ᤗᤢᤁᤠ 15
15
ᤁᤧᤔᤠᤒᤠ ᤔᤧᤸᤗᤢᤰ
(ᤔᤳᤋᤡ ᥇᥎:᥇᥈-᥇᥊)
1ᤌᤡᤰᤕᤧᤴ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤘᤣ᤹ ᤗᤠᤕᤥᤒᤠᤜᤠ᤹ ᤕᤧᤛᤢᤖᤧ ᤁᤢᤒᤠᤴ ᤂᤧᤶᤛᤧ ᤂᤢᤏᤧ᤹ ᤁᤢᤄᤡᤖᤡ ᤔᤧᤈᤢᤵᤛᤧᤸᤗᤧ 2ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤗᤠᤕᤥᤒᤠᤜᤠ᤹ᤀᤠᤱ ᤋᤠ᤺ᤰᤋᤢᤛᤡᤀᤠᤱ ᤛᤥᤖᤡᤰ ᤕᤢᤱᤅᤠᤱ ᤆᤠᤈᤠᤖᤥ॥” 3ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ 4“ᤂᤡᤏᤡ᤹ᤀᤥ ᤁᤡᤵᤌᤡᤰ (᥇᥆᥆) ᤔᤧᤸᤗᤢᤰᤜᤠ᤹ ᤁᤧᤃᤵᤐᤠ ᤔᤏᤠ᤺ᤸᤗᤧ ᤗᤳᤇᤠᤴ ᤔᤠᤛᤢᤸᤗᤧ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤗᤧᤖᤢᤎᤛᤡᤀᤠᤱ ᤂᤧᤴ ᤁᤧᤔᤠᤒᤧᤴ ᤔᤧᤱᤄᤥᤀᤣ ᤌᤠᤖᤡᤰ ᤔᤧᤃᤥ᤺ᤳᤋᤢᤴᤒᤡ᥅ 5-6ᤂᤢᤏᤧ᤹ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤴ ᤂᤥᤛᤢᤀᤠᤱ ᤁᤢᤓᤰᤋᤠᤱᤅᤥ ᤐᤰᤂᤢᤖ ᤛ᤺ᤳᤗ ᤏᤢ᤺ᤱ ᤋᤠᤖᤥ॥ ᤜᤧᤰᤁᤩᤠᤱ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤏᤢ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. ‘ᤜᤦ᥄ ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤁᤧᤔᤠᤒᤠ ᤀᤠᤔᤧᤸᤗᤢᤰᤁᤡᤴ ᤕᤠᤶᤔᤥ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’ 7ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤕᤥᤗᤠᤶ ᤜᤡᤶᤔᤠ ᤔᤧᤶᤒᤥᤱᤔᤏᤠᤒᤠ ᤑᤠᤱ-ᤑᤠᤱ (᥏᥏) ᤛᤠᤶᤕᤥᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤗᤠᤕᤥᤗᤠᤶ ᤁᤧᤜᤡᤶᤒᤠ ᤗᤠᤕᤥᤒᤠᤎᤡᤰᤁᤡᤸᤗᤧ ᤗᤠᤃᤡ ᤕᤶᤒᤠ ᤛ᤺ᤵᤔᤠᤴ ᤐᤥᤱᤗᤥ॥”
ᤁᤧᤔᤠᤒᤠ ᤕᤠᤱᤅᤧᤳᤇᤡᤴ
8ᤕᤧᤛᤢᤖᤧ ᤂᤧᤱᤜᤠ᤹ ᤘᤣ᤹ᤛᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤀᤠᤸᤗ ᤌᤡᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤎᤡᤰᤗᤧ ᤕᤠᤱᤎᤡᤰ ᤔᤠᤛᤢᤸᤗᤧ ᤂᤧᤸᤗᤧ ᤛᤣᤔᤡ ᤜᤠ᤺ᤴᤍᤢᤀᤠᤱ ᤂᤧᤴ ᤕᤠᤱᤀᤡᤳᤇᤡᤴ ᤔᤧᤱᤄᤥᤀᤣ ᤌᤠᤖᤡᤰ ᤜᤡᤶᤔᤡᤴ ᤋᤢᤃᤢᤖ ᤔᤧᤃᤥ᤺ᤳᤋᤢᤶᤒᤡ᥅ 9ᤜᤧᤰᤁᤩᤠᤱ ᤂᤧᤸᤗᤧ ᤂᤥᤛᤢᤀᤠᤱ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹. ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. ‘ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤠᤛᤢᤱᤒᤠ ᤀᤠᤕᤠᤱᤀᤡᤳᤇᤡᤴ ᤀᤡᤱᤃᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’ 10ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤌᤡᤰ ᤗᤠᤕᤥᤗᤠᤶ ᤁᤧᤜᤡᤶᤒᤠᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤔᤧᤛ᤺ᤳᤗᤥ॥”
ᤁᤧᤔᤠᤒᤠ ᤛᤠᤴ
11ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ᤛᤔᤠ ᤂᤧᤍᤠ᤹ᤀᤠᤱ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤏᤧᤵᤑᤢ ᤕᤧᤶᤒᤡᤳᤇᤠ᤹ᤛᤠ ᤁᤧᤃᤵᤐᤠ ᤗᤳᤇᤠ ᤔᤏᤠᤎᤡᤰ ᤘᤕᤧ॥ 12ᤜᤧᤰᤁᤩᤠᤱ ᤌᤡᤰᤕᤧᤴ ᤑᤥ᤹ᤒᤠᤸᤗᤧ ᤁᤢᤶᤒᤠᤴ ᤀᤰᤂᤣ ᤔᤧᤳᤋᤢ. ‘ᤀᤠᤶᤒᤣ. ᤀᤡᤱᤃᤠ᤹ ᤁᤧᤕᤠᤱᤛᤠᤁᤢᤴᤎᤣᤴ ᤑ᤺ᤰᤂᤧᤀᤠᤱ ᤀᤠᤗᤰᤁᤥ ᤁᤧᤎᤠᤒᤠᤴ ᤐᤡᤖᤠᤱᤅᤧ᤹ᤀᤥ॥’ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧᤀᤠᤱ ᤁᤢᤕᤠᤱᤛᤠᤁᤢᤴᤎᤣᤴ ᤂᤧᤱᤜᤠ᤹ ᤜᤠ᤺ᤳᤋᤢᤛᤡᤖᤥ॥ 13ᤌᤡᤰᤕᤧᤴ ᤏᤡᤕᤧᤴ ᤀᤣᤃᤠᤱ ᤁᤢᤛ᤻ᤛᤠ ᤑᤥ᤹ᤒᤠᤸᤗᤧ ᤁᤢᤗᤰᤁᤥ ᤁᤧᤎᤠᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤖᤧᤰ ᤁᤰ ᤔᤧᤳᤇᤡᤱᤅᤠᤱ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤵᤔᤥ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤜᤏᤧ ᤀᤧ᤺ᤳᤗᤧᤗᤧ ᤗ᤹ᤔᤠ ᤏᤢ ᤆᤠᤔᤠ ᤌᤢᤱᤔᤠᤀᤥ ᤆ ᤔᤠ᤺ᤴᤍᤢᤖᤥ॥ 14ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤀᤠᤱ ᤘᤕᤧᤸᤗᤧ ᤂᤧᤵᤔᤥ ᤕᤶᤒᤠ ᤛᤠᤰ ᤌᤩᤧᤀᤠᤱ ᤂᤧᤸᤗᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤄᤥᤛᤢᤴᤗᤥ॥ 15ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤗᤠᤈᤣ᤹ᤀᤥᤒᤠ ᤌᤡᤰ ᤔᤏᤠ᤺ᤸᤗᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤣᤀᤠᤱ ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤑᤠᤰᤆᤠ ᤐᤡᤔᤠ ᤕᤠ᤺ᤶᤒᤰᤁᤥ ᤑᤳᤇᤢ॥ 16ᤜᤧᤰᤁᤩᤠᤱ ᤂᤧᤴ ᤀᤠᤳᤋᤡᤸᤗᤧᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤶᤒᤡᤖᤢᤴᤏᤡᤸᤗᤧ ᤂᤧᤸᤗᤧ ᤑᤠᤰᤆᤠᤴ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥
17“ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤣᤖᤧᤀᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤇᤡᤱ. ‘ᤀᤠᤶᤒᤠᤖᤧ ᤁᤢᤜᤡᤶᤔᤥᤃ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤠᤄᤠ ᤔᤧᤈ ᤔᤧᤎᤢᤅᤢᤖ ᤔᤧᤏᤴᤇᤢ᤹. ᤁᤖ ᤀᤡᤱᤃᤠ᤹ᤃ ᤁᤵᤔᤥ ᤛᤠᤰᤁᤡᤸᤗᤧ ᤛᤡᤔᤠ ᤀᤡ᤺ᤳᤋᤠᤱᤗᤥ॥ 18ᤀᤡᤱᤃᤠ᤹ ᤀᤠᤸᤗᤥ ᤀᤠᤶᤒᤠᤖᤧ ᤁᤢᤜᤡᤶᤔᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤀᤠᤱ ᤔᤧᤳᤋᤢᤱ. ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 19ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤁᤢᤀᤡᤛᤡᤰ ᤁᤧᤜᤡᤶᤔᤥ ᤁᤳᤋᤠᤱᤅᤧ᤹ᤀᤥ॥’
20“ᤜᤧᤰᤁᤩᤠᤱ ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤶᤒᤠᤖᤥ ᤏᤢ᤺ᤰᤂᤧ ᤐᤣ॥ ᤂᤧᤴ ᤑᤧᤖᤧᤖ ᤐᤳᤇᤧᤒᤠ ᤔᤠ᤺ᤱᤄᤠᤗᤠᤶᤏᤢᤀᤣ ᤁᤢᤶᤒᤠᤖᤧ ᤏᤡᤛᤢᤀᤠᤱ ᤔᤡ᤺ᤶᤈᤡᤖᤧ ᤁᤢᤗᤢᤱᤔᤠ᤹ ᤁᤢᤎᤡᤶ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤗᤥ᤺ᤰᤋᤧᤖ ᤐᤣᤀᤠᤱ ᤂᤧᤴ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤆᤢᤵ ᤔᤧᤳᤋᤢᤖᤥ॥ 21ᤁᤢᤛ᤻ᤛᤠ ᤑᤥ᤹ᤒᤧᤸᤗᤧ ᤁᤢᤶᤒᤠ ᤔᤧᤳᤋᤢ. ‘ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥#᥇᥋:᥈᥇ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤁᤢᤀᤡᤛᤡᤰ ᤁᤧᤜᤡᤶᤔᤥ ᤁᤳᤋᤠᤱᤅᤧ᤹ᤀᤥ॥’ 22ᤁᤖ ᤁᤢᤶᤒᤠᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤜᤠᤖᤠ ᤐᤣᤃᤧᤶᤔᤧ᤹ᤀᤠᤱ ᤁᤴ ᤀᤠᤛ᤻ᤛᤠ ᤑᤥ᤹ᤒᤠᤴ ᤁᤠᤰᤏᤢ᤺ᤸᤗᤧ ᤏᤢᤒᤠ ᤋᤣ᤺ᤳᤋᤡᤴ ᤑᤧᤳᤋᤧᤶᤔᤧ᤹ᤀᤠᤱ ᤆᤠᤰᤋᤧᤶᤔᤧ᤹. ᤁᤢᤜᤢᤰᤆᤥᤀᤥ ᤛᤫᤠᤃᤣᤵ ᤘᤠ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤢᤗᤠᤱᤅᤥ ᤗᤠᤱᤛᤢ᤺ᤵ ᤆᤠᤰᤋᤧᤶᤔᤧ᤹ᤀᤥ॥ 23ᤜᤧᤰᤁᤩᤠᤱ ᤌᤠ᤺ᤱᤅᤥ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤑᤧᤳᤋᤧᤶᤔᤧ᤹ᤀᤠᤱ ᤛᤧᤖᤧᤶᤔᤧ᤹. ᤜᤧᤰᤁᤩᤠᤱ ᤆᤠᤔᤢᤰ ᤌᤡᤔᤢᤰ ᤕᤠᤖᤡᤵ ᤆᤥᤃᤢᤶᤔᤠᤱ ᤛ᤺ᤳᤋᤡᤖᤥ॥ 24ᤌᤣᤀᤠᤱᤓᤧᤸᤗᤧ ᤁᤴ ᤀᤠᤛ᤻ᤛᤠᤴ ᤛᤩᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤜᤡᤅᤧ॥ ᤂᤢᤏᤧ᤹ ᤔᤕᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤡᤱᤃᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤶᤒᤠ ᤛᤠᤓᤠᤱᤈᤠ ᤛᤧᤔᤠ ᤔᤧᤜᤣ᤺ᤰᤋᤢᤖᤥ॥
25“ᤀᤠᤸᤗ ᤂᤧᤴ ᤕᤧᤶᤔᤥ ᤁᤢᤛ᤻ᤛᤠ ᤋᤢᤶᤒᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤃᤧ॥ ᤂᤧᤴ ᤀᤠᤰᤂᤥ ᤏᤢ᤺ᤰᤂᤧᤀᤠᤱ ᤜᤡᤶᤒᤣᤛᤠᤱ ᤁᤧᤖᤧᤸᤗᤧ ᤜᤡᤶᤔᤥ ᤔᤢᤰᤗᤠᤜᤠ᤹ ᤔᤢᤰᤋᤧᤒᤠ ᤏᤢ ᤔᤏᤠᤜᤠ᤹ ᤔᤧᤗᤠ᤺ᤰᤂᤧᤒᤠ ᤂᤧᤵᤛᤢᤛᤡ॥ 26ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤌᤣ ᤐᤥᤱᤗ ᤐᤳᤐᤣ᥅ ᤑᤠ᤹ᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤛᤧᤘᤠᤖᤥᤒᤠᤴ ᤛᤣ᤺ᤴᤍᤥᤛᤢ॥ 27ᤜᤧᤰᤁᤩᤠᤱ ᤂᤧᤴ ᤛᤧᤘᤠᤖᤥᤒᤠᤸᤗᤧᤀᤠᤱ ᤏᤥᤃᤵ ᤐᤡᤖᤢ. ‘ᤂᤧᤏᤧ᤹ ᤁᤧᤴᤛᤠ᤹ ᤑᤥ᤹ᤒᤧᤴ ᤌᤣᤀᤠᤱ ᤔᤧᤶᤒᤥᤱᤅᤣ ᤏᤢᤖᤡᤰᤁᤠᤱ ᤏᤢ᤺ᤰᤂᤧ ᤋᤩᤧᤀᤠᤱ ᤘᤠ᤹. ᤂᤧᤸᤗᤧᤆᤥᤃᤢᤸᤗᤧ ᤁᤧᤶᤒᤠᤖᤧ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤛᤧᤵᤔᤠ ᤐᤠᤱᤄᤢᤛᤡᤀᤠᤱ ᤁᤵᤔᤥ ᤆᤠᤔᤢᤰ ᤌᤡᤔᤢᤰ ᤛᤧᤛᤢᤒᤠᤖᤥ॥’ 28ᤁᤖ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤜᤡᤶᤛᤡᤃᤠᤱ ᤗᤠ᤺ᤵᤔᤠᤀᤣ ᤔᤧᤍᤧᤴᤍᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤁᤢᤶᤒᤠ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤂᤧᤴ ᤜᤡᤶᤛᤡᤃᤠᤱ ᤐᤡᤳᤇᤡ ᤑᤠ᤹ᤀᤠᤱ ᤗᤧᤔᤢ॥ 29ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤛ᤻ᤛᤠ ᤋᤢᤶᤒᤠᤸᤗᤧ ᤁᤢᤶᤒᤠ ᤀᤰᤂᤣ ᤔᤧᤳᤋᤢ. ‘ᤀᤥᤔᤧᤳᤋᤧ᤹. ᤀᤡᤱᤃᤠ᤹ ᤁᤶᤓᤧᤖᤡᤰ ᤋᤱᤒᤣ ᤌᤠᤖᤡᤰ ᤂᤧᤏᤧ᤹ ᤁᤢᤛᤧᤘᤠ ᤆᤥᤃᤢᤱ. ᤁᤧᤒᤠ᤺ᤳᤋᤢᤒᤠ ᤐᤠᤴ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤔᤧᤴᤀᤵᤐᤧᤴ. ᤜᤧᤰᤁᤣᤛᤠᤱ ᤂᤧᤏᤧ᤹ ᤀᤠᤴᤍᤣᤱ ᤀᤠᤴᤈᤢᤶᤜᤠ᤹ᤏᤢ ᤆᤠᤔᤢᤰ ᤌᤡᤔᤢᤰ ᤆᤥᤃᤢᤱᤏᤡ ᤑᤠ᤹ᤀᤠᤱ ᤔᤧᤴᤍᤠᤰᤛᤠᤎᤡᤰᤁᤠᤱ ᤁᤧᤶᤒᤡᤖᤠᤱᤅᤡᤴᤗᤥ॥ 30ᤁᤖ ᤁᤴ ᤁᤧᤛ᤻ᤛᤠ᤺ᤸᤗᤧ ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤁᤧᤳᤏᤡᤔᤠᤜᤠ᤹ᤏᤢ ᤀᤧ᤺ᤳᤗᤧᤗᤧ ᤗ᤹ᤔᤠᤀᤥ ᤁᤧᤖᤧᤰ ᤔᤠ᤺ᤴᤍᤢ॥ ᤁᤖ ᤂᤢᤏᤧ᤹ ᤏᤢ᤺ᤰᤂᤧ ᤋᤩᤧ᤺ᤸᤗᤧ ᤂᤧᤏᤧ᤹ ᤆᤠᤗᤢᤵᤔᤏᤠᤒᤠ ᤌᤰᤛᤠᤴ ᤁᤧᤛᤧᤖᤢᤀᤠᤱ ᤆᤠᤔᤢᤰ ᤌᤡᤔᤢᤰ ᤁᤧᤛᤧᤛᤢᤖᤥ॥’ 31ᤜᤧᤰᤁᤣ᤺ᤸᤗᤧ ᤁᤢᤶᤒᤠᤖᤧ ᤁᤢᤛ᤻ᤛᤠᤴ ᤔᤧᤳᤋᤢ. ‘ᤀᤠᤔᤡ᤺ᤶ ᤀᤠᤛ᤻ᤛᤠᤀᤣ. ᤂᤧᤏᤧ᤹ᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢᤀᤣ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤀᤠᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤏᤧ᤹ᤀᤡᤴᤏᤣᤖᤥ॥ 32ᤁᤖ ᤁᤧᤴᤛᤠ᤹ ᤏᤢ᤺ᤰᤂᤧ ᤋᤩᤧᤒᤠᤀᤥ ᤀᤠᤏᤡ᤹ ᤛ᤺ᤵᤔᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤩᤧᤀᤠᤱ ᤘᤕᤧ. ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹॥ ᤂᤢᤏᤧ᤹ ᤔᤕᤧᤒᤣᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤠᤏᤡ᤹ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹ᤖᤥ॥’”
Currently Selected:
ᤗᤢᤁᤠ 15: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
