YouVersion Logo
Search Icon

Acts 5

5
Sema Imag Ananias Tan Si Sapphira
1Nem gwariy sa-kin dahin iyanngaran na Ananias, tan sema imbaliy ton si Sapphira. Iyandaho ira na payow cha say gwara ngoy i-kan ched apostolis. 2Nem iyantolag iren chegwa i a-kalan chiy pilak na payow asan i-kan ched apostolis. Et kimowan si Ananias et in-i-kan toy ebay-anan a pilak cha apostolis a kigwan to i “Ajay i emiin a pilak na payow mi.” 3Nem kigwan Peter i “Ananias, apay nga intolok mon intorayan token Satanas say iyan-itek ked Ispirito Santo? Tep inkamid moy echom a pilak na payow mo. 4Idi aneng mon idahoy payow mo, kegwen mo pay, et idi indahom, sema pilak to, kegwen mo pay. Apay nga niyemnem mo i man-itek ken kigwan mo i in-i-kan moy emiin a pilak? Sema iyan-itekan mo, nat too, no diket si Afo Chiyos.” 5Apaman a inki-ngelan Ananias i kigwan Peter, etongba et etiy. Et emiin a engi-ngel maypangkep na ingkathiy to, timahot iren pasiya. 6Et dinibothan na bedolekiy angel Ananias a biyangkil ched awas, et inbeka ra.
7Idi epalabas i chanchanin tedon oras, mimothok si Sapphira a imbaliy Ananias, nem nat amta thoy epasamak. 8Kigwan Peter cha si-katho i “Pangaasim, kowan mo no podnon sejay i emiin a pilak na payow jo.” Et kigwan Sapphira i “Ahow, setan a emiin.” 9Et kigwan Peter i “Apay nga niyemnem jon imbaliy mon manparas na Ispiriton Afo Chiyos? #5:9 Sema Ispiriton Afo Chiyos i sa-kin ngaran na Ispirito Santo. Iki-ngelim. Sema iren bedolekin engibeka na imbaliy mo, ahay mothok ched sakepan, et bangkilen chaka ngod awas.” 10Et biglen etongbes Sapphira cha sekian Peter et etiy. Idi simekep ira ma bedoleki, mita ren etiy, et biyangkil ched awas et inbeka red askang na imbaliy to. 11Et emiin a emati tan emiin a toon engi-ngel maypangkep na epasamak, timahot iren chili.
Chakel I Ima-imag Na Apostolis A Milagro
12Chakel i kaskasdaaw tan milagron ima-imag na apostolis a sini-neng na tothoo. Et naesa-sa-nop a emiin i ematid Siroman Solomon cha timplo. 13Nagwariy echom a toon etoled a mayka-chom ired ma apostolis chiwan, angken narinispiktar ira na tothoon pasiya. 14Et chakel pay a too, daleki tan bibii, emati ired Jesus, et naiyaa-choman ira ma emati. 15Kagol na milagron naima-imag na apostolis, intolod na tooy mansekit ired kalsara, et inpaolig ched katiri tan kamen say no onda-bas si Peter, mesiroman koma ira na alichon to, et onmapteng ma ira. 16Et chakel a toon naiyan-iyan cha doga-dogad a iyay-esop cha Jerusalem, kimowan ngo ired Jerusalem, et iyodop chiy mansekit tan sema iya-janan na dimonyos, et mimapteng ma iren emiin.
Inpadigat Cha Ira Ma Apostolis
17Et sema kahejangan a pari tan sema iren echom ton Sadducees, epaladoy apal ched apostolis. 18Et chinmet cha ira et inkalebos cha ira. 19Nem nontan a edagwi, say anghil Afo Chiyos, diyohatan to iriy bengbeng na kalebosan, et inbo-day toy apostolis a kigwan to i 20“Tahejon on-akgwat chiwa timplo, et kowan joy too maypangkep niya badon biyag a nain-i-kan Afo Chiyos.” 21Et inpasing na apostolis i kigwan na anghil. Nonta dadabi wa, simekep ired timplo et iyantoro ired man.
Sema kahejangan a pari tan sema iren echom ton Sadducees, tiya-gway chen emiin i iyangkaama tan echom a naengibalbalnay na Hodjos say mekimeeting ira. Et engito-no ira na polis cha kalebosan say a-daen cha iriy apostolis. 22Nem idi mimothok iriy polis cha kalebosan, nagwara ira ma apostolis chiwan, et imoli iriy polis cha esa-nofan na iyangkaama tan echom a naengibalbalnay na Hodjos, et ingwanggwang chen kigwan cha i 23“Idi mimothok kawid kalebosan, iyaysingpet a iyaytolbek et man-ak-akgwat iriy kowadjed sakepan ton manbanbantay chiwan. Nem idi diyohatan mi, nagwariy tood sekep.” 24Sema kapitan na kowadja na timplo tan aafo na papari, idi inki-ngelan cha man, chimanag iren pasiya tep nat amta ra no nengoy panbanagan to. 25Et gwariy toon mimothok a kigwan to i “Sema iren toon inkalebos jo, man-ak-akgwat ired timplon mantotorod too.” 26Et sema kapitan tan sema iren kowadja tho, kimowan ired timplo et ida riy apostolis. Nem nat pinidit cha ira tep ketahot iren chedtogen emo ira na tothoo.
27Idi iyodop cha wiy apostolis chiwa esa-nofan na naengibalbalnay na Hodjos, inpaakgwat cha ired sangoanan na naengibalbalnay. Et kigwan na kahejangan a parid si-kara i 28“Binidin mi kayo i mesepol a onsalcheng kayon mantoro maypangkep niwa toon si Jesus. Nem ema-men ima-imag jo man ingkathod emiin a gwared Jerusalem, inki-ngelan chiy maypangkep cha si-katho. Et nat setan bengat, nem jowan ibasoli kawi na ingkathiy to.” 29Nem si Peter tan echom a apostolis, insongbat cha i “Ahow tep si Afo Chiyos i mesepol a patien mi, nat too. 30Tep si Afo Chiyos a nachijaw iren ma afo-afo thayo la, inpanpawil tos Jesus a biyono yo babaen na inpangidansa yod koros. 31Et inkayang Afo Chiyos cha gwanan to say si-katho di ma mantoray cha si-kathayo tan mengisalakan cha si-kathayo. Inpasing Afo Chiyos iwan say si-kathayon poli-polin Israel, manbabawi kiya emo et bebnekan tayoy basol tayo say pekawanan Afo Chiyos ira man. 32Natinistigoan mi i sejay iren emiin, podno, et sema Ispirito Santon nain-i-kan Afo Chiyos ired ma naengamag na piyan to, natinistigoan to ngo.”
33Idi inki-ngelan na naengibalbalnay i kigwan Peter, bimonget iren chili et piyan chen bonoen ira ma apostolis. 34Nem gwariy sa-kin naengibalbalnay na Hodjos a iyanngaran na Gamaliel a Pharisee. Maistoro na dinteg a narinispiktar na emiin a too. Imakgwat et inpaawas to ira ma apostolis na kemtang. 35Idi in-awas cha ira ma apostolis, kigwan Gamaliel i “Si-kayon echom kon poli-polin Israel, banchaanan tayo koma i maypangkep na pesing tayo ired ja daleki. 36Nemnem jo i epasamak nontan cha dahin si Theudas. Iyanparang a kigwan to i ainportantin too, et chanchanin epat a dasos a daleki, iyayka-chom ired si-katho. Nem biyono ra, et emiin a imonod cha si-katho, esila-silak ira, et sema inchogi tho, nagwariy iyanbanagan to. 37Idi iyakcheng iwan, si Judas a i-Galilee, iyanparang nonta timpon inpandistaan na gobirno na too. Iyawis to ngoy chakel a toon mayka-chom cha si-katho. Nem biyono ra ngo, et emiin a imonod cha si-katho, esila-silak ira. 38Isonga, konen kod si-kayo i enog i imag i kompormi ired ma tothoo. Itolok jon onbetik bengat ira. Tep no sema iren chiyan amaga, edafod nemnem na tothoo, nagwariy panbenagan to. 39Nem no sema iren chiyan amaga, edafo ngod Afo Chiyos, nat mahaisalcheng jo ira, et sema panbenagan to di emo, kontraen jos Afo Chiyos.” 40Et sema iren naengibalnay na Hodjos, iyonoran chiy inbilin Gamaliel. Tiya-gway cha mowan ira ma apostolis, inpabaras cha ira, et biyanchaanan cha ira i nat mantoro wa ira maypangkep Jesus. Et inbolos cha ira. 41Et bintihan na apostolis ira ma naengibalnay, et banay i chadsak cha tep inbilang iren Afo Chiyos a maykarin piyadigathan cha ira kagol na pamati red Jesus. 42Et gwiya-gwa-gwen kimowan ira ma apostolis a mantorod timplo tan bali-baliy na too. Et intolo-toloy chen mankasaba i si Jesus i Cristo.

Currently Selected:

Acts 5: KAR

Highlight

Share

Copy

None

Want to have your highlights saved across all your devices? Sign up or sign in