Mǒhtûlû̌hǎhtûsa 19
19
Cǒmara tûjûpwa̤ cèròpî̌kè Sò̌dowî̤ ta Gòmò̤̌rawî̤
1Bǎ lṳmṳhǎlṳmṳlòte̤ akhanu, mǒkhû̌tanaphû̌ sò̌gini̤ hèto̤ Sò̌dowî̤, bǎnukha Lò̌tǎ hǎnòò̌ bǎ we̤takhadû̌htunu. Bǎ a kè̌shǐ tanaphû̌nu sò̌gini̤ akha, taplǎpa a ihtǒ khlè̌cû̌kè̌shǔ asî, dě a gene̤û̌lò̤ hǎkhû̌ bǎ asî lo̤mo̤nu. 2Dě Lò̌tǎ hî̌, “Kǒ꤮ heběcǎ sî, khòsò̌do cû̌ǒkǔ kû̌pû hehǐ bǎo. Cû̌shǔbò lǒkho sîkhò̌lòpo̤ dě hǎmoǒkû̌ he bǎo tasa. Dě ihtǒcû̌wosò sělěsǒnǒ sîklè̌ htû̌꤮ pe̤wo̤ pě nî̌꤮.”
Pwǎ̤ta tanaphû̌ toǒ hî̌shǔ nû̌û, “Anî̤pwǎ, htǒotasa pa hǎmoǒtû̌ bǎ we̤kǎmakûnu pě.”
3Pwǎ̤ta Lò̌tǎ kaǎ gutṳgla asî akhû̌akhî, gutṳ̌lò̤ dě asî gûgekû̌kè nû̌ûhǐ. Dě Lò̌tǎ ma̤wǒ bǎ asî la̤ǎla̤o. A shû̌ǎ bǎ asî mû̌ shodo ta̤bû dě asî ǎ lǒkho. #Ebrephû̌ 13:2 4Bǎ shǐtè̤mè̤ htǒosò̌gini̤ hǎmoǒ hǒtò̤ akhanu, bò꤮ makhû phû̌sǎsǎ, makhû mo̤pwa̤pwa̤ ǒ bǎ Sò̌dowî̤kûnu toǒ hèǒ te̤we̤bò lǒkho Lò̌tǎ ahǐ. 5Dě asî yi̤kǒhtò̌ lǒkho Lò̌tǎ, “Pa sî̌ya ta khò̌tahǎ shǐtè̤mè̤ makhû hèhǎmoǒ kû̌ nahǐ sò̌gini̤ lè, asî ǒ lǒkho bǎtè? Kaǎhtò̌ bǎ pa akhlobǎo, pa sò̌yṳ hǎmoǒkû̌, lò̤we̤plǒ ta asî.” #Pwa̤cèròta̤ 19:22-24
6Lò̌tǎ hǎhtò̌shǔto asî hǐkhlo dě a sǒbǐ gekhîkè takhadû̌ děnǒkò. 7Dě a hî̌ asî, “Kǒ꤮ khobǒsû̌sî, ma̤ lǒkho pûma̤ ta̤phû̌mò̤shî̌hto hǐnu toǒ ma̤! 8Dě hǐdǒkûnu hephû̌ mamǔ ǒ sò̌gini̤ dě asî hǎmoǒkû̌ nǒ makhû dǐpwǎ̤ hǒtò̤. He kaǎhtò̌ bǎ sî dě sî sò̌yṳ ma̤ asî hî̌tètè̌꤮ bǎbǎ, tûrû̌ ma̤ lǒkho tû̌. Pwǎ̤ta shǐtè̤mè̤ htǒo sò̌gini̤nu ma̤ pû asî dǐcǎ꤮ ma̤ nî̌. Ma̤tè̤hî̌dě asî htû heshǐtè̤mè̤ dě he bǎ ma̤kwaǐ asî hǒ.” Lò̌tǎ hî̌ asî hǐnu.
9Lò̌tǎ hî̌ asî hǐnu pwǎ̤tadě asî hî̌shǔ nû̌û, “Cû̌tephe bǎ pa klè̌! Na mî̌ doshǒphû̌ tapwa̤ pwǎ, na hèǒkû̌ pwǐ shǐtè̤mè̤ tapwa̤ bǎ pawî̤kû htǒo pwǎ dě, mî̌ma̤tè̤ na sò̌yṳhtû pwa̤cèròta̤ tapwa̤ dě pakhû̌? Pa ma̤phû̌mò̤shî̌htokhlo na ta kòyònu sò̌gini̤ pě,” Dě asî shò̌getîkhîkè Lò̌tǎ a tidǐhè lo̤mo̤ dě a glè po̤pò̌ lǒkho takhadû̌.
10Pwǎ̤ta tanaphû̌ nusò̌gini̤ yṳ̂htò̌ acǔde akhlo dě a cǐnṳkè Lò̌tǎ hǐdǒkû dě a sǒbǐkè takhadû̌. 11Ma̤pûhǐ asî kè̌shǐjòpe takhakû tò̤ ayanu, tanaphû̌ ma̤khǐkèbò Sò̌dowî̤ makhû dû̌dû̌ pî̌tî̌tî̌ ǒ bǎ takhahtunu toǒ ami̤sǎ. #Khwǐ ginǐ̤bǎ tabǎ 6:18
12Tanaphû̌nu sò̌gini̤ gwè Lò̌tǎ, “Bǎ wî̤kû htǒo nakhlinalè, namò̤, naphû̌makhû mètò̤mî̌ naphû̌mamǔ ǒpe toǒǒ ya? A dè ǒ hî̌dě khònò̤ nohǎhtò̌cû̌ tephekèbò mò̌ asî wî̤khlonu. 13Ma̤tè̤hî̌dě pa glè cèrò ma̤pî̌kè wî̤ htǒotî̤wî̤ hǒ. Sò̌dowî̤phû̌ toǒ ta̤ma̤ phû̌mò̤shî̌htonu adû̌ mè̤mè̤̌, dě kò yi̤kǒ nocèròlò̤ Cǒmara tûjûpwa̤nu a gana̤de hǒ dě a sûhè pa dě glè cèrò ma̤pî̌kèbò wî̤ htǒotî̤wî̤ hǒ.”
14Hǐnudě Lò̌tǎ hǎhtò̌cû̌ pwe̤ǐlṳ bǎ amò̤sî htě a htû̌dèhto ta aphû̌mamǔsî htǒotoǒ ta, “Ma̤phwèmò̌ dě hǎhtò̌cû̌tephe phwèkèmò̌ lǒkho ta wî̤ htǒotî̤wî̤. Ma̤tè̤hî̌dě Cǒmara tûjûpwa̤ glè cèrò ma̤pî̌kèbò wî̤ htǒotî̤wî̤ hǒ,” Pwǎ̤ta amò̤sî toǒ gènèpwǎ ta a shobǎlò̤we̤ asî pwǎ.
15Bǎ lṳmṳkhǐ pepwǎ akhanu, tanaphû̌ htǒosò̌gini̤ hî̌shû̌shû̌ Lò̌tǎ, “Ma̤phwèmò̌! kaǎnṳmò̌ nama ta naphû̌mamǔ htǒo sò̌gini̤ dě hǎhtò̌cû̌phwèmò̌! Na dè hǎhtò̌khlè̌ mò̌ tò̤ hî̌mî̌, pěmî̌ Cǒmara tûjûpwa̤ cèròsi kû̌dǒbò sî ta wî̤kûphû̌ htǒotoǒ hè̌.”
16Lò̌tǎ ma̤pò̤ma̤ya̤ bǎ nû̌û akhû̌akhî, tanaphû̌ htǒosò̌gini̤ cǐcû̌nṳ Lò̌tǎ ta ama ta aphû̌mamǔhtǒo sò̌gini̤ acǔde dě a kaǎcû̌ tephekè asî wî̤khlo, ma̤tè̤hî̌dě Cǒmara tûjûpwa̤ gwèbǎǐ nû̌û akhû̌akhî, a kaǎcû̌kè asî. #Petru ginǐ̤bǎ tabǎ 2:7-8 17Tanaphû̌ toǒ kaǎhǎhtò̌to̤ asî wî̤khlo dě tanaphû̌nu sò̌gini̤ akla tapwa̤ hî̌ asî, “Khlè̌lû̌htò̌ tû̌mò̌ sîna̤, kè̌getîkhî ma̤ nî̌꤮. Cû̌ǒkǔ pû khodûkhû̌ ma̤ nî̌. Tṳ̂rû̌ khlè̌htò̌ kholokhû̌nu. Tò̤hî̌mî̌ sî si dǒbòkû̌ ta wî̤phû̌nu toǒ pě.”
18Pwǎ̤ta Lò̌tǎ hî̌shǔ asî, “Kǒ꤮ heběcǎ sî, khòsò̌do nocû̌yî̤pe pû pa ma̤ nî̌꤮. 19Na ma̤wǒ plṳ̂꤮ mè̤mè̤̌ ta̤ ta heya hǒ, na gwèbǎǐ he dě na ma̤lû̌htò̌ he hǒhǒ, pò̤̌ta he khlè̌htò̌to̤bò̌pe kholokhû̌ tò̤ hǒ. Bǎ he khlè̌htò̌to̤ kholokhû̌ hǒtò̤ akhanu, ta̤pî̌ta̤lṳ̂ lòte̤tî̤tî̤ he pě dě he sikè pě. 20Kè̌mò̌! wî̤phû̌ ǒ děnu tî̤wî̤ dě a yî̤penǒ tò̤. Nokhlè̌cû̌ ǒ pa bǎnu nî̌꤮, wî̤ pî̌tî̌ pwǎ mè̤tò̤ya? Dě he lû̌htò̌ pě.” Lò̌tǎ hî̌ hǐnu.
21Dě a hî̌shǔ nû̌û, “O, awǒ mè̤mè̤̌, hesò̌phlǒ totǐ kû̌ta pwǐ na hî̌nu. Wî̤phû̌ htě na hî̌nu tî̤wî̤, he cèròpe a tò̤ hǒ. 22Ma̤mò̌ dě khlè̌cû̌phwèmò̌ lǒkho bǎnu. Sî dè cû̌to̤ wî̤nu tî̤wî̤ hǒtò̤ hî̌mî̌, he ma̤jò ta̤ dǐcǎ꤮ hǒtò̤.” Wî̤nu tî̤wî̤ kò kaǎ yǎta Sorawî̤. (Sora amûasǎmî̌ pî̌tî̌.)
23Bǎ Lò̌tǎ cû̌to̤ Sorawî̤ akhanu, lṳmṳhtò̌ hǒ. 24Htǒotaplǎ dě Cǒmara tûjûpwa̤ nojulò̤ ya̤sû̌bû ta mî̌ mǒkhû̌ dě a lòte̤gèkèbò Sò̌dowî̤ ta Gòmò̤̌rawî̤. #Matěo 10:15, 11:23-24; Lǔka 10:12, 17:29; Petru ginǐ̤bǎ tabǎ 2:6; Yṳ̌da 1:7 25A cèrò ma̤pî̌bò mṳ̂tî̤glî wî̤ htǒo ginǐ̤wî̤ ta bò꤮ khodûkhû̌ bǎnu ta bò꤮ kòyò ǒ bǎ wî̤kûnu toǒ ta sǒmṳwû̌bo htě a phǎhtò̌ bǎ ga nutò̤glò lǒ̤꤮ bò. 26Pwǎ̤tadě Lò̌tǎ ama kè̌tîkhî gesǒ akhû̌akhî, a htûkè îsǎhǐtṳ. #Lǔka 17:32
27Bǎnuto̤wo̤ lṳmṳlîbû akhanu, Abraham ihtǒ dě a cû̌ gesǒ a la̤ ihtǒhî̌bǎshǔ ta Cǒmara tûjûpwa̤ gûla̤ nutò̤glò. 28A kè̌lò̤cû̌to Sò̌dowî̤ ta Gòmò̤̌rawî̤ ta bò꤮ khodûkhû̌ nutò̤glò aǒ dě a kè̌shǐ mî̌khǔtoǒhtò̌ lo̤kîhtò̌to bǎnu tò̤glò dě a sǒsǒta mî̌khǔhtò̌ phǎkûnu.
29Hǐnudě bǎ Cǒmaradû̌ cèrò ma̤pî̌kè wî̤ ǒ khodûkhû̌nu ginǐ̤wî̤ akha, a gènè̤htò̌bǎto̤ Abraham kwi nû̌ûnu. Bǎ a cèrò ma̤pî̌kè wî̤ htě Lò̌tǎ ǒ htǒonu akha, a kaǎhǎhtò̌lû̌htò̌kè Lò̌tǎ ata̤cèrò akû.
Lò̌tǎ aphû̌mamǔ sò̌gini̤ hǎmoǒkû̌ ta apha
30Dě anǒnu, Lò̌tǎ ǐsha ǒ bǎ Sorawî̤kûnu dě a ta aphû̌mamǔ sò̌gini̤ hǎhtò̌cû̌ ǒkè lǒkho kholokhû̌ dě a cû̌ǒ lǒkho khokû tûkû. 31Ti̤ni̤kha, aphû̌mamǔdû̌nu tapwa̤ hî̌ apṳ, “Paphahtǒo a mo̤pwa̤ hǒ, ma̤pûhǐ pa phû̌ǒbò̌ kû̌ kò aya, bǎ hǎkhû̌bǎo makhû htě pa la̤phî̌ yǎta pawṳ̂nu a ǒpe dǐpwǎ̤tò̤ hǒ. 32Cû̌! pa ǐomṳ papha shisî̌khǎ dě pa nṳhǎmoǒkû̌ ta a hò! Pa dè ma̤mò̌ pwǐhè̌o mî̌ pakhlipalè ǒ tṳtṳ kû̌ta a pě.”
33Bǎnutasa asî ǐomṳ te̤pe̤ lǒkho apha shisî̌khǎ dě awè̤ cû̌nṳ hǎmoǒ plǒkû̌ ta apha. Apha omṳ te̤pe̤ tûlû̌shû̌ shi akhû̌akhî, aphû̌mamǔ nṳhǎmoǒkû̌ ta a pwǎ̤tadě a sî̌yaǐpe ana̤ dǐcǎ꤮ tò̤.
34Anǒ ti̤ni̤, awè̤ hî̌ apṳ, “Bǎhǎno he nṳhǎmoǒ plǒkû̌hto ta pha hǒ. Htǒotasa lè̌dě pa ǐomṳ gesǒ a shi pě hò, dě na cû̌nṳ hǎmoǒplǒ kû̌lè̌ ta a pě nî̌꤮. Pa dè ma̤ pwǐhè̌o pěmî̌ pakhlipalè ǒ tṳtṳ kû̌ta a pě.” 35Hǐnudě bǎnutasa, asî ǐomṳ gesǒ apha shisî̌khǎ dě apṳ nṳhǎmoǒplǒ kû̌ta apha. Apha omṳ te̤pe̤ tûlû̌shû̌ shi akhû̌akhî, aphû̌mamǔ nṳhǎmoǒkû̌ ta a pwǎ̤tadě a sî̌yaǐpe ana̤ dǐcǎ꤮ tò̤.
36Lò̌tǎ aphû̌mǔ htǒosò̌gini̤ ma̤ lǒkho hǐnu akhû̌akhî, asî mo̤dohtò̌ lǒkho tû̌ta apha akò. 37Awè̤ phû̌ǒlò̤nṳ phû̌makhû tapwa̤ dě a kaǎ nû̌ûmi̤ ta Mò̌bǎ, dě bò Mò̌bǎ khlilèphû̌ khònò̤ htukha toǒ numî̌ akhlialè hǎte̤gilò̤ ta Mò̌bǎ htǒonu hǒ. (Mò̌bǎ amûasǎ mî̌ he nî̤bǎ tṳtṳ dě hephaǒ.) 38Apṳ dě a phû̌ǒlò̤nṳ phû̌makhû tapwa̤pwa̤. Dě a kaǎ nû̌ûmi̤ ta Beamǐ. Amo khlilèphû̌ htukha khònò̤ toǒ numî̌ akhlialè hǎte̤gilò̤ ta Beamǐ htǒo hǒ.
Currently Selected:
Mǒhtûlû̌hǎhtûsa 19: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA
