Luka 16

Parabole o etauroro la kiva vita maeahahauhahau vei

1Soka are areve satiriaraita karu la mō ōpe, Pisoso karu farakeka areve etauroro la kiva vita ia. Karu hea sa havara paraea arero mō ōpe, Ave etauroro la mea kiva vita sa lō miara lō miara lei vovea. 2Soka are arero isa mō ōpe, Ara a vei mapaia mea fari larelekōru? A sa kiva leita tivi ve o uka kekese leitia, ipi a etauroro la kiva leita tivi aite mai ta levi leiti roi. 3Lō mei lea etauroro la kiva leita vita areve haiiri voa o mō ōpe, Ara leati roi, ipi arave papuvita arave tivi soa la sarapi fareovai vei la roi? Ara mea la forōva ari vei maea rofo kao, aea ara karu la maeaforoe vei loki leitita, a—, ara maeamariti. 4A—, ara leita mai farakeka ore, lea vei ara tivi soa sarapi meita soa karu ereve uvi voa araro maeafukapai roi. 5Soka are areve papuvita ve abitorea karu farafarapo la isa, are omopa vita la lalasi lei mō ōpe, Arave papuvita ve abitorea tava a leafere ovi meitore? 6Are mō ōpe, Teoru kavapu metameta 100 reha. Lo mei are mō ōpe. Ave abitorea pepa ovi avi 50 lavelave ukaia. 7Aite are karu aea la mō ōpe, Ave abitorea tava leafere? Are mō ōpe, Uiti puse 100. Lō mei are arero mō ōpe, Ave abitorea pepa ovi, 80 ukaia.

8Lea mea lea papuvita etauroro la kiva vita ve maeahahauhahau la maeatipe, ipi areve lea haisesera vei. Ipi mearovaeka karu ereve elore soa voa haisesera lei, ovava karu la sapatai vovea.

9Ara ero mō moi, Moni are maealolo ia, a—, arero ovi karu la toaraia moraitaitai leiti vei, ipi moni sa kaleitita soa, lea karu ero maeafukapai roi kaleiti ore auke pepeita otioti voa. 10Etau kaekae voa mai haura leita lea karu, etau metameta voa ta mai haura leiti roi; a—, etau seikako voa mai kaiae leita lea karu, etau rovaeka voa mai kaiae ta leiti roi. 11Soka e moni maealolo voa mai kaiae leitita, a—, pisoso kofa la ave mai voa leisa miavai roi? 12Aea e karu haria ve etauroro la kiva kofa leiti auke leit’ oria, eve elore etau kofa ero leisa miarai roi ei?

Ualare aeata pisoso etau

(Mataio 11:12–13; 5:31–32; Mareko 10:11–12)

13Sarufa karu farakeka papukoru orakoria ve sarufa tivi leitita usoso kao, ipi are farakeka la kaifa lei aea la haikakare ari roi, ō are farakeka la topiari kakeva kofa lei, aea la kōutoavi sukavuteai roi. E Ualare ita moni ita topiari kakeva leitita ore kao.#Mat 6:24

14Farisea karu lea o foromai la mapi, arero area sa vutea ōpe, ipi ere moni la haikaeai rovaea eavia. 15A—, Iesu erero mō ōpe, Karu ve soso voa mai haura o oita karu e reha; a—, eve haiiri kofa Ualare sa ore; ipi karu sa arori voa moravaita lea etau Ualare sa haiarara kofa lei vovea.

16Safu O aea peroveta karu ve o ta siseiape itiiti Ioane sa forerōpe soa; aeata lea soa voa itiiti faitora Ualare ve basileia ve ovoro itoro ō vovea, aea karu foromai sukahoavea lōvoa oropai vei.#Mat 11:12–13 17A—, kauri aea mearovaeka ita veverapi kaleitita mai ore, a—, Safu Karoro ve etau sisikaheka veverapi kaleitita ore kao.#Mat 5:18

18Areve ua la kiripi, aea ua haria la laeaita lea vita arero torea loita reha, aea areve vita la kiripaita ua la laeaita lea vita ta ua torea loita reha.#Mat 5:32; 1 Kor 7:10–11

Parabole o pisoso karu aeata merava karu vei

19Soka pisoso vita farakeka sa peiape; are puta mohari mafu lareva ita mopi, aea sare foromai larietau tapare hailareva ita lape. 20Areve uvi kora utape itai voa merava karu farakeka rare Lasaro sa eaeiape, areve maea siaviri sa foromai leipe. 21Are pisoso vita ve posa voa mutapi sisapaita larietau eloe‐eloe la lari vei haikaeaiape. Ave ta areve siaviri la pepeteai vei kotiape. 22Soka merava karu opi, arero aneru sa ovi Abrahama maea maria voa seseari vipi avōpe. Pisoso vita ta opi, viopōpe. 23Opai oti voa are maea hehea‐hehea‐eite lei, areve ofae moravi, Lasaro sa Abrahama ve maea maria voa seseari aiseseiape la ára‐ita ofae eavōpe. 24Eovi are mō isa moipe, Oa Abrahama e, araro rapi maeaforoe leitia; Lasaro areve mai lakoka ma voa paraea, arave uri la veveti vevekoko leiti vei itapaia, ipi ara mea a‐uri voa hehea‐hehea‐eite leipeta eavia. 25A—, Abrahama mō ōpe, Arave atute e, haikaeaia, a ave makuri ve sare sare voa etau lareva‐lareva ovaiape, aea Lasaro etau maealolo la ovaiape; a—, faitora are mōvoa vovoro lei laipea, a—, a maea hehea ita pea. 26O aeata meha, ereitave aru voa lorara pōkoka rovaea ia, lea vei mōvoa pepeita karu aro tai ufai haikaeaita, a—, ere ufaita ore kasirau, aea lōvoa kiripi elaro tai fosita ta ore kasirau. 27Lea mea are mō ōpe, Oa e, ara aro loki, arero arave oa ve uvi voa itapaia; 28ipi ara maraiosu five ia; are erero kurea satiriarai vei, ere ta mea maea hehea‐hehea‐eite leita oti voa forerai ave. 29A—, Abrahama mō ōpe, Ere Mose ve aeata peroveta karu ve buka ia; ere erero mapi kakeva leiti vei. 30Are mō ōpe, Kao, Abrahama, oa e, karu farakeka opai oti kiripi erero tai forerait’ oria, a—, ere haiiri kerori roi. 31A—, are arero mō ōpe, Ere Mose aea peroveta karu ita la mapi kakeva leiti auke leitita, a—, karu farakeka aea opi ata itoit’ oria, ere levi mapai roi.

Currently Selected:

Luka 16: TQO1983

Highlight

Copy