Ioane 15

Parabole o vine aea lakai vei

1Vine eite kofa ara meha, aea vine la kiva leita vita arave Oa reha. 2Ara voa pavaita fare tai auke leitita lakai foromai la, are erero saerea toa fareōva vovea. Fare taita lakai foromai, are sivusi la saerea fareōva vovea ere fare rauapo tai vei. 3E ovava lei kekese ita roroa, ipi ara sa ero satiriaraita lea o vei. 4E ara voa peava, aea ara ta e voa peava roi. Lakai vine voa pavai auke leitita, a—, are haria fare taita usoso auke leita feare, e ta ara voa pavai auke leitita, e ta fare levi tai roi.

5Vine eite ara meha, lakai eite e reha. Are ara voa aea ara are voa pavaita lea karu, fare rauapo tai vovea; ipi e ara voa pavai auke leitita, a—, e etau farakeka aea la levi leiti roi. 6Karu ara voa pavai auke leitita, a—, arero lakai feare sarapi maria voa mutapi fefeopai roi; lōfeare lakai karu sa kokoruka, a voa toapi, a sa sari roi. 7E ara voa pavaita, aea arave o foromai eve iri voa pavaita, a—, e haikaeaita lea etau hariaharia foromai vei loki leitita, a—, lea e vei leiti roi. 8Arave Oa la lei sosorusosoru mōri leiti roi, ipi e sa fare rauapo taita lea vei, aea lōfeare e arave satiriaraita karu leiti roi. 9Usoso Oa sa araro haikakare araita lōfeare, ara ero ta haikakare araitore. Arave haikakare voa pepeava. 10E arave safu o la mapi kakeva lei vovo roroaita, a—, e arave haikakare voa pavai roi, ara ta Oa ve safu o la mapi kakeva lei vovo meita, aea areve haikakare voa pavaita lōfeare.

11Ara mea etau la ero laua sukavaita, arave hailareva e voa leiti vei, aeata eve hailareva foromai kekese leiti vei. 12Arave safu o meha, ara ero haikakare lei vovo meita lōfeare, e ta elore elore haikakare leiti vei.#Ion 13:34; 15:17; 1 Ion 3:23; 2 Ion 5 13Haikakare rovaeka kofa meha, karu areve makuri la areve moraitai‐itai vei miarai vei. 14Ara ero omoita lea etau la e leitita, a—, e arave moraitai‐itai lōri leiti roi. 15Ara ero tivi merava karu rare ata levi aravai roi; ipi tivi merava karu areve papuvita sa leita lea etau ve eite ore kao. A—, ara moraitai rare ero aravaita, ipi ara Oa voa mapi ore leita lea etau foromai, ara ta ero lei ore lei roroka. 16E sa araro haikaea ovai kao, a—, ara sa ero haikaea maravi mea, aea ero o mei e te fare tai vei, aea lea fare ta kaleiti auke ita pepeava roi. Lōfeare voa e sa arave rare vei Oa loki leita lea etau foromai la are ero miarai roi. 17Ara mea safu o ero omoi, e elore elore haikakare leiti vei.

Mearovaeka ve kaifa

18Mearovaeka ero kaifa leitita, a—, mea ore leitia, mearovaeka araro everori kaifa lei vovo mea vovea. 19E mearovaeka ve karu leitita, a—, mearovaeka areve elore karu feare ero haikakare leiti lare; a—, e mearovaeka ve karu kao, ipi ara ero mearovaeka voa haikaea maravaita lea vei, mearovaeka ero kaifa leipeta ipi reha. 20Arave mea o la haikaeaia, tivi karu are areve papuvita ve rovaeka vita kao. Ere araro ivara eokere mai leitita, a—, ere ero ta ivara eokere mai leiti roi. Ere arave o la mapi kakeva lei vovo roroaita, a—, ere eve o ta mapi kakeva lei vovo roroava roi.#Mat 10:24; Luk 6:40; Ion 13:16 21Soka ere arave rare vei lea etau foromai ero leiti roi, ipi ere araro itapōpe Ualare la ore auke leita eavia. 22Ara erero tai koti erero satiriarai auke leitit’ oria, a—, ere kaiae levi ovai lare; a—, faitora ere ereve kaiae la sukavuteai ve tava o kasirau. 23Araro kaifa leita lea karu, arave Oa ta kaifa leititore. 24Karu aea sa leiti auke leita lea peise etau hariaharia la ereve aru voa ara sa leiti auke leitit’ oria, a—, ere kaiae levi ovai lare; a—, ere faitora lea peise etau la ofae eovi eovi, aea ere elaka Oa ita la kaifa lei vovea. 25Lōfeare voa ere ereve Safu Buka voa uka siseita o la lei okofa loita reha; o eite meha, Ere araro auraka kaifa leipe.#Sal 35:19; 69:4

26Toaraita Vita, ara Oa voa ero tai itapai vei leita Vita, Oa voa pea foreraita okofa ve lea Arahoha, are foreraita lea mea, are sa o ara vei moi roi. 27Aea e ta o ara vei moi roi, ipi oarehōva soa itiiti faitora e ara ita farehoria pepeiape aeata laepepea.

Currently Selected:

Ioane 15: TQO1983

Highlight

Copy