Acts 2

Into-non Afo Chiyos I Ispirito Santo Ired Ma Emati

1Idi mimothok i akow na piyasten engaranan na Pintikostis, emiin a ematid Jesus, esa-sa-nop ired sa-kin baliy. 2Et biglen gwariy mapkes a notheng a edafod iyaykayang a inges toy notheng na mapkes a chahem, et singen pino tho ma baliy a kad-an iren ma toon ketinokkong. 3Et gwariy sini-neng iren ma ematin singen manchachalang, a sema itsora tho, inges toy taytay. Sema iren chalang, iyansi-si-jan et pima-tok cha sa-ki tan sa-kin too. 4Et iyapno wen emiin i too na panakabalin na Ispirito Santo, et imesel ira na ekila-kilasin esel a eg cha amta tep sema Ispirito Santoy naedafoan na daing cha.

5Nontan a timpo, gwara iriy Hodjos a naiyan-iyan cha Jerusalem a edafod chakel a ili-ilid dobong a nainpahat chen a-magen i piyan Afo Chiyos. 6Idi inki-ngelan cha ma notheng, chakel i kimowan chiwa esa-nofan na emati. Et iyasdaaw ira tep sa-ki tan sa-kid si-kara, inki-ngelan cha ira ma ematin man-eesel na esel to ngo. 7Iyasdaaw iren chili, isonga kigwan cha i “Niyana? Seja iren toon man-eesel, i-Galilee met iren emiin. 8Apay nga sa-ki tan sa-kid si-kathayo, emangkaiki-ngeli iren man-eesel na emiin a esel tayo ngon nat amta ra? 9Gwara ired si-kathayoy i-Parthia, i-Media, tan i-Elam. Gwara pay iriy i-Mesopotamia, i-Judea, i-Cappadocia, i-Pontus, tan i-Asia. 10Sema echom cha si-kathayo, edafo ired Phrygia, Pamphylia, tan Egypt. Et sema echom, edafo ired sahop na Libya a iyay-askang cha siyodad na Cyrene. Sema echom pay, i-Roma iren manbibisited jay 11a iyaybilang i Hodjos tan nat Hodjos a naengonod ma na rilijon tayo. Gwara ngo pay iriy i-Crete tan i-Arabia. Et angken edafo kiyed ekila-kilasin dogad, emangkaiki-ngeli ira ja naematin man-eesel na esel tayo ngo maypangkep iren ma kaskasdaaw a ima-imag Afo Chiyos.” 12Si-karen emiin, iyasdaaw iren pasiya, tan eg cha igwathan i emangkepasamak. Et iyanbibinaga ira i “Nengoy piyan ton a-seden?” 13Nem sema echom ngo, iyangja ra ira ma ematin kigwan cha i “Ebotheng bengat ira ma too.”

Iyankasabes Peter Cha Chakel A Too

14Et si Peter tan sema iren sawal na sa-kin echom ton apostolis, imakgwat ira, et inpekes Peter i esel ton kigwan to i “Echom kon Hodjos tan si-kayon emiin a naiyan-iyan cha Jerusalem, iki-ngeli yon chiliy konen ko say egwathan joy emangkepasamak. 15Kin jo i ebotheng ira ja too, nem enchi tep nagwariy manbotheng no alas nowibi na agsapa. 16Sema epasamak cha si-kawi nonta engkay da, si-kathoy inpadton Joel a profiten kigwan to i:

17‘Sejay i kigwan Afo Chiyos a

“No onmothok i kaonoran a akow,

ito-nok i Ispiritok cha emiin a too.

Et sema iren anak jon daleki tan bibii,

konen chiy piyan kon ipaamted si-kayo.

Sema iren bedoleki, gwara iriy ipasi-neng kod si-karen

inges toy kokokip.

Tan sema iyangkaama, gwara iriy ipakokip kod si-kara.

18Ahow, angken sema iren naiyansilbid si-kak a

daleki tan bibii,

ito-nok i Ispiritok cha si-kara no kaonoran a akow,

et konen cha ira ma piyan kon ipaamted si-kayo.

19Et gwara diy kaskasdaaw tan sinjal a

ipasi-neng kod iyaykayang tan chiya dobong.

Gwara diy chala, afoy, tan maschel a asok.

20Onbolinget i akow, tan sema bolan, ondepang a

inges toy chala.

Et onmothok i kaskasdaaw a akow a nagwariy kay-ingesan ton

onkowan alis Criston mengowis na emiin a too.

21Et emiin a mekikaasid Afo Chiyos, maysalakan ira.” ’ ”#2:17-21 Joel 2:28-32

22Et intolo-toloy Peter a engowan i “Si-kayon echom kon poli-polin Israel, iki-ngeli yoy konen ko. Si Jesus a i-Nazareth, inpa-mag Afo Chiyos i kaskasdaaw tan milagrod si-katho say sema iren ima-imag Jesus, ipaamta thod si-kayo i si Afo Chiyos i engito-no did si-katho. Et amta yo i podno tan tep inpa-mag Afo Chiyos ira man cha si-katho nonta gwares Jesus cha si-kayo. 23Si Afo Chiyos, sigod a niyemnem to i may-awat si Jesus cha si-kayo tep seman i plano tho nontan da, et amta tho i metongpal. Et si-kayoy kagol na etiyan Jesus tep in-awat jo ired ngaaw a too say idansa red koros. 24Nem inpanpawil Afo Chiyos si Jesus et indibchi thod digat na pathiy tep nat mebedin a tetngelen na pathiy si Jesus. 25Tep gwariy inpadton David maypangkep na panpawil Jesus nonta kigwan to i:

‘Amtak i si Afo Chiyos, gwara na olay cha si-kak.

Tep gwara na olay cha askang ko say nat ontahotak.

26Isonga, manchadsahak tan chejawen tahen Chiyos ko.

Et angken no metiy i angel ko, sigoradoen kon a-magen moy kigwan mo.

27Tep amtak i eg moak iolay chiwa kawad-an na iyangketiy,

tan si-kak a anak mon, eg mo itolok a mebojok i angel ko.

28Tep inpaamtam cha si-kak i chalan a ontorong cha biyag

et mepnoak na chadsak tep gwaraak alid sangoanan mo.’ ” #2:25-28 Psalm 16:8-11

29Et intoloy Peter a imesel a kigwan to i “Si-kayon aahik, ipaamtak cha si-kayo i piyan David a afo thayo len a-seden nonta insolat to ira ma ese-esel. Nat angel ton mismoy towan kona tep etiy si David et iyaybeka, et sema iyaybekaan to, ijay pay cha si-kathayo ingkathod niman. 30Nem profites David, isonga amta tho i inkarin Afo Chiyos cha si-kathon no sa-ki din akow, panbalin Afo Chiyos i sa-kin poli-poli thon arin inges tos si-katho. 31Amten David i mepesamak chiwa poli thon si Cristo. Amta tho i manpawil si Cristo. Isonga, kigwan to i nat may-olay si Cristod kawad-an na iyangketiy tan nat mebojok ngoy angel to. 32Seja Criston miyan kona, si-kathos Jesus. Si-kathoy inpanpawil Afo Chiyos. Et miyan tistigoi i podno jay tep sini-neng min emiin nonta iyakcheng a iyanpawil. 33Et imolis Jesus cha dangit a timokkong cha gwanan Afo Chiyos a Aweto. Et in-i-kan Afo Chiyos i karebengan ton mengito-no na Ispirito Santod si-kathayo tep si-kathoy inkarin Afo Chiyos. Et sema iren sini-neng jo tan inki-ngelan jo niman, sema Ispirito Santon into-no din Jesus, si-katho ma engamag iren man. 34Tep nat si David i kimayang cha dangit. Isonga, nat towan koniy angel to nonta insolat to i:

‘Kigwan Afo Chiyos cha Afok i

“Tokkong ked ja gwanan ko

35ingkathod a-gwahen ko ira ma naengontred si-kam a

singen inkathin mo ira.” ’ #2:34-35 Psalm 110:1

36Isonga, si-kayon emiin a poli-polin Israel, mesepol a egwathan jon agpayso i si Jesus a indansa yod koros, si-katho ma inpanbalin Afo Chiyos na Afo tan Cristo.”

37Idi inki-ngelan iren ma tothoo man, banay i babawi ra, et kigwan ched Peter tan echom a apostolis i “Aahi, nengoy pesing tayo?” 38Et insongbat Peter i “Beneki yoy basol jo et panbonjag kayon sa-ki tan sa-ki say ipaamta yo i memati kayo wed Jesu Cristo et say mepekawanan i basol jo, et i-kan Afo Chiyos i Ispirito Santod si-kayo. 39Tep sema karin Afo Chiyos a ito-no tho diy Ispirito Santod tothoo tho, para cha si-kayo tan sema iren poli-poli yo tan emiin a gwared aragwin doga-dogad. Para cha emiin a toon pinispis Afo Chiyos a memati.”

40Chakel pay i kigwa-kigwan Peter, et inbilin ton pasiya i “Pemati kayod Jesus say maysalakan kayo et say nat mayka-chom kayod chosa ira na ngaaw a too niman.” 41Et chakel i ematin ma kigwan Peter et ebonjagan ira. Nontan a akow, chanchanin tedon dibon tooy iyayka-chom ired ma emati waled Jesus. 42Sema iren too, intolo-toloy chen a-chalen iriy toro-toro iren ma apostolis tan naiyono-onoran cha ma toro-toro. Naesa-sa-nop ngo ira, naekikara-kararag ira, tan naekidiho-dihob ira na tinapay a penginemnemneman cha na ingkathiy Jesus.

Sema Inpasi-pasing Iren Ma Ematid Jesus

43Chakel i milagron ima-imag iren ma apostolis, et emiin a too, iyasdaaw iren pasiya. 44Et emiin a emati, intolo-toloy chen esa-sa-nop tan naiyanbiningay ira na kokowa ra. 45Indaho riy kameng cha tan kokowa ra, et in-ap-ap cha ma pilak ired ma echom chen iyaybasar cha kasapolan na sa-ki tan sa-ki. 46Gwiya-gwa-gwen naesa-sa-nop ired timplo. Tan naesa-sa-nop pay ired baliy chen naekipangan a ainposoan a chadsak. 47Nachija-chijaw ches Afo Chiyos, tan emiin a toon, narinispiktar cha ira. Et gwiya-gwa-gwen gwariy toon insalakan Afo Chiyos a iyayka-chom ired ma emati.

Currently Selected:

Acts 2: KAR

Highlight

Copy