Pwa̤nophû̌ 7
7
Khûsitibe ta̤hî̌bǎ tokhlǒ
1Pwa̤shû̌gǎ ikǒlǒkò adû̌lǒ tôpwa̤ gwè̌ Khûsitibe kû̌, “Pô̤̌khô kòyò nutokhlǒ hî̌ na numî̌, na hî̌ mè̤̌mî̌caca ya?”
2Khûsôtibe dô̌kènè bǎ asî kû̌, “Pṳ̌wè̤̌ mǒ̤pha sî ganǎ̤de lô̌khô he hî̌ bǎ sî hǒo! Bǎ papha PhaAbraha cû̌ô̌ dǒ Wî̤̌hara nò̌khôtô̤̌, dě a ô̌pe pwǎ bǎ Mèsûpûtemiya akhanu, Cǒmara dǒ a lǒbe kû̌ ta̤bwǐdû̌sîrîhtû nutôpwa̤ ô̌lṳ̌htò̌ bǎ lû̌û dǒ a lô̤mô̤̌.#Mǒhtûlû̌hǎhtûsa 12:1 3Htodě a hî̌ lû̌û kû̌, ‘bè̌kè nashinagǎ kû̌ nakhlinalè nutokhlǒ dě cû̌gǎ dǒ he gǔ dǔlè̌lṳ̌ nanu pě nî̌.’#Mǒhtûlû̌hǎhtûsa 12:1
4“Pô̤̌nudě PhaAbraha hǎhtò̌cû̌kè bǎ Khaladè̌ gǎkû nudě a hǎhtò̌cû̌ô̌ dǒ Wî̤̌hara. Bǎ apha sihto dě dǒnô̌khîkònu Cǒmara nocû̌ô̌ khô̌pô̤̌ lû̌û dǒ shigǎ bǎ sîô̌ ǐyǎ khònò̤̌ nuhǒ.#Mǒhtûlû̌hǎhtûsa 11:31, 12:4 5Dě Cǒmara ǐlò̤ PhaAbraha hǎkhû̌ tôlǎ̤꤮ khôtô̤̌, bǎ tôsîlî̌phû̌ pwǎnu a ǐ lû̌û khôtô̤̌, bǎbǎkǎlè Cǒmara olò̤ lû̌û kû̌ a gǔ ǐ lû̌û gǎtôgǎ pě. Dě gǎnu, a gǔ htû PhaAbraha kû̌ akhlialè gelò̤ tutṳ̌ nutokhlǒ ashiagǎ pě. Bǎ Cǒmara olò̤ lû̌û yô̤̌nu akhanu, PhaAbraha aphû̌ ô̌ tôpwǎ̤꤮ khôtô̤̌.#Mǒhtûlû̌hǎhtûsa 12:7, 13:15, 15:18, 17:8 6Cǒmara hî̌ PhaAbraha kû̌, ‘nakhli nalè gelò̤ tutṳ̌ tokhlǒnu a gǔ cû̌htû shǐtèmè̤ dǒ gǎ shǐshawa̤ tôgǎ pě, dě asî gǔ cû̌htû jû̌ bǎnu pě, dě kòyò gǔ ma̤jî̌ma̤jû̌ asî anělǐ̤ya̤ akû pě.#Mǒhtûlû̌hǎhtûsa 15:13-14 7Bǎbǎkǎlè he gǔ cî̌htò̌ kòyò dǒ a nohtû asî jû̌ nutokhlǒ pě. Dě dǒnô̌kò pěnu, asî gǔ hǎhtò̌gekè kû̌ gǎbǎnu tôgǎ pě. Dě asî gǔ ge cubucabahtò̌ he dǒ gûlǎ̤ bǒo tûkû pě,’ #Mǒhtûlû̌hǎhtûsa 15:13-14; Hǎplǎge 3:12 Cǒmara hî̌ pô̤̌nu. 8Cǒmara olò̤ ayô̤̌ tômû kû̌ PhaAbraha, dě a ta̤olò̤ a ta̤ma̤mǎnǎ numî̌ PhaAbraha lǎ̤klô ma̤ ta̤dǔsilǐbě#7:8 Cǒmara hî̌bǎhtò̌ PhaAbraha kû̌ a bǎ dǔtṳ̌ aphěkhi. Pô̤̌khô a kû̌ akhlialè gelò̤ tutṳ̌ tokhlǒ gǔ dǔlè̌lṳ̌ kû̌ asî sǎphlǒtô kû̌ Cǒmara a ta̤olò̤ nudě a jûlě̤phî̌yô̤̌ gû̌ma̤ pô̤̌ Cǒmara mǎnǎnu, a bǎ dǔtṳ̌ aphě. Htokhôtô̤̌ pô̤̌khô a gǔ dǔlè̌lṳ̌ lô̌khô kû̌ asî mî̌ Cǒmara a kòyò hǒ ayanu, a bǎ dǔtṳ̌ aphě. Hǒonu hǒ. Dě PhaAbraha dǔtṳ̌ bǎ phû̌pwa̤khû KhûIsè̌ aphě bǎ a ô̌phijǎlò̤ abe asa lǐ̤sô̌ akhanu. PhaIsè̌ ma̤ tutṳ̌ padô̌ a phû̌pwa̤khû Khûya̤kû pô̤̌ apha ma̤nu. Htodě Phaya̤kò ma̤ tutṳ̌ bǎ pô̤̌ a phû̌pwa̤khû shǐsò̌ginǐ̤ pô̤̌nu. Phaya̤kò aphû̌pwa̤khû shǐsò̌ginǐ̤ numî̌ pa khlilè shǐginǐ̤mṳ̌ nutokhlǒ apha tokhlǒ hǒ.#Mǒhtûlû̌hǎhtûsa 17:10-14, 21:2-4, 25:26, 29:31-35:18
9“Phaya̤kò aphû̌pwa̤khû tokhlǒnu, a sǎkhwè̌ tû̌ apṳ̌ Khûyṳ̂tǎ dě asî shaǎcû̌kè lû̌û dǒ a gǔ cû̌htûkè jû̌ dǒ Ijî̌gǎ. Bǎbǎkǎlè Cǒmara ô̌cu kû̌ yǎ.#Mǒhtûlû̌hǎhtûsa 37:11, 28, 39:2,21 10Htodě bǎ a tṳ̌bǎkhòbǎ ta̤pò̤̌ta̤sha akhanu, Cǒmara ma̤hǎplǎ lû̌û pṳ̂̌꤮ taplǎ. Bǎ Khûyṳ̂tǎ cû̌tǒ̤ dǒ Ijî̌gǎ Khwǐpharû lô̤mô̤̌ akhanu, Cǒmara ǐ lû̌û ta̤sî̌ta̤jò̌ kû̌ Khwǐpharû a ta̤kè̌dû̌kè̌pî̌tî̌ khô̌ lû̌û tokhlǒ. Htodě Khwǐpharû nopǒ lû̌û kû̌ Ijî̌gǎ kû̌ ahǐaphò kû̌ ahǐhô sîtokhlǒ.#Mǒhtûlû̌hǎhtûsa 41:39-41
11“Bǎnuakha ta̤ô̌hǎwǐ̤shèwè̤ ô̌htò̌ bǎ Ijî̌gǎ kû̌ bǎ Khanagǎkû dě ta̤jî̌ta̤jû̌dû̌ tokhlǒ ô̌htò̌ tǒ̤dǒ paphipaphu tokhlǒ lǎ̤ǎlǎ̤ô ô̌ pe tô̤̌.#Mǒhtûlû̌hǎhtûsa 42:1,2 12Dě bǎ Phaya̤kò ganǎ̤de kû̌ bǔjû̌ ô̌ dǒ Ijî̌gǎ akhanu, a nocû̌ pwî̤ papha dǒawǐkhanu tokhlǒ shǎǎshǎô bǎ Ijî̌gǎ awǐlǒ taplǎ. 13Asî cû̌hto ginǐ̤plǎ taplǎ akhanu, Khûyṳ̂tǎ dǐsî̌ganǎ̤ asî kû̌ a mî̌ asî pṳ̌ sanǎ̤ dě Khwǐpharû sî̌ganǎ̤ hè kû̌ Khûyṳ̂tǎ apṳ̌awè̤̌, amǒ̤apha tokhlǒ.#Mǒhtûlû̌hǎhtûsa 45:1, 16 14Htodě Khûyṳ̂tǎ noge kaǎ apha Phaya̤kò kû̌ apṳ̌wè̤̌ khlilè lǒ̤꤮bò dǒ Ijî̌gǎkû.#Mǒhtûlû̌hǎhtûsa 45:9,10,17,18 Apṳ̌wè̤̌ khlilè lǒ̤bònu, a ô̌ susô̌tôshi kû̌ sò̌yè̤̌.#Mǒhtûlû̌hǎhtûsa 46:27 15Pô̤̌nudě Phaya̤kò kû̌ aphû̌ali̤ tokhlǒ cû̌ô̌ lô̌khô dǒ Ijî̌gǎ dě a kû̌ papha dǒawǐkhanu tokhlǒ cû̌sibò bǎnu.#Mǒhtûlû̌hǎhtûsa 46:1-7, 49:33 16Asî lṳ̌tṳ̂̌ tokhlǒnu, kòyò phî̌ge a dǒ Wî̤̌shake. Dě kòyò ge lǔǐ asî bǎ PhaAbraha pwî̤ nǎ lṳ̌khû̌ nutûkû. Lṳ̌khû̌ dǒ Wî̤̌shake nu PhaAbraha pwî̤ dǒ Khûhamû aphû̌ sîtokhlǒ a ô̌.#Mǒhtûlû̌hǎhtûsa 23:3-16, 33:19, 50:7-13; Yṳ̂shǔ 24:32
17“Bǎ shěkhǎ phǔhtò̌ kû̌ Cǒmara gǔ ma̤lǒhtò̌behtò̌ a ta̤olò̤wǎ̤lò̤ dǒ a olò̤ hto kû̌ PhaAbraha akhanu, pa kòyò khlilè dǒ a ô̌ dǒ Ijî̌gǎkû tokhlǒnu, sǔ sǔ aô̌wô̤̌htò̌.#Hǎplǎge 1:7,8 18Dǒnô̌kònu, khwǐ dǒ a sî̌ganǎ̤ Khûyṳ̂tǎ awe̤akè tô̤̌ tôpwa̤nu, a htò̌ pǒǐ Ijî̌gǎ.#Hǎplǎge 1:8 19Asǎphlǒ cǒ dǒ pa kòyò khlilè tokhlǒ akhû̌ tô̤̌.#Hǎplǎge 1:10,11 A ma̤jî̌ma̤jû̌ pamǒ̤papha, paphipaphu dǒ awǐnu tokhlǒ. Pô̤̌khô phijǎphû̌ ô̌sa nutokhlǒ gǔ sikè ayanu, a nocû̌ bè̌tephe yî̤kè pa kòyò khlilèphû̌, phû̌ô̌sa tokhlǒ kû̌ hǐ.#Hǎplǎge 1:22
20“Khûmṳ̂shě ô̌phijǎlò̤ tô kû̌ bǎnu akha. A mî̌ phijǎphû̌ dǒ a phatwè̤̌phawî̤ dǒ Cǒmara alô̤mô̤̌ tôpwa̤. Amǒ̤apha kè̌ǐ lû̌û dǒ hǐdǒkû sulalǎ꤮ nô̤̌ pwǎ.#Hǎplǎge 2:2 21Dě bǎ kòyò cû̌bè̌ tephekè a kû̌ hǐ akhanu, Khwǐpharû aphû̌pwa̤mǒ̤ kè̌shǐ lû̌û dě a phî̌ge bǔǐdû̌ lû̌û pô̤̌ aphû̌ kû̌ sanǎ̤ tû̌ tôpwa̤nu.#Hǎplǎge 2:3-10 22Kòyò sû̌ǐ Khûmṳ̂shě kû̌ Ijî̌phû̌ ta̤sî̌ta̤jò̌ pṳ̂̌꤮ tocǒ dě a ta̤hî̌buhî̌bǎ kû̌ a ta̤phî̌ta̤ma̤ tokhlǒnu, a lǒbe kû̌ ta̤sîrîshû̌sho.
23“Aně ô̌ lǐ̤shi akhanu, a bè̌lò̤ asǎphlǒ kû̌ a gǔ cû̌ô̌lè kû̌ akòyò khlilèphû̌ Isôrělaphû̌ tokhlǒ.#Hǎplǎge 2:11-15 24A kè̌shǐ Ijî̌phû̌ tôpwa̤ ma̤numa̤cî̌ Isôrělaphû̌ tôpwa̤ dě a cû̌ ma̤jè̌ Isôrělaphû̌ nutôpwa̤. A ma̤shǔ gesô̌ ata̤lǐ̤ dě Ijî̌phû̌ nutôpwa̤ dě a ma̤sikè lû̌û. 25A gènè̤ kû̌ akòyò khlilèphû̌ tokhlǒ sî̌ganǎ̤ kû̌ Cǒmara gǔ rû̌htò̌ a dǒ a gǔ ma̤hǎplǎge asî dǒ jû̌ alǎ̤ pě bǎbǎkǎlè asî sî̌ganǎ̤ gû̌ lû̌û tô̤̌. 26Nô̌kòtôni̤nu, a kè̌shǐ Isôrělaphû̌ kû̌ Isôrělaphû̌ sò̌ginǐ̤ gǎ kè̌khî sô̌ lû̌û dě a jî̌pwǐ̤ cû̌ ma̤pè̤̌ma̤dû tîkhî bǎ asî dě a hî̌ asî kû̌, ‘ganǎ̤de lô̌khô khô sî, sî kû̌ sî dě sî cû̌ gǎ kè̌khî tǒ̤ lû̌û ma̤titè?’
27“Bǎbǎkǎlè kòyò dǒ a ma̤sǔ akhô Isôrělaphû̌ tôpwa̤nu, a shò̌tephe cû̌kè Khûmṳ̂shě dǒ ahtu dě a hî̌ lû̌û kû̌, ‘mò̌pè tôpwa̤ ǐ na ta̤siwi̤sòwò̤ dǒ na gǔ pǒ pa dě na gǔ cî̌htò̌ pa nuya? 28Na sǎyṳ ma̤sikè he pô̤̌ na ma̤si Ijî̌phû̌ dǒ pahǎnô̤̌ nutôpwa̤ ya?’#Hǎplǎge 2:14 29Bǎ Khûmṳ̂shě ganǎ̤de ta̤hî̌bǎ nutômû akhanu, a hǎhtò̌ khlè̌ cû̌ô̌ kè dǒ Mǐdǐyagǎ pô̤̌ shilǎ̤ gǎkhlophû̌ tôpwa̤, dě a cû̌ phû̌ ô̌nṳ̌ bǎnu sò̌ginǐ̤.#Hǎplǎge 18:3,4
30“Khûmṳ̂shě cû̌ô̌ behtò̌ bǎnu aně lǐ̤shi akha, dǒ Tǐnǎ khôlô kòshî̌, gǎshashigǎ lǒ̤mî̌shô̌kla gûlǎ̤ tûkûnu, mî̌gè̌htò̌ jôjǔ dě mǒkhû̌ tanaphû̌ tôpwa̤ ô̌lṳ̌htò̌ bǎ lû̌û dǒ mî̌kû bǎ a lô̤mô̤̌nu.#Hǎplǎge 3:1-10 31Khûmṳ̂shě kè̌shǐ dě a ǒò̌ kiti̤kaa dě a hèkè̌phǔ tě̤tě̤mè̤̌mè̤̌ lû̌û dě a ganǎ̤de Běcǎ alě̤pwe̤htò̌ kû̌, 32‘He mî̌ na mǒ̤pha phiphu dǒ awǐnu tokhlǒ a Cǒmara. He mî̌ PhaAbraha, PhaIsè̌, Phaya̤kò tokhlǒ a Cǒmara.’#Hǎplǎge 3:6 Khûmṳ̂shě ǐsha gònò̤̌gòglè dě a kè̌bǔ pe tô̤̌.
33“Cǒmara hî̌ pô̤̌ lû̌û kû̌, ‘gûlǎ̤ bǎ na ihtǒô̌ ǐyǎ nutûkû mî̌ hǎkhû̌ dǒ aplò̌ashǐ akhû̌akhî, plûhǎhtò̌kè nakhò̌phěnu.#Hǎplǎge 3:5 34He kòyò khlilèphû̌ khòjî̌khòjû̌ dǒ Ijî̌gǎkû numî̌ he kè̌shǐ hǒ. He ganǎ̤de hto asî ta̤kookasha dě pô̤̌khô he gǔ ma̤hǎplǎge asî ayanu, he hèlò̤ hǒ. Cû̌mò̌ khònò̤̌, he gǔ nocû̌ na dǒ Ijî̌gǎ kû hǒ.’#Hǎplǎge 3:7-8,10
35“Khûmṳ̂shě mî̌ kòyò tôpwa̤ dǒ a Isôrěla khlilèphû̌ wîkè lû̌û kû̌mî̌ ta̤hî̌bǎ tômû dǒ a hî̌ lû̌û kû̌, ‘mò̌pè tôpwa̤ ǐ na ta̤siwi̤sòwò̤ dǒ na gǔ pǒ gǔ cî̌htò̌ pa nuya?’ A hî̌ lû̌û pô̤̌nu. Mǒkhû̌tanaphû̌ ô̌lṳ̌htò̌ bǎ lû̌û dǒ jôjǔkû akhû̌akhî, Cǒmara anǎ̤běcǎ sanǎ̤ nocû̌ lû̌û dǒ a gǔ pǒǐ a kòyò prṳ̂phǎ dě a gǔ ma̤hǎplǎge a kòyò saprṳ̂ tokhlǒ.#Hǎplǎge 2:14 36Dǒ Ijî̌gǎkûnu bǎbǎ, dǒ shilî̤ shidû̌te̤we̤ akûnu bǎbǎ, Khûmṳ̂shě dǒ a kaǎhtò̌gekè Yǔdaphû̌ tokhlǒ dǒ Ijî̌gǎ kû tôpwa̤nu, a ma̤lṳ̌ bǎ asî ta̤ma̤ cô̌klǐcô̌sè tokhlǒ kû̌ ta̤ma̤ ǒò̌ kiti̤kaa tokhlǒ.#Hǎplǎge 7:3 Htokhôtô̤̌ bǎ asî ge dǒ lǒ̤mî̌shô̌kla aně lǐ̤shi akûnu bǎbǎ, a ma̤lṳ̌ bǎ kòyò ta̤cô̌klǐcô̌sè nutokhlǒkhlǒ.#Hǎplǎge 14:21; Cû̌lèmi̤kla 14:33
37“Khûmṳ̂shě mî̌ kòyò dǒ a shôbǐǐlṳ̌ bǎ Isôrěla akhlialè tokhlǒ kû̌, ‘Cǒmara gǔ nohèlò̤ piwi̤pèshè dǒ sîô̌ pô̤̌ a nohè he nu pě, dě a mî̌ sî kòyò khlilèphû̌ tûû̌ pwǎ.’#Dǒhtû̌ǐ 18:15,18 38Khûmṳ̂shě mî̌ kòyò tôpwa̤ dǒ a ô̌cuô̌plǒ wô̤̌wô̤̌ bò kû̌ paphi paphu dǒ lǒ̤mî̌shô̌kla nutôpwa̤ hǒ. A ô̌plǒ kû̌ pa mǒ̤pha phiphu dǒ awǐnu tokhlǒ kû̌ mǒkhû̌ tanaphû̌ dǒ a hî̌bǎ tûû̌ lû̌û dǒ Tǐnǎ khôlô nutôpwa̤ hǒ. Htodě a mî̌ kòyò tôpwa̤ dǒ a nǐ̤bǎ Cǒmara alě̤ayô̤̌ dǒ a htûpwa̤ tokhlǒ dě a ǐlò̤ tutṳ̌ bǎ pa tokhlǒnu hǒ.#Hǎplǎge 19:1-20:17; Dǒhtû̌ǐ 5:1-33
39“Bǎbǎkǎlè pa mǒ̤pha phiphu dǒ awǐnu tokhlǒnu, a ganǎ̤de Khûmṳ̂shě ayô̤̌ tô̤̌. Asî bè̌taphekè lû̌û dě asî gènè̤ sǎyṳ gesô̌ pwǎ dǒ Ijî̌gǎ pwǎ. 40Asî hî̌ Khûmṳ̂shě awè̤̌ KhûArû kû̌, ‘bô̌ bǎ pa Běcǎ tokhlǒ dǒ a gǔpǒ gǔsû cû̌mò̌ pa dǒ alô̤mô̤̌ tokhlǒ! Khûmṳ̂shě dǒ a kaǎge pa dǒ Ijî̌gǎkû tôpwa̤nu, khònò̤̌dě a ma̤kwè̌ anǎ̤ hî̌tènu, pa sî̌ganǎ̤ petô̤̌ hǒ!’#Hǎplǎge 32:1,23 41Htodě bǎnu akha asî bô̌ pṳ̂̌phû̌ yô̤ tôdo dě a lṳhtò̌ lû̌û dě asî sǎlě̤sǎlò̤ ma̤pwè ǐ lû̌û, dě htû̌sò̌htò̌ǐ lô̌khô ta̤ dǒ a ma̤ lô̌khô kû̌ acǔde nutokhlǒ.#Hǎplǎge 32:2-6 42Pô̤̌nudě Cǒmara kǒ khô̌kè asî dě a dǐhtûhtò̌kè asî kû̌ kòyò dǒ a cabahtò̌ lṳmṳ̌, la, shǎ dǒ mǒlǎ̤ tokhlǒ pô̤̌ kòyò wě̤nǎ dǒ piwi̤pèshè tokhlǒ alî̤kûnu dě a hî̌ kû̌,
‘Isôrělaphû̌ sî! Bǎ sî ô̌ dǒ lǒ̤mî̌shô̌kla aně lǐ̤shikû akha, ta̤phû̌ta̤wè̤ dǒ sî ma̤si dě sî lṳhtò̌ tokhlǒ numî̌ sî lṳhtò̌ kû̌ he mè̤̌tô̤̌.#Amṳ̂ 5:25-27 43Ta̤ dǒ sî ò̌cû̌ yǎ numî̌ běcǎ dǒ kòyò kaǎ kû̌ Mṳ̂lǎ ahǐphû̌ kû̌ sîběcǎ dǒ kòyò kaǎ kû̌ Rapha a shǎphû̌ pwǎ. Ta̤nu tokhlǒ mî̌ ta̤yô̤ta̤gî̌ dǒ sî bô̌ kû̌ sî lǎ̤cabahtò̌ aya pwǎ. Pô̤̌nudě he gǔ nocû̌yî̤kè sî dǒ gǎshǐshawa̤ gǎkhlo dǒ ayî̤khlo kû̌ Babǔlûgǎnu pě.’#Amṳ̂ 5:25-27
44“Bǎ pa mǒ̤pha phiphu dǒ awǐnu ô̌pe dǒ lǒ̤mî̌shô̌kla akhanu, asî bô̌htò̌ lô̌khô hǐphû̌dû̌ plò̌shǐ dǒ Cǒmara shôbǐǐlṳ̌ bǎ asî nutômè.#7:44 hǐphû̌dû̌ plò̌shǐ dǒ a dǔlè̌lṳ̌ kû̌ Cǒmara ô̌cu kû̌ asî A bô̌htò̌ pô̤̌ Cǒmara shôbǐǐlṳ̌ hto Khûmṳ̂shě dě a dǔlè̌lṳ̌ hto lû̌û nupwǎ. #Hǎplǎge 25:9,40 45Dǒnô̌kònu pakhli palè tokhlǒ nǐ̤bǎ hǐphû̌ plò̌shî̌ nu dǒ pamǒ̤papha tokhlǒ a ô̌ dě bǎ asî cû̌ kû̌ Khûyṳ̂shǔ akhanu, a phî̌cû̌ ǐ lû̌û. Bǎ a nṳ̌phî̌nṳ̌ gǎ akhanu, asî phî̌nṳ̌ hǐphû̌ plò̌shî̌nu dǒ gǎnutôbǎ akû. Dě Cǒmara wṳ̂̌hǎhtò̌ kè bǎ asî, kòyò khlilèphû̌ ashǔshawa̤ dǒ a ô̌ bǎnu tokhlǒ dě hǐphû̌ phò̌shî̌ nî̌ a ô̌ tǒ̤dǒ Khûdawi̤ htukha.#Yṳ̂shǔ 3:14-17 46Cǒmara sǎphlǒtô kû̌ Khûdawi̤ dě Khûdawi̤ kwisǎyṳ htò̌ lû̌û dǒ a gǔ dǐ bô̌htò̌ lû̌û Phaya̤kò a Cǒmara lǎ̤ô̌hǐ aya tômè.#Shamuěla ginǐ̤bǎ tôbǎ 7:1-16; Lî̤wě̤mǎnǎ awǐlǒ tôbǎ 17:1-14 47Bǎbǎkǎlè kòyò dǒ a ma̤htò̌ bǎ Cǒmara ahǐ tômè numî̌ Phadawi̤ aphû̌khû Khûshò̌lômû pwǎ.#Khwǐ awǐlǒ tôbǎ 6:1-38; Lî̤wě̤mǎnǎ ginǐ̤bǎ tôbǎ 3:1-17
48“Bǎbǎkǎlè Cǒmara dǒ adû̌lǒ nutôpwa̤ ahǐ dǒ kòyò hǎkhû̌phû̌ ma̤ kû̌ acǔde nî̌ a ô̌ lû̌ tô̤̌. Pô̤̌ piwi̤pèshè tôpwa̤ hî̌nǎ kû̌, 49Běcǎ Cǒmara hî̌ kû̌,
‘mǒkhû̌ mî̌ he lǎ̤hǎnòò̌ gûlǎ̤. Hǎkhû̌ mî̌ he khò̌lôpô̤̌ lǎ̤pô̤̌htò̌. Sî glè̌ bô̌htò̌ bǎ he hǐ hî̌tè tocǒya? He lǎ̤ô̌ gûlǎ̤ ô̌ bǎtè tûkûya?#Yashǎya 66:1,2 50Lǒ̤꤮bò hǒtokhlǒ numî̌ he ma̤htûhtò̌ kû̌ henǎ̤ pwǎ mè̤̌tô̤̌ ya?’”#Yashǎya 66:1,2
51Khûsôtibe hî̌ pô̤̌ kû̌, “Sî sǎphlǒ pwǐ̤tiklǐ shû̌lě, sî sǎphlǒnu a asô̌sô̌kû̌ kòyò dǒ a sî̌ganǎ̤ Cǒmara tô̤̌ tokhlǒnu, Cǒmara alě̤ayô̤̌ aya dě sî nò̌kukoo jòjî̌꤮ tô̤̌! Sî gû̌ma̤ sô̌sô̌kû̌ sî mǒ̤pha phiphu dǒ awǐnu tokhlǒ ma̤nu dě sî ma̤dǐdò tě̤tṳ Yôla Plò̌shǐ Běcǎ pṳ̂̌꤮ taplǎ.#Yashǎya 63:10 52Sî mǒ̤pha phiphu dǒ awǐkha tokhlǒnu, a ma̤jî̌ma̤jû̌ bò piwi̤pèshè tokhlǒ pṳ̂̌꤮ taplǎ. Cǒmara a kòyò dǒ a hè shôbǐǐlṳ̌ nǎ bǎ kòyò kû̌ Cǒmara jû̌ cǒtè̤ dǒ a glè̌ hè pě nutôpwa̤ awe̤akè tokhlǒnu, sî mǒ̤pha phiphu tokhlǒ ma̤sikè asî hǒ. Khònò̤̌dě sî shaǎlò̤kè Cǒmara jû̌ cǒtè̤ tôpwa̤ hǒ, htokhôtô̤̌ sî ma̤sikè yǎ hǒ. 53Sî nǐ̤bǎhto Khûmṳ̂shě a ta̤sû̌ta̤tòwò dǒ Cǒmara ǐlò̤ tutṳ̌ kû̌ mǒkhû̌ tanaphû̌ nutokhlǒ bǎbǎkǎlè sî ganǎ̤de lû̌û yô̤̌ tô̤̌,” Khûsôtibe hî̌ pô̤̌nu.
Kòyò wîsi Khûsôtibe kû̌ lǒ̤
54Bǎ kòyò htû ikǒlǒkòdû̌ tokhlǒ ganǎ̤de Khûsôtibe a ta̤hî̌bǎ akhanu, asî sǎphlǒdû̌ dě a kwî lô̌khô a khû̌khi dě akè̌cû̌tô dǒ lû̌û ô̌. 55Bǎbǎkǎlè Khûsôtibe dě, a lǒbe kû̌ Yôla Plò̌shǐ Běcǎ. A kè̌htò̌ dǒ mǒkhû̌ dě a kè̌shǐ Cǒmara ata̤bwǐdû̌sîrîhtû, htokhôtô̤̌ a kè̌shǐ Yeshǔ ihtǒô̌ dǒ Cǒmara a cǔtômû nutôkhô. 56Dě Khûsôtibe hî̌ asî kû̌, “Kè̌mò̌! he kè̌shǐ mǒkhû̌ ô̌môhtò̌ dě Kòyòphû̌khû ihtǒô̌ dǒ Cǒmara a cǔtômû nutôkhô.”
57Hǒtaplǎdě kòyò htû ikǒlǒkòdû̌ tokhlǒ yî̤̌kǒyî̤̌sa dě cûûbǐ lô̌khô anò̌ku kû̌ acǔmṳ̌. Dě taplǎnô̤̌ a hè phwèdǎtrǐ dǒ Khûsôtibe a ô̌. 58Dě asî cî̌hǎhtò̌kè Khûsôtibe dǒ wî̤̌khlo dě wî lû̌û kû̌ lǒ̤. Pwa̤khòlṳ̌ sîtokhlǒ bè̌kè asî jekhlo tokhlǒ dǒ pwa̤khûphû̌sǎ dǒ ami̤ kû̌ Khûsò̌lǔ tôpwa̤ a ô̌ dě a nokè̌ǐ lû̌û.
59Bǎ asî wî Khûsôtibe kû̌ lǒ̤ akha, Khûsôtibe kwicabahtò̌ Běcǎ dě a hî̌ kû̌, “Běcǎ Yeshǔ, phî̌wô̌kè he sǎphlǒ hǒo.” 60A dô̌gînî̤lò̤ dě a yî̤̌kǒhtò̌ kû̌, “Ǒ Běcǎ, plûkè mò̌ asî ta̤sǔ nî̌꤮” A hî̌ htodě a sikè.
Currently Selected:
Pwa̤nophû̌ 7: KXF
Highlight
Share
Copy
Want to have your highlights saved across all your devices? Sign up or sign in
Wycliffe USA
