လုကာ 19
19
ဇက္ခဲ စိတ်ပြောင်းလှဲခြင်း
1ယေရှုစာ ယေရိခေါမြို့အထဲက ဝင်ရို့ ကြွလီရေ။ 2ယင်းမြို့မာ ဇက္ခဲနာမည်န လူတစ်ယောက် ဟိလီရေ။ သူစာ ဖန်ဒါကောက်သမားဂေါင်း ဖြစ်တေ အရာ သူစာ သူဌေးလည်းသောက် တစ်ယောက် ဖြစ်တေ။ 3ဇက္ခဲစာ ယေရှုဆိုစာ အသူလည်း ဟို့ ကြည့်ဖို့ ကြိုးစားလီရေ၊ ယေကေလည်း သူစာ အရပ်တိုရေအတွက်န အရာ သူ့ရှိက လူပရိတ်သတ် အများကြီး စုရို့ ဟိကတ်လီရေအတွက်န သူစာ ယေရှုကို မမြင်ရလီ။ 4ယင်းအတွက်န သူစာ ယေရှုကို ကြည့်ဖို့အတွက် ရှိတို့ ဗြီးလားရို့ သဖန်းပင်တစ်ပင်မာ တက်လီရေ၊ အကြောင်းကား ယေရှုစာ ယင်းလမ်းကနီရို့ ကြွလာလီရေ။
5ယေရှု ထိုသဖန်းပင်ရင်းတို့ ရောက်တေခါ အထက်တို့ မော်ကြည့်ရို့ ဇက္ခဲကို ခေါ်ချလီရေ၊ “ဇက္ခဲ၊ အယင်အမြန် ဆင်းလာလတ်။ ငါ ဒေနိခါ နင့်အိမ်မာ တည်းဖို့။”
6ဇက္ခဲစာ အပင်ထက်က အယင်အမြန် ဆင်းလာလီရေ။ ယင်းခါ သူစာ ကောင်းကောင်း ပျော်ရို့ ယေရှုကို ကိုယ့်အိမ်တို့ ယူလားခလီရေ။ 7ယင်းသျှင့်ကို မြင်ရို့ အားကုံးသူ မနှစ်သက်ဖြစ်ရို့ ပြောကတ်လီရေ၊ “ဒေသူ လူဆိုးတစ်ယောက် အိမ်မာရာ တည်းရေကား!”
8ဇက္ခဲစာ ကိုယ့်အိမ်မာ ရပ်ရို့ အသျှင်ကို ပြောလီရေ၊ “အသျှင်၊ အကျွန့်မာ ပစ္စည်း-ဥစ္စာ တစ်ဝက်ကို ဆင်းရဲသားရို့ကို လှူလိုက်ပါမည် အရာ အကျွန် အသူ့ကိုမဆို လိမ်စားရို့ ဟိရေဆိုကေ လေးဆတိုင်အောင် ပြန်ပီးလိုက်ပါမည်။”
9ယင်းခါ ယေရှုစာ ပြောလီရေ၊ “ဒေနိခါ ဒေ အိမ်မာ ကယ်တင်ခြင်း ရောက်လာဗျာ၊ အကြောင်းကား ဒေသူလည်းသောက် အာဗြဟံ၏ အမျိုးအနွယ်သား တစ်ယောက် ဖြစ်တေ။ 10ပျောက်လားခသူရို့ကို ရှာဖို့အတွက်န ကယ်တင်ဖို့အတွက် မနုသသားတော် ကြွလာစာ ဖြစ်တေ။”
ကျွန်ဆယ်ယောက် ပုံဥပမာ
(မဿဲ ၂၅:၁၄-၃၀)
11ယင်းခါ ယေရှု ဟိလီစာ နေရာစာ ယေရုရှလင်မြို့န မနီးမဝီး ဟိလီရေ။ သူ့စကားကို နားထောင်ရို့ နီလီကတ်သူရို့စာ ထာဝရဘုရား၏ နိုင်ငံတော် အယင်အမြန် ပေါ်ထွန်းဖို့ဗျာ ဟို့ မှတ်ကတ်လီရေ။ ယင်းအတွက်န ယေရှုစာ သူရို့ကို သွန်သင်ပီးဖို့အတွက် ဒေပိုင် ပုံဥပမာတစ်ခု တင်ပြလီရေ၊ 12“မင်းသားတစ်ယောက်စာ မင်းအရာကို ခံယူရို့ ပြန်လာဖို့အတွက် အဝီးမာဟိစာ ပြည်တစ်ပြည်တို့ ခရီးထွက်လားခလီရေ။ 13သူစာ အခြားပြည်တို့ ခရီးမထွက်ခင်အယင်က ကိုယ့်မာ ကျွန်ဆယ်ယောက်ကို ခေါ်လီရေ အရာ သူရို့ အားကုံးသူကို ငွေသားတန်းကား အချပ်တစ်ရာစီ ပီးရို့ မှာဘိုက်ခလီရေ၊ ‘ငါ ပြန်မလာသကြား ဒေ တန်းကားန စီးပွါးရေး လုပ်လီကတ်။’
14“ယေကေလည်း သူ့ပြည်သားရို့စာ သူ့ကို မုန်းကတ်လီရေ။ ယင်းအတွက်န သူရို့စာ သူ့နောက်က လူရွှတ်ရို့ သတင်းပို့လိုက်လီရေ၊ ‘ဒေလူ အုပ်ချုပ်ဖို့စာကို ငါရို့ မလို။’ 15ယေကေလည်း သူစာ မင်းအရာကို ခံယူရို့ ပြန်လာလီရေ အရာ ငွေသားတန်းကား ပီးဘိုက်ခစာ ကျွန်ဆယ်ယောက်ကို ခေါ်ယူခဖို့အတွက် အာဏာချလီရေ။ အရာ သူစာ စီးပွါးရေး လုပ်ရို့ အသူ ဇာလှောက် အမြတ် ရလီရေလည်းဆိုစာကို မီးကြည့်လီရေ။
16“ပထမ ကျွန်တစ်ယောက်စာ လာရို့ ပြောလီရေ၊ ‘အသျှင်မင်းကြီး၊ အကျွန် ကိုယ်တော်၏ တန်းကားန စီးပွါးရေး လုပ်ရို့ အကျွန့်မာ ဆယ်ဆ အမြတ် ရလီပါရေ။’ 17မင်းစာ သူ့ကို ပြောလီရေ၊ ‘အေး ကောင်းရေ! ကောင်းရေ! နင် ကျွန်ကောင်းတစ်ယောက် ဖြစ်တေ။ နင် တာဝန်အနည်းသျှေကို သစ္စာန ထန်းဆောင်ရေအတွက်န ငါ နင့်ကို မြို့ဆယ်မြို့ကို အုပ်ချုပ်ဖို့အတွက် တာဝန် ပီးရေ။’
18“ဒုတိယ ကျွန်စာ လာရို့ ပြောလီရေ၊ ‘အသျှင်မင်းကြီး၊ အကျွန် ကိုယ်တော်၏ တန်းကားန စီးပွါးရေး လုပ်ရို့ အကျွန့်မာ ငါးဆ အမြတ် ရလီပါရေ။’ 19သူစာ ထိုကျွန်ကို ပြောလီရေ၊ ‘နင်လည်းသောက် မြို့ငါးမြို့ကို အုပ်ချုပ်ဖို့အတွက် တာဝန် ရမည်။’
20“ယင်းနောက် တတိယ ကျွန်စာ လာရို့ ပြောလီရေ၊ ‘အသျှင်မင်းကြီး၊ အကျွန် ကိုယ်တော်၏ တန်းကားကို ပဝါပိုင်းမာ ထုပ်ရို့ ထားလီပါရေ။ 21ကိုယ်တော်စာ ကြမ်းတမ်းသူတစ်ယောက် ဖြစ်တေအတွက်န အကျွန် ကိုယ်တော်ကို ကြောက်လီပါရေ၊ အကြောင်းကား ကိုယ်တော် ကိုယ်စုဆောင်းရို့ မထားစာ ဥစ္စာကို သိမ်းယူပါရေ အရာ မစိုက်ပျိုးစာ အသီးအနှံကို ရိတ်သိမ်းပါရေ။’
22“ယင်းခါ မင်းစာ ပြောလီရေ၊ ‘အဝေး ကျွန်ယုတ်! နင့်စကားန ငါ နင့်ကို တရားစစ်ဆေးဖို့။ ငါ ကြမ်းတမ်းသူတစ်ယောက် ဖြစ်တေအတွက်န ကိုယ်စုဆောင်းရို့ မထားစာ ဥစ္စာကို သိမ်းယူရေ အရာ မစိုက်ပျိုးစာ အသီးအနှံကို ရိတ်သိမ်းရေဆိုစာကို နင်ကား သိရေ! 23ယင်းပိုင်ဆိုကေ နင် ငါ့တန်းကားကို ဇာဖို့ ဘဏ်မာ ထည့်ရို့ မထားလီစာလည်း? ထားလီဖို့ဆိုကေ ငါ ပြန်လာရေခါ တန်းကားအရင်းနအတူ အစီးလည်းသောက် တစ်ဖဲ့ ရလီဖို့။’
24“မင်းစာ ကိုယ့်အနားမာ ရပ်ရို့ ဟိလီသူရို့ကို ပြောလီရေ၊ ‘ဒေသူက ငွေသားတန်းကား အချပ်တစ်ရာကို ယူရို့ ငွေသားတန်းကား အချပ်တစ်ထောင် ဟိသူကို ပီးလိုက်ကတ်။’ 25ယင်းခါ လူရို့စာ မင်းကို ပြောကတ်လီရေ၊ ‘အသျှင်မင်းကြီး၊ ယင်းသူမာကား ငွေသားတန်းကား အချပ်တစ်ထောင် ဟိပါရေ။’
26“မင်းစာ ပြောလီရေ၊ ‘ငါ နင်ရို့ကို ပြောရေ၊ လလုံလောက် ဟိသူကို အရာလည်း ပိုရို့ သွန်ပီးဖို့သိ၊ ယေကေလည်း တစ်ခုလည်း မဟိသူက သူ့မာ ဟိစာတိကိုပင် လုယူဖို့သိ။ 27ယေကေလည်း ငါ့ ရန်သူရို့ကို ခေါ်ယူခရို့ ငါ့ရှိက အသီသတ်ဘိုက်လိုက်၊ အကြောင်းကား သူရို့စာ ငါ့ အုပ်ချုပ်ခြင်းကို ခံယူဖို့ မလိုလီကတ်။’”
ယေရှု ယေရုရှလင်မြို့တို့ ဝင်ခြင်း
(မဿဲ ၂၁:၁-၁၁၊ မာကု ၁၁:၁-၁၁၊ ယောဟန် ၁၂:၁၂-၁၉)
28ထိုစကားတိကို ပြောပြီးရေနောက် ယေရှုစာ တပည့်ရို့ ရှိက ရှိက ယေရုရှလင်မြို့ဖက်တို့ ကြွလီရေ။ 29သူစာ သံလွင်တောင်ခြီရင်းမာဟိစာ ဗက်ဖာဂေရွာန ဗေသနိရွာနားတို့ ရောက်တေခါ ကိုယ့်တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ 30“နင်ရို့ ထိုရှိကဟိစာ ရွာတို့ လားခီကတ်။ နင်ရို့ ယင်းရွာတို့ ဝင်ရေခါ တစ်ယောက်လည်း မစီးဖူးစာ ဝန်ရွက်မြင်းသျှေ တစ်ကောင်ကို ချိုင်ရို့ တွိကတ်လိမည်။ ထိုဝန်ရွက်မြင်းသျှေကို ဖြီရို့ ငါ့တို့ ယူခကတ်။ 31အသူမဆို၊ ‘ယင်းဝန်ရွက်မြင်းသျှေကို ဇာဖို့ ဖြီစာလည်း’ ဟို့ နင်ရို့ကို မီးရေဆိုကေ ‘ဒေ ဝန်ရွက်မြင်းသျှေကို အသျှင် အလိုဟိရေ’ ဟို့ ပြောခကတ်။”
32ရွှတ်လိုက်စာ တပည့်ရို့စာ လားခကတ်တေခါ ယေရှု ပြောပြလိုက်တေအတိုင်း ဟိသမျ အားကုံးကို မြင်ရကတ်လီရေ။ 33သူရို့ ထိုဝန်ရွက်မြင်းသျှေကို ဖြီကတ်တေခါ အပိုင်သျှင်ရို့စာ သူရို့ကို မီးကတ်လီရေ၊ “နင်ရို့ ယင်းဝန်ရွက်မြင်းသျှေကို ဇာဖို့ ဖြီကတ်စာလည်း?”
34သူရို့စာ အဖြေပီးကတ်လီရေ၊ “ဒေ ဝန်ရွက်မြင်းသျှေကို အသျှင် အလို ဟိပါရေ။” 35ယင်းခါ တပည့်ရို့စာ ထိုဝန်ရွက်မြင်းသျှေကို ဖြီရို့ ယေရှုတို့ ယူလာကတ်လီရေ အရာ ထိုဝန်ရွက်မြင်းသျှေထက်မာ ကိုယ်ရို့ ကိုယ်ရုံကို ခင်းရို့ ယေရှုကို ထိုင်စီကတ်လီရေ။ 36ယေရှုစာ ဝန်ရွက်မြင်းသျှေကို စီးရို့ ကြွလီရေခါ လူရို့စာ ကိုယ်ရို့ ကိုယ်ရုံကို လမ်းမာ ခင်းပီးကတ်လီရေ။
37အရာ ယေရှုစာ သံလွင်တောင်က ဆင်းဖို့စာလမ်းတို့ ရောက်လာလီရေ။ ယင်းခါ ယေရှုနအတူ တပည့် အများကြီး ပါကတ်လီရေ။ ထိုတပည့်ရို့စာ ယေရှု လုပ်လီစာ ဟိသမျ အံ့ဩဖွယ် အလုပ်တိကို မြင်ရလီရေအတွက်န ဝမ်းသာပြီးကေ အားန အော်ရို့ ထာဝရဘုရားကို ချီမွမ်းကတ်လီရေ၊
38“အသျှင်၏ နာမည်န ကြွလာစာ မင်း၏ ဘုန်းကြီးပါစီ!
ဂေါင်းခင်ဘုံမာ ငြိမ်းချမ်းခြင်း ဟိပါစီ၊
အရာ ထာဝရဘုရား၏ ဘုန်းကြီးပါစီ!”
39လူကျိုင်ထဲက ဖာရိရှဲအဖွဲ့သား လိုင်းကေယောက်စာ ယေရှုကို ပြောကတ်လီရေ၊ “ဆရာ၊ ကိုယ်ဘင်မာ တပည့်ရို့ကို တိန်းရို့ နီဖို့ ခိုင်းလိုက်ပါ။” 40ယေရှုစာ သူရို့ကို ပြောလီရေ၊ “ငါ ကိုယ်ဘင်ရို့ကို ပြောရေ၊ ဒေသူရို့ တိန်းရို့ နီကတ်တေဆိုကေ ကျောက်လုံးတိ အော်ကတ်လိမည်။”
ယေရုရှလင်မြို့သားရို့အတွက် ဝမ်းနည်းခြင်း
41သူရို့ ယေရုရှလင်မြို့နားတို့ ရောက်ကတ်တေခါ ယေရှုစာ မြို့ကို ကြည့်ရို့ မျက်ရည် ကျလီရေ။ 42သူစာ ပြောလီရေ၊ “အိုး ယေရုရှလင်မြို့သားရို့၊ နင်ရို့ ဒေနိခါ ငြိမ်းချမ်းခြင်း ရဖို့စာလမ်းကို သိလီဖို့ဆိုကေ နင်ရို့အတွက် မင်္ဂလာ ဟိလီဖို့၊ ယေကေလည်း ဒေဂု နင်ရို့ မျက်စိန မမြင်လတ်အောင် ထိုလမ်းစာ နင်ရို့က ကွယ်လားခဗျာ။ 43နင်ရို့မာ ရန်သူရို့ နင်ရို့ လေးဖက်လက်စိမာ အုပ်ထရန် ရန်ရို့ထားဖို့စာ၊ နင်ရို့ကို ဝန်းရို့ထားဖို့စာ အရာ နင်ရို့ကို ဟိသမျ ဖက်က ဖိရို့ထားဖို့စာ အချိန်ရောက်လာလိမည်။ 44သူရို့စာ နင်ရို့န နင်ရို့မာ ဟိသမျ သားသမီးရို့ကို ဖမ်းရို့ မြေပြင်မာ ဖိနင်းကတ်လိမည် အရာ ကျောက်လုံးတစ်လုံးအထက်က တစ်လုံးတင်ရို့ မဟိလတ်အောင် ကျောက်ကူတိကို ဖြိုချကတ်လိမည်၊ အကြောင်းကား ထာဝရဘုရား နင်ရို့ကို ကယ်တင်ဖို့အတွက် ကြွလာလီစာ အချိန်ကို နင်ရို့ မသိလီကတ်။”
ငါ့အိမ်စာ ဆုတောင်းစာ အိမ် ဖြစ်ရဖို့
(မဿဲ ၂၁:၁၂-၁၇၊ မာကု ၁၁:၁၂-၁၉၊ ယောဟန် ၂:၁၃-၂၂)
45ယင်းနောက် ယေရှုစာ ဝိပဿနာကျောင်းမာ ဝင်ရို့ ကုန်သေရို့ကို နှင်ထုတ်လီရေ။ 46သူစာ ထိုကုန်သေရို့ကို ပြောလီရေ၊ “ကျမ်းစာမာ ရွီးရို့ ဟိရေ၊ ‘ငါ့အိမ်စာ ဆုတောင်းစာအိမ် ဖြစ်ရဖို့။’ ယေကေလည်း နင်ရို့စာ ထာဝရဘုရား၏ အိမ်ကို ဒါးမြအိမ်ပိုင် လုပ်ထားကတ်တေ!”
47ယေရှုစာ နိတိုင်း ဝိပဿနာကျောင်းတို့ ကြွရို့ သွန်သင်ပီးရို့ နီလီရေ။ ယဇ်ပုရောဟိတ်အကြီးရို့၊ ကျမ်းဆရာရို့ အရာ ယုဒလူမျိုး ဂေါင်းဆောင်ရို့စာ ယေရှုကို အသီသတ်ဖို့ အခွင့်ရေး ရှာကတ်လီရေ၊ 48ယေကေလည်း သူ့ကို ဇာပိုင်ပျင်ရို့ အသီသတ်ဖို့လည်းဆိုစာကို သူရို့စာ တစ်ခုပိုင်လည်း အခွင့်ရေး မရကတ်လီ၊ အကြောင်းကား လူရို့စာ ယေရှု ပြောစာစကားတိကို စိတ်ဝင်စားပြီးကေ နားထောင်ရို့ နီကတ်လီရေ။
Currently Selected:
လုကာ 19: RMZ
Highlight
Share
Copy
Want to have your highlights saved across all your devices? Sign up or sign in
©2023 Wycliffe Bible Translators, Inc.
