Jone 16

1Si do eki nau ku soree isamulua, ada keka faataofai kamulua. 2Keki arasi kamulua muka lae faisia biu ni ofu la ki: iu, si kadee maṉa lalae kai fula, na ni tei bana na kai thauṉi kamulua manatana do sa kai ra ifatha God. 3Ma si do eki toto keki ilia iamulua, uria na kera dora ana ṉa Maka, ma ni nau. 4Sui si do nei ki nau ku soree isamulua, fasi lalae kadee mana kera e fula naa, muki onotoona na nau ku faaroṉo kamulua naa. Ma si do nei ki nau e ai kwasi soree isamulua ana thafali la, uria ni nau ku to isamulua. 5Ma kwai lalae naa sani nia ne arasi nau mai; ma ta wane iamulua si soetooku, Ifei noki lae uria? 6Sui sulaania nau ku sorea si do nei ki isamulua, liodila ka fuṉu ana ruruumulua. 7Una ena mena ku faaroṉo kamulua asi do mamana; Do e lea ifamulua na nau kwai lae: uria na mada sa kwasi lae, nia na kai faainamaruki kamulua sa ka lae mai isamulua e ai; sui mada sa kwa lae, kwai arasi nia mai isamulua. 8Ma ni nia, lalae e fula, kai faaseenonia fanua nei iano sulia abula taa la, ma sulia kokoto la, ma sulia kotu kokoto la: 9Sulia abula taa la, uria ne ai kesi fitooku: 10Sulia kokoto la uria na nau kwai lae isana ṉa Maka ma ka ai musi riki nau lau; 11Sulia kotu kokoto la, uria do ne inoto i fanua nei iano Wane ni Kotu e ṉata naa suli nia. 12Akua do oro ki ni u sa kwai soree isamulua, sui mulu dora ana ṉali lana si maṉa eri. 13Ma sui lalae ni nia, ṉa Spirit mamana, ka fula naa, nia kai fatai nia tala isamulua asi do ki sui bana ne mamana: uria nia toto si ṉata i talaana; si do eki sui bana na nia kai roṉoa, do eki na kai ṉata sulia: ma nia kai fatai nia si do eki isamulua na toto kai fula. 14Nia kai faainoto nau: uria nia kai ṉali asi do nau ki, ma kai fatai nia isamulua. 15Si do ki sui bana na ṉa Maka kai rikia, do nau ki lau boo: mania nau ku sorea, Nia kai ṉali asi do nau ki, ma kai fatai nia isamulua. 16Ta kasi maṉa faekwa, ma kamulua e ai musi riki nau; sui ta kasi maṉa faekwa lau, ma muki riki nau lau, uria ni nau kwai lae isana ṉa Maka. 17Mania tei wane ana toa nia ne toleda kera ṉata kwailiu uri kera, keka una eri, Ta neri ne soree isakulua, Ta kasi maṉa faekwa, ma kamulua e ai musi riki nau; sui ta kasi maṉa faekwa lau, ma muki riki nau lau: ma, Uria ni nau kwai lae isana ṉa Maka? 18Mania kera sorea, Ta neri na nia sorea, Ta kasi maṉa faekwa? Kulu dora ania maalutana si do nia kai sorea. 19Tha Jesus ka thaitoomana ua kera thathamii soetoona uria, ma ka soree isada, Muki soetoomulua kwailiu uria si do eri, na nau ku sorea, Ta kasi maṉa faekwa, ma kamulua e ai musi riki nau; sui ta kasi maṉa faekwa lau, ma muki riki nau lau? 20Mamana, mamana, ku soree isamulua, Kamulua toto muki tatao ma muki ilia faaṉiṉia, ma fanua nei iano kai seethathala: liomulua kai dila, ma toto keki taala liodila kamulua ana seethathala la. 21Si maṉa na kini to ana fiwela la liona ka dila, uria na si kadee maṉa nia e fula naa: sui si maṉa nia kwalafia naa wela eri, e ai si onotoona naa seefia baita eri, sulia seethathala la uria na wane e futa uri la fanua nei iano. 22Mania si maṉa eri liomulua ka dila: sui toto kwai riki kamulua lau, ma ruruumulua kai seethathala, ma seethathala la kamulua eri e ai ta imole si ṉalia faisi kamulua. 23Ma afa boṉi eri ka ai musi soetooku uria ta si do. Mamana, mamana, ku soree isamulua, Mada sa muki gania ṉa Maka uria atona bana ta si do ana thataku, nia kai falea ifamulua. 24Lalae mai ka fula i maṉa eri musi gania u ta si do ana thataku: gani, ma muki ṉali, fasi muki fuṉu ana seethathala la.

25Si do eki ku soree isamulua ana tarifula ki: si kadee maṉa lalae kai fula, na nau e ai kwasi ṉata lau isamulua ana tarifula ki, kwai faaroṉo fatai ani kamulua ana ṉa Maka. 26Afa boṉi eri muki gani ana thataku: ma nau e ai kwasi soree isamulua, na nau kwai gania ṉa Maka uri kamulua; 27Uria na ṉa Maka talani nia kai liothau ani kamulua, sulaania mulu liothau ani nau, ma mulu fitoo na nau ku lae mai ku ita atha God. 28Nau ku lae mai ku ita ana ṉa Maka, ma ku fula ana fanua nei iano: sui kwai akwasia lau fanua nei iano, kwai lae kau isana ṉa Maka. 29Toa nia ne toleda kera soree isana, Lio fasi, si maṉa eri o ṉata fatai, e ai osi ṉata ana ta tarifula. 30Si maṉa eri mili thaitoomana naa no thaitoomana maalutana si do ki sui bana, ma osi rofea ta wane kai soetoomu: uria si do nei mili fitoo no lae mai oko ita atha God. 31Tha Jesus e luuda, ka una eri, Muki fitoo naa si maṉa eri? 32Rikia fasi, kadee maṉa eri karaṉi kai fula, iu, e fula naa, na keki adea fasi muki akota, ta wane iamulua uria si do nia ki, ma ta wane uria si do nia ki, ma muki akwasi nau kwai to tee nau: ma sui e ai kwasi to tee nau, uria na ṉa Maka kai to bana isaku. 33Si do nei ki ku soree isamulua, fasi amulua enenoa ani nau. Ana fanua nei iano taa la kai thauṉi kamulua: sui kai lea bana iamulua; si nau e tatha naa fafia fanua nei iano.

Currently Selected:

Jone 16: MLU1949

Highlight

Copy