Ioane 17

Iesu ve loki o areve satiriaraita karu vei

1Iesu o lōri mei, areve ofae moravi kauri voa misilei mō ōpe, Oa e, soa foreraita meha; ave Atute la lei sosorusosoru leitia, Atute ta aro lei sosorusosoru leiti vei. 2Ipi a siahu arero miōri roroka are karu foromai ve harofave vita leiti vei, aea a arero miarōpe lea karu foromai la are sa peita makuri miarai vei. 3Peita makuri meha: ere a Ualare kofa farakeka lea la ore leiti vei, aeata Iesu Keriso, a sa itapōpe lea vita ta reha. 4Ara ave sosorusosoru mearovaeka voa muia, a araro miarōpe lea tivi la ara lei roroka lei la mea. 5Lea vei, Oa e, mearovaeka la pisosi auke leipe lea oarehōva soa voa ara a voa ovōpe lea sosorusosoru la ovi, araro faitora lei sosorusosoru leitia ave omopa voa.

6Mearovaeka voa fari a araro miarōpe lea karu la ara ave rare la satiriōri ore lei roroka. Ere ave karu aea a sa erero araro miarōpe; ere ta ave o la mapi kakeva lei vovo la roroa. 7Faitora ere ore a sa araro miarōpe lea etau foromai a voa forerōpe. 8Ipi a araro miarōpe lea o foromai la ara ta erero miarōpe; aea ere erero ovi, aea ara a voa pea forerōpe, ere lea ta ore kofa, aea a araro itapōpe lea ta ere sukaererea vovo la roroa.

9Ara ere vei loki la leipea; ara mearovaeka vei loki leitia kao. A sa araro miarōpe lea karu vei ara loki la leipea, ipi ere arave karu eavia. 10Arave etau foromai ave etau, aea ave etau ta arave, aea ara ere voa arave sosorusosoru ta muia mea.

11Faitora ara aro tai koti vei la leipea; ara mearovaeka voa ata levi meava roi; a—, mea karu mearovaeka voa seseravi roroava roi. Taivotaita Oa e, ave rare ve siahu sa erero kiva leitia, a araro miarōpe lea rare voa ere farakeka leiti vei, usoso elaka ta farakeka leita lōfeare. 12Ara ere ita farehoria peita soa, a araro miarōpe lea rare ve siahu sa erero kiva lei vovo meitore. Ara erero kiva lei, ereve karu farakeka aea veverapai kasirau, a—, farakeka sa haria, saroroapaita soa ve atute reha. Safu Buka ve o la lei okofa leiti vei.#Sal 41:9; Ion 13:18

13Faitora ara aro tai koti vei la leipea meha. Lei vei ara mearovaeka voa mea etau la o mei ere arave hailareva ereve haiiri voa foromai ovi kekese leiti vei. 14Ara ave o erero miōri roroka lei, aea mearovaeka erero kaifa lei vovea, ipi ere mearovaeka ve karu kao, usoso ara ta mearovaeka ve karu kao. 15Arave loki o mōfeare kao, a erero mearovaeka voa farai vei, a—, ara aro loki a Kaiae Vita voa erero fari lei makuri leiti vei. 16Ere mearovaeka ve karu kao, usoso ara ta mearovaeka ve karu kao. 17Erero okofa sa lei safu lei ovava leitia; ave o okofa reha. 18Usoso a araro mearovaeka voa itapōpe lōfeare, ara ta erero mearovaeka voa itapi la roroa meha. 19Aea ipi ere vei ara arave maea la lei safu loi, erero ta okofa sa lei safu lei ovava leiti vei.

20Ara mea karu vei haria loki leitia kao, a—, ereve o sa lei, araro sukaerereaita lea karu vei ta reha, 21ere foromai farakeka lei puavai vei. Oa e, usoso a arave iri voa aea ara ta ave iri voa lei vovo meita, lōfeare ere ta elakave iri voa lei vovo roroai vei, a sa araro itapōpe, mearovaeka karu lea la lei sukaerereai vei. 22Soka a sa araro miarōpe lea sosorusosoru feare ara erero ta miarai vei, ere farakeka leiti vei usoso elaka ta farakeka leita lōfeare. 23Ara ereve iri voa pea, aea a ta arave iri voa pea; lōfeare vei ere farakeka lei kekese kofa leiti vei. Lea vei mearovaeka ore leiti roi, a araro itapōpe, aea a erero haikakare leititore, usoso a sa araro ta haikakare leita feare.

24Oa e, arave haikaeai meha, a araro miarōpe mea karu, ara peita oti voa ere ara ita fareho lei, ere a sa araro miarōpe lea sosorusosoru la ofae eavai vei; ipi mearovaeka forerai auke leipe soa voa a araro haikakare leiape eavia.

25Oa e, haura leita Ualare, mearovaeka aro ore kao, a—, ara aro ore kofa, aea mea karu ta ore, a sa araro itapōpe. 26Ara ave rare la erero lei ore leipe, aea erero ta lei ore leiti roi, a araro haikakare leita lea haikakare ta ereve iri voa pōvi, aea ara ta ereve iri voa pei vei.

Currently Selected:

Ioane 17: TQO1983

Highlight

Copy