Yohana 19

1She Bilatus mak ɓe kaa na Yeso ɓe wuli gha na ɓwar. 2She ɓi kudnggin pak gangas ji kutti mud, she a mak luˈut la rangan ma bangan ɗi. 3A ki yu a bini, a ki nggat ɓuk ɓi takkit aki naɓi na, "Ɓi Koǝl shuˈu rangan la ɓi ɓoɓa Yahuda. 4She Bilatus kǝr pur. I shappi ɓa Yahuda ɓa na, "Tutumi, mi purun na Yeso ɓi wun, mi yad ti wun daal gha na sǝn kumi na ɓiɓǝn kun maan ɗa." 5Yeso pur na ji ma a gangas si mud na luˈut rangan ma yimi bangan a yiɗi. She Bilatus naɓe na, "Ɓoma naami!" 6Ɓi ɓaji ɓal ɓi daatban ɓa mudkid na ɓi kudnggin ɓa La la Koǝl sǝni she ɓuk zak yana, "Pang na yi! pang na yi," ama Bilatus shappe na, "kaa ri na yi na nggid wun, wun pang na yi, la sǝn kumi na ɓiɓǝn kun ɗa." 7Bi ɓoɓa Yahuda na, "Su gha na nzu lasu, nzu lasu mi shap na reˈem ɓi wu nakunla yi kaɗan ma muɗi na yi Ɓo la Koǝl la." 8Ma Bilatus wak kun ma, she wup kǝr wuli shangmi. 9Yi kǝr ko ɓaal La la rangan yi naɓi Yeso na, "Wu pur yabani?" Ama Yeso sǝn kaɗan kun ɗi ɓa. 10A mud wana, she Bilatus naɓi na, "Wu ɓina ba shap kun nami? wu sǝn daala mi gha na nyap mami muˈu gha ko mi pang na wu ɓǝra?" 11Yeso naɓi na, "Nyap lu a moɗa, Koǝl na paɓu, a mud wana ɓoma paa a ɓunu yi tandu na ba pak ɓiɓǝn kun." 12A mud wana, she Bilatus yatti miˈi. Ɓi ɓoɓa Yahuda ɓuk zaak a ki naɓi na, "Wuna maˈam ɓo mi wu la Kaisar na ɓa. Ɓoma na kaɗan ma muɗi na rangan na, yi nyasam ɓi Kaisar nama." 13A mǝsma Bilatus wak kun ɓa, she yi purun Yeso a nza, yi rǝk a mud ban ma kas nzu, a ɓaal ban maan ma a ɓak na taal."A tungul ban ma ging Aramaya na "Gabbatha". 14A lib pak yid Ngwam ma dal na. A kap mudkid tangal she Bilatus shappi ɓi ɓoɓa Yahuda na rangan lawun nami. 15Ama ɓi ɓoɓa Yahuda ɗab zaak aki na, "Mer nayi, mer na yi, pang na yi!" Bilatus maas na, "A pang rangan lawun ma? She ɓii daatbaan ɓa mudkid yana, "Su gha na rangan maan ɗa she Kaisar," 16A ban malas kuni, Bilatus pa Yeso bi ɓoɓa Yahuda lakunla ɓe pǝnggi.

A Pangam Yeso

17She ɓi kudnggin kara Yeso. Yeso kwad yi pur a ɓaal gari ma yi ɗaɓan nggun ma ya pǝnggi gha, yi kaa gha ban maan ma a tungli na "baan Kwalang Mud" na ging la ɓoɓa Aramaya a naɓi na "Golgotha." 18A bana ma na a pang Yeso gha, na ɓoɓaan ɓaari. Ɓo ɗik a ko yap ɓuk na Yeso a mukid ya. 19Bilatus nywangal gǝrmaan yi ma a kitmud nggun ma a pǝnggi gha ma, "YESO MA NAZARAT RANGAN LA ƁOƁA YAHUDA 20Ɓi ɓoɓa Yahuda gywak ɓal gǝrma a nywangal a kid mud nggun ma a pang Yesu gha, nakunla ban ma a pang Yesu gha ma, tuu na ngal gari ma, a nywangal i ɓaal ging la Aramaya na la ɓi Roma na la ɓi Heleni. 21Ɓi daatban ɓa mudkid shappi Bilatus na ɓi gin nywangal na "Rangan la ɓi ɓoɓa Yahuda ɓa" she ɓi nywangal na "Yina shap na yi rangan la ɓi ɓoɓa Yahuda na." 22Bilatus kadan na "Gǝrma nywangal ma nywangal ma nama" 23Takkwad ma ɓi kudnggin pangam Yeso, she a dap luˈut li a ngǝb tiˈi yiin, koyap kudnggin ɗap li. Ya kar ɗap dǝlǝn luˈut li ma a sǝn zuri ɓa ama a kwaɗan yi swab tiˈǝ kitmuɗi dwang nzaal. 24She ya shappi biibya yana, "Su gin sanni luˈut mi ɓa, su walli bet ka muɗi su kum sǝn ɓoma yi li gha. "A pak kun mimi she rǝk tǝk-tǝk na kunma nywangal a ɓaal kunla Koǝl ma dul#19.24 Dul ko Ban Walankuni woma yi shapka na, "A gǝɓǝn luˈut ɓala a zwakya, ya wal bet a mud luˈut la." Wana na kudnggin ɓa pakka. 25A tuu na nggun ma a pang Yeso ma gha nggi gha, na nyam la nggi na Maryamu mala Kiliyofas na Maryamu ma Magadala ya jaam na bana. 26Ma Yeso sǝn nggi na matar li ma yi yiɗi mi ya jaam na tuu, yi naɓi nggi ma na, "Maam, ɓolu naami." 27Na yi shappi matar li mana, "Nggu naami." Matar ma ɗap nggi karayi la li yi rǝk nayi a mǝs ma.

Wu La Yeso

28A takwad wana, ma Yeso daala na a mǝs ma yi malam koyap gǝr nakunla koyap gǝr ɓi rǝkka woam kun la Koǝl shapka, she yina, "Yam wal ma mi." 29Ama nakunla bang maan gha ma walan ɓaali na yam inabi ma ngaˈngan ma a shik a bana, she a nyis soso a kun gangan nggun izob, ya naat ti kuni. 30Ma Yeso moos yam ma ngaˈngan ma, she yi na, "Malam." A mǝs ma wana ma na yi dungat muɗi nzaal yi pa wussi.

A Soom Yeso Na Kwang

31Apak kun ɓiɓi a tangal ma pak gǝr shik, alip durkwat mǝs nggal ban wuus la ɓoɓa Yahuda na. Nakunla ɓi ɓaji la ɓoɓal Yahuda ya yad te shik yid ɓoɓa a pang ya mud nggun a li ban wuus laya ɓa, She kam Bilatus ɓe ɓun ɓi kusiya a kar dwang na luun yid ya nzaal. 32She ɓi kudnggin ɓa ya ɓun kussi ɓoma ma dum ma a pǝngi ma na lama ma ɗik ma kwad. 33Ama ma a yu a ban Yeso, she a kumi yi wum, a sǝn ɓun kussi ɓa. 34She maan ɗik a ɓaal kudnggin ma yi so Yeso na kwang a mbeel ziˈi, na ma ɗarakma kil na yam pur a yiɗi. 35Ɓoma sǝn gǝrɓa biɓi na mishi na shap woma pakka, shapli ma kwad miin na. Yi daala na miin na yi shap, yi shap nakunla ɓi wun kum yak kun mamiin gha woma yi yakka. 36Gǝrɓa ɓiɓi pak yid ɓi dul kun nwyangala kunla Koǝl ma shap na, "Muup yida dik, ya ɓun ɗa." 37Wana kwad nywangala kun la Koǝl maan shap na, "Ya sǝnǝn ɓoma a suˈi."

Ban Limis Yeso

38A takwad wana, Yusufu ma Arimatiya yi kam Bilatus ɓi pa luun yid Yeso ɓi. Yi Yusufu yi matum la Yeso na ma soromna nakunla wup ɓi ɓoɓa Yahuda. Bilatus yak tiˈe paɓi, na yi yu ɗap luun yid Yeso ma. 39Ama Nikodimus ma kaa ban Yeso na duk mi yi gha na Yusuf a lip ma, yi yu na mud ma shagan rum la "Mur" ma a suˈut na Alos ma yaˈal li kilo lumi taat. 40She ya ɓaar ɓa a ɗap luun yid Yeso a mak a ɓaal tong lilin, na gǝrɓa bwaɗan rum ɓa, wama ɓi ɓoɓa Yahuda ɓiki pakka yana ba limis ɓo. 41A ban ma a pǝngi gha sum maan gha na piip kilik maan ma gha ma a sǝn ki mak ɓomaan gha ɓaali ɓa. 42Mǝsma pak yid gǝrshik laɓi ɓoɓa Yahuda na, kilik ma ka tuu she ya mak Yeso a bana.

Currently Selected:

Yohana 19: JGK

Highlight

Copy