เห่ขุทวาลู่ 32
32
เพยาโคบ ตี๊หรี่แตแร เต เด๊อ อา เก่ แม๊เถอะฉื่อ เน๊อ อาแหม่ เพเอซาว
1เร๊อ เบ๊อะ เพยาโคบ กา ปาแพ๊ เด๊อ แกล๊ลู เบ๊อะเนอ, จอแปแหร่ดุ อาเตเน่วม๊อขุพู๊ เต๊เห่ แฮแม๊เถอะฉื่อ ลู.#เห่ขุทวาลู่ ๔๘:๑๖ 2เบ๊อะ เพยาโคบ แม๊เถอะ เฮ๊อ เหย่ซี เบ๊อะเนอ, อา เฮ๊ เน๊อ, “เอ๋อ เออ หม่า จอแปแหร่ดุ อาเกลอเบ๊หมู่ดุ อาเหล่โอ่ ว๊า!” ฮู๊เนอเร๊อ อา เอ๊ เร๊อ เหล่โอ่ เบ๊อะเนอ โต๊โผะ อามุย เน๊อ มาหะนาอิม. (มาหะนาอิม อาโหง่แลช๊า หม่า จอแปแหร่ดุ อาเกลอเบ๊หมู่ดุ อาเหล่โอ่ เนอโผะ.)
3เบ๊อะ เหย่ซี โอ่ปา เบ๊อะ มาหะนาอิม เหล่โอ่เออ เบ๊อะเนอ, เพยาโคบ ซูกาเหร่อ เพรซูเตหรี่เตแก เต๊เห่ เด๊อ อาแหม่ เพเอซาว อาโอ่. เบ๊อะเนอเค, เพเอซาว โอ่ เด๊อ เสอีร์โฉ่เกล เอโดมเก่กู เนอโต๊โผะ. 4อา อิซว๊าอี๊แส่ หนิ เหย่ซี เน๊อ, “ซี เบ่ จว๊าเฮ๊ แวแบ่เจ่ เพเอซาว ฮู๊เออ เน๊อ, ‘เนหลู่ คูยาโคบ เฮ๊ ดื่อ เน๊อ, แวจว๊าโอ่ โก๊เล๊ เด๊อ เพลาบัน อาหี่ เร๊อ แว โอ่ เบ๊อะเนอ โต๋ กู๊แหน่ เร๊อ แว กา เฮ๊อ. 5แวปู่เป๊เหน่ เน๊อ แวแมอ๊อแหล่ ซีเต๊เห่, แวซิหมิ เน๊อ เป่ ซีเต๊เห่, แวหลู่เล๊ เพรคู เต๊เห่ เน๊อ เพรเหมาะ ซีเต๊เห่ อา โอ่ ลอปลี เจ๊อ. แซ่ฮู๊ เน เก่ เอ๊โม กาคยาฉื่อ แว อาเงเนอ, กู๊แหน่เออ แว นอกา เด๊อะโลเหร่อ เฮ๊อ เตหรี่เตแก เออ เด๊อ แวแบ่เจ่ อาโอ่ เฮ๊อ,’” อา เฮ๊ ฮู๊เนอ.
6เบ๊อะ เพรซูเตหรี่เตแก เต๊เห่ กาคยาโต่ คยาแซ๊ เด๊อ เพยาโคบ อาโอ่ เบ๊อะเนอ, เหย่ซี เฮ๊ แลแค เน๊อ, “เป จว๊าโต่ โทเฮ๊อ เด๊อ เนแหม่ เพเอซาว อาโอ่ เฮ๊อ, กู๊แหน่เร๊อ อา เน๊อ อาแกแย เด๊อ อาเพรคู ลุยเย เกเร แฮแม๊เถอะฉื่อ เน๊อ เน เฮ๊อ.”
7เพยาโคบ ซิอิเช เร๊อ อาซิปล่อ กู่แก แหน่เจ๊อ. เร๊อ อาแกแย เต๊เห่ เบ่เบ่, อาซิหมิ เน๊อ เป่ เต๊เห่ เบ่เบ่, อาเตมีเตดอ เบ๊หมู่ เต๊เห่ เบ่เบ่, เน๊อ อาตีซิโบดุ เต๊เห่ เบ่เบ่ อา เบโค๊แก ลู เนอหมู่. 8อา เตเน หนื่ออื่อ เกอเร๊อ อาเต เน๊อ, “เพเอซาว เก่ แฮช๊าปย๊า แก ตู๊หมู่ เฮ๊เร๊อ, อา โอ่แก เออตู๊หมู่ เก่ แลเปล๊ แกติ ปา.”
9โทเร๊อ เพยาโคบ กุยจ๊อเบ เน๊อ, “เก๋อ แวโพ เพอับราฮัม เน๊อ แวเพ เพอิสอัค อาจอแปแหร่ดุ, เน หม่า จอแปแหร่ ตูจูเพร เด๊อ อา เฮ๊ แว เน๊อ, ‘กาคยา คยาแซ๊ มอ เด๊อ เนเทอเหน่เก่ เน๊อ เนกลุยเนแล เต๊เห่ อาโอ่เนอ, แว เก่ นอ เอ่เบ่โอโท ดื่อ เน ปา, เน อ๊อแล แว ฮู๊เนอ.’”#เห่ขุทวาลู่ ๓๑:๑๓ 10เบ๊อะ แว จว๊าเบ๊ จอร์แดน แลโหมะ เบ๊อะเนอ, แวเต โอ่ แพ๊ตื๋อ อิแท๊โบ โตโบ แพ๊, หม่าแน๊เรอ กู๊แหน่เออ แว กา เร๊อ แว กา เกอเร๊อเจ๊อ. เน๊อ แวแกแย ปล๊อหมู่ เนอหมู่ เจ๊อ ล๋อ เตโม เด๊อ อาลอเป่แจ่ โต่ เน๊อ เตจ๊อเน๊อโหง่ เด๊อ เน เด๊อะโล เปเฮ๊อ เนหลู่ หม่าเฮ๊อ แว เออเนอ, แว โต พย๊าหนิ เน๊อ เตอเจ๋อ โต่. 11หม่าแน๊เรอ กู๊แหน่เออ, แวแหม่ เพเอซาว เกเร แฮช๊า เฮ๊อ แว, เร๊อ แว ซิอิเช เน๊อ อา เก่ แฮเมเซอลอ แว เน๊อ แวพู๊ ซีเต๊เห่ เน๊อ แวเม ซีเต๊เห่ อาขว่าอาคยา, แด่ทูซิปล่อ เร๊อ เมแลเปล๊ หนิเหร่อ แว นี๊. 12หม่าแน๊เรอ เน เฮ๊ โทเฮ๊อ แว เน๊อ, “แว นอ เอ่เบ่โอโท หม่าแหน่ เน ปา เร๊อ แว เก่ นอ โอ่โหร่โอ่เอ๊ เนกลุยเนลุ๊ย ตากาแล เต๊เห่ แซ่เจ๊อเน๊อ หล่อตาม๊าหมื่อ เด๊อ เทอดุซาวาทือ เร๊อ อู แด๊ลอ เป่ ปา เจ๊อ ลู โต่ ปา.”#เห่ขุทวาลู่ ๒๒:๑๗, ๒๘:๑๓
13อา โอ่ เบ๊อะเนอ เตเซ๋ เตเซ เร๊อ อา นว๊าพย๊าเถ่ โค๊แก เชหยู่ เด๊อ อา เต เออเต๊เห่ อาเกล เด๊อ อา เก่ เด๊อะ เน๊อ อาแหม่ เพเอซาว เชหยู่อาเง. 14เร๊อ อา นว๊าเถ่โค๊ เป่โหมะ อาโด เนอเย เน๊อ เป่เพ อาโด เนอเชอ, ซิหมิโหมะ อาโด เนอเย เน๊อ ซิหมิเพ อาโด เนอเชอ, 15ตีซิโบดุ โหมะ อาโด โซเชอ เน๊อ อาพู๊ปีตี๊ เต๊เห่, ปู่โหมะ อาโด ลุยเชอ เน๊อ ปู่เพ อาโด เช๊อ, แมอ๊อแหล่โหมะ อาโด เนอเชอ เน๊อ แมอ๊อแหล่เพ อาโด เช๊อ, 16อา เบ เตมีเตดอ เนอเต๊เห่ ตู๊หมู่ เน๊อ ตู๊หมู่ โทเร๊อ อา เด๊อะแล แก เด๊อ อาหลู่เล๊ เต๊เห่ อากู๊ยากู เด๊อ อา เก่ แม๊ เกอ เร๊อดื่อ ตู๊หมู่ เน๊อ ตู๊หมู่, เร๊อ อา เฮ๊ เหย่ซี เน๊อ, “จว๊าเหร่อ มอ แลแค เด๊อ แว เป๊เส่เง เร๊อ เตมีเตดอ ตู๊หมู่ เน๊อ ตู๊หมู่ เนอ นอ จว๊า จ่าเจลอ ลู นี๊.”
17อา อิซว๊าอี๊แส่ จว๊าหนิ โป่ แกแย เด๊อ อา ซูกาเหร่อ อู เด๊อเงเล๊อ เนอตู๊หมู่ เตเพร เร๊อ อา เฮ๊ ลู เน๊อ, “เบ๊อะ แวแหม่ เพเอซาว แม๊เถอะ เน เร๊อ อา แด๊เฮอ เน เน๊อ, ‘เน หม่า อูเป แกแย เป? เน เกเร จว๊า โต เบ๊อะเต? ล๋อ เตมีเตดอ กา เด๊อ เนเง เออเต๊เห่ หม่า อูเป เต เป?’ 18อาเก๊ แด๊เฮอ เน ฮู๊เออ เฮ๊เร๊อ เน เบ่ เฮ๊กาคยาฉื่อ ลู เน๊อ, ‘เตมีเตดอ เออ เต๊เห่ หม่า เนหลู่ เพยาโคบ อาเต่ แพ๊. ล๋อ เออ เต๊เห่ เนอหม่า เชหยู่ เหล่เด๊อะ เน๊อ แวแบ่เจ่ เพเอซาว อาเง เร๊อ เพยาโคบ ครวากา เกอ เฮ๊อ เด๊อ เป คยา เนอ เฮ๊อ.’”
19อา อิซว๊าอี๊แส่ หนิเกอ โป่ แกแย เด๊อ อา บ่อกา เตมีเตดอ อาหมู่ เนอเพรเตเพร, โซเพร เตเพร เน๊อ แกแย เด๊อ อาโร เนอ เต๊เห่. เร๊อ อา นอ เฮ๊ เหย่ซี เน๊อ, “เบ๊อะ ซี แม๊เถอะฉื่อ เฮ๊อ เน๊อ เพเอซาว เบ๊อะเนอ, ตูรู๊ เฮ๊แซ่ลอ ลู ฮู๊เนอ นี๋. 20เร๊อ เฮ๊ ตาเตแร๊ แลแค เน๊อ, ‘เนหลู่ เพยาโคบ ครวากา เกอเฮ๊อ เด๊อ เป คยา เออ เฮ๊อ.’” เมเตเฮ๊เร๊อ อา เตเน เกอ เร๊อ อาเต เน๊อ, “แว เก่ อิลอโมอิลอแร๊ เมเตอเจ๊อ เหร่อ ลูซิปล่อ เน๊อ เชหยู่ เด๊อ แว ซูจว๊าเหร่อ เออเนอเต๊เห่. โทปาเร๊อ เบ๊อะ แว แม๊เถอะฉื่อ เน๊อ ลู เบ๊อะเนอ ปา, แตแร๋ หม่า อา เก่ เอ๊โมฉื่อแร๊ คยาแซ๊ แว ปา เก่เหล่,” อา เตเน ฮู๊เนอ. 21ฮู๊เนอเรอ อู ซูกาเหร่อ เชหยู่ เต๊เห่ เด๊อ เพยาโคบ อาเป๊เส่เง. อาเหน่ เร๊อดื่อ ติเร๊อ, เบ๊อะเนอ เตเซ อา โอ่เมอแก เบ๊อะ อา อิช๊อโอ่โก๊ หนิ เหล่สื่อเหล่โอ่โก๊ เนอโต๊โผะ.
เพยาโคบ แพ๊อี๊อู่อี๊เป่ เน๊อ จอแปแหร่
22เบ๊อะเนอ เตเซ เพยาโคบ ก๊อถ่อ เร๊อ อา เอ๊ หนิ อาเม ซิเนอ, อาหลู่โหมะ ซิเนอ เน๊อ อาพู๊เพรคู เช๊อเตเพร เร๊อ เหย่ซี ตาจว๊าเบ๊ เจ๊อ ยับบอกโหมะ เบ๊อะ อู เหล่โกลจว๊ากา เกอเร๊อ เทอตื๊อหลื่อ เล๊อ เนอโต๊โผะ. 23อา ซูจว๊าเบ๊แก โทลอ เหย่ซี เน๊อ เทอแล เนอ เร๊อ อา ซูจว๊าเบ๊แก ลอเกอ ติ ล๋อ เตมีเตดอ เด๊อ อา โอ่แก เนอเต๊เห่ เน๊อ ตาหมื่อตาเต เนอเต๊เห่. 24ฮู๊เนอเร๊อ เพยาโคบ โอ่แก ตื๋อ ดื่อ แพ๊ เร๊อ แกแย เตเพร แฮ เม ลู แหง่ตา เร๊อ เหย่ซี เบ๊ตอปลอเต๊เปล่ เร๊อ ลู โต่ เจ๊อ เด๊อ เหมาะลีบู เจ๊อ.#โฮเชยา ๑๒:๓-๔ 25เบ๊อะ แกแย เนอเตเพร ซิเง เฮ๊อ เน๊อ อา เมเป่ ปา เพยาโคบ โต่ เบ๊อะเนอ, อา ปลู๊เร เพยาโคบ อาแข่หน่อ. เร๊อ เบ๊อะ เหย่ซี เบ๊ตอปลอเต๊เปล่ ลู เบ๊อะเนอ, เพยาโคบ อาแข่หน่อ ลูเต๊เปล่ แก. 26โทเร๊อ แกแย เนอเตเพร เฮ๊ ลู เน๊อ, “เหมาะลี บูเฮ๊อปลวา จว๊าแก มอ แว.”
หม่าแน๊เรอ เพยาโคบ เฮ๊ฉื่อคยา ลู เน๊อ, “เน เก่ เด๊อะบุ๊ยเด๊อะเตอเรอ แว โต่ เฮ๊หม่า, แว ปลวาจว๊าแจ่ เน โต่.”#โฮเชยา ๑๒:๓
27แกแย เนอเตเพร แด๊เฮอ ลู เน๊อ, “เน มุย เน๊อ อูเป?”
เร๊อ อา เฮ๊ฉื่อ ลู เน๊อ, “คูยาโคบ.”
28เร๊อ แกแย เนอเตเพร เฮ๊ ลู เน๊อ, “เนมุย เน๊อ คูยาโคบ หม่า ปา โต่ เฮ๊อ, เน เก่ มุยติ เฮ๊อ เน๊อ คูอิสราเอล#32:28 คูยาโคบ เน๊อ คูอิสราเอล หม่าเตเพรเพร๋ แพ๊. ปา, เมเตเฮ๊เร๊อ เน วื๊อฉื่อ เน๊อ จอแปแหร่ดุ เน๊อ แกแยเห่ขุพู๊ เร๊อ เน เป่ เฮ๊อ.”#เห่ขุทวาลู่ ๓๕:๑๐
29เพยาโคบ เฮ๊ ลู เน๊อ, “แด่ทูซิปล่อ เร๊อ เฮ๊โฉ่โล เป่แม๊ แว เนมุย,”
หม่าแน๊เรอ อา เฮ๊ฉื่อ ลู เน๊อ, “เน จว๊าแด๊เฮอ โต่ แวมุย เมเต?” อา เฮ๊ เร๊อ อา เด๊อะบุ๊ยเด๊อะเตอ เรอ แก ลู เบ๊อะเนอ.#เพรเมโตเต ๑๓:๑๗-๑๘
30ฮู๊เนอเร๊อ เพยาโคบ เอ๊ เหล่โอ่ เนอโต๊โผะ อามุย เน๊อ เปนีเอล, เร๊อ อา เฮ๊ เน๊อ, “เมเตเฮ๊เร๊อ แว แม๊เถอะ ต๊อต่อเจ๊อ เฮ๊อ จอแปแหร่ดุ เน๊อ แวเหน่ เร๊อดื่อ เจ๊อ ตื๊อดื่อเร๊อ อา ปลวา โอ่เซอ เพร ปา แว แพ๊.” (เปนีเอล อาโหง่แลช๊า หม่า แม๊เถอะฉื่อ ต๊อต่อ เน๊อ จอแปแหร่ดุ.)
31เบ๊อะ เพยาโคบ เถ่จว๊าแก เน๊อ เหล่โอ่ เบ๊อะ เปนีเอล เบ๊อะเนอ, ต๊อเหมาะ แถ่ เฮ๊อ. อาแข่ ลูเต๊เปล่ แก อาขว่าอาคยา, อา จว๊า แข่ด๊า เกอเร๊อ แก. 32ฮู๊เนออาขว่าอาคยา, โต่กู๊แหน่#32:32 โต่กู๊แหน่ อา เฮ๊ เนอ หม่า อา โต่เบ๊อะ เพรราลี ทือเค เนอแพ๊. อิสราเอลพู๊ เต๊เห่ เก่ เอ่ เตหย่า เนอ, อา เอ่ ปา ถว่า เด๊อ อาอี๊จือเร เน๊อ แข่หน่อ เนอเต๊เห่ โต่. เมเตเฮ๊เร๊อ แกแย เนอเตเพร ปลู๊ลูเต๊เปล่แก เพยาโคบ อาแข่หน่อ เบ๊อะ อาถว่า แข่ช๊า เนอ โต๊โผะ อาขว่าอาคยา, เหย่ซี เอ่ โต่.
Currently Selected:
เห่ขุทวาลู่ 32: EKTNTGEN
Highlight
Share
Copy
Want to have your highlights saved across all your devices? Sign up or sign in
Wycliffe USA
