เห่ขุทวาลู่ 18
18
ซิเผระ ซิโซ แฮโอ่เล เกอ เพอับราฮัม
1เตอเนอเค เพอับราฮัม โอ่ เด๊อ คูเมหม่าเร อาส่อเหมาะดุบูโพ๊ แก่ช๊า เนอ โต๊โผะ เร๊อ เบ๊อะ เหมาะโถ่เก่กู่ เบ๊อะเนอ, อา โอ่แนโอ่ เบ๊อะ อาเหล่สื่อ กู่ดากูทือ เร๊อ จอแปแหร่ ตูจูเพร แฮโอ่โลแถ่ เป่ ลู. 2เร๊อ อา แม๊จว๊า เร๊อ อา แม๊เถอะ แกแยเพ ซิโซ ก๊อถ่อโอ่ยาลา เน๊อ ลู โต่. เบ๊อะ อา แม๊เถอะ เหย่ซี เบ๊อะเนอ, อา โต๊โปล่ตาปยา จว๊าแม๊ฉื่อ เอ๊โมฉื่อ เหย่ซี, เร๊อ เด๊อ เตเบ่หยื่อเบ่แหน่ เหย่ซี อาเง, อา แด๊งือ งอตา เด๊อ เห่ขุ.#ฮีบรู ๑๓:๒
3เร๊อ อา เฮ๊ เน๊อ, “เก๊อ แว แบ่เจ่, เน เก่ แม๊เถอะ เน๊อ แว เออ อาโต เน๊อ เนซิปล่อ เฮ๊เร๊อ, แด่ทูซิปล่อ เร๊อ จว๊าตาลว๊า แต แว เหม่นี๋, โนโอ่โก๊ เกอเหร่อ เด๊อ เนหลู่ หี่ด๊อกู เออ นี๋. 4แว เก่ นอ พย๊าแฮ เป่ ซี เทอ ปา เร๊อ ซีปลี แลแค เน๊อ ซีกู๊โด่ เร๊อ โอ่เมอ เตเบ๊ซิพร๊าโก่ลอ แลแค เบ๊อะ ส่อเก๊โอ่เล เออ ปานี๋. 5แว เก่ พย๊าแฮ เป่ ซี เหล่เอ่ เต๊เห่, เร๊อ ซี เก่ เอ่ หนิอ๊าหนิเหร่ คยาแซ๊ เร๊อ เถ่จว๊า เป่แฮ โหน่คยา ซีแกล๊ ปา นี๋. ซี แฮโต่เกอ แว เร๊อ แว ซิเด๊อะเอ่เด๊อะโอ หนิ ซี แพ๋.” เร๊อ เหย่ซี เฮ๊ฉื่อ ลู เน๊อ,
“อ่อ อาแร๊ เฮ๊อ, เก่ เฮ๊ ฮู๊เนอเร๊อ ตูรู๋ เมฮู๊ เน เฮ๊ เนอ นี๋.”
6เออโตโพ๊ เรอ เพอับราฮัม โต๊โปล่ตาปยา แกล่โนโต เด๊อ อาเหล่สื่อกู เร๊อ อา เฮ๊ เหมาะซาราย เน๊อ, “พย๊าแฮ แพรมอ โฮหมื่อ เจ๊แร๊ เบ๊อะเออ โซเป๊. นี๊หมื่อมอ, แบ๊มอ ค๊อมู เร๊อ ชื๊อเอ่ มอ อา.”
7โทเร๊อ อา แกล่จว๊า โป่ เด๊อ ปู่ เบ๊หมู่โอ่ เร๊อ อา จว๊าปื่อ ปู่เพฮู๊ บื่อซื๊อลื๊อ โตโด เร๊อ อา นอจว๊า ตี๊หรี่แตแร เม เน๊อ อาหลู่ เตเพร. 8เร๊อ อา พย๊าแฮหนิ ปู่นู๊เทอแค๊กล๊อ เน๊อ ปู่นู๊เทอ โชแร๊เออ เน๊อ ปู่หย่า เด๊อ อู โพ วา โทเฮ๊อเนอ เร๊อ อา แฮเด๊อะ เน๊อ ซิเผระ เนอซิโซ. เบ๊อะ ซิเผระ เอ่โอ เบ๊อะเนอ, อา เร๊อ อา ก๊อถ่อโอ่ เบ๊อะ เหย่ซี ช๊า ส่อเหมาะเลเนอ.
9เหย่ซี แด๊เฮอ แลแค ลู เน๊อ, “เน เม เหมาะซาราย เล?”
เร๊อ อา เฮ๊ฉื่อ เหย่ซี เน๊อ, “อา โอ่ เด๊อ เหล่สื่อกู เนอ.”
10เบ๊อะ เนอซิโซเกล เตเพร เนอหม่า จอแปแหร่ ตูจูเพร เร๊อ อา เฮ๊ คูอับราฮัม เน๊อ, “ช๋า หน่าเบ่ ฮู๊ กู๊แหน่เค เออ ปาเนอ, แว กาโตคยา หม่าแหน่ เด๊อ เน โอ่ ปา. เร๊อ เนเม เหมาะซาราย เก่ พู๊โอ่แลหนิ พู๊เพรคู เตเพร ปา.”#โรม ๙:๙
เบ๊อะ อา เฮ๊ ฮู๊เนออาเค, เหมาะซาราย ยอโอ่ หนิดา เด๊อ เหล่สื่อ กู่ดากูทือ เบ๊อะ เหย่ซี แบ๊คยา เนอ. 11เบ๊อะเนอเค, เพอับราฮัม เน๊อ เหมาะซาราย ซิเนอลอ หม่า อา โหมะเผระ ลา เฮ๊อ เร๊อ เหมาะซาราย เนอ เพรเหมาะเหล่โกล แฮ ปา โต่ เฮ๊อ อาขว่าอาคยา, อาพู๊ โอ่แจ่ ปา โต่ เฮ๊อ.#โรม ๔:๑๙ 12ฮู๊เนอ อาขว่าอาคยา เร๊อ เหมาะซาราย งยาโห่ เกอเร๊อดื่อ อาเหน่ เร๊อ อา เตเน เน๊อ, “แว โหมะเผระลา เฮ๊อ. แวเว หม่า อา โหมะเผระ ลาแหน่ เฮ๊อเฮ๊อ. ฮู๊เนอเร๊อ แว เก่ โอ่เมอเต่อ เร๊อ ลู เร๊อ อา จว๊าเมโม แจ่ ปา แวซิปล่อ ฮู๊เต?”#เพรเมโตเต ๑๙:๒๖, เปโตร อาเหร่อเล๊อ ต๊าบ่า ๓:๖
13เออโตโพ๊ เร๊อ จอแปแหร่ ตูจูเพร เฮ๊ เพอับราฮัม เน๊อ, “หม่าเมเตเร๊อ เหมาะซาราย งยา เร๊อ อา จว๊าเฮ๊โต่ เน๊อ, ‘กู๊แหน่เออ แว โหมะเผระลา เฮ๊อ เร๊อ แว พู๊โอ่แจ่ ปาแหน่ แอ?’ 14จอแปแหร่ ตูจูเพร เมแจ่เต โต่ เนอ หม่า อา โอ่ แหน่ แอ? ฮู๊ แว เฮ๊โฉ่แก โทเฮ๊อ เน เน๊อ ช๋า หน่าเบ่ ฮู๊ กู๊แหน่เค ปา, แว เก่ แฮ คยาแซ๊ เด๊อ เน โอ่ ปา เร๊อ เหมาะซาราย เก่ พู๊โอ่แล หนิ พู๊เพรคู เตเพร ปา.”#มัทธิว ๑๙:๒๖, ลูกา ๑:๓๗
15เหมาะซาราย ซิอิเช เร๊อ อา เฮ๊แลโฮบี๊ เกอเร๊อ แก เน๊อ, “แว งยา น๊อ โต่ ว๊า.”
หม่าแน๊เรอ อา เฮ๊ฉื่อ ลู เน๊อ, “โต่, เน งยา หม่าแหน่ เจ๊อ.”
เพอับราฮัม กุยซิยอ ตื๊อดื่อ เป่ วีโสโดม อาเง
16เบ๊อะ แกแย เออเต๊เห่ ก๊อถ่อ เถ่จว๊า เฮ๊อ เบ๊อะเนอ, เหย่ซี แม๊จว๊าโตเด๊อ วีโสโดม โอ่เนอโตโค๊ เร๊อ เพอับราฮัม ครวาซูจว๊าเกอ เหย่ซี. 17เร๊อ จอแปแหร่ ตูจูเพร เฮ๊ เกอเร๊อดื่อ อาเหน่ เน๊อ, “เต เด๊อ แว เกเร เมเออเนอ, แว โตเบ่ เฮ๊โฉ่โล หนิเป่ เพอับราฮัม โต่ แอ? 18อา หม่า อา เก่ทวา หม่าแหน่ เมวเจ่อดู๋ เต๊อเจ่อ เด๊อ อา โอ่ เน๊อ เตเตอเรอฉว่าชอ เนอ ปา. เร๊อ ล๋อ เมวเจ่อ เด๊อ อา โอ่ เด๊อ เห่ขุเออ เต๊เห่ เก่ พย๊าหนิ แฮเง เกอ เตเด๊อะบุ๊ยเด๊อะเตอเรอ เน๊อ อาขว่าอาคยา ปา.#เพรโด่แนพู๊ เต๊เห่ ๓:๒๕, กาลาเทีย ๓:๘ 19แซ่ฮู๊ อา เก่ เฮ๊ตา หนิเป่ อาพู๊อาเลอ, อากลุยอาลุ๊ย เด๊อคยา เต๊เห่ อาเงเนอเร๊อ, แว นว๊าแถ่ โทเฮ๊อ ลู เร๊อ เด๊อ เหย่ซี เม เต เด๊อ อาโตอาเบ่ เน๊อ อาจ๊ออาเต อาขว่าอาคยา, เหย่ซี เก่ จูเอ่ ครวาเม แลแค จอแปแหร่ ตูจูเพร อาโหง่ ปา. เหย่ซี เก่ เมฮู๊เนอ เฮ๊เรอ ฮู๊แว อ๊อแลนอแล โทเฮ๊อเนอ, แว เก่ เมเล๊อเมบา ลอปลี เป่ เจ๊อดื่อ อา ปา.”
20เร๊อ จอแปแหร่ ตูจูเพร เฮ๊ เพอับราฮัม เน๊อ, “วีโสโดมพู๊ เน๊อ วีโกโมราห์ พู๊ เต๊เห่ เม เตมู๊แหม่รีแจ่ อาดุ แหน่เจ๊อ เร๊อ อู เอ๊โทเอ๊โม นอ เมจาตา แว เนอ แว หนิโฮ เฮ๊อ. เหย่ซี เมซื๊อเมปล๊า เต เนอ อาดุอาแย แหน่เจ๊อ. 21แว แฮตา แม๊แม๊, หม่า เหย่ซี มู๊แหม่รีแจ่ หม่าแหน่ ฮู๊ แว หนิโฮ อู เอ๊โทแถ่ แว เนอ แอ หม่าโต่แอ เนอ แว เก่ ซิเง ปา.”
22เหย่ซี อาเกล ซิเนอ เร๊อ อา เถ่จว๊าโต เด๊อ วีโสโดม อาโอ่, หม่าแน๊เรอ เพอับราฮัม ก๊อถ่อ โอ่แก เด๊อ จอแปแหร่ ตูจูเพร เนอเตเพร อาเป๊เส่เง. 23เร๊อ อา แฮผื่อ เด๊อ จอแปแหร่ ตูจูเพร อาโอ่ เร๊อ อา เฮ๊ ลู เน๊อ, “เน เกเร เมจาปย๊า หม่าแหน่ เต่อเกอลอ เพรจ๊อเพรเต เต๊เห่ เน๊อ เพรมู๊แหม่รีแจ่ เนอเต๊เห่ ปา แอ? 24เฮ๊โก๊เหร่อ เบ๊อะ วีกู เออเนอ เพรจ๊อเพรเต เก่ โอ่ อาเพร แงเชอ เฮ๊หม่า, เน เกเร เมจาปย๊า หม่าแหน่ ลอเจ๊อ ตีวี ลอเจ๊อ ปา แอ? เน แม๊ เกอ เพรจ๊อเพรเต เนอแงเชอ อาเป๊เส่ เร๊อ เน ซิโล เกอเร๊อ ปาเจ๊อ วี เนอตีวี โต่ แอ? 25เน โตเบ่ เมเซอ เต่อ เพรจ๊อเพรเต เนอเต๊เห่ เน๊อ เพรมู๊แหม่รีแจ่ เนอเต๊เห่ โต่. เน เก่ เม ฮู๊เออ เฮ๊หม่า, เน เมจากาคยา แซ่แก เพรจ๊อเพรเต เนอเต๊เห่ เน๊อ เพรมู๊แหม่รีแจ่ เนอเต๊เห่ เฮ๊อ, เนเม ฮู๊เนอ แตแค๋ โต่. เน หม่า เพร เด๊อ อา เมจากาคยา จ๊อเต เด๊อ เห่ขุ ซีบ่า ลอ อาขว่าอาคยา, เน เบ่ เมโตเมเบ่ แหน่ แพ๊.”
26จอแปแหร่ ตูจูเพร เฮ๊ฉื่อ เน๊อ, “แว เก่ แม๊เถอะ หม่าแหน่ เพรจ๊อเพรเต อาเพร แงเชอ เบ๊อะ วีโสโดมกู เออเนอ เฮ๊เร๊อ เด๊อ เหย่ซี อาขว่าอาคยา, แว เก่ ซิโล เกอเร๊อ ลอเจ๊อ วี เนอตีวี ปา.”
27เพอับราฮัม กุยซิยอ คยาแซ๊ เน๊อ, “แว หม่า แกแย เด๊อ อา หม่า เน๊อ เตอเจ๋อ โต่, อา แซ่เน๊อ เห่หมื่อดอเกล เน๊อ กู๊เผะ เต๊เห่ แพ๊ ตื๊อดื่อเรอ แว เฮ๊เบ่ คือฮา เน๊อ แบ่เจ่ดุ เออ แด่ทูซิปล่อ เหร่อ แวนี๋. 28หม่าแน๊เรอ เพรจ๊อเพรเต เก่ โอ่บาเป่ แงเชอ โต่, อา เก่ ตายว่าแก ซิแง เล? เด๊อ อา ตายว่าแก ซิแง อาขว่าอาคยา เร๊อ เน เกเร เมจาปย๊าแก ลอเจ๊อ ตีวีลอ เจ๊อ ปา แอ?”
เร๊อ จอแปแหร่ตูจูเพร เฮ๊ เน๊อ, “แว เก่ แม๊เถอะ อาเพร ลุยเชอ เน๊อ ซิแง เฮ๊เร๊อ แว เมจากาคยา ปย๊าแก น๊อ โต่.”
29เพอับราฮัม เฮ๊ โป่ เน๊อ, “เน เก่ แม๊เถอะ แพ๊ตื๊อ อาเพร ลุยเชอ แพ๊ เล?”
เร๊อ จอแปแหร่ เฮ๊ฉื่อ ลู เน๊อ, “แกแย เก่ โอ่ แพ๊ตื๊อ อาเพร ลุยเชอ แพ๊ เบ่เบ่, แว เมจากาคยา ปย๊าแก น๊อ โต่โต่.”
30ฮู๊เนอ เร๊อ เพอับราฮัม เฮ๊ โป่ เน๊อ, “เก๊อ แบ่เจ่ดุ, แด่ทูซิปล่อ เร๊อ ซิปล่อดุ แต่ แว เหม่นี๋. แวเบ่ แด๊เฮอ โป่ เหร่อ เน โตโพ๊. เฮ๊โก๊เหร่อ เน เก่ แม๊เถอะ แพ๊ตื๊อ แกแย อาเพร โซเชอ แพ๊ เล?”
เร๊อ จอแปแหร่ เฮ๊ฉื่อ ลู เน๊อ, “แว เก่ แม๊เถอะ แพ๊ อาเพร โซเชอ แพ๊ เฮ๊เร๊อ แว เมจากาคยา ปย๊าแก น๊อ โต่โต่.”
31ฮู๊เนอ เร๊อ เพอับราฮัม เฮ๊ โป่ เน๊อ, “แด่ทูซิปล่อ โป่ เหร่อ แว เฮ๊โก๊เหร่อ เน เก่ แม๊เถอะ แพ๊ แกแย อาเพร เนอเชอ แพ๊ เก่เฮ๊เล?”
เร๊อ จอแปแหร่ เฮ๊ฉื่อ ลู เน๊อ, “แว เก่ แม๊เถอะแพ๊ เพรจ๊อเพรเต อาเพร เนอเชอ แพ๊ เบ่เบ่, แวเมจากาคยา ปย๊าแก น๊อ โต่โต่.”
32ฮู๊เนอ เร๊อ เพอับราฮัม เฮ๊ คยาแซ๊ เน๊อ, “เก๊อ แบ่เจ่ดุ, แด่ทูซิปล่อ เร๊อ ซิปล่อดุ แต แว เหม่ นี๋. แว แด๊เฮอ โป่ เหร่อ เน โตโพ๊โพ๋ แพ๊ นี๋. เน เก่ แม๊เถอะ แพ๊ตื๊อ อาเพรเช๊อ แพ๊ เก่ เฮ๊เล?”
เร๊อ จอแปแหร่ เฮ๊ฉื่อ ลู เน๊อ, “แวเก่ แม๊เถอะ เพรจ๊อเพรเต อาเพรเช๊อ แพ๊ เบ่เบ่, แว เมจากาคยา ปย๊าแก น๊อ วี เนอตีวี โต่โต่.”
33จอแปแหร่ ตูจูเพร เฮ๊เบ่ โทเฮ๊อ เน๊อ เพอับราฮัม เร๊อ อา เถ่จว๊าแก. เร๊อ เพอับราฮัม กาแก เด๊อ อาหี่.
Currently Selected:
เห่ขุทวาลู่ 18: EKTNTGEN
Highlight
Share
Copy
Want to have your highlights saved across all your devices? Sign up or sign in
Wycliffe USA
