Luke 12

1Asi maṉa eri, si maṉa na kudui wane ana malului wane eri kera figu mai, adedea keka uri kwailiu fafo aeda, nia ka sorea totonao isana toa nia ne toleda, Muki fia lefena Farisi ki, na ṉa olodola la. 2Uria ne ai ta si do kera thu agwa fafia, na toto kesi fatai nia: me ai ta si do kera thaufunia, na toto kesi thaitoomana. 3Mania atona bana ta si do na mulu sorea i la maerodo toto keki roṉoa ana lalaa la; ma si do na mulu fuaroṉania i la kadee biu ne banitei ki toto keki ’ai kwaitalofi ani ai fafo biu ki. 4Ma nau ku soree isamulua toa na muki ado bi nau, Musi mau ana toa na keki thauṉia seena imole, ma iburiana e ai ada ta si do lau na kera thaitoomana ili lana. 5Nau kwai faaroṉo kamulua ani nia na muki mau ania: Muki mau ani nia, na iburiana ne thauwane sukwaia ni ania uria ui lana i la hell; iu, nau ku soree isamulua, Muki mau ania. 6Ta na sa lima geraa ki keka usi ania uria fai migee lifoia? me ai ta do iada kesi liodora ania inaofatha God. 7Ma ifuna gwaumulua mena kera teemai nia ka sui. Mania musi mau: kamulua mulu lea ka tatha ana geraa oro ki. 8Ma nau ku sorea lau boo isamulua, Ni tei bana na kai faamamane nau inaofana imole, nia lau boo Kaluwane imole kai faamamane nia inaofana angel tha God ki: 9Ma wane na kai sorea e dora ani nau inaofana imole, toto keki sorea kera dora ani nia inaofana angel tha God ki. 10Ma ni tei bana na kai sorea ta si ṉata taa seena Kaluwane imole, keki manata lubea; ma wane na kai ṉata ana faretoliṉi lana tha Spirit Abu, e ai kesi manata lubea. 11Ma lalae keki talai kamulua isana biu ni ofu la ki, ma wane inoto ki, ma toa gwauwai ki, musi laloma fufuli uria ṉata la na toto muki ṉata ania ma si do na muki luuda ania, mado si do na muki sorea: 12Uria na tha Spirit Abu kai to’oa asi kadee maṉa eri si do ne lea fasi muki sorea.

13Ma tee wane ana toa eki e soree isana, Wane ni kwaifamanatai ae, oko ṉata isana dooraku kai ukalia si do na maka kamarea e akwasia ifamarea. 14Ma nia ka soree isana, Wela ena, ni tei ne alu nau kwai wane ni kotu mado wane kwai ukalia si do ki faisi kamulua? 15Ma nia ka soree isada, Muki fia, ma muki beta kamulua faisia thathami lana ta tee si do mena asi do kera ki: uria na marukia imole e ai si ni ana do oro ne riki daki. 16Ma nia ka ṉata sulia si tarifula isada, ka una eri, Gano tee wane ne rikii do, do oro lea e fula mania: 17Ma nia ka onotoona si do ki i ruruuna, ka una eri, Si ta na kwai ilia, uria ne ai aku ta si kula ana ofu lana foee ai nau ki? 18Ma nia ka sorea, Si do kwai ilia neri: Nau kwai ogea biu ni aludo nau ki, ma kwai kasia do ne baita ka tatha ki; ma kwai alua foee ai nau ki sui bana bia do nau ki iei. 19Ma kwai soree isana maṉoku i talaaku, Do ae, o alua naa do oro ki teo naa uria fa ṉali oro ki; to namu faisia ra la, oko faṉa, oko kuu, oko seethathala. 20Ma tha God ka soree isana, Wane oewanea, afa rodo nei keki sorea oki oli fafia maṉomu; ma si do eki no alu thathai ania, toto si do ni tei ki naa? 21To lana lau boo wane ne taiṉei nia ogogonia ifana i talaana, me ai si rikii do atha God.

22Ma nia ka soree isana toa nia ne toleda, Mania ku soree isamulua, Musi laloma fufuli sulia maṉomulua, uria si do na toto muki ania; ma sulia seemulua ka ai boo, uria si do na toto muki afisia. 23Si maṉo e lea ka tatha ana faṉa, ma seena imole e lea ka tatha ana maku. 24Muki manataia fasi siṉeo ki, e ai kesi afusido, me ai kesi kwaia unii do ne rafo; ne ai ada ta biu ni alufaṉa me ai ada ta biu ni aludo; ma tha God kai thareda bana: ni kamulua musi lea ka tatha ana thaaro ki? 25Ma ni tei iamulua sulia nia kai laloma fufuli kai thaitoomana lado lana tee kadee aba ana baita lana? 26Mania mada se ai musi farana ili lana mena si do ne faekwa asia boo, uria ta na muki laloma fufuli sulia si do ba ki? 27Muki manataia fasi ṉa rakao ki, tae lana: e ai kesi ulafu, me ai kesi thauwai nia maku; ma sui ku soree isamulua, Tha Solomona mena ana inotoa nia sui bana e ai si tooni ’uria ta do ana do eki. 28Mania mada sa tha God kai faatooni una eri ana lolo na kai to bana itaraena i la ra, ma usuwadi keki u ania i la era ni naare la; nia ka ai si falea tooni ne lea ka tatha ifamulua, toa na fitooa kamulua e faekwa? 29Ma musi rofe uria si do na toto muki ania, ma si do na toto muki kuufia, ma musi fitala. 30Sulia si do eki sui bana toa ana fanua eki ana fanua nei iano keki rofe buriana: ma Maka kamulua e thaitoomana na muki rofea si do eki. 31Muki rofe uria tooa tha God, ma si do eki sui boo keki safua bia ifamulua. 32Musi mau, aini sifi na musi oro; uria na Maka kamulua e to’oa kai falea tooa eri ifamulua. 33Muki usi asi do na mulu alua, ma muki tona faledo ifana toa na kesi rikii do; muki thauwai nia wai ni alumalefo ifamulua na toto si lafu, ṉa ogogonia i thalo lo ki mai na toto si sui, si kula na wane na kai bili si fula karaṉia, ma fufuru si labatania. 34Uria na si kula na ogogonia kamulua ni iei, ruruumulua ka ni kula eri lau boo.

35Muki kania liitamulua, ma laeta kamulua ki kai tharu; 36Ma ni kamulua muki ’uria wane ki na keki maasia wane inoto kera, si maṉa nia kai oli mai faisia fafaṉa ana lumaa; fasi, lalae nia fula kai kikidi, keki ifinia si maṉa eri u boo. 37Lea iada, wane ni ra eki, na wane inoto eri lalae e fula kai rikida keki tharai: mamana ku soree isamulua, nia kai kania liitana, ma kai adea keki teoreri isana faṉa la, ma kai fula kai ra ana fale la iada. 38Ma mada sa nia kai fula i la initoona rodo, mado si maṉa kukua ka ’ai, ma ka rikida keki una eri, kai lea iada, wane ni ra eki. 39Ma muki thaitoomana si kula eri, mada sa wane ana biu e thaitoomana si kadee maṉa na wane na kai bili kai fula, do kai tharai uria, ma ka ai si alamatania keki ogea biu nia. 40Mania ni kamulua muki kwaimaakwali lau boo: uria na Kaluwane imole kai fula asi kadee maṉa na musi manatatoona.

41Sui tha Pita ka soree isana, Lord, o ṉata asi tarifula eri uri kamilia ni bana, mado isana toa nei sui? 42Ma ṉa Lord ka sorea, Mania nifenia wane eri na kera takofalea asi do ki, ne mamana ma liona ka too, na wane inoto nia kai alu nia kai gwauwai ana toa na biu nia, fasi kai falea moriṉa kera asi maṉa ni fale lana? 43Lea iana, wane ni ra eri, na wane inoto nia lalae e fula kai rikia kai ade una eri. 44Mamana ku soree isamulua, nia kai alu nia kai gwauwai asi do nia ki sui bana. 45Siu mada sa wane ni ra eri kai sorea i ruruuna, Wane inoto nau kai to, e ai si lae u mai; ma kai kwaea wane ni ra ki ma kini ni ra ki, ma kai faṉa ma kai kuu ka bula nia; 46Wane ne inoto ana wane ni ra eri kai fula afa boṉi na nia ka ai si fia bana, ma ana kadee maṉa ne ai si thaitoomana, ma kai kwai nia ana ro kadee do, ma kai falea si kula thatana kai to bia toa na kera fitala. 47Ma wane ni ra eri, ne thaitoomana si do na wane inoto nia e thathamia, me ai si alua si do si to kwaithathai, me ai si ade sulaania si do na wane inoto nia e thathamia, keki kwae oro ana seena kai aliliboa; 48Ma wane ne ai si thaitoomana bana, ma ka ilia si do ne farana keki kwae nia fafia, keki kwaea ana ṉada fa kwae la seena kai aliliboa. Uria ni tei bana na kera falea do oro ifana, ni nia keki sorea kai oli fafia do oro: ma wane na kera takofale nia asi do oro, ni nia keki soetoona uria do oro.

49Nau ku fula uria kikira lana era fafia fanua nei iano; ma kwai ade ufita, mada se tharu naa? 50Ma nau akua tee babataesi la keki babataesi nau ania; ma kera alu nau asi kula ne sisikofi faamau maasia si maṉa na kai mamana! 51Manatamulua soso ku fula uria fale lana enenoa ifana fanua nei iano? Nau ku faaroṉo kamulua, E ai; ku fula uria fale lana ila la ni ana: 52Uria na, too asi maṉa eri ka lae, lima imole keki to i la tee maafera keki ila, ta ulu ei keki ila bia ta ro ai, ma ta ro ai keki ila bia ta ulu ei. 53Wane ana wela kai ila bia kaluwane nia, ma kaluwane kai ila bia maka nia; ai ana wela kai ila bia thari nia, ma thari kai ila bia thainana; kini kai ila bia kwaina kaluwane nia, ma kini fuṉao kai ila bia thainana kwaina.

54Ma nia ka sorea lau boo isana toa eki, Si maṉa na mulu rikia datha kai tae mai ibali su lana thato, si maṉa eri u boo muki sorea, Dani kai aru; ma kai mamana. 55Ma si maṉa na mulu rikia thauthau i mutana kai tatha, muki sorea, Thato kai thato fifi; ma kai mamana. 56Kamulua toa muki olodola, mulu thaitoomana olotoona lana seena fanua nei iano ma thalo lo; ma sui nifana ade lana musi thaitoomana olotoona lana si maṉa eri? 57Iu ma uria ta ni kamulua i talaamulua musi thaitoomana talisi lana si do ne kokoto? 58Si maṉa noki lae bia maalimae oe isana wane inoto, oko seemabe sula tale fasi nia ka lukasi oe; ada nia kai aba oe isana wane ni kotu, ma wane ni kotu kai fale oe ifana wane ni ili lana si do ki, ma wane eri kai sui oe uri la lokafo. 59Nau ku soree isamu, E ai dodoloa oko kotho faisia kula eri, oko to maasia si maṉa no fale teefau ana malefo na kera alaṉi oe ki mania, tee migee lifoia mena si teo.

Currently Selected:

Luke 12: MLU1949

Highlight

Copy