Luke 13

Mesepol A Bebnekan Tayoy Basol Tayo

1Nontan a mantotoros Jesus iren man, chimag na echom a too i maypangkep iren ma i-Galilee a inpabonon Pilate iy maramen chiyan itangdal i animal cha Afo Chiyos. 2Inbagen Jesus cha si-kara i “Kin jo i sema basol iren ma toon inpabonon Pilate, chakel pay iy say sema iren basol na echom a i-Galilee tep etiy iren inges to man? 3Enchi! Nem konen kod si-kayo i no eg jo bebnekan i basol jo, metiy kayo ngon emiin et maysi-jan kayod Afo Chiyos na ingked ingka. 4Et sema ngon sampolo tan gwalon toon etiy cha Siloam cha Jerusalem nonta etongba ma ekayang a baliy cha si-kara, kin jo i sema iren basol cha, chakel pay iy say sema iren basol na echom a toon man-iiyan ngod Jerusalem? 5Enchi! Nem konen ko mowan cha si-kayo i no eg jo bebnekan i basol jo, metiy kayo ngo et maysi-jan kayod Afo Chiyos na ingked ingka.”

Sema Arig Maypangkep Na Kejow A Fig A Nat Mandawes

6Et in-istoriyen Jesus iya arig a kigwan to i “Gwariy sa-kin toon iyantanem na kejow a fig cha garden to na grape. Idi sa-kin akow, kimowan a meni-neng no iyandawes ma, nem nagwariy sipol to. 7Et kigwan tod ma toon naengajo na garden i ‘Matham, tedon tawen malen nakimowanak a naeni-neng no gwariy dawes niya kejow, nem nagwaren polos i sipol ko. Tongbam. Towan osaliy pithek a metaneman na echom.’ 8Nem sema naengajo na garden, kigwan to i ‘Afo, mansesked kiya na sa-ki pay a tawen say sokdayen koy sengeg to et abonoan ko. 9Et no mandawes no sa-ki din tawen, mapteng, nem no nat mandawes, itoloy mon tongbaen.’ ”

Inpamapteng Jesus I Biin Ebo-kong Nonta Timpo Na Sabbath

10Idi sa-kin Sabbath, mantotoros Jesus cha sa-kin synagog. 11Gwared man i biin inpasahit na dimonyo na sampolo tan gwalon tawen. Ebo-kong et nat mahaakgwat a kosto. 12Idi sini-neng Jesus, tiya-gway ton kigwan to i “Ahi, iyaydibchi ka wed ta digat mo.” 13Et insagpat toy diwa thod si-katho, et mahaakgwat men diritso et chijaw tos Afo Chiyos. 14Nem sema afo na synagog, bimonget a pasiya tep inpamapteng Jesus iwa bii nonta Sabbath a akow na pan-inana na Hodjos. Et kigwan to ired ma too i “Enem komen akow i pan-obda thayo. Seman koma iriy akow a ikowan jon manpamapteng, nat Sabbath.”

15Et kigwan Jesus i “Si-kayon naengibili-biling a naengamag na mapteng! No Sabbath, nat ibolos jon emiin ayay baha tan kabajo yo et ibalnay jod ma pan-inoman cha? 16No setan ngarod, seja biin polin Abraham a singen biyalod Satanas na sampolo tan gwalon tawen, nat maybolos ngo aya na Sabbath?” 17Idi kigwan Jesus iwan, emiin a naengontred si-katho, ebaingan ira, nem emiin a too, kaimdeng ira kagol niwa emiin a kaskasdaaw a naima-imag to.

Sema Arig Maypangkep Na Bothil Na Mostard

(Matthew 13:31-32; Mark 4:30-32)

18Kigwan pay Jesus i “Nengo wiy kay-ingesan na pantorayan Afo Chiyos? Nengo emoy kay-arigan ko? 19Inges toy bothil na mostard a intanem na tood garden to. Bimadeg, et say banay to, inges toy kejow, et naengamag iriy titit na ogong ched panga tho.” #13:19 Sema mostard cha ili na Hodjos, ba-ba-degan iy say sema iren naiyaytanem chiya Pilipinas. Mebedin a naiyabot toy esolok a tedon mitro.

Sema Arig Maypangkep Na Para Debag Na Tinapay

(Matthew 13:33)

20Kigwan mowan Jesus i “Nengoy iarigan ko na pantorayan Afo Chiyos? 21Inges toy para debag a indaok na biid chakel a arina et say ondebag a emiin.”

Sema Ekofit A Sakepan

(Matthew 7:13-14,21-23)

22Idi mantotoloy si Jesus a onkowan cha Jerusalem, iyansa-sa-mad cha siyo-siyodad a mantoro ired ma too. 23Et gwariy toon iyansalodsod cha si-katho i “Afo, otik bengat i maysalakan?” Insongbat Jesus i 24“Ipahat joy kabaalan jon onsekep cha ekofit a sakepan. Tep konen kod si-kayo i chakel i mengiparas a onsekep chiwan, nem nat mebedin. 25No on-akgwat miy mahabaliy et ibengbeng to wa, mebay-anan kayod awas a menogtog a konen jo i ‘Afo, dohatim pangoy bengbeng.’ Nem isongbat to i ‘Nat amta tahejo tan nat amtak i edafoan jo.’ 26Et konen jo mowan i ‘Ekidiho-dihob kawid si-kam tan ekiino-inom kawid si-kam. Iyantoro-toro ka pay cha siyodad mi.’ 27Nem sema mahabaliy, isongbat to mowan i ‘Konen kod si-kayo i nat amta tahejo tan nat amtak i edafoan jo. Si-kayon emiin a naengamag na ngaaw, betik kayo!’ 28Et onngogngogngog kayon kale-kaletketen jo ngoy sangi yo no si-nengen jos Abraham, si Isaac, si Jacob, tan emiin a profiten gwared ma pantorayan Afo Chiyos iy chiyagchag cha kayo. 29Gwariy tothoon medepod emiin a soli na dobong a mekidihob cha pantorayan Afo Chiyos. 30Et gwariy echom a iyangkebaba niman a maykayang, tan gwara ngoy echom a iyangkekayang niman a maybaba.”

Sema Semek Jesus Ired Ma Toon Naiyan-iyan Cha Jerusalem

(Matthew 23:37-39)

31Nonta kosto-koston oras, gwariy Pharisees a kimowan cha kad-an Jesus, et kigwan ched si-katho i “Mapteng no bebtihan mo jay et onkowan ked echom a dogad tep piyan Ari Herod a ipabono toka.” 32Et kigwan Jesus cha si-kara i “Tahejon kowan jo ma maloko-dokon si Herod i niman tan megwa-gwa itoloy kon menagchag na dimonyos tan mengipamapteng na too, et no maykatdon akow, kekchengen koy obdak. 33Angken nengoy mepesamak, mesepol a itoloy kon onkowan cha Jerusalem niman tan megwa-gwa tan gwa-gwa tho. Tep sema pemonoan cha na profita, mesepol a chiwed Jerusalem.”

34Et kigwan men Jesus i “Si-kayon i-Jerusalem a naemono iren ma profita tan naiyantog na echom a toon into-non Afo Chiyos cha si-kayo! Eminpiyen piyan kon si-nofen kayon inges toy manok a sa-dinan to na payad toy aanak to, nem nat piyan jo! 35Isonga, towan iolay kayon Afo Chiyos, pati siyodad tan timplo yo say maomas ali. Et konen kod si-kayo i eg joak si-nengen mowan ingkathod timpo na pengowan jo i ‘Mabindisjonan i into-no din Afo Chiyos!’ ”

Currently Selected:

Luke 13: KAR

Highlight

Copy