Acts 7

Sema Kigwan Stephen Ired Naengibalbalnay Na Hodjos

1Et sema kahejangan a pari, inbagaan tos Stephen i “Podno ma kigwan cha?” 2Insongbat Stephen i “Si-kayon aahik tan aawak, pangaasi yo, iki-ngeli yo ja konen ko. Nonta bayag da, si Afo Chiyos a echayaw, iyanparang cha Abraham a afo thayo la iy maramen man-iiyan pay si Abraham cha sahop na Mesopotamia asan onkowan a man-iyan cha sahop na Haran. 3Et kigwan Afo Chiyos i ‘Betihim itha ilim tan bobonat mo, et tahed dogad a ibiybiy kod si-kam.’ 4Et bintihan Abraham i ili thon engaranan na Chaldea, et iyan-iyan cha Haran. #7:4 Chaldea tan Haran, gwared sahop na Mesopotamia. Chaldea, gwared pesaw, tan Haran, gwared sedong. Idi etiy mes awen Abraham, into-non Afo Chiyos chiya ilin naiyan-iyanan jo niman. 5Idi mimothok si Abraham chiyay, nagwaren polos i in-i-kan Afo Chiyos cha si-kathon chaga, angken sanchafan, no diket inkari tho i no sa-ki din akow, i-kan tod Abraham i intiron ili say kegwen to tan poli-poli tho di. Kigwan Afo Chiyos iwan angken nonta inkari tho, nagwariy anak Abraham. 6Et kigwan ngon Afo Chiyos cha Abraham i onkowan iriy poli-poli thon man-iyan cha sa-kin ili, et sema tothood man, panbalin cha iren bagaen tan pediga-digat cha ira na epat a dasos a tawen. 7Et kigwan Afo Chiyos i ‘Nem chosaen ko ira ma toon pansilbian chen bagaen, et sema iren poli-polim, bebtihan cha ma ili, et on-oli di ired ja ilin manchejaw cha si-kak.’ 8Et kigwan ngon Afo Chiyos cha Abraham i mesepol a mekogit i emiin a dalekid si-karen sinjal a ekitolag ired Afo Chiyos. Isonga, nonta iyay-anak si Isaac a anak Abraham, kiyogit Abraham nonta maykagwalon akow na ingkay-anak to. Si Isaac ngo, kiyogit toy anak ton si Jacob, et si Jacob, kiyogit to ngoy sawal na chegwen anak ton sigod a afo-afo thayo nonta bayag da.

9“Nem sema iren dalekin anak Jacob, ipalan ches Joseph a ahi ra et indaho ra, et iyanbalin na bagaen cha Egypt. Nem gwares Afo Chiyos cha Joseph chiwan, 10et tiyolongan tod emiin a diga-digat to. Et in-i-kanan ngon Afo Chiyos na daing to say si Pharaoh a arid Egypt, iyapolbaran to. Et chiyotohan Pharaoh si Joseph a gobirnador cha intiron Egypt tan mengimanchal na emiin a kokowen Pharaoh.

11“Et mimothok i bithil cha Egypt tan cha Canaan ngo, et edigathan a chiliy too. Sema iren afo-afo thayo led Canaan, nagwariy engalaan cha na kakanen cha. 12Idi inki-ngelan Jacob i gwariy mekan cha Egypt, into-no tho ira ma anak ton afo-afo thayo la say menongkal ira na kakanen cha. Si-kathoy pilmiron biyahi red Egypt. 13Nonta maykadgwen biyahi red Egypt, inpaamten Joseph cha si-kara i si-kathoy ahi ra, et iyamtaan ngon Pharaoh i maypangkep na aahin Joseph. 14Et engito-nos Joseph na tothoon mena-gway na aweton si Jacob tan emiin a bobonat to say onkowan ali ched Egypt. Say karakel na emiin a too, pithon polo tan dima. 15Et si Jacob ira, kimowan iren man-iyan cha Egypt, et chiwan i etiyan Jacob tan afo-afo thayo la. 16Et intolod chiy angel na iyangketiy cha Shechem, et inbeka red ma iyaybekaan a tiyongkal Abraham cha poli-polin Hamor nonta bayag da.

17“Idi chanchaniy timpon tongpalen Afo Chiyos i inkari thod Abraham a on-oli wa iriy poli-poli thod Canaan, chimakel a pasiya ira ma afo-afo thayo led Egypt. 18Nontan a timpon iyan-iya-iyan ira ma afo-afo thayo led Egypt, sema aarid man, iyansa-sa-dat ira ingkathod gwariy sa-kin arin nat mahaamta maypangkep Joseph. 19Seman a ari, siyao-saol to iriy tothoo tayo, et pinidit to iren engiolay na ngoyat ched awas say metiy ira. 20Et seman i timpon iyay-anak si Moses a mapteng a nga-nga. Et kiyajoan na inetod baliy cha na tedon bolan. 21Idi epalabas miy tedon bolan, pinidit chen engiolay cha awas, nem say biin anak Pharaoh, simagwid si-katho, et biyadeg ton singen anak ton mismo. 22Intoroan ches Moses na emiin a kinadaing ira na i-Egypt, tan emiin a kigwa-kigwan to tan inpasi-pasing to, echayaw.

23“Idi epat a poloy tawen Moses, niyemnem ton manbisita iren ma Hodjos, sema iren toon echom ton poli-polin Israel. 24Et simagwid sa-kin Hodjon niyanbarasa na i-Egypt. Kimowan si Moses a ontolong chiwa Hodjo, et biyales toy i-Egypt et biyono tho. 25Kin Moses i egwathan ira na echom ton Hodjos i si-kathoy pinispis Afo Chiyos a mengidibchid si-kara, nem enchi gayam. 26Idi gwa-gwa tho, simagwis Moses cha chegwen Hodjos a manbabakal, et inparas ton mengisalcheng cha si-karen kigwan to i ‘Apay nga si-kayon echom a Hodjos, manbabakal kayo?’ 27Nem sema dahin iyanbasol, intolchon tos Moses a kigwan to i ‘Siyay engi-kan na karebengan mon mantoray tan mengowis cha si-kawi? 28Bonoen moak a inges toy inpasing mon emono niwa i-Egypt nonta ka-cheman?’ 29Idi inki-ngelan Moses iwan, amta tho i aamtaan i inpasing to, et bintik toy sahop na Midian a iyanbisitaan to. Nontan a gwared man, engimbaliy, et chiwan ngoy iyay-anahan na chegwen anak ton daleki.

30“Idi epalabas miy epat a polon tawen, iyanparang i anghil cha Moses cha manchachalang a kejow a iyay-esop cha chontog a Sinai cha dogad a nagwariy toon naiyan-iya-iyan. 31Iyasdaaw si Moses kagol na sini-neng to, et imesop a meni-neng a chili, et inki-ngelan toy esel Afo Chiyos a kigwan to i 32‘Si-kak si Afo Chiyos a nachija-chijaw iren ma afo-afom den si Abraham, si Isaac, tan si Jacob.’ Idi inki-ngelan Moses iwan, kimayengkeng et nat intoled ton si-nengen. 33Et kigwan Afo Chiyos cha si-katho i ‘Ekal mo ta sapathos mo tep seta mowan ak-akgwathi, esantoan a chaga. 34Sini-neng koy diga-digat na tothook a gwared Egypt, et inki-ngelan koy inga-ingag cha. Isonga, kimowanak alin mengidibchid si-kara. Gomali jay say ito-no tahen on-oli led Egypt.’ ”

35Intolo-toloy Stephen a engowan i “Si Moses, si-kathoy nat igwat ira na echom ton Hodjos a kigwan cha i ‘Siyay engi-kan na karebengan mon mantoray tan mengowis cha si-kawi?’ Nem si-katho ma into-non Afo Chiyos a mantoray tan mengidibchid si-kara babaen na tolong na anghil a iyanparang cha Moses cha manchachalang a kejow. 36Si Moses pay i engibalnay iren ma poli-polin Israel nonta bintihan chiy Egypt. Tan chakel i milagro tan echom a kaskasdaaw a ima-imag tod ma Egypt tan chiwa Depang a Baybay, tan chiwa ngod dogad a nagwariy toon naiyan-iya-iyan na epat a polon tawen. 37Si Moses ngoy engowan ired ma poli-polin Israel i ‘Mengito-no dis Afo Chiyos cha si-kayo na profiten inges toak. Sema too, sa-kin echom jon poli-polin Israel.’ 38Tan si Moses ngoy gwared ma afo-afo thayo la nonta esa-sa-nop ired sengeg na chontog a Sinai cha dogad a nagwariy toon naiyan-iya-iyan. Si-katho ma engowanan na anghil chiwa toktok na chontog a Sinai, tan si-katho ma iyay-i-kanan na ese-esel Afo Chiyos a naengi-kan na biyag say ipaamta thod si-kathayo.

39“Nem sema afo-afo thayo la, eg cha piyan a patien si Moses, no diket inbiyang chiy kigwan to tep sema piyan chen pasiyen a-magen, on-oli ched Egypt. 40Isonga, nonta ebayag si Moses chiwed chontog a Sinai, kigwan ched Aaron i ‘Pengemag ka ira na chiyos para cha si-kawi say ibalnay cha kiya tep nat amta wiy epasamak chiwa toon si Moses a engibo-day cha si-kathayod Egypt.’ 41Et engamag ira na sinan chiyos a sema itsora tho, singen kilaw na baha. Engitangdal ired ma sinan chiyos, et iyansilibrar ira kagol na imag cha. 42Isonga, binekan iren Afo Chiyos, et in-olay ton iyanchaya-chayaw ira na akow, bolan, tan pasingsing cha iyaykayang. Et sema imag cha, iyaypadto wa ded insolat na profita nonta bayag den kigwan to i:

‘Si-kayon poli-polin Israel,

si-kak ayay engitangdalan jo

na rigalo tan animal a piyarti yo

nonta epat a polon tawen a

gwara kayod ma dogad a

nagwariy toon naiyan-iya-iyan?

43Enchi tep intahin joy

panchejawan na chiyos a

si Moloch

tan bolto ngo na

pasingsing na chiyos a

si Rephan.

Si-kariy sinan chiyos a

imag jon chija-chijaw jo.

Isonga, ipabtik tahejod

dogad a mas aragwi iy

Babylon.’ ” #7:42-43 Amos 5:25-27

44Et kigwan Stephen mowan i “Sema iren afo-afo thayo la, idi gwara ired ma dogad a nagwariy toon naiyan-iya-iyan, gwared si-kariy panchejawan a inpaamta tho i gwares Afo Chiyos cha si-kara. Sema panchejawan, imag chiy kosto-koston inges toy inbiybiy Afo Chiyos a arig cha Moses maypangkep na pesing komen ma-mag. 45Idi etiy si Moses, iyaysa-dat si Joshua a mengibalnay na afo-afo thayo led ja ili. Et sema panchejawan a iyay-elbat cha si-kara, intahin cha nonta iyaysa-dat ired toon sigod a iyan-iyan chiyay a chiyagchag Afo Chiyos. Et sema panchejawan a intahi-tahin iren ma afo-afo thayo led ma kompormin kimowanan cha, gwara pay chiyay ingkathod timpon David. 46Si David, ensemek Afo Chiyos et inbagen David no mebedin emon mengitegwen na baliy a panchejawan iren ma poli-polin Jacob cha Afo Chiyos. #7:46 Si Jacob i sa-kin ngaran Israel. 47Nem nat si David i engitegwen niwa baliy para cha Afo Chiyos, no diket anak ton si Solomon. 48Nem si Afo Chiyos a kahejangan, nat naiyan-iyan cha baliy a integwen na tothoo. Tep nonta bayag da, gwariy kigwan na sa-kin profita i:

49‘Kigwan Afo Chiyos i “Dangit i natimokkongan kon naiyantoray,

tan dobong ngoy naiyan-inanaan ko na sekik.

Mebedin ayen mengitegwen kayo na baliy a pan-iyanan ko?

Mebedin ayen mengitegwen kayo na pan-inanaan ko?

50Tep si-kak i emarsowa na emiin a gwared iyaykayang tan dobong.” ’ ” #7:49-50 Isaiah 66:1-2

51Et intolo-toloy Stephen a engowan i “Si-kayon too, esolpeng kayon agpayso. Inges jo ira ma toon nat piyan chen mematid Afo Chiyos et eg cha nainki-ngelan i nakigwan to. Inges jo ira ma afo-afo thayo la tep nakiyonkontra yoy Ispirito Santo. 52Gwara ayay angken sa-kin profiten nat piyadigat iren ma afo-afo thayo la? Nagwara, et nat setan bengat, nem biyono cha pay iriy profiten engipadto na ikowan alin Criston nagwaren polos i basol to. Et niman si-kayoy enraidor Cristo et si-kayoy emono. 53Ahow, angken si-kayoy iyay-i-kanan na dinteg Afo Chiyos babaen na anghilis, eg jo pay piyati.”

Chintog Ches Stephen Et Etiy

54Idi inki-ngelan iren ma naengibalnay na Hodjos i kigwan Stephen, bimonget iren chili, et kiyale-kaletket chiy sangi ra. 55Nem si Stephen ngo, iyapno na panakabalin na Ispirito Santo, et timangkak cha dangit a mita thoy nihal Afo Chiyos. Mita tho ngos Jesus a man-ak-akgwat cha gwanan Afo Chiyos. 56Et kigwan Stephen i “Matha yo! Kowan si-nengiy edohatan a dangit, tan sema Anak na Toon si Jesus a man-ak-akgwat cha gwanan Afo Chiyos.” 57Idi inki-ngelan na tothoo man, kimeljaw iren emiin et timpep chiy ngila ra. Et iyamtik iren mengeden Stephen. 58Et inkoyod ched awas na siyodad na Jerusalem et chintog cha. Sema iren enistigon engibasol, inpayas chiy ta-kep na baro red sekian na balodahin iyanngaran na Saul say mekichetog ired Stephen. 59Et idi chiyan chetoges Stephen, iyankararag a kigwan to i “Afo Jesus, alam i ispiritok.” 60Et iyantalimohod et inpekes toy esel ton kigwan to i “Afo Jesus, enog i inbilang iyay a basol cha.” Et idi kigwan to wa man, etiy ma.

Currently Selected:

Acts 7: KAR

Highlight

Copy