Luke 18

1Ma nia ṉata sulia si tarifula isada uria si kula eri, so e lea na imole keki foa ṉado, ma kesi feda faisia; 2Ka una eri, Tee wane ni kotu e to i la tee toaa susu, ne ai si mau atha God, me ai si madoa ta wane: 3Ma tee gwa oru e to i la toaa susu eri; ma nia kai fufula isana, ka una eri, Oko soboṉi nau fafia maalimae nau. 4Ma nia e ai si makee ilia: ma iburiana nia ka sorea i ruruuna, Kwasi mau mena atha God, ma kwasi madoa ta wane; 5Sui uria na gwa oru nei kai faafeda nau, kwai soboṉi nia, ada kai susuu fafi nau sulia fula ṉado lana. 6Ma ṉa Lord ka sorea, Roṉoa fasi si do na wane ni kotu eri ne ai si kokoto e sorea. 7Ma tha God ka ai si soboṉia toa ne filida, na keki ’ai thatana afa thato mafa rodo, nia ka to mena asi lio ne ai si rakeiri fofoa sulida? 8Nau ku soree isamulua, nia kai soboṉida si tau lau. Ma sui lalae Kaluwane imole kai fula, nia kai rikia fitooa ana fanua nei iano?

9Ma nia ṉata asi tarifula nei isana tei imole na kera manata ṉado ani kera i talaada na kera kokoto, ma kera fare faekwa ana toa eeta: 10Ro nonii wane kera tae uri la biu baita tha God fasi keko foa; ta wane ṉa Farisi, ma ruana wane ṉa wane ni ṉali lana takisi ki. 11Farisi eri e takwe kai foa una eri ana i talaana, God ae, ku sore lea tale oe, na nau kwasi ’uria oroṉana toa, toa na keki laulau, toa na kesi kokoto, toa na kera oe, ma wane nei ni ṉali lana takisi ki mena e ai kwasi ’uria. 12Nau ro fa abu la ana faṉa afa uiki; ku falea taṉafula asi do ki sui bana na nau ku alua. 13Ma wane eri ni ṉali lana takisi ki e takwe da mai, ma nia boro so maana mena ka lalakwee tafoa uri thalo lo, ma ka kumua ruruuna, ka una eri, God ae, oko tatakomi nau wane ku abula taa. 14Nau ku soree isamulua, Wane eri e sifo uri biu nia kera sorea nia kokoto, ma ruana wane e ai: uria ni tei na kai tala faainoto nia i talaana keki faafaekwa nia; ma wane na kai tala faafaekwa nia i talaana keki faainoto nia.

15Ma kera talaia lau bomai wela faekwa ki isana, fasi nia kai suada: ma si maṉa na toa ne toleda kera rikia, keka soreda: 16Ma tha Jesus e ailida isana, ka una eri, Alamatania kala wela keka lae mai isaku, ma musi lufida: uria na toa na kera ’urida kera ni ana tooa tha God. 17Mamana ku soree isamulua, Ni tei bana ne ai si ṉalia tooa tha God mala ta wela faekwa, e ai dodoloa nia ka fulatoona.

18Ma tee wane gwauwai, e soetoona, ka una eri, Wane ni kwaifamanatai ae, oe na abula lamu e lea, si ta na kwai ilia fasi kwai fulatoona marukia tatha? 19Ma tha Jesus ka soree isana, Uria ta oko alaṉi nau so ku abula lea? e ai ta wane si abula lea, tee tha God boo. 20O thaitoomana si ṉata fifi ba ki, Osi oee, Osi thathauwane, Osi bibili, Osi lolole fafia ta imole, Fare baita ana maka oe ma thainamu. 21Ma nia ka sorea, Si do eki sui bana ku adede sulia ita na ku faekwa. 22Ma si maṉa na tha Jesus e roṉoa si do eki, nia ka soree isana, Tee do e ai u faisi oe: oki usi asi do oe ki sui boo no rikidaki, ma oki toliṉia faisia toa na kesi rikii do, ma toto oki rikia ogogonia i thalo: ma lae mai, oki lae iburiaku. 23Ma si maṉa nia roṉoa si do eki, nia ka liodila faamau; uria nia rikia do oro. 24Ma si maṉa na tha Jesus e rikia na nia liodila faamau, nia ka sorea, E afetai faamau sa toa na kera rikii do keki kotho ana tooa tha God! 25E sukani afetai ana kamela kai tatha i maana ogila, me afetai faamau ana wane ne rikii do kai kotho ana tooa tha God. 26Ma toa na kera roṉoa keka sorea, Ni tei fetei keki faamarukia? 27Ma nia ka sorea, Si do na imole si talaana ili lana tha God e talaana. 28Sui tha Pita ka sorea, Rikia fasi, kamilia mili akwasia si do ki sui bana, ma mika lae iburiamu. 29Ma nia ka soree isada, Mamana ku soree isamulua, E ai ta wane ne akwasia maafera nia, mado maka nia ma thainana, mado doo rana kera, mado kwaina, mado wela nia ki, inunufana tooa tha God, 30Na toto si ṉalia do oro asi maṉa eri fuliṉana do ne akwasidaki, ma asi kada na ni u marukia tatha.

31Ma nia ka ailia akwala ma ro wane eki isana, ma ka sorea isada, Rikia fasi, kuki tae uri Jerusalema, ma si do ba ki sui bana na porofeta ki kera keda sulia Kaluwane imole kai mamana. 32Uria na keki fale nia ifana Jenetaele ki, keki aefara iana, keka ṉaṉasuala uri nia, ma keka ṉisufia: 33Ma keki kwae tataria ana suila ma keki thauṉi nia: ma ana ula fa boṉi nia kai tatae lau. 34Me ai kesi thaitoomana maalutana ta si asi do eki; ma si ṉata eri e thaufuni faisida, ma kesi thaitoomana si do na kera soredaki.

35Ma lalae mai, si maṉa ne lae mai karaṉia i Jeriko, tee nonii wane maane rodo e ono i ninimana tale, kai gani: 36Ma nia roṉoa malului wane kai tatha, ka soetoona i maalutana si do eri. 37Ma kera faaroṉo nia, na tha Jesus, wane i Nasaretha, kai tatha. 38Ma nia ’ai, ka una eri, Jesus, kaluwane tha Defeta, oki tatakomi nau. 39Ma toa na kera tatha inao keka sore nia, fasi nia kai bona: ma nia ka bii ’ai faamau, Kaluwane tha Defeta, oki tatakomi nau. 40Ma tha Jesus e takwe ṉado, ka sorea keki talai nia mai isana: ma si maṉa ne fula karaṉi mai, nia ka soetoona, 41Ka una eri, Si ta no thathamia kwai ilia ani oe? Ma nia ka sorea, Lord, ku thathamia kwai lio. 42Ma tha Jesus ka soree isana, Oki lio boo: fitooa oe e faamaruki oe. 43Ma si maṉa eri u boo nia ka lio, ma ka lae iburiana, kai taṉoa tha God: ma toa eki sui bana, si maṉa na kera rikia, keka fare inoto atha God.

Currently Selected:

Luke 18: MLU1949

Highlight

Copy