John 1

Si Esel A Iyanbalin Na Too

1Nonta kapkapoanan a aneng pay meparsowiy dobong, sigod a gwares Esel.#1:1 Si Esel, si-kathos Jesu Cristo. Isonga, sema piyan ton a-seden chiya birsikolo, idi aneng meparsowiy dobong, sigod a gwares Jesu Cristo. #1:1 Say ese-esel, si-kathoy naaosal a mengipaamted too i piyan tayo tan gwared nemnem tayo. Isonga, iyanngaran si Jesus na Esel tep babaen cha si-katho, inpaamten Afo Chiyos i piyan to tan inbilin tod si-kathayo. Ekisa-kis Esel cha Afo Chiyos, tan man-inges i ogadin Esel tan Afo Chiyos. 2Manipod nonta kapkapoanan, ekisa-kis Esel cha Afo Chiyos. 3Si Esel, si-kathoy kagol na eparsowaan na emiin a gwared dobong tan dangit. Nagwaren polos i eparsowa, malaksid babaen cha si-katho. 4Si Esel i naedafoan na biyag, tan sema biyag, si-kathoy silow a naenilow na nemnem na too. 5Nasimilow iwa silow cha kawad-an na enbolinget, et sema enbolinget ket, nat mahaagwak to ma silow.

6Gwariy sa-kin toon into-non Afo Chiyos a iyanngaran na John a Naemonjag. 7Into-non Afo Chiyos a menistigo niwa silow say emiin a too, memati ira kagol na kigwan John. 8Si John a Naemonjag, nat si-katho ma silow, no diket kimowan ali say tistigoan to ma silow. 9Sema podnon silow, mimothok med ja dobong, et nasinilowan toy nemnem na emiin a too.

10Sema iyanngaran na Esel a podnon silow, ekiiyan cha tood ja dobong, nem angken si-kathoy kagol na eparsowaan na emiin a gwared ja dobong, nat igwat pay laeng na too. 11Kimowan alis Esel cha ili thon mismo, nem nat igwat iren ma kaidian to. 12Nem gwara ngoy toon engawat et ematid si-katho, et si-kariy inni-kanan to na karebengan chen manbalin na anak Afo Chiyos. 13Say inpasing chen iyanbalin na anak Afo Chiyos, nat inges toy nainpasing na toon may-anak tep nat edafod ma dekna na sambaliy tan sema plano ren man-anak, no diket edafod Afo Chiyos a mismo.

14Si Esel, iyanbalin na too, et ekiiya-iyan cha si-kathayo. Gwared si-kathoy emiin a kaasi tan podno. Sini-neng miy kinakayang ton sema kinakayang na sa-sa-kin Anak Afo Chiyos a Aweto.

15Si John a Naemonjag, tinistigoan to ma toon kimeljaw a kigwan to i “Sejay iwa engibanagan ko nonta kigwan ko i ‘Gwariy sa-kin toon ontened alid si-kak a mas ekayang iy say si-kak tep idi anengak pay may-anak, sigod a gwara.’ ” 16Kagol na banay a kaasin ma toon si Cristo, sema iren bindisjon a nain-i-kan tod si-kathayon naemati, naiya-a-choman na olay. 17Tep inpaamten Afo Chiyos i dinteg to babaen Moses, nem inpaamta thoy kaasi tan kinapodno tho babaen Jesu Cristo. 18Nagwariy eni-si-neng Afo Chiyos, nem si Jesu Criston sa-sa-kin Anak to, inpaamta thod too. Tep sema ogadin Cristo tan ogadin Afo Chiyos, man-inges ira, et ekisa-kis Cristo na olay cha Aweto.

Sema Intoron John A Naemonjag

(Matthew 3:1-12; Mark 1:1-8; Luke 3:1-18)

19Idi sa-kin akow, sema iren naengibalnay na Hodjos cha Jerusalem, into-no ra ira ma pari tan sema iren polin Levi cha kad-an John a Naemonjag, say ibagaan cha no siyes si-katho. Sejay i kigwan John a songbat tod si-kara. 20Nat indibak John, no diket kigwan toy podnon “Nat si-kak i Cristo.” 21Et inbagaan cha mowan i “Siya ka ngarod? Si-kam si Elijah?” #1:21 Malachai 4:5 Insongbat John i “Enchi.” Et inbagaan cha mowan i “Si-kam iwa profiten onkowan ali?” #1:21 Deuteronomy 18:15 Insongbat John i “Enchi.” 22Et kigwan cha mowan i “Siya ken agpayso? Kowan mo pangod si-kawi say gwariy konen mi ired ma engito-nod si-kawi. Ngoy konen mo maypangkep na angel mo?” 23Et insongbat John i “Si-kak iwa engibanagan Isaiah a profita nonta kigwan to i:

‘Gwariy sa-kin toon

mankelkeljaw chiwa

dogad a nagwariy toon

naiyan-iya-iyan a

towan kona i

“Singpet joy chalan a

panchedanan alin Afo.” ’ ” #1:23 Isaiah 40:3

24Niman gwara ngo iriy Pharisees #1:24 Sema iren Pharisees tan Sadducees, chegwen gropo na Hodjos a iyanpan-achal. Sema iren Sadducees, naiyonoran chiy toro-toro bengat a gwared dimen dibchon insolat Moses (Genesis, Exodus, Leviticus, Numbers, tan Deuteronomy). Sema iren Pharisees, naiyonoran chiy toro-toron iyaysolat ired ma dibcho, nem naiyonoran cha ngoy toro-toron in-elbat iren ma afo-afo ra la maypangkep na mapteng a panbiyag.Maypangkep na napiyati iren ma Hodjos, napiyati na Pharisees i manpawil i iyangketiy, nem enchiy Sadducees. Napiyati ngo na Pharisees i no metiy miy too, kongkonaan Afo Chiyos no napiyatin ma tooy bili-bilin to, tan chosaen Afo Chiyos no nat napiyati tho ma bili-bilin to. Nem nat napiyati iren ma Sadducees iwan. Tan napiyati ngo iren ma Pharisees i gwares Satanas, anghilis, dimonyos, tan ispiritos, nem enchiy Sadducees. a into-no iren ma echom ched kad-an John. 25Inbaga ra i “No nat si-kam i Cristo tan nat si-kam si Elijah tan nat si-kam iwa profiten onkowan ali, apay nga naemonjag ka?” 26Insongbat John i “Si-kak, nainbonjag koy chanom. Nem gwariy sa-kin tood si-kayon nat amta yo. 27Sema too, tetneren toak, et kagol na kinakayang to, nat maykariak angken memasbas na iket na sapathos to.”

28Epasamak iyay cha Bethany chiwa piig na kolos a Jordan a naemonjagan John.

Sema Ngalobon Kalniron Afo Chiyos

29Idi gwa-gwa tho, miten John a Naemonjag si Jesus a man-eesop ali, et kigwan to i “Si-neng jo, aman aliy Ngalobon Kalniron Afo Chiyos a mengkal na basol na tothoo! 30Sejay iwa engibanagan ko nonta kigwan ko i ‘Gwariy sa-kin toon ontened alid si-kak a mas ekayang iy say si-kak tep idi anengak pay may-anak, sigod a gwara.’ 31Angken si-kak, nat amtak ngo no siya man. Nem kimowanak alin mengibonjag na chanom say maypaamta ma too ired ma polin Israel.”

32Et enistigos John a kigwan to i “Mitak iwa Ispirito Santon inges toy kalapatin sima-kod alid dangit. Pima-tok cha Jesus a imeket cha si-katho. 33Sigod a nat amtak i si Jesus iwa iyaypadto. Nem si Afo Chiyos a engito-nod si-kak a mengibonjag na chanom, kigwan tod si-kak i ‘No metaen moy toon pansa-koran na Ispirito, et on-onong cha si-katho, si-katho ma toon mengibonjag na Ispirito Santo.’ ” 34Et kigwan John i “Sini-neng ko ma too et tistigoan ko i si-kathoy Anak Afo Chiyos.”

Sema Iren Pilmiron Disipolon Jesus

35Idi gwa-gwa tho, gwares John a Naemonjag mowan chiwan, pati chegwen disipolos to. 36Mita thos Jesus a manda-da-bas a kigwan to i “Si-neng jo, ajay i Ngalobon Kalniron Afo Chiyos!” 37Idi inki-ngelan niwa chegwen disipolos John i kigwan to, tined chen chakos si Jesus. 38Idi iyanboli-neg si Jesus, sini-neng to ma chegwen disipolos a mantetened cha si-katho, et kigwan to i “Gwariy ibaga yo?” Et insongbat cha i “Rabbi, toy naiyan-iyanan mo i?” Say banag na Rabbi, maistoro. 39Kigwan Jesus i “Gomali jo say si-nengen jo.” Et ekiolop ired si-katho et mita riy naiyan-iyanan to. Iyan-iyan ired man nontan a akow tep chanchaniy alas quatro na ma-chem.

40Sema sa-kin disipolos a engi-ngel na kigwan John a Naemonjag a timened cha Jesus, si Andrew a ahin Simon Peter. 41Kimowan a chakos si Andrew a mengenap Simon. Idi sipol to, kigwan to i “Sipol miy Messiah,” a say banag na Messiah, sema Cristo. 42Et iyodop Andrew si Simon cha kad-an Jesus. Sini-neng Jesus a chilis Simon a kigwan to i “Si-kam si Simon a anak John. #1:42 Si John i ngaran awen Simon Peter. Seja John, nat si John a Naemonjag tan nat si John ngon disipolon Jesus a engisolat niya dibcho. Si-kathoy maykatdon toon iyanngaran na John. Nem manipod niman, manngaran ka na Cephas.” #1:42 Seja ngaran a Cephas tan ngaran a Peter, man-inges i banag chen batho.

Tiya-gway Jesus Si Philip Tan Si Nathanael

43Idi gwa-gwa tho, niyemnem Jesus i onkowan cha Galilee. Sipol tos Philip a kigwan to i “Kay-olop ked si-kak.” 44Edafos Philip cha siyodad na Bethsaida a inges tos Andrew ni Peter. 45Et inap Philip si Nathanael, et idi sipol to, kigwan to i “Sipol miy toon nainngara-ngaran Moses cha dinteg tan nainngara-ngaran ngo iren ma profitas chiwa insolat cha. Si-kathos Jesus a i-Nazareth a anak Joseph.” 46Et kigwan Nathanael i “Gwara ayay panmaptengan a medepo did Nazareth?” Insongbat Philip i “Emoy say si-nengen mo.”

47Idi miten Jesus si Nathanael a man-eesop ali, kigwan to i “Si-neng jo. Aman i podnon anak Israel a nagwaren polos i doho-doho to!” 48Et inbagen Nathanael i “Ngoy inpasing mon engamted si-kak?” Insongbat Jesus i “Idi eg toka pay tiya-gway Philip, sini-neng tahen mantoktokkong cha sengeg na kejow a fig.” 49Et kigwan Nathanael i “Maistoro, si-kam i Anak Afo Chiyos! Si-kam i Ari na Israel!” 50Insongbat Jesus i “Memati ka wa tep kigwan ko i sini-neng tahen mantoktokkong cha sengeg na kejow a fig. Nem chakel pay i si-nengen mon kaskasdaaw iy sejay.” 51Et kigwan ngon Jesus i “Sejay a konen kod si-kayo, podnon metaen joy dangit a edohatan. Et metaen jo ngoy anghilis Afo Chiyos a mankakayang cha dangit tan mansa-sa-kod cha si-kak a Anak na Too.” #1:51 Sema Anak na Too i ngaran a naiyosal Jesus no konen toy maypangkep na angel to. Sema iren echom a naengachal na Biblia, nakigwan cha i inges toy ngaran a iyayngaran cha Daniel 7:13-14. Say nakigwan ira na echom a naengachal, sema engibanagan to, sema kinatoon Jesus tep iyay-anak cha too. Say nakigwan ira na echom, sema engibanagan to, sema kinachiyos Jesus tep si-kathos Chiyos. Tan say nakigwan ira na echom, sema engibanagan to, sema chegwa.

Currently Selected:

John 1: KAR

Highlight

Copy