ᤔᤷᤁᤢᤛ 9
9
1ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤔᤢᤰᤛᤠᤶᤏᤢ ᤕᤢ᤺ᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”
ᤕᤧᤛᤢᤖᤧ ᤁᤢᤎᤰᤁᤡᤴ ᤗᤧᤱᤛᤡᤱ
(ᤔᤳᤋᤡ ᥇᥍:᥇-᥇᥉; ᤗᤢᤁᤠ ᥏:᥈᥎-᥉᥌)
2ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤕᤢᤜᤢᤴᤏᤠᤴ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣᤰ ᤗᤧᤱᤛᤡᤱᤗ ᤐᤣᤀᤠᤱ 3ᤁᤢᤍᤣ᤺ᤳᤜᤠ᤹ ᤔᤡᤰᤁᤡᤴ ᤆᤧᤔᤢᤖ ᤌᤠᤖᤡᤰ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤐᤥ᤺ᤰᤂᤧ. ᤂᤧᤶᤔᤩᤠᤰ ᤛᤠ᤹ᤖᤡᤰ ᤑ ᤗ᤹ᤖ ᤌᤠᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠ᤺ᤳᤗᤧᤀᤠᤱ ᤆᤠᤱᤅᤡᤴ ᤘᤠᤜᤵᤔᤠ ᤔᤧᤛᤢᤰᤋᤢᤴᤗᤥ॥ 4ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤏᤢ ᤔᤥᤛᤠᤴ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢᤴ ᤏᤢ ᤋᤠ᤹ᤈᤧᤰᤂᤧᤳᤇᤡᤖᤥ॥ 5ᤐᤋᤪᤢᤛᤖᤧ ᤕᤧᤛᤢᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢᤒᤠ ᤐᤥᤱᤗᤥ॥ ᤀᤠᤏᤡᤃᤣ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧᤒᤡ᥅ ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰᤌᤡᤰ ᤆᤥᤃᤢᤶᤒᤧᤖᤥ᥄” 6ᤐᤋᤪᤢᤛᤖᤧ ᤌᤣ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ᤀᤡᤸᤗᤧ ᤌᤣᤀᤠᤱ ᤔᤧᤎᤠᤵᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥ 7ᤜᤧᤰᤁᤩᤠᤱ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥” 8ᤂᤧᤱᤜᤠ᤹ ᤂᤡᤖᤡ ᤀᤥᤔᤧᤔ᤺ᤕᤧᤸᤗᤧ ᤕᤧᤛᤢᤴ ᤗᤰ ᤘᤕᤧ. ᤘᤣ᤹ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧᤖᤥ॥ 9ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤁᤧᤏᤡᤛᤢᤶᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤜᤠ᤺ᤳᤋᤠᤱ ᤔᤧᤈᤧᤰᤋᤧᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤖᤥ॥ 10ᤂᤧᤱᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤗᤢᤶᤔᤥᤀᤣ ᤔᤧᤕᤢᤰᤂᤢ॥ ᤂᤧᤱᤜᤠ᤹ ᤁᤴ ᤛᤡᤔᤧᤴᤗᤠᤶ ᤜᤡᤱᤔᤠ ᤑᤠ᤹ᤀᤡᤴ ᤌᤧᤔᤠᤏᤧᤒᤣ ᤑᤠ᤹ᤀᤠᤱ ᤐᤠᤴ ᤔᤧᤎᤰᤋᤧᤖᤥ॥
11ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢ᤺ᤔᤠᤀᤣ ᤐᤥᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”
12ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥ ᤀᤠᤰᤂᤣᤗ᤹ᤖᤡᤰ ᤔᤧᤴᤇᤠᤶᤛᤠᤴ ᤋᤢᤰᤂᤣ ᤆᤠᤔᤠᤀᤣ ᤐᤥᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢ ᤁᤧᤗ᤹ᤒᤠ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤒᤡ᥅ 13ᤁᤖ ᤀᤣᤗᤡᤕᤠᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤵᤐᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥”
ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤆᤢᤰᤐᤧᤴ
(ᤔᤳᤋᤡ ᥇᥍:᥇᥊-᥈᥇; ᤗᤢᤁᤠ ᥏:᥉᥍-᥊᥉)
14ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤐᤠ᤺ᤴᤎᤰᤏᤢ ᤔᤧᤕᤠᤃᤧ॥ 15ᤕᤧᤛᤢᤴ ᤕᤧᤒᤠ ᤔᤧᤏᤡᤛᤢᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤜᤠ᤺ᤵᤔᤧᤗᤧᤰᤋᤧᤀᤠᤱ ᤔᤧᤗᤥ᤺ᤰᤋᤧᤖ ᤕᤧᤛᤢᤴ ᤛᤧᤘᤠ ᤔᤧᤔᤧᤳᤋᤢᤖᤥ॥ 16ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤧᤱᤜᤠ᤹ᤏᤢ ᤌᤧᤔᤠ ᤐᤠᤴ ᤁᤧᤎᤰᤋᤡᤒᤠᤒᤣ᥅”
17ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤐᤠ᤺ᤳᤋᤢ. “ᤛᤡᤰᤛᤠᤶᤒᤣ. ᤀᤠᤛ᤻ᤛᤠᤴ ᤁᤵᤔᤥ ᤋᤠᤖᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤋᤖᤢᤀᤠᤱ ᤁᤢᤒᤠ᤺ᤴᤏᤠᤱ ᤔᤕᤧᤒᤣᤀᤠᤱ ᤘᤠ᤹ᤖᤥ॥ 18ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤸᤗᤧ ᤂᤧᤴ ᤂᤠᤶᤔᤥ ᤌᤠᤶᤛᤡᤱᤅᤠᤱ ᤁᤢᤎᤩᤠᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤏᤠᤱ ᤁᤢᤜᤠᤒᤥ᤹ᤒᤠᤴ ᤀᤡᤛᤡᤰᤂᤢ᤹. ᤜᤧᤰᤁᤩᤠᤱ ᤂᤠᤰᤋᤢ᤹ᤖᤥ॥ ᤁᤧᤜᤢ᤹ᤛᤠᤶᤒᤠᤜᤠ᤹ ‘ᤂᤧᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹’ ᤔᤧᤳᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”
19ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤛᤠᤴ ᤁᤧᤜᤥ᤺ᤵᤐᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤖ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥” 20ᤂᤧᤴ ᤆᤢᤰᤐᤧᤴ ᤕᤧᤛᤢᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤑᤧᤴᤛᤠᤶᤔᤡᤸᤗᤧ ᤕᤧᤛᤢᤴ ᤏᤡᤛᤢᤀᤠᤱ ᤂᤧᤴ ᤆᤢᤰᤐᤧᤴ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤁᤢᤎᤩᤠᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤍᤧᤖ ᤜᤥ᤺ᤳᤇᤡᤱᤔᤠ ᤜᤣ᤺ᤰᤋᤧᤖᤥ॥ 21ᤕᤧᤛᤢᤖᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠᤴ ᤛᤣ᤺ᤴᤍᤥᤛᤢ. “ᤁᤴ ᤆᤢᤰᤐᤧᤴ ᤀᤠᤵᤑᤠᤸᤗᤧᤀᤠᤱᤎᤥ ᤀᤰᤂᤣ ᤐᤥ᤺ᤰᤂᤧᤒᤠᤒᤣ᥅”
ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤁᤴ ᤀᤅᤧ᤺ᤰᤘᤠ ᤘᤕᤧᤀᤠᤱᤎᤥᤀᤣ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥ 22ᤁᤴ ᤑᤧᤴᤛᤠᤶᤔᤡᤸᤗᤧ ᤕᤖᤡᤰᤗᤧᤱ ᤛᤧᤵᤔᤠ ᤁᤥ᤺ᤳᤋᤢᤸᤗᤧ ᤆᤢᤰᤐᤧᤴ ᤔᤡᤀᤥ ᤏᤢ ᤆᤫᤠ᤺ᤳᤋᤥ ᤛᤧᤵᤔᤠ ᤑᤠ᤹ᤀᤠᤱ ᤗᤠᤵᤑᤢᤛᤢ ᤕᤠᤰᤋᤢᤖᤥ॥ ᤀᤠᤍᤠᤱᤒᤣ. ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ. ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤀᤠᤓᤠ᤹ᤖᤧ᤹ᤀᤥ॥” 23ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “‘ᤁᤧᤛᤢᤰᤋᤢᤏᤧ ᤑᤠ᤹ᤃᤪ’ ᤑᤠ᤹ᤀᤠᤱ ᤌᤣᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅ ᤏᤛᤠᤴ ᤁᤧᤈᤥ᤺ᤰᤐᤠᤸᤗᤧ ᤁᤢᤗᤠᤃᤡᤃ ᤌᤣᤛᤠᤱ ᤐᤥᤱᤔᤠ ᤛᤢᤰᤗᤥ॥” 24ᤜᤧᤰᤁᤣ᤺ᤸᤗᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠᤖᤧ ᤂᤡᤔᤥ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤛᤠᤴ ᤆᤥᤃᤢᤱ. ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤛᤠᤴ ᤆᤥ᤺ᤰᤔᤠ ᤑᤠ᤹ᤖᤠᤱᤅᤧ᤹ᤀᤥ᥄” 25ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤂᤧᤵᤔᤥ ᤔᤧᤗᤥ᤺ᤰᤋᤧᤖ ᤔᤧᤓᤧᤖᤧᤒᤠ ᤏᤡᤛᤢᤛᤡᤀᤠᤱ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤏᤠᤎᤠᤰᤐᤠ ᤏᤢ ᤁᤢᤒᤠᤴ ᤔᤧᤴᤗ᤺ᤶᤏᤠᤒᤠ ᤑᤧᤴᤛᤠᤶᤔᤣ. ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤕᤠᤶᤔᤥ ᤔᤧᤗᤠᤛᤧᤴᤏᤧ᤹᥄” 26ᤂᤧᤴ ᤑᤧᤴᤛᤠᤶᤔᤡᤴ ᤑᤡ᤺ᤰᤋᤧᤖ ᤂᤧᤴ ᤛᤠ᤹ᤖᤡᤰ ᤌᤠᤵᤛᤢᤎᤀᤠᤱ ᤗ᤺ᤴᤍᤧ ᤐᤣᤖᤥ॥ ᤂᤧᤴ ᤆᤢᤰᤐᤧᤴ ᤂᤠᤰᤋᤢᤀᤠᤱ ᤁᤧᤛᤡᤒᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤣ᤺ᤸᤗᤧ ᤁᤢᤓᤠᤖᤧᤃ ᤂᤧᤱᤃ ᤛᤩᤧ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥ 27ᤁᤖ ᤕᤧᤛᤢᤖᤧ ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤋᤧᤶᤛᤢᤖ ᤑᤥ᤺ᤰᤂᤢᤀᤠᤱ ᤕᤧᤵᤛᤢ. ᤜᤧᤰᤁᤩᤠᤱ ᤂᤧᤴ ᤕᤧᤶᤛᤡᤱᤗᤥ॥ 28ᤕᤧᤛᤢᤴ ᤜᤡᤶᤔᤥ ᤗᤠᤛᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤣ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”
29ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤰᤋᤱᤒᤠᤱᤃ ᤋᤢᤘᤠ᤺ᤸᤗᤧᤖᤰ ᤏᤠ᤺ᤵᤔᤠ ᤗ᤺ᤵᤔᤠ ᤛᤢᤰᤋᤧᤳᤗᤥ॥”
ᤕᤧᤛᤢᤖᤧ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹
(ᤔᤳᤋᤡ ᥇᥍:᥈᥈-᥈᥉; ᤗᤢᤁᤠ ᥏:᥊᥉-᥊᥋)
30ᤜᤧᤰᤁᤩᤠᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤋᤧᤴᤏᤡᤴ ᤐᤰᤔᤧᤎ᤺ᤀᤠᤱ ᤃᤠᤗᤡᤗ ᤔᤧᤗᤛ᤻ᤛᤢᤖ ᤔᤧᤒᤣ॥ ᤂᤢᤏᤡ᤹ ᤀᤠᤳᤋᤥ ᤔᤧᤘᤠ᤹ ᤑᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤛᤢᤴᤗ ᤁᤧᤗ᤹ᤒᤠ ᤕᤧᤛᤢᤖᤧ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤕᤧᤖᤥ. 31ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤜᤢ᤹ᤖᤢᤛᤡᤖ ᤘᤕᤧ॥ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠᤴ ᤀᤡᤱᤔᤧᤗᤧᤰᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤗᤥ॥” 32ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤔᤠᤀᤠᤱ ᤔᤧᤃᤡᤛᤧᤖᤥ॥
ᤕᤶᤗᤠᤒᤠ ᤜᤠ᤺ᤳ᥅
(ᤔᤳᤋᤡ ᥇᥎:᥇-᥋. ᥇᥆:᥊᥈; ᤗᤢᤁᤠ ᥏:᥊᥌-᥋᥆)
33ᤂᤧᤱᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧᤀᤠᤱ ᤂᤧᤵᤔᤥᤒᤠ ᤜᤡᤶᤔᤥ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤴᤍᤣᤴ ᤗᤠᤶᤔᤥ ᤂᤡᤏᤡ᤹ ᤌᤧᤔᤠ᤺ᤴ ᤐᤠᤴ ᤁᤧᤎᤰᤋᤡᤖ ᤁᤧᤘᤕᤡᤒᤠᤒᤣ᥅” 34ᤁᤖ ᤂᤧᤱᤜᤠ᤹ ᤔᤧᤶᤒᤠᤖᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠ᤺ᤴᤔᤧᤎᤰᤋᤧᤀᤠᤱ ᤔᤧᤘᤕᤧᤖᤥ॥ 35ᤕᤧᤛᤢᤴ ᤕᤢᤱᤛᤡᤱᤅᤠᤱ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤋᤃᤡ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤐᤥᤱᤔᤠᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤛᤧᤘᤠᤖᤥᤒᤠ ᤐᤥᤱᤔᤠ ᤐᤥᤱᤗᤥ॥” 36ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤵᤔᤥ ᤜᤡᤴᤈᤠ᤹ᤎᤡᤰ ᤂᤢᤏᤡ᤹ ᤗᤢᤶᤔᤥ ᤕᤧᤵᤛᤢ. ᤜᤧᤰᤁᤩᤠᤱ ᤁᤢᤓᤰᤋᤢᤱᤅᤥ ᤕᤢᤰᤂᤢᤖ ᤔᤧᤳᤋᤢᤛᤡ. 37“ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤶᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤶᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤱᤍᤠ᤺ᤰᤋᤢ᤹॥” 38ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰᤐᤠ ᤕᤢᤜᤢᤴᤏᤠ ᤔᤧᤵᤔᤏᤠᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤣ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡᤛᤢᤶᤒᤧ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤴ ‘ᤜᤧᤰᤁᤣ ᤔᤧᤈᤥᤃᤧᤴᤏᤧ᤹’ ᤔᤧᤳᤋᤢᤶᤒᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡ᤹ᤏᤢ ᤛᤥᤖᤡᤰ ᤗᤠᤱᤔᤧᤄᤣ᤺ᤰᤏᤧᤴᤗᤥ॥” 39ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤴ ᤀᤠᤍᤰᤗᤧᤱᤘᤠᤀᤥ ᤜᤠᤖᤠ ᤔᤧᤒᤥ᤺ᤰᤏᤧᤴᤗᤥ॥ 40ᤀᤠᤳᤋᤡᤴ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤜᤥᤵ. ᤂᤧᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥ 41ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤔᤏᤠ ᤑᤠ᤹ᤀᤠᤱ ᤑᤱᤏᤠᤎᤡᤰ ᤆᤫᤠ᤺ᤳ ᤁᤧᤒᤡᤖᤡ᤹. ᤂᤧᤸᤗᤧ ᤛᤧᤰᤂᤠᤛᤠᤱ ᤌᤢᤶᤄᤥᤴ ᤂᤥᤛᤢ᤹ᤀᤣᤖᤥ॥”
ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤴ ᤛᤠᤶᤍᤡᤱ
(ᤔᤳᤋᤡ ᥇᥎:᥌-᥏; ᤗᤢᤁᤠ ᥇᥍:᥇-᥈)
42“ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥ᤺ᤰᤐᤠ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ#᥏:᥊᥈ ᤗᤢᤶᤛᤢᤶᤔᤡᤴ—ᤁᤴ ᤆᤠ ᤕᤢ᤺ᤵᤔᤠ ᤕᤶᤒᤠ ᤐᤧ᤺ᤵᤐᤧᤳᤋᤠ ᤗᤢᤱ ᤘᤕᤧ॥ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢᤒᤠ ᤐᤥᤱᤗᤥ॥ 43ᤂᤧᤏᤧ᤹ ᤁᤧᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣᤛᤧ᤹ᤀᤥ॥ ᤏᤧᤳᤇᤡ ᤜᤢᤰᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤜᤢᤰᤌᤡᤰ ᤔᤣ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥ 44(ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥) 45ᤁᤧᤗᤠᤱᤅᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣᤛᤧ᤹॥ ᤏᤧᤳᤇᤡ ᤗᤠᤱᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤗᤠᤱᤎᤡᤰ ᤔᤣ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥ 46(ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥) 47ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤕᤃᤧᤗ᤺ᤳᤋᤧ᤹॥ ᤏᤧᤳᤇᤡ ᤔᤡᤰᤁᤡᤴᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤔᤡᤰᤌᤡᤰᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤏᤢᤒᤠᤖᤥ॥ 48ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥#ᤕᤛᤤ ᥌᥌:᥈᥊ 49ᤕᤢᤶᤔᤡᤸᤗᤧ ᤛᤡᤍᤢᤱᤈᤓᤠᤴ ᤛᤢᤳᤌᤥ ᤆᤥᤃᤢᤒᤠ ᤜᤧᤰᤁᤣᤀᤣ ᤔᤡ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤛᤢᤳᤌᤥ ᤆᤥᤃᤢᤛᤡ᤹ᤖᤥ॥ 50ᤕᤢᤶᤔᤡᤴ ᤏᤢᤒᤠ ᤆᤥᤰ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠ᤺ᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤂᤧᤴ ᤁᤧᤗᤡᤶᤒᤠ ᤁᤧᤈᤥᤃᤢᤶᤒᤣ᥅ ᤂᤡᤏᤡ᤹ ᤜᤡᤱᤔᤴᤏᤥ ᤕᤢᤶᤔᤡᤴ ᤁᤳᤋᤧᤶᤔᤧ᤹ᤀᤠᤱ ᤁᤧᤖᤧᤰᤏᤢ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥”
Currently Selected:
ᤔᤷᤁᤢᤛ 9: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
