Markus 15

A yuum na Yeso i dum Bilatus

1I tak duru ɗang, ɓi daatban ɓa mudkid, la ɓi ɓoji, la ɓi ɓoɓa shik nzu, la pyang ɓoɓa ki kang la ɓoji la Yahudawa ma, shap kun a shik. A kud Yeso, a saani ban maan, a dab ban pa yi ɓi Bilatus.

2Bilatus ɗwa'ari na, “Wu la rangan la Yahudawa? Yeso kaɗan ɗi na, “U shaɓam wa.”

3Ɓi daatban ɓa mudkiɗi ɓa, shap kun i mud gǝrɓa muɗi gywak. 4Bilatus kad i ɗwa'ari na, “Wu gha kaɗan ɗara? Wak bǝlǝn gǝrɓa ye shap i muɗu.”

5Ama Yeso kad i mwad, i sun kaɗan ɗa, gǝrma sheel Bilatus.

6Wama gwamna ki pakka ma ndwang, i koyab nggwom ma dal, yi ki ma'an ɓo mwak ma a giɓi, la na ɓi ɓo kamam na ɓi mǝ'i. 7Ɓomaan nga ma a tu'uli na Barabas, ma a giɓi i nda ma gib ɓo, yi la ɓoɓa ki nga'at ɓaal ɓo, a ki wal ɓo ɓe wu. 8Bǝlǝn ɓoɓa raam ɓa, yu ɓi ɗwa'ar Bilatus, ɓi pak gǝrma yi ki pak ɓe, ma ndwang.

9Bilatus ɗwa'ar ya na, “Wun yaɗan ɗa mak rangan la Yahudawa ɓi wun ne?” 10I daal ma na buk la mak ki ɓi daatban ɓa mudkiɗi pa Yeso gha ɓi. 11Ama ɓi daatban ɓa mudkid, nga'at ɓaal li ɓi ɓo, ɓe kam Bilatus, ɓi mak Barabas i karkun Yeso.

12Bilatus ɗwa'ar ya na, “Ma la mi pak, la ɓoma wun tu'uli na rangan la Yahudawa mi?”

13A ngam na, “zǝd na yi!”

14Bilatus ɗwa'ar na, “Wake, ɓiɓin gǝr ma la i pak?” Ama a li dum la ban ngam na, “Zǝd na yi!”

15Lakunla ban yad ban mak, ɓi ɓaal bǝlǝn ɓoɓa nwang, she Bilatus mak Barabas ɓe. I mak ɓe wal Yeso, la i pi yi, ɓi zǝɗi.

Kudnggin zaal Yeso

16Kudnggin ɓa, saan Yeso i ban ma yid la la gwamna, la a tu'ul pyang kudnggin ɓa, i ban ma mwak. 17A mak ɓyal lu'ut la rangan ma yam zargina, ma jing toon gappi, she a nak ji ɓi gus tagya la rangan, a mak ɓi mud. 18She a bwal ban tu'uli na, “Ɓi Koǝl shuo, Rangan la Yahudawa!” 19A kad ki wuli, kinikini la njalang i muɗi, a ki ta taɗa ɓi. A kungǝt, a pa gulli. 20Ma a zaali, she a wup lu'ut la rangan ma yam zargina ma ɓi yid, a mak lu'ut ɓali ɓi. She a saani, ɓi pǝngi.

A zǝɗǝm Yeso

21Ɓomaan ma pur i Bakurane, lu'i na Saminu, tad le ɓi Iskandari la Rufas, yi ngaar ɓi ɓeer i ɓaal nggali gari, she a mǝ'i ɓi ɗap nggun ma zǝt ɓo ma. 22A yuun Yeso i bana a tu'uli na Golgota, yi na ban la muup mud. 23She a pa yam nggun ɗi, ma a su'ut la ɓuur, ma a tu'uli na mur, ama i ɓiin ban kyam. 24La a zǝɗi. A gǝb ɓi lu'ut ɓali, a wal beed ka muɗi, ɓe sun gǝrma koyab ɓo i ɓaal ya ɓi kum.

25A zǝɗi, i bwal kyastwangan ma duru. 26A ngywangal gǝrma mak ki a zǝɗi gha na: RANGAN LA YAHUDAWA. 27A zǝɗi la nggib rwap, ɓa yak gǝr la ki'il, mwak i ɓu'i ma li gǝr, mwak kwad, i ɓu'i ma kalang. [28Yi na wal kun, kun la Koǝl ma shap na, ‘A ɗaɓan yi wa ɓoɓa pak ɓǝsǝn kun na.’] 29Ɓoɓa ngaar i kab ɓa, ki ngam, a ki shap ɓi'in kun i muɗi na, “Ayya! Wu ma shap na wu gwa'as na La la Koǝl, ki ɓak i ɓaal nwang taat, 30su'ul i mud nggun ma zǝt ɓo, ɓu yak muɗu!”

31Wama la ɓi daatban ɓa mudkid, la ɓi ɓoɓa shik nzu, ki zaali i nzwak ya. A na, “I yak mud ɓoɓaan, ama yi gha gamban yak mud nggiiɗi ɓa! 32Shik ni rangan Isrela, Kristi mi, ɓi su'ul tutumi i mud nggun ma a zǝɗi gha, ɓi su sun, su yakti'i gha.” Ɓoɓa a zǝɗi laya ɓa, shap ɓi'in kun ɗi.

Ban wu la Yeso

33I mudkid tangal, ban toon zub nzaal ma pyang, ma bwal taat. 34I bwal taat ma tangal ma, Yeso ɓo zwal la nggalli gingi, i shap na, “Eloi, Eloi, lama Sabaktani?’’ Yi na, “Koǝlla, Koǝlla, wake ki sha'a?”

35Ma ɓoɓaan ɓa jaam tuu wak mi, a shap na, “Taana kid wun, yi tu'ul Iliya!”

36Ɓomaan ɓang, mak soso i ɓaal yam nggun ma ngang, i so i yid njalang, la i pa ɓi Yeso ɓi kyam. Ɓoma shap na, “Shik na yi, i mu'i. Ɓi su sun, laa na Iliya ɓi yu, su'ul na yi nzaal.”

37Yeso ɓo zwal la ngaali gingi, she i tangas ban wuushi, maa masal kuni.

38La laɓule ma La la Koǝl, sa'ad rwapshi, swabti'i kidmuɗi su'ul i nzaal. 39Ma ɓoji la kudnggin ɓa, ma jaam i dum Yeso, wak zwal lii, i sun wama i wu gha, she i shap na, “Mamiin, ɓomi yin ɓola Koǝl na!” 40Maam ɓaan nga, ɓi ki sun i ban naat na. I ɓaal ya, Maryamu Magadaliya gha, la Maryamu nggali ɓi Yakubu ma gap la Yusufu, la Salomi. 41Maam ɓiɓi, bil mi, a ki kud tak ɓi, ki yi ɓaal Galili. Bǝlǝn maam ɓaan ɓa yu la yi, i Urshalima gha bana.

Ban limǝs Yeso

42Ma kurup shik tuu ɓi pak, i tangal ma pak yid, I tangal ma kasa ki Asabar lama, 43Yusufu ma Arimatiya, ɓoma ɓaal ɓoji ɓa kang la ɓoji la Yahudawa na, ma a daali shangmi. Yi la nggiiɗi, yi yal tak ban nwang rangan la Koǝl, i ɓeer la ɓaali mwak i ban Bilatus, i ɗwa'ar yid Yeso. 44Ma Bilatus wak na Yeso wuum, she kun ma sheeli. She i tu'ul ɓoji la kudnggin ɓa, i ɗwa'ari na, ko Yeso moor i wuum. 45Ma Bilatus wak gǝrma ɓoji la kudnggin ma shappi, she i shap na, ɓi pa yid Yeso ma ɓi Yusufu. 46La Yusufu kur lu'ut lilin, ma limǝs ɓo. She i su'ul yid ma, i gangal la lilin ma, la i shik i bana limǝs ɓo, i ɓaal taal ma a ɓo. She i ɗi'ir taal, i nggyak kun bana limǝs ɓoma gha. 47Maryamu Magadaliya la Maryamu nggali Yusufu, sun bana a mǝ'i gha.

Currently Selected:

Markus 15: JGK

Highlight

Copy