Mǒhtûlû̌hǎhtûsa 35
35
Yǎ̤kò gekhîsǒ dě Betelǎwî̤
1Ǒyî̤hǒtò̤dě Cǒmaradû̌ hî̌ Yǎ̤kò, “Hǎhtò̌cû̌mò̌ Betelǎwî̤ dě cû̌ǒ lǒkho bǎnu, cû̌tèhtò̌ ta̤lṳhtò̌wa̤ tawa̤ ta lo̤ htě la̤sabahtò̌ ta he aya ta̤wa̤ nî̌, ma̤tè̤hî̌dě he mî̌ Cǒmaradû̌ htě a ǒlṳhtò̌ bǎ na bǎ na hǎhtò̌khlè̌cû̌ ǒhǔ nawè̤ Ětò̌ ala̤ akhanu tapwa̤ hǒ.”#Mǒhtûlû̌hǎhtûsa 27:43, 28:11-22
2Hǐnudě Yǎ̤kò hî̌ ahǐphû̌phòphû̌ ta kòyò htě a ǒplǒ kû̌ta anu toǒ, “Wîkèbò lǒkho Cǒmara ahǔwa̤ apwa̤yo̤ htě sî phî̌ǒǐnu toǒ, ma̤mṳ̂ma̤plî sîna̤ dě kûsǒhtò̌ tèplè̌ lǒkho sîhǐdo htě aplîaphǔnu toǒ nî̌꤮. 3Htopědě pa cû̌ Beselǎwî̤ hò꤮, dě he cû̌ tèhtò̌ ta̤lṳhtò̌wa̤ ta̤wa̤ ta lo̤ htě la̤sabahtò̌ ta Cǒmaradû̌ aya bǎnu pě. A mî̌ bǎ he shěto̤bǎ ta ta̤guta̤gè akhanu a hî̌bǎshǔ he dě he cû̌ bǎtètè̌꤮ bǎbǎ a cû̌htukhahtu kû̌ta he.” 4Hǐnudě lǒ̤꤮ bò Cǒmara ahǔwa̤ apwa̤yo̤ htě asî phî̌ǒǐnu toǒ ta asî sè lǒ̤꤮ bò toǒnu, a ǐbò nû̌ûta Yǎ̤kò, dě Yǎ̤kò plulò̤kèbò bǎ Shekewî̤ sǒmṳdû̌nu tṳmṳ ala̤. 5A ma̤hto hǐnudě asî hǎhtò̌cû̌ akha, Cǒmaradû̌ ma̤ sò̌gònò̤ ǐshabò kòyò ǒ lǒkho bǎ wî̤ ǒ te̤we̤lṳ̂ bǎnu akû toǒ akhû̌akhî, kò gûbǔkû̌ asî kò dǐpwǎ̤꤮ tò̤.
6Yǎ̤kò ta akòyò lǒ̤꤮ bò htě a ǒ kû̌ta anu toǒ cû̌to̤ lǒkho Lṳ̌sawî̤, bǎ Khana̤gakûnu. Lṳ̌sawî̤ htǒo kò kaǎpo̤ ami̤ ta Betelǎwî̤. 7Dě a cû̌tèhtò̌kè ta̤lṳhtò̌wa̤ tawa̤ ta lo̤ bǎnu dě a kaǎ gûla̤ htǒotò̤glò ami̤ ta Betelǎ acǒmaradû̌, ma̤tè̤hî̌dě bǎ Yǎ̤kò hǎhtò̌khlè̌kè awè̤ Ětò̌ la̤ akhanu Cǒmaradû̌ dǔlṳ nû̌û ta ana̤ bǎnu tò̤glò.#Mǒhtûlû̌hǎhtûsa 28:19
8Ǒyî̤hǒtò̤dě, Debǒra mî̌ Ribè̌ka apwa̤ma̤ta̤ htǒo a sikè dě kò lǔlò̤kè nû̌û bǎ sǒmṳdû̌la̤ Betelǎwî̤ cǔmû galo̤to̤kûnu tò̤glò. Hǐnudě kò kaǎkè gûla̤nu tò̤glò ami̤ ta Alobakhǔ. (Alobakhǔ amûasǎ mî̌ ta̤hǎta̤wo asǒmṳdû̌.)
9Yǎ̤kò ǒ Pada aragakû dě a geto̤ htoyî̤hǒ akhanu, Cǒmaradû̌ dǔlṳ gepo̤sǒ ana̤ ta a ginǐ̤plǎ taplǎhǒ, dě a howi̤homò̤ nû̌û.#Hoshea 12:4 10Dě Cǒmaradû̌ hî̌ yǎ, “Khònò̤htǒo, nami̤ ta Yǎ̤kò lè. Pwǎ̤ta pwǐ he hî̌hto nanu, kò kaǎpe nami̤ ta Yǎ̤kò tò̤ hǒ. Kò kaǎ nami̤ ta Israel pě.” Dě a htòkè nû̌ûmi̤ ta Israel.#Mǒhtûlû̌hǎhtûsa 32:28; Khwǐ ginǐ̤bǎ tabǎ 17:34
11Cǒmaradû̌ hî̌po̤ nû̌û, “He mî̌ Cǒmara htě apo̤aphǎ tapwa̤, phû̌ǒwo̤li̤ǒphǎ lǒkho dě ǒwo̤ǒhtò̌ lǒkho nî̌. He nohtûhtò̌ nakhlinalè toǒ ta khlilèdû̌ tacǎ ta khlilè gû̌꤮ cǎ akhlilè toǒ pě. #Mǒhtûlû̌hǎhtûsa 28:3-8 Dě nakhlinalè akla toǒnu, a htûhtò̌ nṳtû̌ Khwǐcophǎ toǒ pě. 12Hǎkhû̌ htě he ǐ yǎta Abraham ta Isǎko htǒonu he ǐ yǎta na hǒ. Dě hǎkhû̌htǒo he ǐlò̤ tṳtṳ kû̌po̤ yǎta nakhlinalè hǎte̤gilò̤ nanǒkònu toǒ pěpě.” 13Cǒmaradû̌ hî̌bǎhto ta Yǎ̤kò dě a gekihtò̌ gesǒ bǎ a hî̌bǎ ǐ nû̌ûnu tò̤glò hǒ.
14Yǎ̤kò doihtǒ lo̤hǐhtǔ bǎ Cǒmara la̤hî̌bǎ ǐ nû̌ûnu tò̤glò, htodě a lò̌lò̤ sobîshisî̌yo̤ ta htěshi dě lo̤ htǒo akhû̌ ta ta̤bè̌cahtǐhtò̌ lo̤ htǐnutama aya hǒ.#Mǒhtûlû̌hǎhtûsa 28:18-19 15Yǎ̤kò kaǎ gesǒ gûla̤ htě Cǒmaradû̌ hî̌bǎlò̤shǔ ta anu tò̤glò ami̤ ta Betelǎwî̤, (Betelǎ amûasǎ mî̌ Cǒmaradû̌ ahǐ.)
Isǎko ta Rakhelǎ ata̤si awi̤akè̌
16Htodě asî hǎhtò̌cû̌kè ta Betelǎwî̤ bǎnu. Dě a cû̌to̤phǔ ta Ephratawî̤ akhanu, Rakhelǎ sahtò̌ phusha dě a shajîshû̌ mè̤mè̤̌ nû̌û. 17Bǎ a phû̌ǒlò̤ dě a shajîshû̌ mè̤mè̤̌ nû̌û akhanu, pwa̤kè̌khwè̌phû̌ǒnu tapwa̤ hî̌ nû̌û, “Ǐsha pûma̤, ma̤tè̤hî̌dě na phû̌ǒ ǐpo̤ phû̌makhû tapwa̤ hǒ.” 18Rakhelǎ glè̌ sǎlò̤te̤ phǔsi akhanu, a kaǎkè aphû̌mi̤ ta Beò̌nǐ, pwǎ̤ta apha kaǎ nû̌mi̤ ta Bejame. (Beò̌nǐ amûasǎ mî̌ phû̌khû htě he bǎ sǎpla̤sǎyṳ, pwǎ̤tadě Bejame amûasǎ mî̌ phû̌khû htě ahtû hecǔdemû.)
19Htodě Rakhelǎ sikè dě kò lǔlò̤kè nû̌û bǎ klè̌ la̤cû̌ dě Ephratawî̤ mî̌ Bè̌tèlèhèwî̤ nutò̤glò. 20Dě Yǎ̤kò doihtǒ ǒ ta̤sî̌yahtò̌ lo̤hǐhtǔ tama bǎ Rakhelǎ lṳbǐkhû̌nu, dě lo̤hǐhtǔ nutama mî̌ a htû Rakhelǎ alṳkhû̌ ata̤ma̤dòǐ to̤khònò̤ hǒ.
21Yǎ̤kò#35:21 Yǎ̤kò ta Israel mî̌ tapwǎ̤pa. cû̌sělěpo̤ klè̌ dě a cû̌ma̤htò̌ hǐphû̌ toǒ bǎ Mǐkadǎ Eda ahǐhtò̌yî̤ la̤ǒpo̤ kè̌cû̌ a cǔmû tokho.
Yǎ̤kò ta aphû̌makhû toǒ
22Yǎ̤kò ǒ bǎ gûla̤nu tò̤glò akha, Rube nṳhǎmoǒhtu ta apha amaja Bǐlaha, dě ta̤wi̤ta̤kè̌ htǒonu nǒkòdě Yǎ̤kò gana̤dekè. Yǎ̤kònu aphû̌makhû ǒ shǐsò̌gini̤.#Mǒhtûlû̌hǎhtûsa 49:4 23Yǎ̤kò ta Le̤a aphû̌wè̤pwa̤ mî̌ Rube, htodě Simeo, Lě̤wǐ, Yṳ̌da, Isakarǒ ta Sabulo sî toǒ hǒ.#Mǒhtûlû̌hǎhtûsa 46:8-25; Ta̤lû̌htò̌ge 1:2-4 24Rakhelǎ aphû̌makhû toǒ mî̌ Jǒjè ta Bejame. 25Rakhelǎ ajûmo̤ Bǐlaha aphû̌makhû toǒ mî̌ Da ta Natali. 26Le̤a ajûmo̤ Sǐlapa aphû̌makhû toǒ mî̌ Gǎ ta Asharu.
Lǒ̤꤮ bò asî htǒotoǒnu mî̌ Yǎ̤kò aphû̌makhû toǒhǒ, dě a ǒlò̤bò lǒkho Pada aragakû.
Isǎko sikè
27Yǎ̤kò getosǒ apha Isǎko la̤ǒǐ Mè̌mare gûla̤, dě a ǒphǔ ta Kǐria arabawî̤ htě kò kaǎpo̤ nû̌û ta Hebrowî̤ htǒonu tî̤wî̤. Wî̤ htǒotî̤wî̤ mî̌ Abraham ta Isǎko cû̌ǒǐshǐtè̤mè̤ wî̤ nuhǒ.#Mǒhtûlû̌hǎhtûsa 13:18 28Isǎko ǒhtûpwa̤ aně ta̤ya̤ ta shilǐ̤sǒ. 29A ǒhtûpwa̤ mo̤pwa̤ mè̤mè̤̌ dě a sikè. Dě aphû̌ Ětò̌ ta Yǎ̤kò lǔkè nû̌û.
Currently Selected:
Mǒhtûlû̌hǎhtûsa 35: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA
