John 19

Kiyowis Ches Jesus A Kigwan Cha I Mesepol A Metiy

1Kagol niwan, inpabaras Pilate si Jesus. 2Et engamag iriy sosolcharo na bengel a aamag na gwahal a iyas-asbithan, et inbengel ched Jesus a singen korona. Biyaroan cha pay na depang a inges toy nainbaro na ari, 3et sansa-ki iren imesop cha si-kathon kigwan cha i “Si-kam a Ari na Hodjos, sapay koma onbaya-bayag i biyag mo!” Et siyedsedpak cha.

4Et imawas si Pilate mowan a kigwan to ired ma Hodjos i “Si-neng jo, ipabo-day kos Jesus say amtaen jo i nagwariy diyoktalan kon kaybasolan to.” 5Et imawas si Jesus a iyanbaro niwa depang tan iyanbengel niwa koronen iyasbithan. Et kigwan Pilate ired ma too i “Si-neng jo ja too!”

6Sema iren aafo na papari tan sema iren kowadja, idi sini-neng ches Jesus, kimeljaw iren kigwan cha i “Idansam cha koros! Idansam cha koros!” Et kigwan Pilate mowan i “Ala jo et si-kayoy mengidansed koros tep si-kak, nagwariy diyoktalan kon kaybasolan to.” 7Insongbat iren ma Hodjos i “Gwariy dinteg mi, et kigwan tod ma dinteg i mesepol a metiy iwa too tep kigwan to i si-kathoy Anak Afo Chiyos.”

8Idi inki-ngelan Pilate i kigwan cha, mas timahot pay. 9Et simekep mowan chiwa baliy ton kigwan tod Jesus i “Toy edafoan mo aya i?” Nem nat simongbat si Jesus. 10Et kigwan Pilate i “Niyana nat onsongbat ka? Nat amtam aya i gwariy karebengan kon mengipabolos cha si-kam tan mengipadansed si-kam cha koros?” 11Et insongbat Jesus i “Nagwara komiy karebengan mod si-kak no nat in-i-kan Afo Chiyos cha si-kam. Isonga, sema toon engiawathak cha si-kam, mas enbel-at i basol to iy say si-kam.” #19:11 Sema iren naengachal na Biblia, nat sigorado cha no siya ma toon mas enbel-at i basol to. Sema iren echom a naengachal, kigwan cha i si Judas bengat tep si-kathoy enraidor cha Jesus. Nem sema iren echom pay, kigwan cha i si Caiaphas a kahejangan a pari bengat tep in-awat tos Jesus cha Pilate. Nem sema iren echom ngo, kigwan cha i si Judas, si Caiaphas, tan emiin a naengibalnay na Hodjos a piyan chen memonon Jesus.

12Idi inki-ngelan Pilate iwan, piyan ton pasiyen mengipabolos Jesus. Nem kimeljaw ira ma Hodjos mowan a kigwan cha i “No ipabolos mo ta too, maamta i nat kajem token Caesar. #19:12 Say Caesar, titolo na naiyantoray na Romano a Empire. Sema empire, gropo na ili-ili tan saho-sahop a naintorayan na sa-kin gobirno. Tep sema toon panbalin toy angel to na ari, kontraen tos Caesar.” 13Idi inki-ngelan Pilate i kigwan cha, inpabo-day to mowan si Jesus, et timokkong si Pilate cha tokkongan na naengowis. Sema tokkongan, chiwed bo-dayan a epakpahan na bathon engaranan na Gabbatha cha esel na Hodjos. 14Seman a akow i akow na pansagana na Hodjos para cha Piyasta na Inda-bas na Anghil cha Hodjos. Chanchaniy alas dosi, et kigwan Pilate ired ma Hodjos i “Si-neng jo, ajay i ari yo.” 15Et kimeljaw ira ma Hodjos a kigwan cha i “Bonom! Bonom! Idansam cha koros!” Et inbagen Pilate i “Piyan jon ipadansak i ari yod koros?” Et insongbat iren ma aafo na papari i “Nagwariy echom a ari wi. Si Caesar bengat i ari wi.” 16Et in-awat Pilate si Jesus ired ma mengidansed koros.

Indansa Res Jesus Chiwa Koros

(Matthew 27:32-44; Mark 15:21-32; Luke 23:26-43)

Et sema iren sosolcharo, ida res Jesus 17a inpasakbat chiy koros tod si-katho et intolod ched dogad a engaranan na pohel na toktok na toon iyanngaran na Golgotha cha esel na Hodjos. 18Chiwan i engidansaan chen Jesus cha koros. Gwara ngoy chegwen toon iyaydansed koros cha. Sema sa-ki, gwared gwanan Jesus, tan sema sa-ki ngo, gwared gwili tho, et inkawa res Jesus. 19Gwara pay i insolat Pilate a inpapakpak tod ma koros Jesus a kigwan to i “Si Jesus a i-Nazareth a Ari na Hodjos.” 20Chakel i Hodjos a emasa na insolat Pilate tep sema dogad a iyaydansaan Jesus cha koros, iyay-esop cha siyodad na Jerusalem. Et iyaysolat iwan cha esel na Hodjos tan esel na Romanos tan esel na Greeks. 21Nem sema aafo na papari na Hodjos, iyanriri ira kagol na insolat Pilate. Isonga, kimowan ired kad-an Pilate a kigwan cha i “Nat insolat mo koma i ‘Ari na Hodjos,’ no diket isolat mo koma i ‘Kigwan to i si-kathoy Ari na Hodjos.’ ” 22Nem insongbat Pilate i “Sema insolat ko, nat mebedin malen mesa-dathan.”

23Idi indansa iren ma sosolcharos Jesus cha koros, ida riy baro tho et iyanbibingayan chen epat say gwariy a-daen na sa-ki tan sa-ki. Nem sema kamisita tho, nagwariy chai-chait to tep tolo-toloy i agwel to. 24Isonga, iyantabtabalan iren ma solcharo i “Nat bi-bi-nihen tayo koma jay, no diket panbobonothan tayo say mesi-neng no siyay mengeda.” Epasamak iwan say metongpal iwa iyaysolat cha esel Afo Chiyos a kigwan to i:

“Iyanbibingayan chiy barok

et iyanbobonothan chiy kamisitak.” #19:24 Psalm 22:18

Et seman ngoy inpasing iren ma solcharo.

25Gwariy bibiin kainakgwat cha askang na koros Jesus a ineto, ahi na ineto, si Mary a imbaliy Clopas, tan si Mary Magdalene. 26Idi sini-neng Jesus si ineto tan sema disipolon ensemek ton ekiakgwat cha si-katho, kigwan tod ineto i “Nanang, ithan miy anak mo.” 27Et kigwan tod ma disipolo tho i “Ithan miy inam.” Et iyanchogid ma akow, iyodop niwa disipolos Mary a mekiiyan cha baliy to.

Sema Ingkathiy Jesus

(Matthew 27:45-56; Mark 15:33-41; Luke 23:44-49)

28Et amten Jesus i iyakcheng i emiin a piyan Afo Chiyos a a-magen to. Isonga, kigwan to i “Iya-kowak” say metongpal iwa iyaysolat cha esel Afo Chiyos. #19:28 Psalm 69:21 29Gwariy salaw chiwan a iyapno na enpait a inom. Isonga insiwsiw iren ma sosolcharoy singen bolak chiwa inom, et intebek ched panga na do-bet a hyssop, et inpetek ched temin Jesus. 30Idi siyopsop Jesus, kigwan to i “Iyakcheng ma.” Et jimemeg et inbolos toy ispirito tho.

Timbek Chiy Tagdang Jesus

31Nontan a akow a ingkathiy Jesus, akow na pansagana na Hodjos. Sema gwa-gwa tho, Sabbath a akow na pan-inana. Sema alin Sabbath, akow ngon esantoan a pasiya tep si-kathoy Piyasta na Inda-bas na Anghil. Isonga, sema iren naengibalnay na Hodjos, kimowan ired kad-an Pilate a inbagaan cha i ipaketdo thoy seki iren ma iyaydansed koros say metiy iren chakos et say ma-kal i angel ched koros. Tep nat piyan chen on-eket ira ma angel na tood koros no Sabbath. 32Isonga kimowan ira ma solcharo et kiyetdo riy seki niwa chegwen toon iyaydansed koros a kadgwen Jesus. 33Nem idi sibi res Jesus, mita ren etiy mala, isonga nat kiyetdo riy seki tho. 34Nem sa-ki ired ma solcharo, timbek toy tagdang Jesus na kayang to, et bimo-day a chakos i chala tan chanom. 35Si-kak a mansosolat niyay, tistigoan ko i podno jay tep mitak. Amtak i podno ma kigwan kod si-kayo, et insolat ko say memati kayo ngo. 36Tep epasamak ira man say metongpal i iyaysolat cha esel Afo Chiyos a kigwan to i “Nagwariy angken sa-kin pohel ton meketdo.” #19:36 Psalm 34:20 37Et kigwan to ngod ma esel Afo Chiyos i “Metaen chiy toon timbek cha.” #19:37 Zechariah 12:10

Iyaybekes Jesus

(Matthew 27:57-61; Mark 15:42-47; Luke 23:50-56)

38Idi iyakcheng iwan, gwariy sa-kin toon kimowan cha kad-an Pilate a iyanngaran na Joseph a i-Arimathea. Seja too, disipolon Jesus, nem nat inpaamta tho tep entahot to ira ma aafo na Hodjos. Inbaga thod Pilate no mebedin a a-daen toy angel Jesus say maybebka. Et intolok Pilate. Isonga, kimowan si Joseph et ingkal toy angel Jesus. 39Si Nicodemus a toon kimowan a ekitebal cha Jesus nonta sa-kin dagwi, ekiolop cha Joseph a i-Arimathea. Intahin Nicodemus i bangbangdon aamag na myrrh tan aloes. Say bel-at to, esolok a tedon polon kilo. 40Ida riy angel Jesus a dinibothan cha na polaw a dofot et iya-choman na bangbangdo tep seman i ogadi na Hodjos no ibeka riy etiy. 41Gwariy garden a iyay-esop cha iyaydansaan Jesus cha koros. Et gwara ngoy dohang chiwan a kaybekaan na etiy a aneng maosal. 42Isonga inbeka res Jesus chiwan tep chanchani diy akow na pan-inana na Hodjos tan iyay-askang iwa dohang.

Currently Selected:

John 19: KAR

Highlight

Copy