မဿဲ 17

ယေရှု မျက်နှာက ဘုန်းရောင်ခြေတော် ထွက်ခြင်း

(မာကု ၉:၂-၁၃၊ လုကာ ၉:၂၈-၃၆)

1ခြောက်ရက်ရွန်ရေခါ ယေရှုစာ ပေတရု၊ ယာကုပ် အရာ ယာကုပ်မာညီ ယောဟန်ကို ခေါ်ရို့ တောင်အမြင့်ကြီး တစ်တောင်တို့ တက်လီရေ။ 2ယင်းတောင်ထက်မာ သူရို့ ရှိထက်က ယေရှုမာ မျက်နှာစာ ပြောင်းလှဲလားခလီရေ။ သူ့မာ မျက်နှာစာ နီရောင်ပိုင် တောက်ပြောင်လီရေ အရာ သူ့မာ အဝတ်အစားတိစာ အလင်းပိုင် ဖဖွီးဆဆွ ဖြစ်လားခလီရေ။ 3ယင်းနောက် သူရို့စာ ဗြုန်းခနိုင်းပျင်ရို့ မောရှေန ဧလိယကို ယေရှုနအတူ စကားပြောရို့ မြင်ရကတ်လီရေ။ 4ယင်းခါ ပေတရုစာ ယေရှုကို ပြောလီရေ၊ “အသျှင်၊ အကျွန်ရို့ ဒေ နေရာမာ ဟိကတ်စာ ကောင်းပါရေ။ ကိုယ်တော် အလိုဟိရေဆိုကေ အကျွန် ဒေ နေရာမာ တဲသုံးဆောင် ဆောက်ပါဖို့။ ကိုယ်တော်အတွက် တစ်ဆောင်၊ မောရှေအတွက် တစ်ဆောင် အရာ ဧလိယအတွက် တစ်ဆောင် ဖြစ်ပါရေ။” 5ပေတရု စကားပြောနီတုံးမာ တောက်ပြောင်စာ မိုးရိပ်တစ်ခဲ လာရို့ သူရို့ကို ချုပ်ဘိုက်လီရေ။ အရာ ယင်းမိုးရိပ်အထဲက ဒေပိုင် စကားပြောသံကို ကြားရလီရေ၊ “ဒေသူ ငါ့အချစ်သား ဖြစ်တေ။ ငါ သူ့ကို ကောင်းကောင်း နှစ်သက်တေ။ နင်ရို့ သူ့စကားကို နားထောင်ကတ်။” 6ထိုစကားကို ကြားရို့ တပည့်ရို့စာ ကောင်းကောင်း ကြောက်ပြီးကေ မြေပြင်မာ အပြားဝပ်ကတ်လီရေ။ 7ယင်းခါ ယေရှုစာ လာပြီးကေ သူရို့ကို ကိုင်ရို့ ပြောလီရေ၊ “ထကတ်၊ မကြောက်ကတ်ကေ့။” 8ယေကေလည်း သူရို့စာ အထက်တို့ မော်ကြည့်ကတ်တေခါ ယေရှု တစ်ပါးတည်းကို ပယ်ရို့ အရာတစ်ယောက်ကိုလည်း မမြင်ရကတ်လီဗျာ။ 9သူရို့ တောင်က ဆင်းလာကတ်တေခါ ယေရှုစာ တပည့်သုံးယောက်ကို အာဏာပီးလီရေ၊ “နင်ရို့ တောင်ထက်မာ မြင်ခကတ်စာ အကြောင်းတိကို မနုသသားတော် သီရာက ပြန်ရှင်မထမြောင့် သကြား တစ်ယောက်ဘားမာလည်း မပြောလီကတ်ကေ့။”

10ယင်းခါ သူရို့စာ ယေရှုကို မီးကတ်လီရေ၊ “ခရစ်တော် ကြွမလာခင်အယင်က ဧလိယ ကြွလာရဖို့ ဆိုပြီးကေ ကျမ်းဆရာရို့ ဇာဖို့ ပြောနီကတ်ပါစာလည်း?” 11ယေရှုစာ သူရို့ကို အဖြေပီးလီရေ၊ “ဧလိယ အမှန် ကြွလာဖို့ အရာ ဟိသမျ အားကုံးကို အဆင်သင့် လုပ်ဖို့။ 12ယေကေလည်း ငါ နင်ရို့ကို ပြောရေ၊ ဧလိယ ကြွလာလီရေ အရာ လူရို့စာ သူ့ကို မသိလီကတ်။ လူရို့စာ သူ့ကို ကိုယ်ရို့ စိတ်တချင် ညှဉ်းဆဲလီကတ်တေ။ ယင်းပိုင်တထန် မနုသသားတော်လည်း လူရို့အလက်မာ ဒုက္ခ-ဝေဒနာကို ခံရလိမည်။” 13ယင်းခါ ကိုယ်ရို့ဘားမာ ရီနှစ်မင်္ဂလာပီးသူ ယောဟန် အကြောင်းကို ယေရှု ပြောပြရေဆိုစာကို တပည့်ရို့စာ နားလည်ကတ်လီရေ။

နတ်ဆိုးကိုင်စာ ယောက်ျားသျှေ အကောင်းဖြစ်ခြင်း

(မာကု ၉:၁၄-၂၉၊ လုကာ ၉:၃၇-၄၃)

14ယေရှုန သူ့တပည့်ရို့စာ လူပရိတ်သတ်ရို့တို့ ပြန်လာကတ်တေခါ လူတစ်ယောက် လာရို့ ယေရှု ရှိက ဒူးထောက်ရို့ ပြောလီရေ၊ 15“ဆရာ၊ အကျွန့် သားကို သနားပါ၊ အကြောင်းကား သူစာ ဝက်ရူးနာ စွဲရို့ ကောင်းကောင်း ဒုက္ခ ခံရနီပါရေ။ သူစာ မကြာမကြာ မီးမာ မဟုတ်ကေ ရီမာ ကျပါရေ။ 16အကျွန် သူ့ကို ကိုယ်ဘင် တပည့်ရို့တို့ ယူခလီပါရေ၊ ယေကေလည်း သူရို့ အကောင်း လုပ်ဖို့ မနိုင်လီကတ်ပါ။” 17ယင်းခါ ယေရှုစာ ပြောလီရေ၊ “အိုး မကျုံသူရို့န လမ်းမှားသူရို့! ငါ နင်ရို့နအတူ ဇာမျှရက် နီဖို့သိလည်း? အရာ နင်ရို့ကို ဇာမျှရက် သည်းခံရို့ နီဖို့သိလည်း? နင့် သားကို ငါ့တို့ ယူခ။” 18ယေရှုစာ နတ်ဆိုးကို ဟောက်တေခါ နတ်ဆိုးစာ ယင်းသူခန္ဓာက ထွက်လားခလီရေ အရာ သူစာ ချက်ချင်း ကောင်းလားခလီရေ။

19ယင်းနောက် ယေရှု နူးချင်းတည်း ဟိလီရေခါ တပည့်ရို့စာ သူ့တို့ လာရို့ မီးကတ်လီရေ၊ “အကျွန်ရို့ ဇာဖို့ နတ်ဆိုးကို နှင်ထုတ်ဖို့ မနိုင်လီပါစာလည်း?” 20ယေရှုစာ သူရို့ကို ပြောလီရေ၊ “နင်ရို့မာ ကျုံခြင်းတရား အားနည်းရေအတွက်န မနိုင်လီစာ ဖြစ်တေ။ ငါ နင်ရို့ကို အမှန် ပြောရေ၊ ရဲစိသျှေတစ်စိလှောက် နင်ရို့မာ ကျုံခြင်းတရား ဟိရေဆိုကေ နင်ရို့ ဒေ တောင်ကို၊ ‘ဒေ နေရာက ရွိရို့ ထိုနေရာမာ ကျ’ ဟို့ ပြောရေဆိုကေ ဒေ တောင်စာ ရွိလိမည်။ အရာ နင်ရို့အတွက် မဖြစ်နိုင်စာ တစ်ခုလည်း ဟိလိမည် မဟုတ်။ 21#၁၇:၂၁ ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၂၁-မာ စကားတိ ရွီးရို့ မဟိပါ။ဆုတောင်းခြင်းန အစားရှောင်ခြင်း မပါဘိုင်း ဒေပိုင်ဇတ် နတ်ဆိုးကို တစ်ခုပိုင်လည်း နှင်ထုတ်ရို့ မရ။”

ကိုယ်သီဖို့စာ အကြောင်းကို ဒုတိယခေါက် ပြောပြခြင်း

(မာကု ၉:၃၀-၃၂၊ လုကာ ၉:၄၃-၄၅)

22ယင်းနောက် ဂါလိလဲပြည်နယ်ထဲက ဝင်လားကတ်တေခါ ယေရှုစာ တပည့်ရို့ကို ပြောလီရေ၊ “မနုသသားတော်စာ လူရို့အလက်မာ အဖမ်းခံရလိမည်။ 23လူရို့စာ သူ့ကို အသီသတ်ဘိုက်ကတ်လိမည် အရာ သူစာ သုံးရက်နိမာ သီရာက ပြန်ရှင်ထမြောင့်လိမည်။” ယင်းခါ တပည့်ရို့စာ ကောင်းကောင်း စိတ်ဒုက္ခ ရကတ်လီရေ။

ဝိပဿနာကျောင်းအတွက် ဖန်ဒါပီးခြင်း

24ယင်းနောက် ယေရှုန သူ့တပည့်ရို့စာ ကပေရနောင်မြို့သျှေတို့ ရောက်ကတ်လီရေ။ ယင်းခါ ဝိပဿနာကျောင်းအတွက် ဖန်ဒါကောက်သူရို့စာ ပေတရုတို့ လာရို့ မီးကတ်လီရေ၊ “ကိုယ်ဘင်ရို့မာ ဆရာ ဝိပဿနာကျောင်းမာ ဖန်ဒါမထည့်လော?” 25ယင်းခါ ပေတရုစာ အဖြေပီးလီရေ၊ “ထည့်ပါရေ။”

ယင်းနောက် ပေတရု အိမ်ထဲတို့ ဝင်ရို့ တစ်ခုလည်း မပြောခင်အယင်က ယေရှုစာ သူ့ကို မီးလီရေ၊ “ရှိမုန်၊ နင် ဇာပိုင် မှတ်တေလည်း? ဒေ လောကမာ မင်းရို့စာ အသူရို့က ဖန်ဒါကောက်ကတ်တေလည်း? ကိုယ့်ပြည်သားရို့ကလော မဟုတ်ကေ အခြားပြည်သားရို့ကလော?” 26ပေတရုစာ အဖြေပီးလီရေ၊ “အခြားပြည်သားရို့က ကောက်ကတ်ပါရေ။” ယင်းခါ ယေရှုစာ သူ့ကို ပြောလီရေ၊ “ယင်းပိုင်ဆိုကေ ကိုယ့်ပြည်သားရို့ ဖန်ဒါပီးဖို့ ရွတ်လားခကတ်ပျာကား။ 27ယေကေလည်း ဖန်ဒါကောက်သမားရို့စာ ငါရို့ အကြောင်းန စိတ်မနာရအောင် နင် မြစ်မာ လားရို့ ငါးမျှားခီ။ ပထမဆုံး ကိုက်စာ ငါးပစကို ဖွင့်ရေခါ ငွေသားတန်းကားတစ်ချပ် ရလိမည်။ ယင်းတန်းကားကို ဖန်ဒါကောက်သမားရို့တို့ ယူလားရို့ ငါ့အတွက်န နင့်အတွက် ဖန်ဒါပီးဘိုက်ခီ။”

Currently Selected:

မဿဲ 17: RMZ

Highlight

Copy