Aposetolo 5

Ananiasi auka Safira ia

1A—, karu aea rare Ananiasi, aeata areve ua Safira ita, hasu la itaea lei miōri, 2areve ua ore ita tava itai elore vei fareōvi, moni itai aea ovi aposetolo karu ve omopa voa miavōpe. 3Miavi Petero lalasi mō leipe, Ananiasi e, Satani ave haiiri voa soaipeta ipi levea, Safu Arahoha Lareva la apeva vuteai vei, aea mea ve tava itai la murufa fareovai vei? 4Mea itaea leiti auke leitia soa, lea mea ave elore etau. Itaea lei miaraia soa ve aite voa lea moni tava ta ave elore etau, a haikaeaita lea mai la leiti vei. Soka a ave haiiri voa mea apeva mai leiti haikaeaipeta ipi levea? A karu la apeva vuteaia kao, a—, a Ualare la apeva vuteaipea. 5Ananiasi lea o la mapōpe lea mea, are putei au opōpe reha. Lea fari la mapōpe karu foromai tore rovaea leipe. 6Soka harokoulese itotea, areve sofa puta sa ilafisa, arero maria voa taiovi te viopōpe.

7Soka ora oroisoria feare ve aite voa, areve ua lea leipe etau haveva ita, iri voa koti oropōpe. 8Lea mea Petero arero lalasi lei mō ōpe, Araro aura moi, euka mea itaea lei miaraia tava moni foromai mōfeare ei? Are arero mō ōpe, A, tava moni foromai lōfeare. 9Lō mei Petero arero mō ōpe, Euka Papuvita ve Arahoha la apeva vuteai vei hai fareho kaeaia ipi levea? Mapaia, ave vita la viopaita lea karu ve mora utape voa soi la popōvai. Ere aro ta maria voa taiovi terai roi. 10Lō mei are Petero ve mora ipi voa utohoa putei au opōpe. Harokoulese oropi arero opōpe la eovi, arero maria voa taiovi, areve vita ve maea maria voa te arero ta viopōpe. 11Lea soa ekalesia karu foromai aeata lea fari la mapaiape karu foromai ita tore foromai rovaea leipe reha.

Siahu ve peise aea haihava leita etau

12Siahu ve peise aea haihava leita etau rauapo aposetolo karu sa leiape karikara karu ve aru voa; aea ere farehoria haiiri farakeka ita Solomono ve pitaka tōvu voa kokoruka vovo roroaiape. 13Ereve karu firu maria voa roroaiape karu hea ere ita fareho kokorukai vei ivara leiti kasirau, etau farakeka karikara karu erero maeatiape; 14aea Papuvita la sukaerereaita karu rauapo kofa, vita ita uamori ita ereve karu firu voa au topiaraiape. 15Ere maea eka karu la karu sa karikara pisiri voa taiovi, erero posa voa aea kite voa miavaiape, ipi Petero mora kerori foapaita soasoa voa areve sare ve ove karu hea voa ovai vei. 16Ierusalema eakoa toepōpe karikara hariaharia voa karu sitavu ta ereve eka karu la taiovi, harisu maeasisiaviri sa toaiape karu la lariōvi kokorukaiape, aea ereve eka foromai la lei lareva au leiape.

Karikara papukoru aposetolo karu la heafo leipe

17A—, maso harofave karu rovaea areve maeapavora karu ita, lea ve eite Sadukea karu firu, hilisi rovaea lei, 18aposetolo karu la mai paea fasi karikara ve dibura uvi voa sasaukōpe. 19Sasauka, faita voa Papuvita ve aneru dibura uvi ve utape la fapi, erero maria voa lariōvi mō ōpe, 20Te Maso Uvi voa soi popōvi, mea makuri áre ve o foromai vei karikara karu la omoia. 21Lea o la mapi, ere Maso Uvi voa sare pataita soa oropi satiriaraiape.

Soka maso harofave vita rovaea aea areve maeapavora karu ita forerōpe lea mea, ere kaunsila karu aea Israela opasora‐sora foromai ita la isa kokorukōpe. Kokoruka ere karu la dibura uvi voa itapōpe aposetolo karu la lariōvi koti vei. 22A—, areve toaraita tivi karu te, ere dibura uvi voa aposetolo karu la eavai auke lei, ata kerori koti kaunsila karu la mō ōpe, 23Ela dibura uvi utape kere sasaukai peita, kiva karu ta utape voa soi pepeita la eavaita, a—, utape fapaita soa ela iri voa karu eavai kasirau. 24Maso Uvi ve kapena aea maso harofave karu ita lea o la mapi haikapekapea lea etau leafeare leitita varo ere horahora leipe. 25A—, karu farakeka koti erero mō ōpe, E dibura uvi voa sasaukaia lea karu ere Maso Uvi voa soi popōvi karikara karu la la satiriaraipea. 26Lō mei Maso Uvi ve kapena vita aea toaraita tivi karu ita te erero lariōvi kotipe, a—, irori mai ita leiti kao, ipi ere tore leipe karikara karu erero fave sa toai ave.

27Ere erero lariōvi kotipe lea mea, ere erero kaunsila karu ve omopa voa vipōpe. Vipi maso harofave vita rovaea erero mō ōpe, 28Ela ero mea rare vei laua taheka aeata levi sukavai vei ero o kere moita, a—, faitora eve satiriaraita o sa Ierusalema voa fafarapi fafarapi, eve haiiri mea vita ve ovo ve tava ela voa lei forerai vei.#Mat 27:25

29A—, Petero aea aposetolo karu ita tava o mō ōpe, Ualare la mapi kakeva leitita lareva; karu la mapi kakeva leitita lareva kao. 30E Iesu la satauro voa vitei paea opōpe soa ve aite voa ereitave papaita ve Ualare arero opai voa fareōvi, 31arero areve mai toare voa moravi, arero lei Harofave Vita aea lei makuri leita Vita leiti vei vipōpe, ipi Israela karu la lei haiiri kerori aea ereve iri kaiae la felaukea mutapai vei. 32Mea etau la ore lei okofa moita karu ela meha, Safu Arahoha Lareva ita farehoria, Ualare sa arero kakeva leita karu la miaraita lea Arahoha.

33Kaunsila karu lea o la mapi kitou foromai lei, erero paeai haikaeōpe. 34A—, Farisea karu farakeka, rare Gamaliele, lea kokorukai ve aru voa itoipe. Are safu o la satiriaraita vita, aea areve rare ta rovaea karu foromai ve aru voa. Are itei, aposetolo karu soa taheka maria voa terai o mei roroka lei, 35kaunsila karu la mō ōpe, Israela karu e, e mea karu la leiti vei leipeta mai haiiri metakao seseōvaia. 36Omopa soa voa, Teudasi itei are harofave karu rovaea o ta mei, karu 400 feare arero tai topiari roroaiape. A—, arero paea opōpe soa arero kakeva leita karu foromai la toa liōvea, areve leita mai ve eite kaleipe reha. 37Areve aite voa, Iudasi, Galilea karu, karu ve rare rare la uka mutiape soa voa itoipe, aea karu sitavu ta arero aitetei roroaiape. A—, arero ta paea opōpe, aea arero kakeva leita karu foromai la toa liōveōpe. 38Lea vei ara ero o mō auai, Mea karu kiripi ere foforoe roroa. Mea satiriaraita o aea mea leita mai ve ipi, karu voa leitit’ oria, are veverapi kaleiti roi; 39a—, areve ipi Ualare voa leitit’ oria, e erero sapataita ore kao. E kiva leitia, e Ualare ita i ari ave.

Soka kaunsila karu arero mapi kakeva leipe. 40Ere aposetolo karu la isa, erero teavi sa’, ere Iesu ve rare vei sukavai vei o kere ita erero o erere a’ erero lōri paraea itapōpe. 41Aposetolo karu lea kaunsila ve kokorukai kiripi terōpe hailareva foromai ita, ipi ere Iesu ve rare vei hehea leipe lea vei. 42Sare foromai voa, Maso Uvi voa aeata karu ve uvi hariaharia voa ere karu la satiriōri, aea Iesu Keriso ve Ovoro Lareva la itoro a’ poitapai kasirau.

Currently Selected:

Aposetolo 5: TQO1983

Highlight

Copy