Mǒhtûlû̌hǎhtûsa 13

Khûabra kû̌ aphû̌dû̌ Khûlòtǎ cû̌tephe khô̌kè lû̌û

1Pô̤̌nudě, Khûabra kaǎ nṳ̌ ama kû̌ aphû̌dû̌ Khûlòtǎ dě a tô̤̌nṳ̌bò ata̤dû̌yò̤̌htò̌sa timǐtitè tokhlǒ dě a ô̌ bǎ Ijî̌gǎnu dě a genṳ̌ sô̌ dǒ Khanagǎ gǎcômû tôkhô. 2Khûabra a ta̤mi̤ta̤mò̤̌ tokhlǒ a ô̌ dû̌wî̤ mî̌ca, htokhôtô̤̌ aru mî̌ a ô̌ wô̤̌wô̤̌, ahta mî̌ a ô̌ wô̤̌wô̤̌.

3A ô̌ dǒ Khanagǎ lô̤̌kò nutôkhô dě a cû̌ô̌ tôkû hto tôkû, dě a getîkhî sô̌ dǒ Wî̤̌betelǎ, dǒ awǐkha a cû̌ma̤htò̌ hǐphû̌ bǎ Wî̤̌betelǎ kû̌ Wî̤̌aǐ aplǎkûnu, 4Dě agûlǎ̤ nutûkû mî̌ bǎ alǎ̤ tèhtò̌ma̤htò̌ ta̤lṳhtò̌wǎ̤ kû̌ lǒ̤ nu tûkûhǒ. Dě a cabahtò̌ Cǒmara tûjû̌pwa̤ bǎnu.

5Khûlòtǎ dǒ a cû̌cukhacu kû̌ Khûabra pṳ̂̌tûkû tôpwa̤nu, asû̌phû̌ kû̌ pè̤̌, pṳ̂̌panǎ̤ kû̌ hǐphû̌ tokhlǒ mî̌ a ô̌ dû̌wî̤ lîlî. 6Asî sò̌ginǐ̤ gǔ ô̌plǒ lû̌û ayanu, asî ta̤phû̌ta̤wè̤ lǎ̤ǎshǎ agûlǎ̤ pô̌ pe dǒ asîya tô̤̌. Ma̤titèhî̌dě asî ta̤phû̌ta̤wè̤ tokhlǒ ô̌wô̤̌ô̌dû̌htò̌ akhû̌akhî pwǎ. 7Htokhôtô̤̌ pwa̤kè̌ bǎ Khûabra ata̤phû̌ta̤wè̤ tokhlǒ kû̌ pwa̤kè̌ bǎ Khûlòtǎ ata̤phû̌ta̤wè̤ tokhlǒ klǐ hî̌bǎô̌wô̤̌ pô̤̌ lû̌û. Bǎnukha Khanaphû̌ tokhlǒ kû̌ Peresǐphû̌ tokhlǒ mî̌ a ô̌ lô̌khô bǎ gǎkû nunu.

8Dǒ anô̌nu Khûabra hî̌ Khûlòtǎ kû̌, “Dǒ he kû̌ na aplǎkû nubǎbǎ, dǒ pwa̤kè̌ǐ bǎ he ta̤phû̌ta̤wè̤ tokhlǒ kû̌ pwa̤kè̌ǐ bǎ nata̤phû̌ta̤wè̤ tokhlǒ aplǎkû nubǎbǎ, he sǎyṳ nohtûhtò̌ ta̤klǐ tô̤̌, ma̤titèhî̌dě he kû̌ na mî̌ papṳ̌wè̤̌ khlilè bǎ lû̌û pwǎ. 9Ma̤pô̤̌nudě pa cû̌khô̌kè lû̌û tǎ. Lǒ̤bò hǎkhû̌ dǒ na kè̌shǐ a nî̌, na rû̌htò̌ a mî̌ a nǐ̤ pwǎ. Na kè̌ rû̌htò̌ agûlǎ̤ dǒ cǔcôcî̌ tôkhô hî̌dě he cû̌phî̌ bǎ na dǒ cǔtômû tôkhô pě, na kè̌ rû̌htò̌ agûlǎ̤ dǒ cǔtômû tôkhô hî̌dě he phî̌ bǎ na dǒ cǔcôcî̌ tôkhô pě.”

10Khûlòtǎ kè̌ cû̌ alô̤mô̤̌ dǒ Jòda lô̤̌te̤kû tǒ̤dǒ Wî̤̌sûra aklô. Dě akè̌shǐ sî̌ya kû̌ shi wô̌ bǎ lû̌û bǎnu. Dě gûlǎ̤ bǎnutûkû mî̌ awî̤ sô̌sô̌kû̌ Cǒmara tûjû̌pwa̤ awe̤kû, awî̤ sô̌sô̌kû̌ Ijî̌gǎ nu. Awî̤agwǎ pô̤̌numî̌ bǎ Cǒmara tûjû̌pwa̤ cèrò Wî̤̌sǐdû kû̌ Wî̤̌gamû̌ra nò̌khôtô̤̌ akhanu pwǎ.#Mǒhtûlû̌hǎhtûsa 2:10 11Pô̤̌nu akhû̌khî Khûlòtǎ rû̌lǎkè Jòda lô̤̌mǒ̤ kòshǐ lô̤̌te̤kû nutôklô bò̌bò, htodě a hǎhtò̌cû̌kè dǒ lṳmṳ̌htò̌ tôkhô. Pṳ̌wè̤ khlilè nusò̌ginǐ̤, tôpwa̤ tôkûkû a cû̌tephe khô̌kè bò lû̌û. 12Khûabra dě a ô̌kè bǎ Khanagǎkû, bǎbǎkǎlè Khûlòtǎ dě a cû̌ô̌ khô̌kè dǒ wî̤̌ ô̌ dǒ lô̤̌te̤kû nutokhlǒ, dě a cû̌ma̤htò̌ phǔ ahǐphû̌ tokhlǒ dǒ Wî̤̌sǐdû kòshî̌ nutagǎ. 13Bǎnukha Wî̤̌sǐdûphû̌ tokhlǒ asǎphlǒ phû̌mò̌shǐhtô dě a ma̤sǔma̤plě dû̌wî̤ Cǒmara tûjû̌pwa̤.

14Bǎ Khûlòtǎ cû̌khô̌kè hto kû̌ Khûabra akhanu, Cǒmara tûjû̌pwa̤ hî̌ Khûabra kû̌, “Ô̌ bǎ na lǎ̤ô̌ nutôkû dě kè̌tôhtô, kè̌tòlò̤, kô̌lô̤mô̤̌, kè̌tîkhî te̤we̤ kû̌ nanǎ̤nu. 15Dě hǎkhû̌ dǒ lǒ̤bò na kè̌shǐ khònò̤̌ tokhlǒnu, he gǔ ǐ kû̌ na kû̌ naphû̌nali̤ tokhlǒ aya tûjû̌pwa̤ pě.#Pwa̤nophû̌ 7:5 16He gǔ no ô̌dû̌htò̌ naphû̌nali̤ tokhlǒ asô̌sô̌kû̌ hǎkumṳ̌ nu pě. Kòyò tôpwa̤pwa̤ dǒ a dô̌bǎ pè̤̌bò hǎkumṳ̌nu, a dô̌bǎ pè̤̌bò naphû̌nali̤ tokhlǒ pě. 17Cû̌mò̌, cû̌lè te̤we̤bò mò̌ dǒ gǎkûnu, he ǐ kû̌ na pě.”

18Pô̤̌nukhû̌khî, Khûabra htěpò̌cû̌ ahǐphû̌ dě a sǒcû̌ ahǐphû̌ tokhlǒ dě a cû̌ ma̤htò̌phǔ dǒ Khûmè̤mare asǒmṳ̌dû̌ plò̌shǐ gûlǎ̤ bǎ Wî̤̌hebrû nutôkû, dě a tèhtò̌ma̤htò̌ ǐ bǎ Cǒmara tûjû̌pwa̤ aya ta̤lṳhtò̌wǎ̤ kû̌ lǒ̤ bǎnu tôwǎ̤.

Currently Selected:

Mǒhtûlû̌hǎhtûsa 13: KXF

Highlight

Copy