ꤗꤢ꤬ꤊꤢꤨ 13
13
ꤒꤢꤩ꤬ꤗꤢꤩ꤬ꤒꤢ꤭ꤖꤚꤢꤪ꤬ꤊꤢꤧ꤭ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤢ꤬ꤚꤤ꤬ꤢ꤬ꤊꤢꤧ꤭
(ꤗꤢꤞꤢꤧ ꤂꤄:꤁-꤂, ꤜꤢꤨꤊꤢ꤬ ꤂꤁:꤅-꤆)
1ꤙꤣꤧ ꤛꤢꤩ꤬ꤏꤛꤢꤨ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤠꤤ꤭ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣ꤬ꤖꤚꤢꤩ꤬ ꤟꤢꤩ ꤜꤢꤨ꤭ ꤔꤢꤧ, “ꤞꤢꤚꤢ꤮ ꤔꤢꤧ꤬ ꤗꤢꤧꤗꤣꤧ꤭ ꤜ꤫ꤢꤪ꤬ꤘꤢꤨ꤬ ꤔꤢꤧ ꤟꤤ꤬ꤘꤢꤨ꤬ꤟꤤ꤬ꤓꤢꤨ꤭ ꤘꤣ ꤔꤣꤧ꤬ꤒꤣꤧ꤬ꤟꤢꤩ꤬ ꤜꤢꤩ, ꤢ꤬ꤒꤝ꤫ꤢ꤬ ꤔꤢꤧ꤬ꤡꤣꤧ!”
2ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤟꤤ꤬ꤘꤢꤨ꤬ꤟꤤ꤬ꤓꤢꤨ꤭ꤒꤝ꤫ꤢ꤬ ꤘꤣꤔꤣꤧ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤞꤤ꤭ ꤗꤢꤧꤓ꤫ꤣꤧ꤬ ꤠꤢꤧ꤭ ꤟꤢꤩ? ꤜꤢꤪ꤭ ꤜ꤫ꤢꤪ꤬ꤘꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ꤔꤣꤧ꤬ ꤢꤨ꤭ ꤊ꤫ꤢꤦ꤬ ꤟꤢꤧ꤭ꤘꤢꤪ꤬ ꤒꤢ꤭ꤖꤚꤢꤪ꤬ꤊꤢꤧ꤭ ꤜꤢꤪ꤭ ꤢ꤬ ꤕꤢ꤭꤯ ꤜ꤫ꤢꤪ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ꤡ꤫ꤢꤩ꤬ꤡꤢꤦ꤭ ꤕꤢ꤬ ꤡꤣꤧ ꤜꤢꤨ꤭ ꤒꤣ꤬ꤗꤢꤩ꤭꤮ ꤒꤥ꤬ ꤡꤣꤧ ꤕꤢ꤭꤯”
ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭ ꤔꤢꤧ ꤒꤢꤩ꤬ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬
(ꤗꤢꤞꤢꤧ ꤂꤄:꤃-꤁꤄, ꤜꤢꤨꤊꤢ꤬ ꤂꤁:꤇-꤁꤉)
3ꤙꤣꤧ ꤛꤢꤩ꤬ꤏꤛꤢꤨ ꤥ꤬ꤔꤢꤧ꤭ꤥ꤬ ꤘꤣ ꤢꤪꤜꤤꤠꤢ꤬ꤏꤥ꤬ꤋꤢꤨ꤬ ꤚꤣꤧ꤬ ꤢ꤬ ꤗꤢꤧꤡꤝꤢ ꤒꤥ꤭ꤘꤢꤩ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤥ꤬ ꤢ꤬ꤋꤢꤩ꤭ꤔꤣꤧ꤬, ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ, ꤋꤢꤨ꤭ꤡꤛꤢꤩ꤭ꤗꤢ꤬ꤎꤣ꤬, ꤋꤢꤨ꤭ꤛꤥ꤭ꤟꤢ꤬, ꤋꤢꤨ꤭ꤢꤧ꤬ꤘꤚꤢꤨ, ꤟꤢꤧ꤭ꤟꤥ꤬ꤚꤣꤧ ꤘꤣ ꤜꤢꤨ꤭ꤥ꤬ ꤚꤣꤧ꤬ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, 4“ꤔꤢꤧ꤬ ꤟꤢꤩ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭? ꤙꤣꤧ ꤜꤢꤪ꤭ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ꤚꤢꤩ꤭ ꤓꤝꤢ꤭ꤓꤢꤧ꤬ ꤓꤥ꤭ꤕꤜꤢꤦꤜꤢꤪ꤭ꤟꤣꤧ ꤕꤢ꤭ꤔꤣꤧ꤬ ꤒꤢꤩ꤬ꤋꤥꤒꤣꤧ꤬ꤊꤜꤤ ꤢ꤬ꤗꤢꤢ꤬ꤒꤢꤩ꤭ ꤒꤣ꤬ꤡꤣ꤬ꤡꤣ꤬ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤚ꤫ꤣꤧ꤬ ꤕꤢ꤭ ꤟꤢꤧ꤭?”
5ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊ꤫ꤢꤦ꤬ ꤟꤢꤧ꤭ ꤢꤩꤜꤢ꤬ꤜꤣꤧ꤬ꤟꤥ꤭ ꤞꤤ꤭ ꤕꤢ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮꤯ 6ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬ ꤊ꤫ꤢꤦ꤬ ꤊꤜꤝꤢ꤬ꤟꤢꤧ꤭ ꤢ꤬ꤔ꤫ꤢꤩ꤬ ꤞꤢꤧꤔꤢꤧ ꤠꤢꤧ꤭ ꤔꤣꤧ꤬ ꤕꤢ꤭꤯ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤧꤊꤝꤢ ꤜꤣꤧ꤬ꤟꤥ꤭ ꤜꤢꤧ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ, ‘ꤠꤢꤧ꤭ ꤗꤢ꤬ ꤋꤚꤤ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬’ ꤓꤥ꤭ꤚꤣꤧ꤬ ꤢ꤬ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ꤔ꤫ꤤ꤬ ꤢꤩꤔꤢꤧ꤬ꤡꤣꤧ ꤢꤨ꤭ ꤕꤢ꤭꤯ 7ꤙꤣꤧ ꤞꤤ꤭ ꤔ꤫ꤤ꤬ꤟꤥ꤭ ꤢꤨ꤭ ꤏꤢ ꤖꤚꤢ꤬ꤚ꤫ꤢꤨ꤬ꤖꤚꤢ꤬ꤒꤢꤩ ꤜꤢꤨ꤭ ꤘꤣ ꤢ꤬ꤖꤢꤦ꤬ ꤙꤢꤩ꤬ꤙꤢꤩ꤬, ꤞꤤ꤭ ꤔ꤫ꤤ꤬ꤟꤥ꤭ ꤢꤨ꤭ ꤘꤢꤧ ꤕ꤫ꤢꤩ꤬ ꤞꤤ꤭ ꤒꤢꤩ꤬ꤏꤢꤒꤢꤩ꤬ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤘꤣ ꤢ꤬ꤛꤢ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤩ꤬ꤙꤢꤩ꤬, ꤞꤤꤤ꤬ꤏꤢꤩ꤭ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤟꤢꤨꤣꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤙꤢꤩ꤬ ꤓꤝꤢ꤭ꤓꤢꤧ꤬ ꤔꤢꤧ꤭ ꤕꤢ꤭, ꤗꤢ꤬ꤔꤢꤧꤚꤣꤧ꤬ ꤣꤧ꤭ꤔꤣꤧ꤬ꤗꤢ꤬ ꤟꤢꤩ꤬ꤋꤢꤨ꤬ ꤊ꤫ꤢꤦ꤬ꤚꤢꤩ꤭ ꤒꤣꤧ꤬ꤘꤢꤦ꤬ ꤟꤣꤧꤔꤣꤧ꤬ ꤗ꤫ꤢ꤬ꤜꤢ꤭ꤟꤤꤒꤥ꤬꤯ 8ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤗꤤ꤭ꤡꤣ꤬ ꤒꤣ꤬ꤡꤣ꤬ ꤔꤢꤧ ꤒꤣ꤬ꤡꤣ꤬, ꤓꤣꤧ꤭ꤊ꤫ꤢꤩ꤬ ꤒꤣ꤬ꤊ꤫ꤢꤩ꤬ ꤔꤢꤧ ꤒꤣ꤬ꤊ꤫ꤢꤩ꤬ ꤊ꤫ꤢꤦ꤬ꤏꤢꤊ꤫ꤢꤦ꤬ꤕꤢ꤭ ꤜꤢꤨ꤭ ꤕꤢ꤭꤯ ꤒꤣꤧ꤬ꤔꤢꤩꤓꤢꤪꤘꤤ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤓꤢꤧ꤬ꤓꤥ꤭ꤥ꤬ꤓꤢꤧ꤬ꤜꤢꤧ꤬ ꤜꤢꤪ꤭ꤕꤜꤤ꤭ ꤘꤣ ꤟꤢꤩ꤬ꤋꤢꤨ꤬ꤣꤧ꤭ ꤒꤣ꤬ꤖꤥ꤬ ꤓꤥ꤭ ꤒꤣ꤬ꤖꤥ꤬ ꤕꤢ꤭꤯ ꤊ꤫ꤢꤩ꤬ꤠꤤ꤭ꤊ꤫ꤢꤩ꤬ꤊꤢꤪ꤭ ꤊ꤫ꤢꤦ꤬ ꤥ꤬ꤓꤢꤧ꤬ ꤕꤢ꤭꤯ ꤒꤢꤩ꤬ꤓꤝꤢ꤭ꤓꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤕꤢ꤬ꤖꤢꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ ꤊꤢꤧ꤭ꤏꤢꤊꤢꤧ꤭ꤚꤢꤧ꤬ ꤘꤣ ꤢ꤬ꤞꤢꤧꤔꤢꤧ ꤖꤚꤢꤩ꤬ꤗꤢꤪ꤬ ꤊ꤫ꤢꤦ꤬ꤚꤢꤩ꤭ ꤖꤢꤨꤥ꤬ ꤟꤢꤪꤏꤢꤩ꤭ꤔꤣꤧ꤬ ꤟꤢꤧ꤭ꤒ꤫ꤥ꤬ ꤗꤥꤕꤢ꤬ꤖꤢꤧ꤯
9“ꤞꤤ꤭ ꤙꤢꤩ꤬ ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬꤯ ꤘꤣ ꤠꤢꤧ꤭ꤋꤝꤢ꤬ꤠꤢꤧ꤭ꤋꤛꤢ꤭ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤕ꤫ꤢꤦ꤬ ꤞꤤ꤭ ꤕꤢ꤭, ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤞꤢꤨ꤭ꤓꤢꤧ꤬ ꤞꤤ꤭ ꤘꤣ ꤖꤚꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤕꤢ꤭꤯ ꤢꤨ꤭ ꤊ꤫ꤢꤦ꤬ꤗꤢꤦ꤭ꤊ꤫ꤢꤦ꤬ꤕꤢꤪ꤬ ꤞꤤ꤭ ꤘꤣ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ꤊꤢꤨ꤭ ꤕꤢ꤭꤯ ꤞꤤ꤭ ꤙꤢꤩ꤬ ꤊꤣꤧ꤬ꤓꤢꤪ꤬ꤥ꤬ ꤘꤣ ꤖꤚꤢꤩ꤬ꤕꤣꤒꤣꤧ꤬ꤚꤤ꤬ꤒꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ ꤡꤢꤪꤖꤢꤧ꤬ ꤒꤣꤧ꤬ꤟꤢꤩ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤡꤢ꤭ ꤞꤤ꤭ ꤕꤢ꤭ ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤔ꤫ꤤ꤬ꤕ꤫ꤢꤩ꤬ ꤛꤢꤩ꤬ꤞꤤ꤭ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤕꤢ꤭꤯#ꤗꤢꤞꤢꤧ ꤁꤀:꤁꤇-꤂꤀, ꤜꤢꤨꤊꤢ꤬ ꤁꤂:꤁꤁,꤁꤂ 10ꤗꤢ꤬ꤔꤢꤧꤚꤣꤧ꤬ ꤙꤣꤧ ꤟꤢꤩ꤬ꤋꤢꤨ꤬ ꤒꤣꤧ꤬ꤘꤢꤦ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤞꤤ꤭ ꤒꤥ꤭ꤙꤢꤩ꤬ ꤡꤝꤢ ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤖꤚꤢꤩ꤬ꤜꤢꤨ꤬ꤗꤤ꤭ꤡꤣ꤬ ꤕꤝꤢ꤭꤮ ꤒꤣ꤬ꤡꤣ꤬ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ꤚꤤ꤬ꤢ꤬ꤊꤢꤧ꤭꤯ 11ꤢꤨ꤭ ꤕ꤫ꤢꤦ꤬ꤞꤢꤨ꤭ꤓꤢꤧ꤬ ꤞꤤ꤭ ꤘꤣ ꤋꤝꤤꤟꤤ꤬ ꤙꤢꤪꤋꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬, ꤞꤤ꤭ ꤒꤥ꤭ꤙꤢꤩ꤬ ꤟꤢꤩꤙꤢꤩ꤬ ꤟꤢꤨꤒꤢꤩ꤭ ꤟꤢꤨꤒꤢꤩ꤭ꤔꤣꤧ꤬ ꤙꤢꤩ꤬ꤛꤢꤪ꤬ꤥ꤬ꤔꤢꤩ꤬ ꤚ꤫ꤣꤧ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤏꤣꤧꤋꤢꤩ꤭ ꤟꤢꤧ꤭ꤒ꤫ꤥ꤬ ꤕꤢ꤭ ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤟꤢꤩꤙꤢꤩ꤬ ꤒꤢꤦꤘꤢꤦ꤬ ꤗ꤫ꤢ꤬ꤒꤥ꤬, ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤊ꤫ꤢꤦ꤬ ꤟꤢꤩꤏꤥ꤬ ꤗꤢꤩ꤬ꤡꤝ꤫ꤢ꤬ ꤘꤢꤦ꤬ ꤞꤤ꤭ ꤕꤢ꤭꤯
12-13“ꤙꤣꤧꤔꤣꤧ꤬ꤢ꤬ꤋꤢꤩ꤭ ꤕꤢ꤭ꤔꤣꤧ꤬, ꤕ꤫ꤥ꤬ ꤊ꤫ꤢꤦ꤬ ꤔꤢꤪ꤭ꤗꤢꤩ꤬ꤞꤣꤧ꤭ ꤚꤣꤧꤘꤢꤦ꤬ ꤢ꤬ꤗ꤫ꤢꤧ꤬ ꤔꤢꤧ ꤢꤨ꤭ꤚꤥ꤬ ꤕꤢ꤭, ꤚꤣꤧ꤬ ꤗ꤫ꤢꤧ꤬ ꤊ꤫ꤢꤦ꤬ ꤔꤢꤪ꤭ꤗꤢꤩ꤬ꤞꤣꤧ꤭ ꤚꤣꤧꤘꤢꤦ꤬ ꤢ꤬ꤕ꤫ꤥ꤬ꤔꤢꤧ ꤢꤨ꤭ꤚꤥ꤬ ꤕꤢ꤭, ꤖꤢꤩ꤭ ꤊ꤫ꤢꤦ꤬ ꤔꤢꤪ꤭ꤗꤢꤩ꤬ꤞꤣꤧ꤭ ꤚꤣꤧꤘꤢꤦ꤬ ꤢ꤬ꤖꤢꤨ ꤔꤢꤧ ꤢꤨ꤭ꤚꤥ꤬ ꤕꤢ꤭, ꤖꤢꤨ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤠꤢꤦ ꤊꤢ꤬ꤋꤛꤢ꤭ꤏꤢꤦ꤬ ꤚꤣꤧꤘꤢꤦ꤬ ꤢ꤬ꤗ꤫ꤥ꤬ꤢ꤬ꤖꤢꤩ꤭ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤔꤢꤪ꤭ꤗꤢꤩ꤬ꤞꤣꤧ꤭ ꤚꤣꤧꤘꤢꤦ꤬ ꤢꤨ꤭ ꤔꤢꤧ ꤢ꤬ꤗ꤫ꤥ꤬ꤢ꤬ꤖꤢꤩ꤭ ꤕꤢ꤭꤯ ꤘꤣ ꤠꤢꤧ꤭ꤋꤝꤢ꤬ꤠꤢꤧ꤭ꤋꤛꤢ꤭ ꤚꤣꤧ꤬ ꤊꤣꤧ꤬ꤛꤢꤧ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤞꤤꤒꤣꤧ꤬ꤋꤥ꤭ ꤜꤢꤪ꤭ ꤞꤤ꤭ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤣꤧ꤬ꤓꤢꤪ꤬ꤒꤣꤧ꤬ꤔꤢꤧ꤭ ꤥ꤬ꤊꤜꤢꤪ꤬ꤏꤢꤪꤗꤢ꤬ ꤘꤣ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤢ꤬ꤊꤢꤨ꤭ ꤒ꤫ꤥ꤬ꤘꤣ ꤢ꤬ꤒꤣꤧ꤬ꤘꤢꤦ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤛꤢꤩ꤬ꤞꤤ꤭ ꤕꤢ꤭꤯”#ꤗꤢꤞꤢꤧ ꤁꤀:꤂꤂
ꤒꤢꤩ꤬ꤒꤣꤧ꤬ꤚꤢꤪ꤬ꤞꤢꤩ ꤞꤤꤤ꤬ꤏꤢꤩ꤭ ꤘꤣ ꤜ꤫ꤢꤩ꤬ꤞꤤꤛ꤫ꤢꤪ꤬ꤞꤤꤙꤤ꤭ ꤒꤣꤧ꤬ꤟꤢꤩ꤬
(ꤗꤢꤞꤢꤧ ꤂꤄:꤁꤅-꤂꤁, ꤜꤢꤨꤊꤢ꤬ ꤂꤁:꤂꤀-꤂꤄)
14ꤛꤢꤩ꤬ꤏꤛꤢꤨ ꤟꤢꤩꤟꤢꤧ꤭ꤑꤢꤩ꤭ ꤕ꤫ꤥ꤬ ꤔꤢꤧ, “ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤔꤢꤧ ꤒꤢꤩ꤬ꤞꤤꤛ꤫ꤢꤪ꤬ꤞꤤꤙꤤ꤭ ꤒꤥ꤭ꤙꤢꤩ꤬ ꤊꤣꤧ꤬ꤓꤢꤪ꤬ꤥ꤬ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ꤊꤢꤨ꤭ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ꤥ꤬ ꤙꤣꤧꤔꤣꤧ꤬ ꤕꤢ꤭꤯ ꤘꤣ ꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢꤨ꤭ ꤊ꤫ꤢꤦ꤬ ꤘꤢꤧ꤬ꤥ꤬ꤚ꤫ꤢꤧ꤬ꤊꤢꤧ꤭ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ ꤕꤢ꤭ (ꤊꤣꤧ꤬ꤛꤢꤧ꤭ ꤘꤣ ꤢ꤬ ꤘꤢꤧ ꤜꤤ꤬ ꤣꤧ꤭ꤒꤣꤧ꤬ꤟꤢꤩ꤬ ꤒꤥ꤭ꤙꤢꤩ꤬ ꤞꤤꤑꤢꤩ꤭ꤕꤜꤥ꤭ ꤜꤢ꤭ꤋꤢꤧ꤭)꤯ ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ ꤢ꤬ ꤓꤝꤢ꤭ꤓꤢꤧ꤬ ꤟꤣꤧ ꤟꤢꤨꤣꤧ꤭ ꤢ꤬ꤋꤢꤩ꤭ ꤕꤢ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤥ꤬ ꤘꤣ ꤛꤢꤨꤘꤢ꤬ ꤊ꤫ꤢꤩ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤙꤢꤩ꤬ ꤊꤜꤢꤧ꤬ꤓꤢꤧ꤬ ꤜꤣꤧ꤬ꤕꤜꤢꤩ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤘꤣ ꤏꤥ꤬ꤋꤢꤨ꤬꤯#ꤘꤢ꤬ꤔꤤ꤬ꤢꤩꤜꤢ꤬ ꤉:꤂꤇, ꤁꤁:꤃꤁, ꤁꤂:꤁꤁ 15ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤘꤣ ꤟꤤ꤬ꤋꤢꤨ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤙꤣꤧ ꤢ꤬ ꤊꤜꤢꤧ꤬ꤒꤢ꤭ ꤢ꤬ꤋꤢꤩ꤭ ꤢ꤬ ꤒꤥ꤭ꤙꤢꤩ꤬ ꤔꤥ꤭ꤖꤛꤢꤔ꤫ꤤ꤬ ꤢ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤘꤣ ꤟꤤ꤬ꤊꤢꤨ꤭ ꤒꤣ꤬ꤡꤣ꤬꤮ ꤒꤥ꤬꤯#ꤜꤢꤨꤊꤢ꤬ ꤁꤇:꤃꤁ 16ꤊꤣꤧ꤬ꤛꤢꤧ꤭ ꤗꤢꤩ꤬ꤒꤢꤩ꤬ ꤘꤣ ꤜ꤫ꤢꤧ꤬ꤋꤢꤨ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤙꤢꤩ꤬ ꤊꤜꤢꤧ꤬ꤊꤢ꤬ ꤖꤛꤢꤔ꤫ꤤ꤬ ꤢ꤬ꤡꤢ꤬ ꤘꤣ ꤟꤤ꤬ ꤒꤥ꤬꤯ 17ꤙꤣꤧꤔꤣꤧ꤬ꤒꤣ꤬ꤔꤣꤧ꤭ ꤕꤢ꤭ꤗꤢ꤬ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ꤗ꤫ꤥ꤬ꤘꤢꤪ꤭ ꤔꤢꤧ ꤗ꤫ꤥ꤬ ꤘꤣ ꤢ꤬ ꤥ꤬ꤔꤢꤧ ꤢ꤬ꤖꤢꤨ ꤘꤣ ꤢ꤬ ꤤ꤬ꤔꤢꤨ ꤕꤢ꤬ꤖꤢꤧ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ꤗꤢ꤬ ꤏꤣꤧꤋꤢꤩ꤭ ꤡꤢ꤭ꤡꤢꤦ꤬ ꤔꤢꤧ꤬ꤡꤣꤧ ꤘꤣ ꤛꤢꤩ꤬ꤞꤤ꤭ꤑꤢꤩ꤭ ꤕꤢ꤭꤯ 18ꤞꤢꤧꤟꤢꤨ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤣꤧ꤭ ꤊ꤫ꤢꤦ꤬ ꤒꤢ꤭ꤒꤥ꤭ ꤒ꤫ꤢꤧ꤬ ꤔꤢꤧ ꤊ꤫ꤢꤩ꤬ꤚ꤫ꤥ꤬ꤋꤢꤩ꤭ ꤒ꤫ꤢꤧ꤬ꤗꤢꤩ꤬ ꤔꤣꤧ꤬, ꤞꤤ꤭ ꤒꤥ꤭ ꤊꤝꤤ꤭ꤡꤢꤪꤙꤢꤩ꤭ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤕꤝꤢ꤭꤮ ꤒꤣ꤬ꤖꤚꤢꤩ꤬꤯ 19ꤛꤢꤩ꤬ꤞꤤ꤭ ꤒꤥ꤭ꤙꤢꤩ꤬ ꤊꤝꤤ꤭ꤡꤢꤪꤙꤢꤩ꤭ ꤜꤢ꤭ꤋꤢꤧ꤭ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤗ꤫ꤢꤪ꤬ꤔꤣꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤕꤢ꤭ ꤔꤣꤧ꤬, ꤡꤢꤓꤢꤧ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤙꤢꤧꤜꤢꤧ꤬ꤜꤢꤨ ꤒꤢꤩ꤬ ꤒ꤫ꤥ꤬ꤊꤢꤨꤔ꤫ꤢꤧ꤬ ꤣꤧ꤭ꤔꤣꤧ꤬ ꤢ꤬ ꤗꤢꤩ꤬ꤔꤢꤪ ꤟꤢꤨꤔꤣꤧ꤬ ꤒꤣ꤬ꤖꤥ꤮ ꤒꤥ꤬꤯ ꤙꤣꤧꤔꤣꤧ꤬ꤋꤢꤩ꤭ꤕꤢ꤭ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤡꤢ꤭ꤜꤣ ꤢꤨ꤭ꤋꤥ꤭ ꤕꤢ꤭ ꤚꤣꤧ꤬ ꤘꤣꤋꤛꤢ꤭ꤕꤢ꤭ ꤔꤣꤧ꤬ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ꤔꤢꤪ ꤕꤢ꤬ ꤟꤢꤨꤔꤣꤧ꤬ ꤒꤣ꤬ꤖꤥ꤮ ꤒꤥ꤬ ꤕꤢ꤭꤯#ꤘꤢ꤬ꤔꤤ꤬ꤢꤩꤜꤢ꤬ ꤁꤂:꤁, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤇:꤁꤄ 20ꤙꤢꤧ꤬ꤡꤢꤩ꤬ ꤊꤢꤩ꤬ ꤗꤢꤩ꤬ꤖꤥ꤬ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤒꤥ꤬ ꤟꤢꤩꤔꤣꤧ꤬ꤗꤢ꤬ ꤢꤨ꤭ ꤜꤣꤧ꤬ꤕꤜꤢꤩꤙꤢꤩ ꤔꤣꤧ꤬, ꤢ꤬ ꤥ꤬ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤥ꤬ꤔꤢꤩ꤬ ꤓꤥ꤭ꤟꤣꤧ ꤜꤢꤨ꤭ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ꤔꤣꤧ꤬ ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤗꤢꤩ꤬ꤖꤥ꤬ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤕꤢ꤭꤯ 21ꤢ꤬ ꤓꤝꤢ꤭ꤓꤢꤧ꤬ ꤟꤢꤨꤔꤣꤧ꤬ ꤓꤥ꤭ꤕꤢ꤭ꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤟꤢꤩ ꤞꤤ꤭ ꤔꤢꤧ, ‘ꤗꤢꤧꤗꤣꤧ꤭ ꤜꤢ꤭ꤋꤢꤧ꤭, ꤣꤧ꤭ ꤗꤢ꤬ ꤋꤚꤤ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭ ꤔꤣꤧ꤬ ꤒꤣ꤬ꤖꤚꤢꤩ꤬ ꤟꤣꤧ,’ ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ ꤊ꤫ꤢꤦ꤬ ꤟꤢꤩ ꤞꤤ꤭ ꤔꤢꤧ, ‘ꤡꤝꤢ ꤗꤢꤧꤗꤣꤧ꤭ ꤜꤢ꤭ꤋꤢꤧ꤭, ꤋꤚꤤ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ ꤥ꤬ ꤘꤣ ꤔꤣꤧ꤬,’ ꤢ꤬ ꤊ꤫ꤢꤦ꤬ ꤟꤢꤩ ꤞꤤ꤭ ꤟꤢꤨꤔꤣꤧ꤬ ꤕꤢ꤭ ꤗꤢ꤬ꤔꤢꤧꤚꤣꤧ꤬ ꤛ꤫ꤢꤦ꤬ꤢꤩ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ 22ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤟꤢꤨ ꤋꤚꤤ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭ ꤣꤧ꤭ꤒꤣ꤬ꤖꤚꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤟꤢꤨ ꤖꤚꤢꤩ꤬ꤖꤚꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤕꤢ꤭꤯ ꤞꤢꤧꤟꤢꤨ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤔ꤫ꤤ꤬ꤒ꤫ꤥ꤬ ꤊꤣꤧ꤭ꤘꤢꤦ꤬ ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤓꤥ꤭ꤟꤣꤧ ꤜꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤊꤢꤩ꤬ ꤗꤢꤩ꤬ꤡ꤫ꤢꤧ꤬ ꤟꤢꤩꤚꤣꤧ꤬, ꤢ꤬ ꤊ꤫ꤢꤦ꤬ ꤗꤢꤩ꤬ꤜꤥ꤭ꤓꤢꤧ꤬ ꤢ꤬ꤒꤢꤩ꤬ꤗꤢꤩ꤬ ꤋꤥꤒꤣꤧ꤬ꤊꤜꤤ ꤒꤣꤧ꤬ꤟꤢꤩ꤬ ꤔꤢꤧ ꤢ꤬ꤒꤢꤩ꤬ꤗꤢꤩ꤬ ꤒꤣꤧ꤬ꤕꤢ꤬ ꤋꤛꤢꤛꤢꤦ ꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯ 23ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮꤯ ꤙꤣꤧ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤓꤝꤢ꤭ꤓꤢꤧ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤣꤧ꤭ꤔꤣꤧ꤬, ꤠꤢꤧ꤭ ꤟꤢꤩꤏꤥ꤬ ꤥ꤬ꤔꤢꤩ꤬ ꤚ꤫ꤣꤧ꤬ ꤕ꤫ꤢꤩ꤬ ꤜꤢꤪ꤭ ꤓꤥ꤭ꤟꤣꤧ ꤞꤤ꤭ ꤕꤝꤢ꤭꤮ ꤒꤣ꤬ꤡꤣ꤬ ꤟꤣꤧ,” ꤛꤢꤩ꤬ꤏꤛꤢꤨ ꤟꤢꤩꤊꤢꤧ꤭ ꤟꤢꤨꤔꤣꤧ꤬꤯
ꤖꤚꤢꤩ꤬ꤜꤢꤨ꤬ ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤊ꤫ꤢꤦ꤬ ꤟꤢꤧ꤭ ꤕꤢ꤭
(ꤗꤢꤞꤢꤧ ꤂꤄:꤂꤉-꤃꤁, ꤜꤢꤨꤊꤢ꤬ ꤂꤁:꤂꤅-꤂꤈)
24ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤟꤢꤧ꤭ꤑꤢꤩ꤭ ꤕ꤫ꤥ꤬ ꤔꤢꤧ, “ꤙꤣꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤒꤣꤧ꤬ꤟꤢꤩ꤬ ꤡꤝꤢ ꤒꤣꤧ꤬ꤜꤝꤢꤓꤥ꤭ꤟꤣꤧ ꤕꤢ꤭ ꤔꤣꤧ꤬,
‘ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ ꤋꤤꤊꤢꤧ꤭ ꤒꤣꤧꤗ꤫ꤢꤪ꤬ ꤕꤢ꤭꤯#ꤛꤢ꤬ꤏꤛꤢꤛꤢ꤬ ꤁꤃:꤁꤀, ꤡꤛꤥ꤬ꤢꤩꤜꤢ꤬ ꤂:꤁꤀, ꤃:꤁꤅, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤆:꤁꤂ ꤜꤢꤩ꤭ ꤊ꤫ꤢꤦ꤬ ꤜꤤ꤭ ꤕꤢ꤬ꤒꤥ꤬ꤟꤣꤧ꤯ #ꤛꤢ꤬ꤏꤛꤢꤛꤢ꤬ ꤁꤃:꤁꤀, ꤛꤣ꤬ꤟꤢꤩꤎꤢ꤬ꤊꤢꤩꤜꤢ꤬ ꤃꤂:꤇ 25ꤏꤢꤩ꤬ ꤘꤣ ꤗꤢꤪꤜꤢꤩ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤜꤣꤧ꤬ꤒꤢ꤭ꤖꤚꤢꤪ꤬ꤊꤢꤧ꤭ ꤜꤢꤪ꤭ꤕꤢ꤭꤯ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤊꤣꤧ꤬ꤛꤤ꤬ꤊꤣꤧ꤬ꤛꤥ꤭ ꤜꤢꤪ꤭ ꤜꤢꤪ꤭ ꤗꤢꤪꤜꤢꤩ꤭ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯’#ꤡꤛꤥ꤬ꤢꤩꤜꤢ꤬ ꤂:꤁꤀
26“ꤓꤥ꤭ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤜꤢ꤭ꤋꤢꤧ꤭ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ꤜꤢꤧ꤬ ꤘꤣ ꤢꤪꤜ꤫ꤥ꤬ꤊꤜꤢꤩ꤭ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤥ꤬ꤜꤣꤙꤢ꤭ ꤡꤣꤧ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤔꤢꤧ ꤢ꤬ ꤒꤢꤩ꤬ꤒꤣꤧ꤬ꤚꤣꤧ꤭ꤘꤢꤨ꤬ꤒꤣꤧ꤬ꤚꤣꤧ꤭ꤓꤢꤨ꤭ ꤘꤣ ꤢ꤬ꤏꤝꤢ꤬ꤢ꤬ꤏꤢꤪ꤭ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯#ꤘꤢ꤬ꤔꤤ꤬ꤢꤩꤜꤢ꤬ ꤇:꤁꤃, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤁:꤇ 27ꤓꤥ꤭ꤚꤣꤧ꤬ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢ꤬ ꤊ꤫ꤢꤦ꤬ ꤔꤢꤪ꤭ꤟꤢꤧ꤭ꤜꤢꤧ꤬ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤕꤢ꤭ ꤚꤣꤧ꤬ ꤠꤢꤧ꤭ ꤊ꤫ꤢꤦ꤬ ꤔꤢꤪ꤭ꤡꤝꤢ ꤛꤢꤩ꤬ꤞꤤ꤭ ꤘꤣ ꤟꤢꤩ꤬ꤋꤢꤨ꤬ ꤜꤝꤤ꤭ꤔ꤫ꤢ꤬ ꤕꤢ꤭, ꤛꤢꤩ꤬ꤞꤤ꤭ ꤊ꤫ꤢꤦ꤬ ꤡꤢꤓꤢꤧ꤬ ꤡꤝꤢ ꤘꤣ ꤗꤢꤪꤘꤢ ꤊꤢꤧ꤭ꤏꤢ ꤒ꤫ꤥ꤬ꤘꤣ ꤗꤢꤪꤘꤢ ꤒꤣꤧ꤬ꤘꤢꤦ꤬ ꤕꤢ꤭ ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤡꤝꤢꤢꤩꤕꤜꤢꤪ ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤓꤥ꤭ꤟꤣꤧ ꤛꤢꤩ꤬ꤞꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯
(ꤗꤢꤞꤢꤧ ꤂꤄:꤃꤂-꤃꤅, ꤜꤢꤨꤊꤢ꤬ ꤂꤁:꤂꤉-꤃꤃)
28“ꤖꤛꤢꤔ꤫ꤤ꤬ ꤜꤢ꤭ꤋꤢꤧ꤭ ꤒꤢꤩ꤬ꤤ꤬ꤞꤝꤢ ꤘꤣ ꤊꤣꤧ꤬ꤘꤝꤤꤗ꤫ꤢꤪ꤬ ꤥ꤬ꤔꤣꤧ꤬꤯ ꤙꤣꤧ ꤢ꤬ꤖꤢꤧ꤭ ꤒꤣꤧ꤬ꤟꤢꤩ꤬ ꤘꤢꤧꤡ꤫ꤢꤩ꤬ꤓꤢꤧ꤬ ꤟꤣꤧ ꤚꤣꤧ꤬ ꤢ꤬ꤜ꤫ꤢꤩ꤬ ꤒꤣꤧ꤬ꤟꤢꤩ꤬ ꤘꤢꤧꤡ꤫ꤢꤩ꤬ꤓꤢꤩ꤬ ꤟꤣꤧ ꤢ꤬ꤋꤢꤩ꤭ꤔꤣꤧ꤬, ꤊ꤫ꤢꤩ꤬ꤊ꤫ꤢꤨ꤬ꤋꤢꤩ꤭ ꤖꤢꤦ꤬ꤟꤢꤧ꤭ꤒꤥ꤬ꤟꤣꤧ, ꤞꤤ꤭ ꤞꤤꤑꤢꤩ꤭ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ 29ꤟꤢꤨꤔꤣꤧ꤬ꤟꤣꤧ ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ꤟꤣꤧ ꤒꤢꤩ꤬ꤣꤧ꤭ ꤒꤣꤧ꤬ꤟꤢꤩ꤬ ꤓꤝꤢ꤭ꤓꤢꤧ꤬ꤟꤣꤧ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤞꤤꤑꤢꤩ꤭ ꤜꤢ꤭ꤋꤢꤧ꤭ ꤔꤢꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢ꤬#13:29 ꤖꤚꤢꤩ꤬ꤞꤤꤑꤢꤩ꤭ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤒꤣꤧ꤬ꤔꤢꤩ꤬ ꤜꤢ꤭ꤋꤢꤧ꤭ ꤔꤢꤧ ꤒꤢꤩ꤬ꤟꤢꤩꤙꤢꤩ꤬ꤣꤧ꤭ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ ꤟꤢꤩ꤬ꤋꤢꤨ꤬ ꤒꤣꤧ꤬ꤘꤢꤦ꤬ ꤖꤢꤦ꤬ꤓꤢꤧ꤬ ꤟꤣꤧ ꤟꤢꤨꤔꤣꤧ꤬꤯ ꤟꤢꤧ꤭ꤖꤢꤦ꤬ꤒ꤫ꤥ꤬ꤟꤣꤧ ꤘꤣ ꤊꤣꤧ꤬ꤘꤢ꤭ꤊꤢꤨ꤭ꤓꤢꤦ꤭ ꤟꤣꤧ ꤔꤤ꤮꤯ 30ꤠꤢꤧ꤭ ꤟꤢꤩꤜꤥ꤭ꤡꤢꤪꤡꤢꤪ꤮ ꤡꤣꤧ ꤞꤤ꤭, ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤞꤣꤧ꤭ꤖꤚꤢꤩ꤬ ꤊꤢꤨꤔ꤫ꤢꤧ꤬ꤣꤧ꤭ꤒꤣ꤬ꤓꤢꤦ꤭ ꤒꤣꤧ꤬ꤟꤢꤩ꤬ ꤞꤣꤧ꤭ꤜꤢꤪ꤭ ꤒꤢꤧ꤬ꤜꤢ꤭ꤟꤤꤒꤥ꤬ ꤔꤣꤧ꤬, ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤜꤢꤪ꤭ ꤕꤢ꤭꤯ 31ꤗꤢꤪꤋꤢꤨ꤬ ꤔꤢꤧ ꤟꤢꤩ꤬ꤋꤢꤨ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕꤢ꤭꤯ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕ꤫ꤢꤩ꤬ ꤒꤣꤧ꤬ꤋꤢꤧ꤮ ꤒꤥ꤬꤯
(ꤗꤢꤞꤢꤧ ꤂꤄:꤃꤆-꤄꤄)
32“ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭, ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ꤏꤣꤧꤢ꤬ꤋꤢꤩ꤭ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭ꤔꤣꤧ꤬ ꤢꤨ꤭ ꤞꤤꤑꤢꤩ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤒꤣꤧ꤬ꤔꤢꤩꤖꤢꤨ ꤥ꤬ ꤘꤣ ꤗꤢꤪꤋꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ ꤙꤢꤩ꤬ꤙꤢꤩ꤬ ꤢ꤬ ꤞꤤꤑꤢꤩ꤭ ꤒꤥ꤬꤯ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤔꤢꤧ ꤢ꤬ꤔ꤫ꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤡꤣꤧ꤮ ꤙꤢꤩ꤬ꤙꤢꤩ꤬, ꤢ꤬ ꤞꤤꤑꤢꤩ꤭ ꤒꤥ꤬ꤒꤥ꤬꤯ ꤢ꤬ ꤞꤤꤑꤢꤩ꤭ ꤖꤢꤧꤒꤢꤦ ꤠꤢꤧ꤭ꤖꤢꤩ꤭ ꤒꤣ꤬ꤖꤚꤢꤩ꤬ ꤖꤢꤧ꤯#ꤗꤢꤞꤢꤧ ꤂꤄:꤃꤆ 33ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬, ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤕꤢ꤭ ꤙꤢꤪꤋꤢꤩ꤭ꤒꤢꤩ꤭ ꤔꤣꤧ꤬ ꤞꤤ꤭ ꤞꤤꤑꤢꤩ꤭ ꤒꤥ꤬꤯ 34ꤣꤧ꤭ꤗꤢ꤬ ꤢ꤬ꤞꤢꤧꤔꤢꤧ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤘꤣ ꤢ꤬ ꤊ꤫ꤢꤦ꤬ꤚꤢꤩ꤭ ꤓꤢꤩ꤬ꤡꤝꤢ ꤊꤜꤢꤧ ꤘꤣ ꤓꤣꤧ꤭ꤊ꤫ꤢꤩ꤬ ꤢ꤬ꤚꤥ꤬ ꤒꤣ꤬ꤊ꤫ꤢꤩ꤬ ꤚꤣꤧ꤬ ꤢ꤬ ꤔꤢꤪ꤭ꤗꤢꤧꤔꤢꤪ꤭ꤡꤢꤧ꤬ꤊꤢꤧ꤭ ꤢ꤬ꤟꤤ꤬ ꤔꤢꤧ ꤢ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤓꤢꤩ꤬ꤡꤝꤢ꤯ ꤢ꤬ ꤘꤣꤧꤒꤢ꤭ꤊꤢꤧ꤭ ꤋꤥꤘꤢꤦ꤬ ꤛꤢꤩ꤬ꤞꤤ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤢ꤬ꤒꤢꤩ꤬ꤗꤢꤩ꤬ ꤚꤣꤧ꤬ ꤢ꤬ ꤟꤢꤩꤊꤢꤧ꤭ ꤖꤚꤢꤩ꤬ꤥ꤬ꤕ꤫ꤢꤪ꤬ ꤊꤣꤧ꤬ꤘꤢ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤔꤢꤧ ꤢ꤬ ꤊ꤫ꤢꤦ꤬ ꤥ꤬ꤕ꤫ꤢꤪ꤬ ꤞꤢ꤬ꤞꤢꤩ꤭ꤏꤢꤦ꤬ ꤟꤢꤨꤔꤣꤧ꤬꤯#ꤜꤢꤨꤊꤢ꤬ ꤁꤂:꤃꤆-꤃꤈
35“ꤟꤤ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤊꤢ꤬ꤋꤛꤢ꤭ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭ ꤔꤣꤧ꤬ ꤞꤤ꤭ ꤞꤤꤑꤢꤩ꤭ ꤒꤥ꤬꤯ ꤗꤢ꤬ ꤢ꤬ ꤊꤢ꤬ꤋꤛꤢ꤭ ꤏꤢ꤮ ꤗ꤫ꤢꤪ꤬ꤟꤢꤩ ꤕꤢ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤚꤣꤧ꤬ ꤗꤢ꤬ ꤢ꤬ ꤊꤢ꤬ꤋꤛꤢ꤭ ꤏꤢ꤮ ꤗ꤫ꤢꤪ꤬ꤔꤢꤩ꤬ꤋꤢꤩ꤭ ꤕꤢ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤚꤣꤧ꤬ ꤗꤢ꤬ ꤢ꤬ ꤊꤢ꤬ꤋꤛꤢ꤭ ꤏꤢ꤮ ꤏꤢ꤭ ꤤ꤬ꤢꤨ꤬ ꤕꤢ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤚꤣꤧ꤬ ꤏꤢ꤮ ꤗ꤫ꤢꤪ꤬ꤜꤤ꤭ꤋꤢꤩ꤭ ꤕꤢ꤭ ꤟꤢꤧ꤭? ꤔꤣꤧ꤬, ꤞꤤ꤭ ꤞꤤꤑꤢꤩ꤭ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤞꤢ꤬ꤞꤢꤩ꤭ꤏꤢꤦ꤬ ꤜꤢ꤭ꤋꤢꤧ꤭ ꤔꤤ꤮꤯ 36ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤟꤤ꤬ꤙꤢꤧ꤬ꤡꤢꤩ꤬ ꤊꤢꤩ꤬ ꤊꤢ꤬ꤒ꤫ꤥ꤬ꤖꤚꤢꤦ ꤕꤢ꤭ ꤚꤣꤧ꤬ ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤒ꤫ꤢꤧ꤬ ꤞꤤ꤭ ꤥ꤬ꤗꤣꤧ꤭ꤒꤣꤧ꤬ꤕꤢ꤬ ꤒ꤫ꤢꤧ꤬ꤗꤢꤩ꤬ ꤔꤣꤧ꤬, ꤥ꤬ ꤞꤢ꤬ꤞꤢꤩ꤭ꤏꤢꤦ꤬ ꤜꤢ꤭ꤋꤢꤧ꤭ ꤔꤤ꤮꤯ 37ꤒꤢꤩ꤬ ꤘꤣ ꤠꤢꤧ꤭ ꤟꤢꤩ ꤕ꤫ꤢꤩ꤬ ꤞꤤ꤭ꤣꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬, ꤠꤢꤧ꤭ ꤟꤢꤩꤒ꤫ꤥ꤬ꤕ꤫ꤢꤩ꤬ ꤊꤣꤧ꤭ꤜꤢꤪ꤭ ꤢꤨ꤭ ꤕꤝꤢ꤭ꤖꤚꤢꤩ꤬, ꤟꤢꤨꤔꤣꤧ꤬ꤚꤣꤧ꤬ ‘ꤥ꤬ꤕ꤫ꤢꤪ꤬ ꤞꤢ꤬ꤞꤢꤩ꤭ꤏꤢꤦ꤬ ꤜꤢ꤭ꤋꤢꤧ꤭ ꤔꤤ꤮꤯’”
Currently Selected:
ꤗꤢ꤬ꤊꤢꤨ 13: eky-Kali-MM
Highlight
Share
Copy
Want to have your highlights saved across all your devices? Sign up or sign in
Wycliffe USA
