Ioane 1

Makuri ve O

1Oarehōva kofa soa voa O sa peiape, aea lea O Ualare ita fareho peiape, aea lea O are Ualare. 2Are oarehōva kofa soa voa Ualare ita fareho peiape. 3Etau etau foromai are voa forerōpe, are voa forerai auke etau aea kasirau. 4Makuri ve eite ta are voa, aea karu ve ovava lea makuri voa. 5Ovava murumuru ve aru voa la haeaipea; a—, murumuru arero ovi aierai sore.

6Ualare sa itapōpe karu farakeka forerōpe, areve rare Ioane.#Mat 3:1; Mak 1:4; Luk 3:1–2 7Are okofa lei moi vei aea ovava ve eite muiai vei kotipe, karu foromai la are sa moiape o vei lei sukaerereai vei. 8Lea ovava are kao, a—, are lea ovava ve eite la omoi vei forerōpe. 9Karu foromai la lei ovava leita lea ovava kofa lea soa mearovaeka voa forerai vei leiape.

10Lea O mearovaeka voa peiape, aea mearovaeka are voa forerōpe, a—, mearovaeka arero ofae eovi ore leiti kao. 11Are areve elore mea voa forerōpe; a—, areve lea elore karu arero maeafukapai kasirau. 12A—, arero maeafukapaiape karu, areve rare la sukaererea vo roroaiape lea karu la are siahu miarōpe ere Ualare ve atutemori leiti vei. 13Lea karu ovo sa lei mi ari kao, aea karu sa haikaea lei mi ari kao, aea sarōva sa haikaea lei mi ari kao; a—, erero Ualare ve haikaeai voa mi ape.

14O ta maeasarōva lei ereitave aru voa peiape, aea ereita areve sosorusosoru la ofae eavaiape, Oa sa miōpe atute farakeka la miaraita lea sosorusosoru feare, haiforoe okofa ita sa soōpe.

15Ioane are vei o mō isa moiape, Ara o ero mōri moiape vita are eite meha, Araro aitetei voa kotipeta lea vita ve rovaea sa araro orapi omopa loita meha, ipi araro mi‐ari auke leipe soa, are evera peiape eavia.

16Areve ovi meita etau rauapo voa, ereita foromai haiforoe leita meru la maravi, meru maea aeata topiari maravi la roroa. 17Ipi Ualare Safu O Mose voa ereita vei miarōpe, a—, haiforoe okofa ita Iesu Keriso voa forerōpe. 18Evera soa itiiti faitora karu aea Ualare la ofae eavai kasirau, a—, Ualare ve Atute farakeka, Oa ve maea maria voa peita lea Vita sa arero mei fafarapi pisiri leipe.

Ioane Bapatiso Vita sa moipe o

(Mataio 3:1–12; Mareko 1:1–8; Luka 3:1–18)

19Soka Ierusalema voa pepeiape Iuda karu ere maso karu hea aea Levi firu karu ita la Ioane tai lalasi mō leiti vei itapōpe, A ita leisa? 20Ioane ve o, are okofa ita aeata horahora auke ita o pisiri mei mō moipe, Ara Keriso kasirau. 21Soka ere arero lalasi ata mō leipe, Aita! a ita leisa? A Elia ei? A—, are tava o mō ōpe, Kao. Ere ata arero lalasi mō leipe, A lea peroveta vita ei? Are tava o mō ōpe, Kao.#Deut 18:15, 18; Mala 4:5 22Soka ere arero mō ōpe, A ita leisa? Ave tava o la ela ovi elaro itapaita karu la o lōri moi vei. Ave haria maea vei a o leafeare moi vei? 23Soka Ioane peroveta Isaia sa evera moipe lea o la ovi tava o mōri moipe: Ara

furuka merava voa i mō la isa moipea,

Papuvita ve otiharo la lei haura leitia.#Isa 40:3

24Lea itapi forerōpe karu hea ere Farisea karu. 25Ere arero lalasi ata lei mō ōpe, A Keriso ō Elia ō lea peroveta vita auke oria, a—, bapatiso leipeta ipi levea? 26Ioane tava o erero mō ōpe, Ara ma sa bapatiso leititore, a—, e ore auke leita vita eve aru voa soi laipea; 27are arave aite voa la kotipea. Lea vita ve tamaka ve éla la felaukeai vei ara lareva kao. 28Lea etau Betania voa leipe, Ioridana ve mai itai voa, Ioane sa bapatiso leiape lea oti voa.

29Aite sare voa are Iesu arero tai forerōpe la ofae eovi mō ōpe, Ofae eavaia, Ualare ve mamoe mere reha, mearovaeka ve iri kaiae la fareōvi mutapai vita. 30Ara ero mōri moia vita eite meha, Arave aite voa kotipeta lea vita ve rovaea sa araro orapi omopa loita meha; ipi araro mi ari auke leipe soa, are evera peiape eavia. 31Ara ta arero ore auke ita, ma sa bapatiso lei vovo mea, ipi arero Israela voa lei pisiri lei muiai vei.

32Soka Ioane o ta pisiri mei mōri moipe, Ara Arahoha sua sa kauri voa faukaita maea feare areve arori voa orea avaita la ofae eavaita. 33Ara arero ore leiti kao, a—, araro ma sa bapatiso leiti vei itapōpe lea Ualare sa araro mō ōpe, A Arahoha fauka areve arori voa orea avaita la ofae eavaita lea vita, Arahoha Lareva sa bapatiso leiti vita reha. 34Soka ara eovi roroka lei aea ara okofa o la moi, Ualare ve Atute meha.

Iesu ve oarehōva satiriaraita karu

35Lea ve aite sare voa Ioane areve satiriaraita karu oraka ita soi pepea, 36Iesu mora teraiape la ofae fofoisa mō ōpe, Ualare ve mamoe mere la ofae eavaia. 37Lea satiriaraita karu oraka are moipe lea o la mapi te Iesu la aitetaipe. 38Soka Iesu aiterori a’ ereukaro arero aitetei roroaiape la ofae eovi mō ōpe, Euka lekōru vei elipea? Ereuka arero mō ōpe, Rabai (lea o ve eite Satiriaraita Papuvita), a leavoa pea? 39Are ereukaro mō ōpe, Koti ofae aura eavai. Lea soa sare sōsi leipe. Soka ereuka te are peiape lea oti la ofae eovi lea sare voa are ita fareho pavōpe.

40Ioane sa moipe o la mapi Iesu la aitetei terōpe karu oraka voa, ereuka aea Anderea, Simona Petero ve marehari reha. 41Are areve paua Simona la utohoa eli sukaea arero mō moipe, Ela Mesia la sukaeaita meha. (Lea o mavitoaita eite Keriso reha.) 42Are arero Iesu tai lariōvi, Iesu arero fofoisa mō ōpe, A Simona, Iona ve atute; a rare Kefasi la aravai roi. (Kefasi aea Petero ve eite farakeka, Raepa Fave.)

43Lea aite sare voa Iesu Galilea voa kavai vei haiiri kekese leipe. Are Filipi la sukaea arero mō ōpe, Araro aitetei kotiria. 44Soka Filipi are Betesaida karu, Anderea auka Petero ita ve karikara karu. 45Filipi te Natanaele la sukaea arero mō ōpe, Ela Mose ve Safu O voa aea peroveta karu ve buka voa ukōpe lea vita la sukaeaita meha, are Iesu, Iosefa ve atute, Nasareta karikara karu. 46Lō mei, Natanaele arero mō ōpe, Etau lareva aea Nasareta voa foreraita ore ei? Filipi arero mō ōpe, Koti, ofae eavaia.

47Iesu are Natanaele arero tai forerōpe la ofae eovi are vei mō ōpe, Israela karu kofa reha; maeahahauhahau aea are voa kasirau. 48Natanaele arero lalasi mō leipe, A araro leafeare ore loi? Iesu tava o arero mō ōpe, Filipi aro isai auke loita soa voa, a haue tola ora voa peita la ara aro eavaita reha. 49Natanaele tava o arero mō ōpe, Rabai e, A Ualare ve Atute, a Israela ve king. 50Iesu tava o arero mō ōpe, Ara o mōri moi, ara aro haue tola ora voa eavaita, a lea vei sukaerereai ei? A lea etau la sapataita etau metameta la aite ofae eavai roi. 51Are arero ta mō ōpe, Okofa ara aro omoi, a kauri la aite ofae eovi, are fapai roi, aea Ualare ve aneru rauapo Karu ve Atute ve arori papatavaia fafukaia leitita la ofae eavai roi.#Gen 28:12

Currently Selected:

Ioane 1: TQO1983

Highlight

Copy