ᤗᤢᤁᤠ 11
11
ᤕᤧᤛᤢᤖᤧ ᤋᤢᤘᤠ ᤆᤥ᤺ᤰᤔᤠ ᤜᤢ᤹ᤖᤢᤛᤡ᤹
(ᤔᤳᤋᤡ ᥌:᥏-᥇᥉. ᥍:᥍-᥇᥇)
1ᤌᤡᤰᤕᤧᤴ ᤕᤧᤛᤢᤴ ᤌᤡᤰ ᤋᤧᤴᤏᤥ ᤋᤢᤘᤠ ᤆᤥᤃᤧᤖ ᤕᤢᤅᤧ॥ ᤂᤢᤏᤧ᤹ ᤋᤢᤘᤠ ᤆᤥᤃᤢᤛᤢᤖᤢᤸᤗᤧ ᤁᤢᤜᤢ᤹ᤛᤠᤶᤒᤠᤎᤡᤰ ᤂᤧ᤹ᤕᤥ ᤋᤩᤧᤀᤠᤱ ᤔᤧᤳᤋᤢ. “ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤋᤢᤘᤠ ᤆᤥ᤺ᤰᤔᤠ ᤜᤢ᤹ᤖᤢᤛᤡᤒᤠ ᤜᤧᤰᤁᤣᤀᤣ ᤀᤠᤍᤠᤱᤒᤠᤖᤧ ᤀᤠᤏᤡᤃᤧᤀᤠᤱ ᤋᤢᤘᤠ ᤆᤥ᤺ᤰᤔᤠ ᤀᤠᤜᤢ᤹ᤖᤧ᤹ᤀᤥ॥”
2ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤀᤰᤂᤣ ᤐᤠ᤺ᤳᤋᤧᤶᤔᤧ᤹.
“ᤀᤠᤏᤡᤃᤣ ᤐᤠᤀᤣ.
ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤖᤥ॥
ᤁᤧᤜᤠᤱᤈᤢᤶᤔᤡᤴ ᤋᤠᤖᤖᤥ॥
3ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠᤴ ᤀᤠᤒᤡᤖᤧ᤹ᤀᤥ॥
4ᤀᤠᤏᤡᤃᤣ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥
ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡᤃᤧᤀᤠᤱ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤗᤧᤵᤔᤡ ᤐᤡᤖᤢᤶᤛᤡᤶᤒᤧ᤹ᤖᤥ॥
ᤜᤧᤰᤁᤩᤠᤱ ᤏᤡᤱᤘᤠ᤹ᤛᤠ᤹ᤔᤠᤀᤥ ᤀᤠᤴᤎᤠᤛᤧᤴᤏᤧ᤹ᤀᤥ॥”
5ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤠᤸᤗ ᤂᤧᤏᤧ᤹ ᤌᤡᤰ ᤛᤧᤴᤍᤡᤰ ᤛᤧᤳᤗᤢᤶᤓᤰᤁᤡᤸᤗᤧ ᤋᤣ᤺ᤱᤒᤠᤸᤗᤥ ᤁᤧᤒᤣ᤺ᤰᤁᤠᤱ ᤀᤰᤂᤣ ᤁᤧᤔᤧᤳᤋᤢ. ‘ᤋᤣ᤺ᤱᤒᤣ ᤀᤡᤱᤃᤠ᤹ ᤛᤢᤶᤛᤡ ᤂᤖᤧ᤺ᤱᤎᤡᤰ ᤌᤧ᤹ᤗᤠ ᤐᤡᤖᤠᤱᤅᤧ᤹ᤀᤥ॥ 6ᤌᤣᤀᤠᤱᤓᤧᤸᤗᤧ ᤔᤠ᤺ᤱᤄᤠᤏᤢ ᤀᤠᤴᤈᤢᤶᤎᤡᤰ ᤋᤩᤧᤀᤠᤱ ᤘᤠ᤹॥ ᤂᤢᤏᤧ᤹ ᤐᤡᤔᤠᤖᤧ ᤗᤠᤃᤡ ᤆᤠᤔᤠ ᤌᤢᤱᤔᤠ ᤀᤡᤱᤃᤠ᤹ ᤌᤣᤀᤠᤱ ᤔᤧᤃᤳᤋᤠᤴᤗᤥ॥’ 7ᤜᤧᤰᤁᤣ᤺ᤸᤗᤧ ᤜᤡᤶ ᤛᤡᤃᤠᤱᤗᤠᤶ ᤂᤧᤸᤗᤧ ᤏᤥᤃᤵ ᤁᤧᤒᤡ᤹. ‘ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ᤀᤥ᥄ ᤀᤠᤴᤍᤣ᤺ᤴᤇᤠ ᤗᤠᤶᤎᤣ᤺ᤵᤐᤧᤴ ᤀᤧᤳᤋᤧᤀᤠᤱ ᤐᤳ. ᤜᤧᤰᤁᤩᤠᤱ ᤕᤠᤶᤔᤥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤀᤠᤱ ᤀᤡᤱᤃᤠ᤹ᤏᤢᤀᤣ ᤏᤧᤳᤏᤠᤀᤥ ᤔᤧᤏᤧ॥ ᤀᤡᤱᤃᤠ᤹ ᤐᤥ᤺ᤰᤔᤠᤀᤠᤱ ᤂᤧᤏᤧ᤹ ᤌᤧᤔᤠᤀᤠᤱ ᤐᤡᤔᤠ ᤔᤧᤛᤢᤰᤏᤧᤴᤗᤥ॥’ 8ᤁᤖ ᤂᤧᤵᤛᤧᤶᤔᤧ᤹. ᤂᤧᤴ ᤀᤠᤒᤠᤅᤣ ᤁᤢᤴᤍᤣ᤺ᤱᤒᤠᤛᤠᤱ ᤂᤢᤏᤧ᤹ ᤐᤥ᤺ᤰᤁᤠᤱ ᤌᤣᤀᤠᤱ ᤔᤧᤒᤡᤖᤢᤴᤗᤥ. ᤁᤖ ᤂᤢᤏᤧ᤹ ᤁᤢᤏᤠ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤐᤥ᤺ᤰᤁᤠᤱ ᤆᤠᤜᤠᤒᤠ ᤆᤥ᤺ᤰᤐᤠ ᤕᤠᤖᤡᤰᤁᤣ ᤂᤧᤴ ᤐᤡᤖᤢ᤹ᤖᤥ॥ 9ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤔᤧᤳᤏᤡᤱᤗᤥ—ᤏᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤒᤡᤖᤡ᤹ᤖᤥ. ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤄᤥᤛᤢᤶᤗᤥ. ᤗᤠᤶᤎᤣ᤺ᤵᤐᤧᤴ ᤂᤰᤂᤰ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤗᤥ॥ 10ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤏᤠ᤺ᤰᤋᤢ᤹. ᤂᤧᤸᤗᤧ ᤂᤥᤛᤢ᤹. ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤥ᤺ᤳᤋᤢ᤹. ᤂᤧᤸᤗᤧ ᤕᤠᤱᤄᤢ᤹. ᤜᤧᤰᤁᤩᤠᤱ ᤜᤠ᤺ᤳᤗᤧ ᤗᤠᤶᤎᤣ᤺ᤵᤐᤧᤴ ᤂᤰᤂᤰ ᤔᤧᤳᤋᤢ᤹. ᤂᤧᤸᤗᤧ ᤁᤢᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤗᤥ॥ 11ᤂᤡᤏᤡ᤹ᤀᤥ ᤀᤠᤳᤋᤡᤴ ᤐᤠ᤺ᤸᤗᤧ ᤁᤢᤛ᤻ᤛᤠᤴ ᤅᤠ ᤏᤠ᤺ᤰᤁᤡᤸᤗᤧ ᤀᤛᤣ᤺ᤰᤐᤧᤴ ᤐᤡᤖᤢᤒᤣ᥅ 12ᤜᤧᤰᤁᤩᤠᤱ ᤘᤠᤎᤡ᤺ᤴ ᤏᤠ᤺ᤰᤁᤡᤸᤗᤧ ᤋᤠᤱᤛᤠᤰᤂᤧᤒᤰᤐᤧᤴ ᤐᤡᤖᤢᤒᤣ᥅ 13ᤂᤡᤏᤡ᤹ ᤑᤧᤴᤏᤡᤱᤘᤠ᤹ ᤁᤧᤃᤳᤋᤢᤶᤛᤠᤱ ᤀᤠᤒᤠᤅᤣ ᤛᤠ᤺ᤜᤠ᤹ ᤏᤢᤒᤠ ᤆᤡᤃᤰᤘᤠᤜᤠ᤹ ᤐᤡᤔᤠᤛᤡ ᤁᤧᤗᤧᤛ᤻ᤛᤢᤶᤔᤡᤸᤗᤧ. ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤸᤗᤧᤀᤠᤱ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ ᤁᤧᤏᤠ᤺ᤰᤋᤢᤶᤔᤡᤸᤗᤧ ᤛᤧᤰᤂᤠᤛᤠᤱ ᤁᤧᤒᤡᤖᤡ᤹ᤀᤣᤖᤥ॥”
ᤕᤧᤛᤢᤴ ᤏᤢ ᤒᤠᤗᤈᤡᤒᤢᤗ
(ᤔᤳᤋᤡ ᥇᥈:᥈᥈-᥈᥏; ᤔᤷᤁᤢ ᥉:᥈᥆-᥈᥍)
14ᤌᤡᤰᤕᤧᤴ ᤕᤧᤛᤢᤖᤧ ᤌᤡᤰ ᤁᤢᤒᤠᤴ ᤔᤧᤴᤗ᤺ᤶᤔᤏᤠᤒᤠ ᤁᤧᤒᤠ ᤔᤏᤠᤗᤠᤶ ᤑᤧᤴᤛᤠᤶᤔᤡᤴ ᤏᤠ᤺ᤳᤋᤢ ᤗ᤺ᤳᤋᤢᤖ ᤐᤳᤇᤧ॥ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤳᤋᤢᤍᤣᤛᤢᤀᤠᤱ ᤂᤧᤴ ᤔᤏᤠᤴ ᤐᤠ᤺ᤵᤔᤠ ᤜᤣ᤺ᤰᤋᤧ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. 15ᤁᤖ ᤁᤢᤓᤠᤖᤧ ᤔᤧᤔᤧᤳᤋᤢ. “ᤁᤸᤗᤧᤃ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡ᤹ᤖᤥ॥”
16ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤢᤏᤧ᤹ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣᤴ ᤀᤠᤎᤠᤰᤋᤧ᤹ᤀᤥ” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥ 17ᤁᤖ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤔᤧᤔᤧᤰᤗᤥ॥ ᤜᤧᤰᤁᤩᤠᤱ ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤡᤶᤛᤕᤱᤜᤠ᤹ᤀᤠᤱ ᤔᤧᤔᤧᤰᤗᤥ॥ 18ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤀᤠᤒᤠᤅᤣ ᤁᤢᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤁᤢᤜᤠᤱᤈᤢᤶᤔᤡᤸᤗᤧ ᤌᤖᤢᤒᤣ᥅ ᤁᤖ ᤀᤡᤱᤃᤠ᤹ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤗᤥ॥ 19ᤀᤡᤱᤃᤠ᤹ ᤒᤠᤗᤈᤡᤒᤢᤗᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤢᤱᤛᤡᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤜᤠ᤹ᤖᤧ ᤌᤧᤔᤠ᤺ᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤧᤗ᤺ᤳᤋᤢᤛᤡᤒᤣ᥅ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤎᤠᤰᤗᤥ॥ 20ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤡᤏᤡ᤹ ᤗᤢᤶᤔᤥ ᤋᤩᤧ ᤆᤢᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
21“ᤗᤳᤇᤠ ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤑᤧᤈᤠ-ᤑᤧᤕᤢᤶᤜᤠ᤹ ᤁᤠᤵᤛᤡᤱᤅᤠᤱ ᤁᤢᤜᤡᤶᤔᤡᤴ ᤁᤥᤛᤢᤸᤗᤧ ᤁᤢᤈᤡᤃᤰᤘᤠᤜᤠ᤹ ᤛᤧ᤺ᤵᤋᤢᤛᤡ᤹ᤖᤥ॥ 22ᤁᤖ ᤂᤢᤏᤧ᤹ᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤏᤠᤴ ᤋᤠᤀᤠᤱ ᤂᤢᤏᤧ᤹ ᤏᤠ᤺ᤴᤍᤢ᤹. ᤜᤧᤰᤁᤩᤠᤱ ᤛᤧ᤺ᤵᤔᤠ ᤛᤢᤰᤁᤠ ᤗ᤹ᤖᤡᤰ ᤀᤡ᤺ᤳᤋᤢᤒᤠ ᤑᤧᤈᤠ-ᤑᤧᤕᤢᤶᤜᤠ᤹ ᤏᤢ ᤁᤢᤈᤡᤃᤰᤘᤠᤜᤠ᤹ ᤏᤠᤵᤋᤢᤍᤣ᤹ᤖᤢᤀᤠᤱ ᤁᤢᤔᤏᤠᤜᤠ᤹ᤏᤢ ᤜᤠᤛ᤻ᤛᤢᤖᤥ॥
23“ᤜᤠᤳ ᤀᤡᤱᤃᤠ᤹ ᤗᤧᤵᤔᤠᤱ ᤜᤥᤵ. ᤂᤧᤴ ᤀᤠᤍᤰᤗᤧᤱᤘᤠᤀᤥ ᤘᤠ᤹॥ ᤜᤠ᤺ᤳᤗᤧ ᤀᤡᤱᤃᤠ᤹ᤏᤢ ᤔᤧᤛᤢᤵᤛᤢᤴ. ᤂᤧᤸᤗᤧ ᤛᤧᤛᤢᤖᤥ॥”
24“ᤑᤧᤴᤛᤠᤶᤔᤡᤴ ᤔᤏᤠᤀᤥᤗᤠᤶ ᤗ᤺ᤴ ᤐᤣ᤺ᤰᤁᤡᤸᤗᤧ ᤏᤠ᤺ᤶᤛᤡᤱ ᤋᤧᤴ ᤁᤥ᤺ᤳᤇᤧ ᤛᤧᤱᤛᤧᤱᤒᤠ ᤋᤧᤴ ᤜᤧᤱᤄᤠᤳᤋᤡ ᤐᤣ᤺ᤰᤗᤥ. ᤁᤖ ᤂᤧᤸᤗᤧ ᤀᤠᤳᤋᤠᤴᤏᤠᤱ ᤔᤧᤄᤥᤛᤢᤴᤏᤠᤱ ᤀᤰᤂᤣ ᤔᤧᤳᤇᤡᤱ. ‘ᤀᤡᤱᤃᤠ᤹ ᤗᤧᤖᤢᤱᤒᤠ ᤔᤏᤠ᤺ᤸᤗᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥’ 25ᤜᤧᤰᤁᤩᤠᤱ ᤂᤧᤴ ᤂᤧᤵᤔᤥ ᤏᤢ᤺ᤱ ᤋᤠ᤺ᤸᤗᤧ ᤋᤃᤡ ᤕᤠᤃᤧᤒᤠ ᤋᤧᤴᤏᤡᤴ ᤔᤧᤍᤢᤃᤢᤀᤠᤱ ᤏᤢᤒᤠ ᤔᤧᤈᤥᤃᤢᤒᤠ ᤏᤡᤛᤢᤖᤥ॥ 26ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤁᤠᤱ ᤀᤠᤵᤑᤣᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢ᤹ᤀᤡ ᤁᤧᤓᤧ᤹ᤒᤠ ᤘᤣ᤹ ᤏᤢᤛᤡ ᤑᤧᤴᤛᤠᤶᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤠᤱ ᤔᤧᤕᤢᤱᤛᤡᤱᤗᤥ॥ ᤂᤧᤴ ᤔᤏᤠ᤺ᤸᤗᤧ ᤁᤢᤕᤠᤰᤏᤠᤶᤔᤡᤴ ᤋᤃᤡᤒᤠᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤐᤥᤱᤗᤥ॥”
27ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤵᤔᤥ ᤔᤏᤠᤗᤢᤶᤔᤥᤗᤠᤶ ᤌᤡᤰ ᤔᤧᤴᤇᤢᤔᤠ᤹ᤀᤡᤴ ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧ. “ᤂᤢᤏᤧ᤹ ᤛᤠᤃᤧᤘᤠ᤺ᤶᤔᤠᤴ ᤜᤧᤰᤁᤩᤠᤱ ᤏᤢᤃᤧᤎᤢᤰᤔᤠᤱᤃ ᤔᤢ᤹ᤀᤡᤛᤠᤔᤠᤖᤥ॥”
28ᤁᤖ ᤕᤧᤛᤢᤖᤧ ᤐᤠ᤺ᤳᤋᤢ. “ᤜᤧᤰᤁᤣᤃ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠ ᤏᤢ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤀᤣ ᤔᤢ᤹ᤀᤡᤛᤠᤒᤠᤛᤡᤖᤥ॥”
ᤕᤥᤏᤠᤖᤧ ᤁᤢᤔᤡᤰᤛᤣᤴ
(ᤔᤳᤋᤡ ᥇᥈:᥉᥎-᥊᥈)
29ᤔᤏᤠᤜᤠ᤹ ᤂᤧᤵᤔᤥ ᤕᤖᤡᤰ ᤔᤧᤒᤥᤖᤧᤖ ᤔᤧᤒᤣ᤺ᤸᤗᤧ ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤁᤢ᤹ᤀᤡᤃᤧᤓᤧ᤹ᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤔᤧᤃᤥ᤺ᤳᤋᤢ᤹. ᤁᤖ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣᤴ ᤔᤧᤱᤄᤥᤛᤢᤴᤗᤥ॥ 30ᤀᤠᤰᤂᤣᤗ᤹ᤖᤡᤰ ᤕᤥᤏᤠᤴ ᤏᤡᤏᤒᤣ ᤕᤧᤰᤕᤰᤐᤠ ᤔᤏᤠᤜᤠ᤹ᤖᤧ ᤗᤠᤃᤡ ᤔᤡᤰᤛᤣᤴ ᤐᤥ᤺ᤰᤂᤧᤀᤠᤱ ᤘᤕᤧ. ᤂᤧᤴ ᤜᤧᤰᤁᤣᤀᤣ ᤔᤧᤴᤇᤠᤶᤛᤠ᤺ᤴᤏᤠᤱ ᤁᤴ ᤌᤠ᤺ᤰᤁᤡᤸᤗᤧ ᤗᤠᤃᤡ ᤔᤡᤰᤛᤣᤴ ᤐᤥᤱᤗᤥ॥ 31ᤗᤠᤱᤃᤧᤳ ᤐᤡᤛᤠᤱᤒᤠ ᤛᤡᤘᤠ ᤗᤠᤈᤣ᤹ᤛᤔᤠ ᤜᤠᤱᤔᤠᤴ#᥇ ᤜᤠᤱ ᥇᥆:᥇-᥇᥉ ᤂᤠᤛᤧᤴ ᤕᤧᤴᤏᤥ ᤕᤧᤶᤛᤡᤱᤅᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠᤱ ᤐᤠ᤺ᤴᤎᤡᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴ ᤂᤧᤶᤛᤧ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧᤀᤠᤱ ᤘᤕᤧᤖᤥ॥ ᤁᤵᤔᤥ ᤛᤥᤗᤥᤔᤏ ᤜᤠᤱᤅᤡᤴᤏᤢ᤺ᤸᤗᤧ ᤐᤕᤶ ᤕᤶᤒᤠᤴ ᤘᤠ᤹ᤛᤠᤱ ᤁᤧᤱᤄᤧᤵᤛᤢᤶᤔᤡᤴᤗᤥ॥ 32ᤏᤡᤏᤒᤣᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧᤀᤠᤱ ᤁᤴ ᤌᤠ᤺ᤰᤜᤠ᤹ ᤂᤠᤛᤧᤴ ᤕᤧᤴᤏᤥ ᤐᤠ᤺ᤴᤔᤧᤎᤡᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤥᤏᤠᤖᤧ ᤀᤡᤱᤓᤴ ᤛᤧᤛᤢᤸᤗᤧ ᤂᤧᤱᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤀᤠᤱ ᤔᤧᤘᤕᤧ. ᤁᤖ ᤁᤵᤔᤥ ᤕᤥᤏᤠᤴᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠᤴ ᤘᤠ᤹ᤛᤠᤱ ᤂᤡᤏᤡ᤹ ᤁᤧᤴᤜᤡᤴᤍᤡᤴᤗᤥ॥”
ᤏᤠᤛᤡᤱᤃᤧᤴ ᤌᤰᤁᤡᤸᤗᤧᤴ ᤛᤣᤔᤡ
(ᤔᤳᤋᤡ ᥋:᥇᥋. ᥌:᥈᥈-᥈᥉)
33“ᤀᤠᤳᤋᤡᤸᤗᤧᤀᤠᤱ ᤛᤣᤔᤡᤴ ᤜᤠ᤺ᤴᤍᤢᤀᤠᤱ ᤏᤀᤡᤔᤠᤸᤗᤧ ᤔᤧᤛᤢ᤺ᤵᤋᤢᤴ ᤜᤧᤰᤁᤩᤠᤱ ᤔᤧᤈᤡᤰᤂᤢᤴᤏᤠᤱ. ᤁᤖ ᤜᤡᤶᤛᤡᤃᤠᤱ ᤁᤧᤗᤠ᤺ᤵᤐᤠᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤆᤶᤈᤶᤒᤠ ᤋᤧᤴᤏᤥ ᤕᤢᤰᤂᤢ᤹ᤖᤥ॥ 34ᤂᤧᤏᤧ᤹ ᤁᤧᤔᤡᤰᤁᤡᤴ ᤏᤠᤛᤡᤱᤃᤧᤴ ᤁᤧᤎᤰᤁᤥᤒᤠ ᤛᤣᤔᤡᤖᤥ॥ ᤂᤧᤏᤧ᤹ ᤁᤧᤔᤡᤰᤁᤴ ᤏᤢ᤹ᤏᤧ ᤑᤠ᤹ᤃᤪ. ᤁᤠᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤀᤥ᤺ᤳᤗᤥ॥ ᤁᤖ ᤁᤧᤔᤡᤰᤁᤴ ᤑᤧᤴᤏᤧ ᤑᤠ᤹ᤃᤪ. ᤁᤠᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤂᤠᤍᤠᤶᤗᤥ॥ 35ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤥᤒᤠ ᤀᤥ᤺ᤳᤋᤡ᤺ᤴ ᤂᤠᤍᤠᤶᤔᤠᤸᤗᤧ ᤔᤧᤛᤢ᤺ᤵᤋᤢᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ 36ᤂᤧᤏᤧ᤹ ᤁᤧᤏᤡᤱᤘᤠ᤹ᤛᤠᤶᤔᤡᤴ ᤀᤥ᤺ᤳᤋᤡ᤺ᤸᤗᤧ ᤁᤢᤎᤡᤶ ᤘᤠ᤹ᤀᤠᤱ ᤂᤠᤍᤠᤶᤔᤠᤴ ᤜᤥ᤺ᤵᤏᤧ ᤑᤠ᤹ᤃᤪ. ᤛᤣᤔᤡ᤺ᤸᤗᤧ ᤌᤥ᤹ᤖᤢᤒᤠ ᤜᤧᤰᤁᤣᤀᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤛᤠᤶᤔᤡᤴᤏᤠᤱ ᤀᤥ᤺ᤳᤗᤥ॥”
ᤕᤧᤛᤢᤖᤧ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤐᤠᤴ ᤌᤡᤰᤋᤢᤛᤡ᤹
(ᤔᤳᤋᤡ ᥈᥉:᥇-᥉᥌)
37ᤕᤧᤛᤢᤖᤧ ᤐᤠ᤺ᤵᤔᤠ ᤛᤢᤖᤢᤸᤗᤧ ᤂᤧᤵᤔᤥ ᤑᤖᤡᤛᤡᤎᤡᤰ ᤋᤩᤧᤀᤠᤱ ᤂᤢᤏᤧ᤹ ᤆᤠᤈᤠᤛᤧ ᤀᤢ᤺ᤳᤋᤢᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤴ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱ॥ 38ᤆᤠᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤆᤥ᤺ᤰᤌᤡᤶ ᤁᤢᤀᤡᤛᤡᤰ ᤘᤠᤔᤧᤜᤵᤋᤢᤶᤒᤠ ᤏᤡᤛᤢᤸᤗᤧ. ᤂᤧᤴ ᤑᤖᤡᤛᤡ᤺ᤸᤗᤧ ᤁᤢᤏᤡᤱᤘᤠ᤹ ᤔᤕᤧᤖᤥ॥ 39ᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. “ᤂᤡᤏᤡ᤹ ᤑᤖᤡᤛᤡᤜᤠ᤹ᤖᤧ ᤂᤥᤷᤕᤠᤴ ᤏᤢ ᤆᤧᤳᤌᤩᤠᤴ ᤗᤠ᤺ᤰᤁᤠᤳᤗᤰ ᤘᤠᤃᤧᤜᤵᤋᤢᤶ. ᤁᤖ ᤂᤡᤏᤡ᤹ ᤛᤡᤃᤠᤱᤃ ᤔᤏᤠᤜᤠ᤹ ᤁᤧᤏᤠᤵᤋᤢᤶ ᤁᤧᤍᤠ᤺ᤖᤢᤶᤛᤡᤒᤠ ᤐᤠ᤺ᤴᤜᤠ᤹ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤍᤡᤶᤛᤡᤀᤠᤱ ᤁᤧᤘᤕᤡ᤹ᤖᤥ॥ 40ᤀᤍᤱᤛᤣ. ᤗᤠ᤺ᤰᤁᤠᤳ ᤁᤧᤈᤥ᤺ᤰᤐᤠᤸᤗᤧ ᤛᤡᤃᤠᤱᤒᤠᤴᤏᤠᤱ ᤆᤥᤃᤢᤒᤠ ᤔᤣ᤺ᤶᤒᤡ᥅ 41ᤁᤖ ᤁᤧᤄᤡ᤺ᤵᤛᤡᤖ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤶᤍᤣᤛᤧᤶᤛᤡᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤢᤳᤌᤥᤀᤣ ᤁᤧᤒᤥ᤺ᤰᤂᤡ᤹ᤖᤥ॥
42“ᤁᤖ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ ᤑᤖᤡᤛᤡᤛᤣ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤆᤢᤈᤢᤰᤛᤠ ᤔᤠᤖᤢᤰᤁᤡᤸᤗᤧᤴ ᤌᤡᤒᤥᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤶᤔᤧᤳᤋᤢᤶᤔᤡᤴ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤀᤠᤱ ᤏᤢᤖᤡᤰᤁᤠᤱ ᤂᤠᤛᤧᤴ ᤁᤧᤴᤗᤥ᤺ᤴᤍᤢᤶᤛᤡᤶᤔᤡᤴᤗᤥ॥ ᤂᤡᤏᤡ᤹ ᤋᤃᤡᤛᤔᤠᤴ ᤁᤧᤈᤥᤃᤢᤶᤔᤡᤸᤗᤧ ᤀᤣᤃᤠᤱᤛᤔᤠᤴᤏᤠᤱ ᤁᤧᤈᤥᤃᤢᤶᤔᤡᤸᤗᤧ ᤐᤥ᤺ᤰᤂᤧᤒᤠᤖᤥ॥ 43ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶᤜᤠ᤺ᤳᤋᤡ ᤔᤏᤠᤜᤠ᤹ᤖᤧ ᤛᤧᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤖᤡ᤹ᤖᤥ॥ 44ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤛᤢᤳᤗᤢᤱ ᤔᤣ᤺ᤴᤏᤣᤒᤠ ᤀᤡ᤺ᤵᤐᤢᤱ ᤜᤧᤰᤁᤣ ᤁᤧᤗ᤹ᤖᤡᤖᤥ॥ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤀᤣ ᤔᤧᤱᤄᤥᤀᤣ ᤂᤧᤴ ᤀᤡ᤺ᤵᤐᤢᤱ ᤛᤶᤍᤠᤱ ᤗᤠᤱᤔᤧᤄᤣ᤺ᤰᤁᤠᤱ ᤀᤠᤛᤢᤳᤌᤥ ᤔᤧᤒᤥᤱᤗᤥ॥”
45ᤂᤧᤵᤔᤥ ᤌᤡᤰ ᤛᤠᤶᤕᤥᤌᤡᤶᤛᤠᤶᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤳᤋᤡᤸᤗᤧᤃ ᤀᤠᤏᤡᤃᤧᤀᤠᤱ ᤆᤠ᤺ᤳᤌᤡᤖᤰ ᤁᤧᤍᤣᤛᤢᤖᤥ॥”
46ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤡᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤁᤧᤈᤡ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤁᤧᤗᤡ᤺ᤵᤐᤠ ᤁᤰ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤌᤡᤶᤜᤠ᤹ ᤁᤧᤈᤥᤃᤢᤶᤔᤠᤱ ᤔᤏᤠᤜᤠ᤹ ᤁᤧᤃᤢ᤺ᤳᤋᤢᤶᤛᤡᤶ. ᤁᤖ ᤂᤡᤏᤡ᤹ᤃ ᤁᤰ ᤕᤠᤱᤕᤠᤱ ᤗ᤹ᤖ ᤑᤠ᤹ᤀᤠᤱ ᤀᤠᤒᤠᤅᤣ ᤜᤢᤰᤆᤥᤎᤡᤰᤁᤡᤸᤗᤧᤀᤠᤱ ᤂᤧᤴ ᤁᤧᤴᤇᤢᤛᤢᤶᤔᤡᤴᤗᤥ॥ 47ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤛᤧᤖᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤴ ᤀᤡ᤺ᤵᤐᤢᤱᤅᤡᤴ ᤁᤧᤈᤥᤃᤢᤶᤗᤥ॥ 48ᤂᤡᤏᤡ᤹ᤃ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴᤏᤢ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤂᤡᤏᤡ᤹ ᤁᤧᤈᤥᤃᤢᤶᤗᤥ॥ 49ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤁᤢᤏᤡᤱᤘᤠ᤹ᤀᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤂᤡᤏᤡ᤹ᤀᤥ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤐᤠᤱᤄᤢᤱᤛᤡᤱ. ᤁᤖ ᤂᤡᤏᤡ᤹ ᤁᤢᤓᤠ ᤁᤧᤛᤧᤖᤢᤶᤛᤡᤶ. ᤁᤢᤓᤠ ᤏᤡᤱᤄᤢᤶ ᤁᤧᤔᤧᤳᤋᤢᤶᤛᤡᤶ॥’ 50ᤜᤧᤰᤁᤣ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤵᤐᤠᤜᤠ᤹ᤖᤧ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤅᤡᤴ ᤁᤴ ᤌᤠ᤺ᤰᤜᤠ᤹ᤖᤧ ᤔᤧᤄᤥᤛᤢ᤹ᤖᤥ— 51ᤔᤧᤛᤧᤖᤢᤒᤠ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤀᤠᤱᤎᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤏᤢ ᤔᤠᤱᤜᤡᤶᤔᤡᤸᤗᤧ ᤁᤢᤗᤢᤶᤔᤥ ᤔᤧᤛᤧᤖᤢᤒᤠ ᤈᤁᤖᤡᤕᤠᤖᤧ ᤁᤢᤔᤠᤰᤂᤡ᤹ ᤌᤠᤖᤡᤰᤐᤠ ᤂᤢᤶᤍᤡᤱᤅᤡᤴ ᤁᤴ ᤌᤠ᤺ᤰᤜᤠ᤹ᤖᤧ ᤔᤧᤄᤥᤛᤢ᤹ᤖᤥ॥
52“ᤂᤡᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤛᤣ. ᤂᤡᤏᤡ᤹ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤜᤶᤔᤠ ᤋᤡᤔᤡᤰᤁᤡᤴ ᤁᤧᤍᤣ᤹ᤖᤢᤶᤛᤠᤱ ᤂᤡᤏᤡ᤹ ᤀᤠᤒᤠᤅᤣᤃ ᤁᤧᤴᤗᤠᤛᤡᤴᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤁᤧᤃᤥ᤺ᤵᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤗᤠ᤺ᤵᤔᤠ ᤁᤧᤶᤒᤠᤱᤄᤢᤶᤛᤡᤶᤔᤡᤴᤗᤥ॥”
53ᤜᤧᤰᤁᤩᤠᤱ ᤂᤢᤏᤧ᤹ ᤂᤧ᤹ᤕᤥᤗᤠᤶ ᤐᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤠ ᤔᤧᤜᤣ᤺ᤰᤋᤢᤖᤥ॥ ᤂᤧᤴ ᤕᤧᤶᤔᤠᤱᤎᤥ ᤂᤢᤏᤧ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤖ ᤕᤖᤡᤰ ᤛᤣ᤺ᤴᤍᤥᤜᤠ᤹ ᤛᤣ᤺ᤴᤔᤧᤍᤥᤛᤢ॥ 54ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤋᤧᤶᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤡᤱ ᤋᤱᤔᤠ ᤔᤧᤜᤣ᤺ᤰᤋᤢᤖᤥ॥
Currently Selected:
ᤗᤢᤁᤠ 11: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
