Lǔka 24

Ye̤shǔ Khrî̌stu htûpwa̤gesǒ ta ta̤si

(Matěo 28:1-10; Mǎ̤riko 16:1-8; Jowǎ̤ni̤ 20:1-10)

1Mṳni̤ susǒti̤ni̤ akû khû̌lû̌gutṳ̌ ti̤ni̤ bǎ lṳmṳlîwosò akhanu, mamǔ htǒotoǒ phî̌nṳ shinṳmû̌ htě asî ma̤wǒnǎ htǒotoǒ dě a hè lǒkho dě lṳkhû̌. 2Dě lo̤ htě kò htû̌toklobǐ yǎta lṳkû tamanu, asî kè̌shǐ ta kò htû̌toklotephe cû̌kè nû̌û. 3Asî nṳkè̌ pwǎ̤tadě a kè̌shǐpe Ye̤shǔ alṳto̤ tò̤. 4Bǎ asî ihtǒ gènè̤ ta̤wi̤ta̤kè̌ htǒokhanu, kòyò htě a kûsǒ hǐdo rakharosho sò̌gini̤ ǒlṳhtò̌sumṳ bǎ asî dě a hèihtǒ ǒ asî kòshî̌. 5Mamǔ htǒotoǒ ǐsha tûlû̌shû̌ dě a gene̤lò̤ û̌tṳglulò̤ ami̤sǎ dě hǎkhû̌, dě kòyò htǒosò̌gini̤ hî̌ asî, “Sî cû̌kè̌lǎ kòyò htûpwa̤ dě kòyò si toǒ akla ma̤tè? 6Ye̤shǔ ǒpe bǎo tò̤ hǒ, a htûpwa̤gesǒ hǒ. Gènè̤htò̌ gesǒ lǒkho bǎ a ǒ Galilî̌aga akha htě a pwe̤ǐhto sî ta̤hî̌bǎnu toǒnu. #Matěo 16:21, 17:22-23, 20:18-19; Mǎ̤riko 8:31, 9:31, 10:33-34; Lǔka 9:22, 18:31-33 7‘Kòyòphû̌khû mî̌ hehtǒo, kò ǐlò̤kè he dě kòyò ta̤ma̤sǔphû̌ toǒ a cǔdekû pě. Kò bǎ htǎwa̤si he dě nò̌dòhtǔ alo̤ pě, dě bǎ suni̤ti̤ni̤ pěnu, he bǎ htûpwa̤gesǒ pě.’” 8Htǒotaplǎdě mamǔ toǒ gènè̤htò̌bǎge a ta̤hî̌bǎnǎnu toǒ.

9Dě asî hǎhtò̌gekè ahǐ dě a gepwe̤ǐbò ta̤wi̤ta̤kè̌ htǒo ta pwa̤nophû̌ shǐtapwa̤ htǒonu ta kòyò ahǔwa̤ htě a ǒkû̌ ta asî lǒ̤꤮ bò bǎnu toǒ. 10Mamǔ htǒotoǒ mî̌ Madalě̤na dokûmo̤ Marǐa, Jowǎ̤na ta Jǎgomo̤ amo̤ Marǐa sînu toǒ hǒ. Asî htǒotoǒ ta mamǔ ahǔwa̤ toǒ pwe̤ǐlṳ bǎ pwa̤nophû̌ toǒ ta ta̤wi̤ta̤kè̌ htǒotoǒ. 11Pwǎ̤tadě pwa̤nophû̌ htǒotoǒ gènè̤ lǒkho ta mamǔ htǒotoǒ hî̌bǐhî̌ǒ pwǎ akhû̌akhî, a yṳǎ asî tò̤. 12Pwǎ̤tadě Petru ihtǒkhlè̌hè lṳkhû̌ dě bǎ a hèû̌lò̤kè̌jonṳ akhanu, a kè̌shǐ hǔgòpwî̌ bǎplo̤htû nutṳpṳ pwǎ. A hèkè̌hto hǐnudě a gesǒ dě hǐ. A cû̌htûhtò̌ tǒ̤ hè̌o ma̤tè a gènè̤ dě a sû̌pi̤sò̌pi̤ mè̤mè̤̌.

Kòyò toǒ cû̌ dě Emaǔdo

(Mǎ̤riko 16:12-13)

13Bǎnu ti̤ni̤, Ye̤shǔ akhophijaû̌ sò̌gini̤ cû̌ Emaǔdo htě a ǒ yî̤ ta Ye̤rǔshèlèwî̤ dě a phǔ꤮ ǒ susǒ tè̤mè̤. 14Dě asî pwe̤ǐcû̌ kè̌khînû̌û ta lǒ̤꤮ bò ta̤ma̤htûhtò̌hto awi̤akè̌ htǒonu toǒ. 15Bǎ asî hî̌bǎpwe̤ǐ kè̌khînû̌û akhanu, Ye̤shǔ hèphǔ asî ǒ dě a cû̌ htagu kû̌ta asî. 16Asî kè̌shǐ nû̌û pwǎ̤tadě a sî̌ya lǒkho nû̌û tò̤.

17Ye̤shǔ hî̌ asî, “Sî hî̌bǎpwe̤ǐcû̌ kwè̌ nû̌û ta ta̤wi̤ta̤kè̌ titètè?”

Htǒotaplǎdě asî ihtǒ ǒkǔ lǒkho dě asî mi̤sǎnu, a sǎpla̤sǎyṳbò. 18Bǎnu akla tapwa̤ mî̌ ami̤ ta Kleǒpha htǒotapwa̤nu a gwè nû̌û, “Dě Ye̤rǔshèlèwî̤kû htǒonu, kòyò htûshǐtè̤mè̤ mî̌ a ǒ pwǎpǒ̤ natapwǎ̤panu hǒ. Bǎhǎlṳno dě kò ma̤kwè̌꤮ mî̌titè numî̌ na sî̌ya kû̌nǒ kò dǐcǎ꤮ tò̤ya?”

19Dě Ye̤shǔ gwè nû̌û, “Kò ma̤ kwè̌꤮ titè ya?”

Dě asî hî̌shǔ nû̌û, “Mî̌kǎ Nǎ̤sèrèwî̤phû̌ Ye̤shǔ awi̤akè̌nu lè꤮. A mî̌ pwa̤po̤ tapwa̤. A ta̤hî̌bǎhî̌sho ta a ta̤phî̌ta̤ma̤ htě Cǒmara ta kòyòhǎkhû̌phû̌ lǒ̤꤮ bò alo̤mo̤nu, a ǒ ta ta̤po̤ta̤phǎ. 20Ma̤pûhǐ pa pwa̤tòlûhtò̌ hǐkǒdû̌ toǒ ta pa kòyòdû̌ toǒ cèròsikè nû̌û ayanu, a ǐlò̤kè nû̌û dě Khwǐpilǎto a cǔdekû dě a htǎwa̤sikè nû̌û nò̌dòhtǔlo̤. 21Pwǎ̤ta pa kè̌shu nǎla̤ǐ yǎta a ma̤lû̌htò̌ge Israelphû̌ toǒ pě. Hǐnuhtohǒtò̤, khò̌ti̤ni̤mî̌ ta̤ma̤htûhtò̌ ana̤ behtò̌ suni̤ hǒ. 22Mamǔ dě pakla toǒnu, asî hè wosò lǒkho lṳkhû̌ dě a ge hî̌sò̌gònò̤bò pa. 23Ma̤tè̤hî̌dě asî hè dě a hè kè̌shǐ lṳto̤ htǒo tò̤ ahî̌nǔ꤮. Asî gesǒ dě a gehî̌ ta asî kè̌shǐ mǒkhû̌tanaphû̌ toǒ ǒlṳhtò̌ bǎ asî, dě a hî̌ asî ta Ye̤shǔ htûpwa̤gesǒ hǒ, ahî̌nǔ. 24Makhû dě pakla toǒǒ khlè̌hèkè̌ lǒkho lṳkhû̌ dě a kè̌shǐ Ye̤shǔ lṳkû ǒkhûkè sǒsǒta mamǔnu toǒ hî̌nupwǎ. Dě asî kè̌shǐ Ye̤shǔ tò̤, ahî̌nǔ.”

25Hǐnu htodě Ye̤shǔ hî̌ asî, “Kòyò ǒlû̌ǒkhlo sî꤮, pwa̤po̤ toǒ hî̌nǎ ta̤hî̌bǎ toǒnu, sî yṳǎpò̤ jî̌꤮ le! 26Khrî̌stu tobǎ khò ta̤jîta̤jû htǒotoǒ htodě a cû̌nṳ a ta̤sîrîdû̌sîrîhtû akû dě mǒkhû̌ pě mè̤tò̤ ya?” 27Htodě Ye̤shǔ pwe̤ǐphlo bǎ asî ta lî̤cahtǐ hî̌nǎhto a awi̤akè̌ tèhtò̌ dě Mǒ̤jè khwè̌lî̤nu toǒ ta pwa̤po̤ lǒ̤꤮ bò toǒ khwè̌nǎnu.

28Bǎ asî cû̌to̤phǔ ta do htě a glè̌ cû̌ htǒotado akhanu, Ye̤shǔ ma̤ pwǐ a glè̌ cû̌ tûlû̌kè ta do htǒonu. 29Pwǎ̤tadě asî kaǎ sělě nû̌û dě a hî̌ nû̌û, “Nṳ ǒkǔ kû̌ta pa bǎo hǒ, lṳmṳ glè̌ phǔlò̤hǒ, pěmî̌ lṳmṳkhǐlǎ na hè̌.” Hǐnu akhû̌akhî, Ye̤shǔ cû̌nṳ ǒkǔkû̌ ta asî bǎnu.

30Bǎ a hǎnòò̌ ǎhtu asî shǎ akhanu, a phî̌ mû̌ dě a hî̌bwǐhî̌sîrîhtò̌ Cǒmara htodě a bî̌phò̌ mû̌ dě a yṳ̂ǎpa̤ nû̌ûta asî. 31Htodě asî mi̤sǎ lîhtò̌ dě a sî̌ya to̤mǎǐge Ye̤shǔ, dě taplǎpa Běcǎ Ye̤shǔ hǎmǎkè asî lo̤mo̤. 32Asî hî̌ kè̌khînû̌û, “Bǎ a hî̌bǎ ta pa dě klè̌lo̤ akhanu bǎbǎ, bǎ a pwe̤ǐphlo bǎ pa ta lî̤cahtǐ a ta̤pwe̤ǐnǎ sîtoǒ akhanu bǎbǎ, dě pa sò̌phlǒkûnu, a phoshû̌phogî sò̌le̤sò̌lò̤htò̌ hǐnu mè̤tò̤ya?”

33Taplǎpa asî ihtǒge dě Ye̤rǔshèlèwî̤. Dě asî gekè̌shǐ ta pwa̤nophû̌ shǐtapwa̤ ta kòhǔwa̤ toǒ ǒplǒdǒbò nû̌û bǎnu. 34Pwa̤nophû̌ htǒotoǒ hî̌ kòyò hèto̤ mǒ̤pe htǒosò̌gini̤, “Běcǎ htûpwa̤ge mè̤mè̤̌ hǒ nî. A dǔlṳhto ana̤ ta Shîmǒ̤nè̤ hǒ!” 35A hî̌htohǐnu dě kòyò htǒosò̌gini̤ pwe̤ǐlṳ dǒlè̌ asî ta bǎ asî cû̌ dě klè̌lo̤ akhanu, a ma̤kwè̌ bǎ asî hî̌tè, htodě asî sî̌yanǒ pwǎ Ye̤shǔ bî̌phò̌ mû̌ akhanu pwǎ, a pwe̤ǐlṳlè̌ asî hǐnu.

Ye̤shǔ dǔlṳ ana̤ ta akhophijaû̌ toǒ

(Matěo 28:16-20; Mǎ̤riko 16:14-18; Jowǎ̤ni̤ 20:19-23; Pwa̤nophû̌ toǒ 1:6-8)

36Bǎ kòyò htǒosò̌gini̤ pwe̤ǐ asî ta ta̤wi̤ta̤kè̌ htǒo akhanu, Ye̤shǔ ana̤ Běcǎ hèihtǒ ǒlṳsumṳ bǎ asî kǎmakû dě a hî̌ asî, “Sò̌phlǒ ta̤gûjûkabǎ ǒkû̌ tû̌ta sî nî̌꤮.”

37Asî gènè̤ lǒkho ta a kè̌shǐ kòyola dě a ǐsha sò̌gònò̤ mè̤mè̤̌ lǒkho. 38Dě Ye̤shǔ hî̌ asî, “Sî gènè̤ ǐshabò lǒkho ma̤tè? Sî sò̌phlǒ wò̌wè̌bò lǒkho ma̤tè? 39Ma̤pûhǐ sî kè̌shǐsî̌ya te̤mǎ ta he na̤klû ǒ na̤cè̌ ayanu, kè̌mò̌ lǒkho he cǔde ta he khò̌lopo̤htǒo, hèpṳ̂kè̌ lǒkho mò̌ hena̤htǒo, ma̤tè̤hî̌dě, kòyola numî̌, aphěayî̌ akhwǐakhû̌ ǒkû̌kò pwǐ he htǒonu tò̤.”

40A hî̌hto asî hǐnudě a dǔlṳ bǎ asî ta acǔde ta akhò̌lopo̤. 41Asî sò̌le̤sò̌lò̤ lǒkho dě a te̤pe̤bò lǒkho akhû̌akhî, a yṳǎwǒ lǒkho hǒtò̤. Htodě Ye̤shǔ gwè asî, “Sî shǎǎshǎo ǒ tacǎcǎ ya?” 42Asî ǐ nû̌û tò̤phû̌ shû̌ǎ tûkû̌kòphû̌. 43Dě a phî̌shǔ nû̌dě a ǎhtò̌lṳ asî lo̤mo̤.

44Htodě a hî̌ asî, “Bǎ he ǒkû̌pe ta sî akhanu, kò lǒ̤꤮ bò khwè̌nǎhto hewi̤hekè̌ dě Mǒ̤jè alî̤kûnu toǒ bǎbǎ, pwa̤po̤ khwè̌nǎnu toǒ bǎbǎ, dě ta̤htû̌sò̌ǐ lî̤kûnu toǒ bǎbǎ, a bǎ lǒbehtò̌bò pṳ̂̌꤮ tacǎ pěnu, he pwe̤ǐlṳhtobò bǎ sî hǒ.”

45Htodě ma̤pûhǐ asî sî̌yaphlowǒ lî̤cahtǐ toǒ ayanu, a bòmohtò̌ bǎ asî sò̌phlǒta̤gènè̤ toǒ hǒ. 46Dě a hî̌ asî, “Lî̤cahtǐ hî̌nǎ ta, Khrî̌stu khòbǎ ta̤jîta̤jû pě htodě suni̤ti̤ni̤ pěnu, a htûpwa̤gesǒ ta ta̤si pě. 47Htodě ami̤akû dě kò dǒhtû̌ǐ ta̤yò̤lò̤gesò̌ awi̤akè̌ ta ta̤bòlû̌ ta̤sǔ htǒonu toǒ awi̤akè̌ pě. Kò dǒhtû̌ǐ yǎta kòyò pṳ̂̌tacǎ aya pě, dě kò tèhtò̌ dǒhtû̌ǐwǐgutṳ̌ bǎ Ye̤rǔshèlèwî̤kû nupě. 48Sî mî̌ pwa̤lò̤sasî̌ htě a htû ta̤wi̤ta̤kè̌ htǒotoǒ aya toǒ hǒ. 49Dě he nohèlò̤ bǎ sî pwǐ hepha olò̤ nǎhtonu tacǎ dě sîlo̤ pě. Pwǎ̤tadě sî dè nî̤bǎ ta̤sîrîshû̌sho htě a ǒ mǒkhû̌htǒo hèlò̤ dě sîlo̤ hǒtò̤nu, sî bǎ ǒpo̤ǐ bǎ wî̤kû bǎonu pě.” #Pwa̤nophû̌ toǒ 1:4

Jo kihtò̌kè Ye̤shǔ dě mǒkhû̌

(Mǎ̤riko 16:19-20; Pwa̤nophû̌ toǒ 1:9-11)

50Htodě anǒkònu, a kaǎcû̌ akhophijaû̌ toǒ wî̤khlo, dě a kaǎcû̌to̤ asî Betanǐdo akòshî̌, a yṳ̂htò̌ acǔde dě a howi̤ asî. #Pwa̤nophû̌ toǒ 1:9-11 51Bǎ a howi̤pe asî akhanu, kò jokihtò̌ tephekè nû̌û mǒkhû̌ dě a bè̌kè akhophijaû̌ toǒ. 52Asî subusabahtò̌hto nû̌û dě asî sò̌le̤sò̌lò̤ gesǒ lǒkho dě Ye̤rǔshèlèwî̤kû. 53Htodě asî ǒ ta̤lṳhtò̌hokû pṳ̂̌꤮ taplǎ dě htû̌sò̌ǐ hî̌bwǐhî̌sîrîhtò̌ Cǒmara bǎnu.

Currently Selected:

Lǔka 24: KRC

Highlight

Copy