ereita lari vei. 9Ereuka arero mō ōpe, Elaka leiti vei a sa haikaeaipeta oti leavoa? 10Are ereukaro mō ōpe, Mapaia, euka karikara voa oropaita soa, ma posu la taiovi meita vita eukaro sukaeai roi. Sukaea are oropaita lea uvi iri voa arero aitetaia. 11Aea euka uvi ve papuvita la o mōri moia, Satiriaraita Papuvita o mō auai, Sariva karu ve lalava leavoa, ara arave satiriaraita karu ita Foapaita Sosoka la lōvoa lari vei? 12Aea are arori lalava rovaea, avaita oti ta kekese lei eaeipeta la eukaro muiai roi; euka larietau lōvoa pisosia. 13Soka ereuka te, aea are ereukaro moipe lōfeare ereuka sukaeōpe. Sukaea ereuka Foapaita Sosoka ve larietau lei kekese leipe.

Papuvita ve Areto

(Mataio 26:26–30; Mareko 14:22–26; 1 Korinito 11:23–25)

14Ora kofa forerōpe lea mea, are posa voa aposetolo karu ita farehoria avōpe. 15Avi are erero mō ōpe, Arave haikaeaipeta haiiri rovaea meha, e ita fareho mea Foapaita Sosoka la lari ao, aea aite voa hehea lōri leiti vei. 16Ipi ara ero o mō auai, Ara Foapaita Sosoka la ata levi lari roi tetetete areve eite kofa Ualare ve basileia voa forerai roi. 17Lea mea Iesu kōkuveisa la ovi, Ualare la maeatita o mei roroka lei mō ōpe, Mea ovi, e farafarapo lalō puavaia. 18Ipi ara ero o mō la auai, Ara vine opu la ata levi lari roi tetetete Ualare ve basileia forerai ao. 19Aite are faloa la ovi, Ualare la maeatita o mei roroka lei, arero fofi erero miōri, mō ōpe, Arave maea meha [e vei omopa posaseai. Mea mai la araro haikaeai vei leitia. 20Larietau la’ kaleipe, are kōkuveisa ta lōfeare ovi mō ōpe, Mea kōkuveisa ve eite arave ovo sa arita otoare áre, e vei sisapaita lea ovo.]#Iere 31:31–34

21A—, ofae eavaia, araro kivaia lei opai voa miarai vei leipeta vita ve mai arave mai ita fareho posa voa miavi la eaea.#Sal 41:9 22Ipi usoso Ualare sa kekese leita haiiri feare Karu ve Atute opai voa la terai meha, a—, arero kivaia lei opai voa miaraita lea vita vei, ahai‐e! 23Lea mea ere elore elore lalasi leiape ere voa lea mai la leiti vei leipeta karu leisa.

Rovaea kofa karu

24Soka satiriaraita karu ere o serea elore elore ōpe ipi ere voa rovaea kofa vita leisa.#Mat 18:1; Mak 9:34; Luk 9:46 25A—, Iesu erero mō ōpe, Toruipi‐ipi hariaharia ve king karu ere siahu ia ereve basileia voa papukoru leititore, aea ereve harofave karu ta karikara karu sa erero lareva o ari vei haikaeai vovea.#Mat 20:25–27; Mak 10:42–44 26A—, e voa lōfeare levi leitia; a—, e voa rovaeka kofa vita karu áre usoso aitehahaera feare leitia, aea harofave vita ta tivi leita sarufa feare leitia.#Mat 23:11; Mak 9:35 27Ipi rovaea kofa karu leisa, larietau lari vei avaita lea vita, ō sarufa tivi leita lea vita ei? Are larietau posa voa avaita lea vita. A—, ara sa e voa sarufa vita feare lei mea.#Ion 13:12–15

28Araro seseōvi haisora leitia lea soasoa voa ara ita farehoria roroaita karu e reha. 29Usoso arave Oa basileia ve siahu araro miarōpe lōfeare, ara ta lea siahu ero ta miarai roi; 30e arave basileia voa arave posa voa larietau ma ita lari vei, aea e terona voa avi Israela ve toruipi‐ipi twelve la seseōvi tava miarai vei.#Mat 19:28

Petero Iesu la avoa ari roi

(Mataio 26:31–35; Mareko 14:27–31; Ioane 13:36–38)

31Simona e, Simona e, mapaia, Satani are siahu ovai ero foromai la usoso uiti feare totoa seseōvai vei. 32A—, ara a vei loki leitita, a araro sukaerereaita haiiri ave iri voa levi kaleiti vei; a araro tai ata kerorita lea mea, ave maraiosu la haiiri rofo leiti vei kureaia. 33Petero tava o mō ōpe, Papuvita e, ara a ita fareho soa dibura voa aeata opai voa terai vei haiiri kekese. 34A—, Iesu mō ōpe, Petero e, ara aro o mō la auai, kokora vita iso sare fi levi ari roi, tetetete a araro ore lei meita lea vei a soa oroisoria araro avoa ari roi.

35Soka Iesu erero mō ōpe, Ara ero everori moni oroa auke ita aea posea auke ita aea tamaka auke ita maria voa au itapōpe lea mea, e haikaeaita etau hea la topiari maravai kao ei? Ere mō ōpe, Kasirau.#Mat 10:9–10; Mak 6:8–9; Luk 9:3; 10:4 36Are erero mō ōpe, A—, faitora moni oroa ita karu oroa la ovi teraia, aeata posea ta lōfeare. Aea marehaukaita soi auke leita lea karu areve arori puta la itaea lei miōri, moni ovi, soi aea la itaea lei ovaia. 37Ipi ara ero o moi mea ukōpe o ve eite ara voa okofa leiti vei la roi, Arero kaiae leita karu ita fareho topiari mutipe. Ipi ara vei ukōpe lea o okofa la leipea.#Isa 53:12 38Ere mō ōpe, Papuvita e, marehaukaita soi orakoria mele. Are mō ōpe, Kaka isoka.

Iesu Getesemane voa

(Mataio 26:36–46; Mareko 14:32–42)

39Lea mea usoso areve leiape mai feare, are maria voa kei Olive Raepa voa pataipe; areve satiriaraita karu arero aitetaipe. 40Are lea oti voa forera erero mō ōpe, Ualare la loki leitia, ero vuteaita mea voa oai ave. 41Are erero kiripi terōpe soa karu sa fave la toa te iavaita savori ve ára feare, are sukakoka avi mō moipe, 42Oa e, a haikaeai oria, mea kōkuveisa ara voa fareovaia; a—, ara haikaeaipeta lōfeare mai levi leitia, a—, a sa haikaeaipeta lōfeare leitia. 43Lea mea aneru aea kauri voa arero lei rofo leiti vei faukōpe. 44A—, are haieae foromai lei loki taupi, areve orovea fei usoso ovo korukoru feare lei mea voa sisapaiape.

45Are loki lei itei satiriaraita karu tai itipe soa, are ere haisora foromai lei ivutu siseiape la eovi, 46mō ōpe, E ivutu siseipeta ipi levea? Itotea, Ualare la loki leitia, e vuteaita mea voa oai ave.

Iesu la sukaforōpe

(Mataio 26:47–56; Mareko 14:43–50; Ioane 18:3–11)

47Are laua sukavaiape lea soa kofa voa karu sitavu forerōpe reha, Iudasi, twelve karu farakeka ereve omopa voa. Are Iesu la evera sisi vei haekao leipe. 48Lei, Iesu arero mō ōpe, Iudasi e, a Karu ve Atute la evera sisi arero lōri kivaia lei miarai vei ei? 49Areve maeapavora karu ere leiti vei leiape lea etau la ore lei mō ōpe, Papuvita e, ela marehaukaita soi sa toaia ei? 50Lō mei ereve karu farakeka maso harofave vita ve sarufa karu la toa, areve kirori toare la elori fareovōpe. 51A—, Iesu mō ōpe, Soka ata levi leitia. Lō mei are areve kerori la mai sa mopi lei lareva leipe.

52Lea mea Iesu arero sukaforai vei forerōpe maso harofave karu, aea Maso Uvi ve kiva papukoru aea opasora‐sora ita la mō ōpe, E marehaukaita soi aea poti ita koti, ara irori mai ita torea leita karu feare ei? 53Ara sare sare foromai e ita fareho Maso Uvi voa meia lea soasoa, e araro sukaforai vei mai sosoropai sore. Soka mea eve soa, aeata murumuru ve siahu ve soa.#Luk 19:47; 21:37

Petero Iesu la avoa ōpe

(Mataio 26:57–58, 69–75; Mareko 14:53–54, 66–72; Ioane 18:12–18, 25–27)

54Soka ere Iesu la fasi roroka lei, arero maso harofave vita ve uvi voa lariōvi isaipe, Petero ára‐ita aitetei meiape. 55Karu hea uvi iri‐aru‐pisiri oti voa a sukea farehoria aipepeiape; Petero ta koti erero toari avōpe. 56Sarufa mori aea arero a ovava voa ofae eovi, arero fofoisa mō ōpe, Mea vita are ta areve maeapavora. 57A—, are lea o la avoa a’ mō ōpe, Lea mori e, ara arero ore kao. 58Taheka aite voa karu aea ta arero ofae eovi mō ōpe, A ta areve maeapavora farakeka aea. A—, Petero mō ōpe, Lea vita e, ara kasirau. 59Soka ora farakeka feare kaleipe lea mea karu farakeka aea o serea ita mō ōpe, Etakofa, mea vita ta areve maeapavora, ipi are Galilea karu eavia. 60A—, Petero mō ōpe, Lea vita e, a moipeta lea o ve eite ara ore kasirau. Utohoa, are omoiape lea soa kofa voa kokora vita fi ōpe. 61Lea mea Papuvita kerori Petero la ofae fofoisōpe. Fofoisa, Petero Papuvita sa arero moipe mea o la haikaeōpe reha, Kokora vita sa iso sare voa fi ari auke leita soa voa, a soa oroisoria araro ore ita avoa omopa ari roi. 62Soka are maria voa te ovororo sisapi fi kakosa ita ōpe.

Iesu maso harofave vita ve omopa voa

(Mataio 26:59–68; Mareko 14:55–65; Ioane 18:19–24)

63Soka Iesu la fasi kiva leiape lea karu, arero area sa vutea a’, arero teavi sasape. 64Ere areve ofae ta puta sa fasi sasauka, arero toa toa lalasi mō leiape, Peroveta vita e, aro toaipeta karu leisa? 65Ere o maealolo rauapo arero moiape arero lei maeamariti leiti vei.

66Mea ōpōpe soa, Iudea toruipi ve opasora‐sora, maso harofave karu aeata Safu Karoro ore karu ita farehoria kokoruka, ere arero ereve kaunsila ve omopa voa lariōvi mō ōpe, 67A elaro omoia, A Keriso ei? A—, are erero mō ōpe, Ara ero omoita, a—, e levi sukaerereai roi; 68aea ara o ero lalasi leitita, a—, e tava o arero levi moi roi. 69A—, mea soa ve aite voa Karu ve Atute Ualare ve siahu ve mai toare voa avi aiseseava roi. 70Ere foromai mō ōpe, Se! a Ualare ve Atute ei? Are erero mō ōpe, E moita lea o ara reha. 71Ere mō ōpe, Ereita areve kaiae la ore leita karu aea la haikaeaia kao. Ereita areve elore ape o la mapaita meha.

Currently Selected:

Luka 22: TQO1983

Highlight

Copy