Mǒhtûlû̌hǎhtûsa 6
6
Kòyòhǎkhû̌phû̌ ata̤phû̌mò̤shî̌hto
1Bǎ kòyòhǎkhû̌phû̌ tèhtò̌ ǒplṳ̂ǒphǎhè ta ǒpîshîcû̌bò hǎkhû̌tebě dě kò phû̌ǒlò̤nṳ phû̌mamǔ sîtoǒ akhanu, 2Cǒmaradû̌ atanaphû̌ sîtoǒ kè̌shǐ kòyòhǎkhû̌phû̌ aphû̌mǔ toǒ mo̤wî̤mo̤tè̤ mè̤mè̤̌ dě a wû̌lǎphî̌ lǒkho nû̌ûta ama. 3Dě Cǒmara tûjûpwa̤ hî̌, “He noǒ sayè̤kû̌ heyolahtûpwa̤ ta kòyòhǎkhû̌phû̌ htǒotoǒ tûjûpwa̤ mî̌ awǒ tò̤, ma̤tè̤hî̌dě asî ǒ pwǎ̤ta sǐshiphěyî̌ htě a sijònu akhû̌akhî, asî bǎ ǒhtûpwa̤ pwǎ aně ta̤ya̤ ta gini̤shi pwǎ.”
4Bǎnu tuhtukha bǎbǎ, nǒkò htukha bǎbǎ, Cǒmaradû̌ atanaphû̌ toǒ ta kòyòhǎkhû̌phû̌ aphû̌mǔ toǒ phî̌nû̌û dě a phû̌ǒlò̤nṳ kòyòshû̌kòyòsho kòyòdû̌htû toǒ. Dě ami̤dû̌ lṳshilṳga lǒkho wǐnukhanu toǒ hǒ. #Ta̤dǒbǎ 13:33
5Cǒmara tûjûpwa̤ kè̌shǐ kòyòhǎkhû̌phû̌ sîtoǒ ta ajîajû phû̌mò̤shî̌hto aplǎaplò̤ mè̤mè̤̌, htohǒtò̤ asîsò̌phlǒ toǒnu a shokhû̌ye̤yo̤ma̤ còcè̌ ta̤phû̌mò̤shî̌hto pṳ̂̌꤮ taplǎ.#Mǒhtûlû̌hǎhtûsa 8:21; Matěo 24:37; Lǔka 17:26; Petru awǐlǒ tabǎ 3:20 6Dě Cǒmara tûjûpwa̤ bǒ kòyòhǎkhû̌phû̌ hǎkhû̌bǎo akhû̌akhî, a gènè̤mo̤ dî̌kî̌ tò̤ dě a shèwè̤ mè̤mè̤̌ nû̌ûsò̌phlǒ. 7Cǒmara tûjûpwa̤ hî̌, “Kòyòhǎkhû̌phû̌ ta ta̤phû̌ta̤li̤ lǒ̤꤮ bò htě adû̌dû̌ apî̌tî̌tî̌nu toǒ ta htû̌phû̌yṳphû̌ htě he bǒlò̤bò asî toǒnu, he ma̤hǎmǎkèbò asî hǎkhû̌ bǎonu pě. Ma̤tè̤hî̌dě he bǒlò̤ asî akhû̌akhî, a shèwè̤ mè̤mè̤̌ hesò̌phlǒ.” 8Pwǎ̤ta Nǒa nî̤bǎ khǒtû̌ Cǒmara tûjûpwa̤ abwǐdû̌ asîrîhtû.
Nǒa awi̤akè̌
9Htǒomî̌ ta̤khwè̌mǎǐ tû̌ Nǒa akhlialè to̤gilò̤ sî toǒ awi̤akè̌. Bǎ Nǒa ahtukhanu, a mî̌ kòcǒkòtè̤ tapwa̤, a ta̤ǒhtûpwa̤nu kò la̤bè̌ nû̌û ta̤sǔ ǒ tò̤. Htohǒtò̤ abǒsû̌khǎkho cû̌htukhahtu kû̌ta Cǒmaradû̌. #Petru ginǐ̤bǎ tabǎ 2:5 10Nǒa aphû̌makhû ǒ sò̌su. Asî mi̤ ta Shemǎ, Hamǎ ta Ya̤phè̌.
11Cǒmaradû̌ kè̌shǐ sî̌yabò ta kòyòhǎkhû̌phû̌ asò̌phlǒnu a phû̌mò̤shî̌htojî mè̤mè̤̌, bǎtè tò̤glòtè bǎbǎ aphû̌mò̤jîbò. 12Cǒmaradû̌ kè̌lò̤ hǎkhû̌ bǎo dě a phû̌mò̤shî̌hto jîajû lǒ̤bò, kòyòhǎkhû̌phû̌ bǎ hǎkhû̌ htǒonu a ma̤bò ta̤sǔta̤plě pṳ̂̌꤮ tapwa̤. 13Cǒmaradû̌ hî̌ Nǒa, “He bè̌lò̤ he sò̌phlǒ ta he cèrò ma̤pî̌kèbò kòyò hǎkhû̌phû̌ pṳ̂̌꤮ tapwa̤ pě. Ma̤tè̤hî̌dě hǎkhû̌bǎo alǒbebò ta ta̤phû̌mò̤shî̌hto hǒ. Ma̤tè̤hî̌dě asî akhû̌akhî, he ma̤pî̌dǒbòkè asî ta hǎkhû̌ pě. 14Dě phî̌ mò̌ sǒhǐ#6:14 Kò ma̤ sǒkhlidû̌ ta sǒ titènu tapwǎ̤꤮ sî̌ya te̤mǎ tò̤. dě ma̤htò̌mò̌ yǎta sǒkhlidû̌ nunî̌. Dotṳ dědǎ to̤to̤ ta to̤to̤ dě plṳbǐbò akûkû akhlokhlo ta sǒcònu nî̌. 15Ma̤dû̌yǎ pwî̌tè hî̌dě, ma̤htû yǎ apla̤ suya̤. Ma̤lè̤ yǎ apla̤ yè̤shi dě ma̤htò̌yî̤ yǎ apla̤ sushi nî̌. 16Na bǎ klǒbǐ akhû̌klǒ, akhû̌klǒla̤ ta dědǎkhû̌ aplǎnu bè̌ǒkè a ta̤pla̤ nî̌. Dě awe̤pa̤nu bè̌ǒ takha tûkû dě ma̤htò̌ a suto̤. Dě ma̤htò̌ akòdǎ to̤to̤, akǎmakû to̤to̤ ta akhû̌ to̤to̤ nî̌. 17He nodû̌htò̌ shi hǎkhû̌bǎo dě he ma̤pî̌kèbò ta̤ htě a ǒ mǒla̤ toǒ pě. Bò ta̤ htě a ǒ hǎkhû̌ bǎotoǒnu a sikèbò pě. #Petru ginǐ̤bǎ tabǎ 2:5 18Pwǎ̤ta he ma̤měma̤gle heta̤wṳ̂dò ta na pě. Kaǎnṳ naphû̌ makhû toǒ ta nama, kaǎnṳ nadè̌nu toǒ dě nṳlǒkho sǒkhlidû̌kû nunî̌꤮. #Mǒhtûlû̌hǎhtûsa 9:9-16 19Ma̤pûhǐ bò꤮ ta̤phû̌ta̤li̤ toǒ ǒhtûpwa̤ hèpo̤ lǒkho ayanu, pṳ̂nṳ sûkhû̌ amo̤ ta apha tacǎ mî̌ tûphû̌ dě sǒkhlidû̌kûnu nî̌. 20Bò htû̌tî̤pî̤ ta htû̌li̤cò̌ tû̌, ta̤phû̌ta̤li̤ ta ta̤phû̌ta̤li̤ akhli tû̌, ta̤phû̌ta̤li̤ htě adû̌dû̌ apî̌tî̌tî̌nu toǒ akhli ta akhli tû̌ hèbò naǒ pě dě ma̤pûhǐ a htûpwa̤ hèpo̤ ayanu, pṳ̂nṳ amo̤ tabǎ apha tabǎ nî̌. 21Phî̌nṳplǒbò nala̤ǎla̤o pṳ̂̌꤮ tacǎ ta ta̤phû̌ta̤li̤ la̤ǎla̤o pṳ̂̌꤮ tacǎ nî̌.”
22Htodě Nǒa gûma̤kû̌ pwǐ Cǒmaradû̌ mǎnǎ nû̌ûnu pṳ̂̌꤮ tacǎ.
Currently Selected:
Mǒhtûlû̌hǎhtûsa 6: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA