Mǒhtûlû̌hǎhtûsa 19

Cǒmara tûjû̌pwa̤ cî̌htò̌pî̌kè Wî̤̌sǐdû kû̌ Wî̤̌gamû̌ra

1Bǎ lṳmṳ̌hǎlò̤ akhanu, mǒkhû̌tanaphû̌ sò̌ginǐ̤ hètǒ̤ bǎ Wî̤̌sǐdû, bǎnukha Phalòtǎ hǎnòò̌ bǎ wî̤̌takhadû̌ htunu. Bǎ a kè̌shǐ tanaphû̌nu sò̌ginǐ̤ akha, tôplǎnô̤̌ a ihtǒ khlè̌cû̌kè̌shǔ asî, dě a dô̌gînîlò̤ dǒ hǎkhû̌ bǎ asî lô̤mô̤̌nu. 2Dě Phalòtǎ hî̌ kû̌, “Ǒ he běcǎ sî, khòsǎdô cû̌ ô̌ kû̌lǎ dǒ he hǐnu. Cû̌cǔbò lô̌khô sîcǔkhò̌lôpô̤̌ dě hǎmôô̌ kû̌ he bǒo tôsa. Dě ihtǒcû̌ wǐ̤sò sělě sô̌ sîklè̌ htû̌ pewô̤pě nî̌꤮.”

Bǎbǎkǎlè tanaphû̌ tokhlǒ hî̌shǔ lû̌û kû̌, “Anǐ̤pwǎ, khò̌tasa dě pa hǎmôô̌ tû̌ bǎ wî̤̌klǎmakû nupě.”

3Bǎbǎkǎlè Phalòtǎ kaǎ kudǔdǔ asî akhû̌akhî, gutṳ̌kò dě asî gû̌ge kû̌kè dǒ ahǐ. Dě Phalòtǎ tîwî̌tòwò bǎ asî lǎ̤ǎlǎ̤ô. A shû̌ǎ bǎ asî mû̌ shôdô ta̤bû dě asî ǎ lô̌khô.#Hebrǔ 13:2 4Bǎ shǐtèmè̤ nusò̌ginǐ̤ hǎmôô̌ khôtô̤̌ akhanu, lǒ̤bò pwa̤khû phû̌sǎsǎ, pwa̤khû mǒ̤pwǎ̤pwǎ̤ ô̌ bǎ Wî̤̌sǐdûkû nutokhlǒ hèô̌ te̤we̤ bò lô̌khô Phalòtǎ ahǐ. 5Dě asî kaǎgǔ lô̌khô Phalòtǎ kû̌, “Pa sî̌ganǎ̤ kû̌ khò̌tôhǎ shǐtèmè̤ pwa̤khû hèhǎmôô̌ kû̌ nahǐ sò̌ginǐ̤ yahî̌, asî ô̌ lô̌khô bǎtè? Kaǎhtò̌bǎ pa dǒ akhlonu, pa sǎyṳ hǎmôô̌, lò̤wě̤ kû̌ asî.”#Pwa̤jètôta̤ 19:22-24

6Phalòtǎ hǎhtò̌shǔ asî dǒ hǐkhlo dě a htǒbǐ tîkhî takhadû̌ dǒ akò. 7Dě a hî̌ asî kû̌, “Ǒ sû̌khôsî, ma̤ tǎ̤ lô̌khô ta̤phû̌mò̤̌shǐhtô pô̤̌nu tokhlǒ tǎ̤mǎ̤! 8Dǒ hǐdǒkûnu hephû̌ pwa̤mǒ̤ ô̌ sò̌ginǐ̤ dě asî hǎmôô̌ bǎ kû̌ pwa̤khû tôpwǎ̤꤮ khôtô̤̌. He kaǎhtò̌ bǎ sî dě sî sǎyṳ ma̤ asî pwǐtètè̌꤮ bǎbǎ, tûlû̌ ma̤ lô̌khô tûû̌. Bǎbǎkǎlè shǐtèmè̤ nusò̌ginǐ̤ nî̌ ma̤ tǎ̤ asî tôcǒ tǎ̤mǎ̤ nî̌꤮. Ma̤titèhî̌dě asî htû he shǐtèmè̤ dě he bǎ takaǐ asî pwǎ.” Phalòtǎ hî̌ asî pô̤̌nu.

9Phalòtǎ hî̌ asî pô̤̌nu bǎbǎ asî hî̌shǔ lû̌û kû̌, “Cû̌tephe mò̌ pa klè̌! Na mî̌ doshû̌phû̌ tôpwa̤ pwǎ, na hèô̌kû̌ shǐtèmè̤ tôpwa̤ bǎ pawî̤̌kûnu pwǎ dě, ma̤hî̌tè na sǎyṳhtû pwa̤cî̌htò̌ta̤ tôpwa̤ dǒ pakhû̌ ya? Pa ma̤phû̌mò̤̌shǐhtô khlo na kû̌ kòyò nusò̌ginǐ̤ pě,” dě asî shò̌ tîkhîkè Phalòtǎ dě a tidǐhè dǒ lô̤mô̤̌ dě a glè̌ depò̌ lô̌khô takhadû̌.

10Bǎbǎkǎlè tanaphû̌ nusò̌ginǐ̤ yṳ̂̌htò̌ acǔde dǒ akhlo dě a cǐnṳ̌kè Phalòtǎ dǒ hǐdǒkû dě a htǒbǐkè takhadû̌. 11Pô̤̌khô asî gǔ kè̌shǐjò pe takhakû tô̤̌ ayanu, tanaphû̌ ma̤khǐ bò Wî̤̌sǐdûphû̌ pwa̤khû adû̌dû̌ apî̌tî̌tî̌ ô̌ bǎ takhahtu nutokhlǒ amǐ̤sǎ.#Khwǐ ginǐ̤bǎ tôbǎ 6:18

12Tanaphû̌ nusò̌ginǐ̤ gwè̌ Phalòtǎ kû̌, “Bǎ wî̤̌kûnu nakhlinalè, namò̤̌, naphû̌pwa̤khû tô̤̌mî̌ naphû̌pwa̤mǒ̤ ô̌ pe tokhlǒkhlǒ ya? A kè̌ ô̌ hî̌dě khònò̤̌ no hǎhtò̌cû̌ tephekèbò mò̌ asî dǒ wî̤̌khlonu. 13Ma̤titèhî̌dě pa glè̌ cî̌htò̌ ma̤pî̌kè wî̤̌ hǒtîwî̤̌ hǒ. Wî̤̌sǐdûphû̌ tokhlǒ ma̤ta̤ nî̌ aphû̌mò̤̌ jî̌jî̌, dě kòyò yî̤̌kǒyî̤̌sa no cî̌htò̌ Cǒmara tûjû̌pwa̤nu a ganǎ̤de hǒ dě a sûhè pa dǒ pa gǔ cî̌htò̌ ma̤pî̌kèbò wî̤̌ hǒtîwî̤̌ hǒ.”

14Pô̤̌nudě Phalòtǎ hǎhtò̌cû̌ shôbǐǐlṳ̌ bǎ amasî dǒ a hè ǎmě hto kû̌ aphû̌pwa̤mǒ̤sî tokhlǒ kû̌, “Ma̤phwèmò̌ dě hǎhtò̌cû̌ tephe phwèkèmò̌ lô̌khô kû̌ wî̤̌ hǒtîwî̤̌. Ma̤titèhî̌dě Cǒmara tûjû̌pwa̤ glè̌ cî̌htò̌ ma̤pî̌kè bò wî̤̌ hǒtîwî̤̌ hǒ,” Bǎbǎkǎlè amasî tokhlǒ shò̌tò̤̌pwǎ kû̌ a hî̌bǎ lò̤wě̤ asî pwǎ.

15Bǎ lṳmṳ̌khǐ pepwǎ akhanu, tanaphû̌ nusò̌ginǐ̤ hî̌shosho Phalòtǎ kû̌, “Ma̤phwèmò̌! Kaǎnǐ̤mò̌ nama kû̌ naphû̌pwa̤mǒ̤nu sò̌ginǐ̤ dě hǎhtò̌cû̌ phwèmò̌! Na kè̌ hǎhtò̌khlè̌ mò̌ tô̤̌ mî̌, hî̌pě Cǒmara tûjû̌pwa̤ cî̌htò̌si bò sî kû̌ wî̤̌kûphû̌ nutokhlǒ hè̌.”

16Phalòtǎ ma̤htǒma̤yo bǎ lû̌û akhû̌akhî, tanaphû̌ nusò̌ginǐ̤ cǐcû̌nṳ̌ Phalòtǎ kû̌ ama kû̌ aphû̌pwa̤mǒ̤ sò̌ginǐ̤ acǔde dě a kaǎhtò̌cû̌ tephekè asî dǒ wî̤̌khlo, ma̤titèhî̌dě Cǒmara tûjû̌pwa̤ sǎyṳgwèbǎǐ lû̌û akhû̌akhî a kaǎhtò̌cû̌ kè asî.#Petarǔ ginǐ̤bǎ tôbǎ 2:7 17Tanaphû̌ tokhlǒ kaǎ hǎhtò̌ asî dǒ wî̤̌khlo dě tanaphû̌ nusò̌ginǐ̤ akla tôpwa̤ hî̌ asî kû̌, “Khlè̌hǎplǎ tûû̌ mò̌ sînǎ̤, kè̌tîkhî tǎ̤mǎ̤ nî̌꤮. Cû̌ ô̌kǔ tǎ̤ dǒ khôdûkhû̌ tǎ̤mǎ̤ nî̌꤮. Tûlû̌ khlè̌htò̌ dǒ khôlôkhû̌nu. Tô̤̌mî̌ sî gǔ si bò kû̌ wî̤̌phû̌ nutokhlǒ pě.”

18Bǎbǎkǎlè Phalòtǎ hî̌shǔ asî kû̌, “Ǒ he Běcǎ sî, khòsǎdô no cû̌yî̤ pû tǎ̤ pa tǎ̤mǎ̤ nî̌. 19Na ma̤wô̌ dû̌wî̤ mî̌ca ta̤ dǒ heya hǒ, na gwèbǎǐ he dě na ma̤hǎplǎ he hǒhǒ, bǎbǎkǎlè he khlè̌htò̌tǒ̤ bò̌ pe dǒ khôlôkhû̌ tô̤̌. Bǎ he khlè̌htò̌tǒ̤ dǒ khôlôkhû̌ khôtô̤̌ akhanu, ta̤pî̌ta̤lṳ̂̌ gǔ lò̤bǎlǎ he pě dě he gǔ sikè pě. 20Kè̌mò̌! wî̤̌ phû̌pî̌tî̌ ô̌ dǒ nutîwî̤̌ dě a yî̤pe bǎ tô̤̌. No khlè̌cû̌ ô̌ pa bǎnu nî̌, wî̤̌ pî̌tî̌ pwǎ yahî̌? Dě he glè̌ hǎplǎ pě.” Phalòtǎ hî̌ pô̤̌nu.

21Dě a hî̌shǔ lû̌û kû̌, “O, awô̌ gutṳ̌, he sǎphlǒ tôtǐ kû̌ pô̤̌ na hî̌nu wî̤̌phû̌ dǒ na hî̌ nutôwî̤̌, he cî̌htò̌ pe a tô̤̌. 22Ma̤phwè mò̌ dě khlè̌cû̌phwèmò̌ lô̌khô bǎnu. Sî kè̌ cû̌tǒ̤ dǒ wî̤̌ nutîwî̤̌ khôtô̤̌ mî̌, he ma̤jò ta̤ tôcǒ tô̤̌.” Wî̤̌ nutîwî̤̌ kòyò kaǎ kû̌ Wî̤̌sûra. (Sûra amṳ̂asǎmî̌ pî̌tî̌.)

23Bǎ Phalòtǎ cû̌tǒ̤ dǒ Wî̤̌sûra akhanu, lṳmṳ̌ htò̌ hǒ. 24Hǒtôplǎ dě Cǒmara tûjû̌pwa̤ no julò̤ ya̤sû̌bû kû̌ mî̌ dǒ mǒkhû̌ dě a lò̤tě̤u gè̌bò Wî̤̌sǐdû kû̌ Wî̤̌gamû̌ra.#Matè̌ 10:15, 11:23-24; Lǔka 10:12, 17:29; Petarǔ ginǐ̤bǎ tôbǎ 2:6; Yǔda 1:7 25A cî̌htò̌ ma̤pî̌kè bòmǔte̤gle wî̤̌nṳ ginǐ̤wî̤̌ kû̌ lǒ̤bò khôdûkhû̌ bǎnu kû̌ lǒ̤bò kòyò ô̌ bǎ wî̤̌kûnu tokhlǒ kû̌ sǒmṳ̌wû̌bô dǒ a phôhtò̌ bǎ gǎ nutôkû lǒ̤꤮ bò. 26Bǎbǎkǎlè Phalòtǎ ama nî̌ akè̌ tîkhî akhû̌akhî, a htûkè îsǎhtǔ.#Lǔka 17:32

27Bǎnutôwô̤ lṳmṳ̌wî̤sò akhanu, PhaAbraha ihtǒ dě a cû̌ sô̌ dǒ a lǎ̤ ihtǒ hî̌bǎshǔ kû̌ Cǒmara tûjû̌pwa̤ gûlǎ̤ nutôkû. 28A kè̌cû̌ tô dǒ Wî̤̌sǐdû kû̌ Wî̤̌gamû̌ra kû̌ lǒ̤bò khôdûkhû̌ nutôkû a ô̌ dě a kè̌shǐ mî̌khǔ toǒhtò̌ lo̤kǎkre bò tô bǎnu tôkû dě asô̌sô̌kû̌ mî̌khǔhtò̌ dǒ kûphǎkû mî̌ca.

29Pô̤̌nudě bǎ Cǒmaradû̌ cî̌htò̌ ma̤hǎpò̌kè wî̤̌ ô̌ dǒ khôdûkhû̌nu ginǐ̤wî̤̌ akha, a gènè̤htò̌bǎ PhaAbraha kwi lû̌ûnu. Bǎ a cî̌htò̌ ma̤pî̌kè wî̤̌ dǒ Phalòtǎ ô̌ ǐnu akha, a kaǎ hǎhtò̌ hǎplǎkè Phalòtǎ dǒ ta̤cî̌htò̌ akû.

Phalòtǎ aphû̌pwa̤mǒ̤ sò̌ginǐ̤ hǎmôô̌ kû̌ apha

30Dǒ anô̌nu, Phalòtǎ ǐsha ô̌ bǎ Wî̤̌sûrakûnu dě a kû̌ aphû̌pwa̤mǒ̤ sò̌ginǐ̤ hǎhtò̌cû̌ ô̌kè lô̌khô dǒ khôlôkhû̌ dě a cû̌ô̌ lô̌khô dǒ khokû tôkû. 31Tôni̤kha, aphû̌pwa̤mǒ̤dû̌ nutôpwa̤ hî̌ apṳ̌ kû̌, “Papha nî̌ a mǒ̤pwǎ̤ hǒ, pô̤̌khô pa gǔ phû̌ô̌ bò̌ aya, bǎ hǎkhû̌nu pwa̤khû dǒ pa lǎ̤phî̌ kû̌ pawṳ̂nu a ô̌ pe tôpwǎ̤꤮ tô̤̌ hǒ. 32Cû̌! pa dǐômṳ papha kû̌ shishǐkhǎ dě pa nṳ̌hǎmôô̌ kû̌ a tǎ! Pa kè̌ ma̤pô̤̌nu tô̤̌mî̌ pakhlipalè gǔ ô̌kè kû̌ a pě.”

33Bǎnutasa dě asî dǐômṳ shôpe̤ lô̌khô apha shishǐkhǎ dě awè̤̌ cû̌nṳ̌ hǎmôô̌ kû̌ apha. Apha ômṳ shôpe̤ tûlû̌ shû̌lě shi akhû̌akhî, aphû̌pwa̤mǒ̤ nṳ̌hǎmôô̌ kû̌ lû̌û bǎbǎkǎlè a sî̌ganǎ̤lò̤ pe anǎ̤ tocǒ꤮ tô̤̌.

34Nô̌kò tôni̤, awè̤̌ hî̌ apṳ̌ kû̌, “Pehǎnô̤̌ he nṳ̌hǎmôô̌ hto kû̌ pha hǒ. Khò̌tôsa dě pa dǐômṳ sô̌ lû̌û shi pě tǎ, dě na cû̌nṳ̌ hǎmôô̌ kû̌ a pě nî̌. Pa kè̌ ma̤ pô̤̌o mî̌ pakhlipalè gǔ ô̌kè tutṳ̌ kû̌ a pě.” 35Pô̤̌nudě bǎnutasa, asî dǐômṳ sô̌ apha shishǐkhǎ dě apṳ̌ nṳ̌hǎmôô̌ kû̌ apha. Apha ômṳ shôpe̤ tûlû̌ shû̌lě shi akhû̌akhî, aphû̌pwa̤mǒ̤ nṳ̌hǎmôô̌ kû̌ lû̌û bǎbǎkǎlè a sî̌ganǎ̤lò̤ pe anǎ̤ tocǒ꤮ tô̤̌.

36Phalòtǎ aphû̌pwa̤mǒ̤ nusò̌ginǐ̤ ma̤ lô̌khô pô̤̌nu akhû̌akhî, asî mǒ̤dohtò̌ lô̌khô kû̌ apha tûû̌. 37Awè̤̌ phû̌ô̌lò̤nṳ̌ phû̌pwa̤khû tôpwa̤ dě a kaǎ lû̌mi̤ kû̌ Khûmò̤̌bǎ, dě lǒ̤bò Mò̤̌bǎ khlilèphû̌ khònò̤̌ htukha tokhlǒ numî̌ akhlialè lò̤tutṳ̌ kû̌ Khûmò̤̌bǎnu hǒ. (Khûmò̤̌bǎ yô̤̌sǎyô̤̌mû mî̌ he nǐ̤bǎ tûû̌ dǒ he pha ô̌.) 38Apṳ̌ dě a phû̌ô̌lò̤nṳ̌ phû̌pwa̤khû tôpwa̤pwa̤. Dě a kaǎ lû̌mi̤ kû̌ Khûběamî̌. Amṳ̂ khlilèphû̌ khònò̤̌ htukha tokhlǒ numî̌ akhlialè lò̤tutṳ̌ kû̌ Khûběamî̌nu hǒ.

Currently Selected:

Mǒhtûlû̌hǎhtûsa 19: KXF

Highlight

Copy