ᤕᤢᤜᤢᤴᤏᤠ 4
4
ᤕᤧᤛᤢᤴ ᤏᤢ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤡᤴ
1-3ᤕᤧᤛᤢᤖᤧ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ ᤆᤥᤃᤢᤛᤡᤀᤠᤱ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢ॥ (ᤜᤧᤰᤁᤣᤛᤠᤱ ᤕᤧᤛᤢᤖᤧᤃ ᤔᤣ᤺ᤴ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧᤖᤰ ᤒᤵᤋᤡᤛ᤻ᤔᤠ ᤔᤧᤒᤡᤖᤢᤛᤡᤖ ᤔᤧᤕᤠᤃᤧᤖᤥ॥) ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤕᤜᤢᤍᤡᤕᤠ ᤌᤢᤶᤗᤠᤶ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤕᤠᤶᤔᤥ ᤏᤢ᤺ᤰᤂᤧ ᤐᤣᤖᤥ॥
4ᤀᤠᤸᤗ ᤂᤢᤏᤧ᤹ ᤛᤠᤔᤖᤡᤕᤠ ᤌᤢᤶᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧᤖᤥ॥ 5ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤠᤁᤢᤒᤖᤧ ᤁᤢᤛ᤻ᤛᤠ ᤕᤢᤛᤢᤑᤧᤴ ᤐᤡᤖᤢᤒᤠ ᤕᤥ᤹ᤒᤠ᤺ᤸᤗᤧ ᤁᤢᤒᤣᤛᤠᤱ ᤛᤢᤂᤠᤖ ᤔᤧᤵᤔᤏᤠᤒᤠ ᤛᤠᤔᤖᤡᤕᤠ ᤐᤠᤱᤓᤣ᤹ᤀᤥ ᤁᤧᤖᤧ॥#᥊:᥋ ᤜᤠᤔᤥᤖᤖᤧ ᤁᤢᤛ᤻ᤛᤠ᤺ᤗᤠᤶ ᤕᤠᤁᤢᤒᤖᤧ ᤗᤠᤈᤣ᤹ ᤀᤡᤅᤢᤀᤠᤱ ᤁᤢᤛ᤻ᤛᤠ ᤕᤢᤛᤢᤑᤧᤴ ᤐᤡᤖᤢ॥ ᤕᤖᤡᤰ ᤋᤱᤒᤣ ᤀᤣᤃᤠᤱ ᤕᤢᤛᤢᤑ ᤛᤩᤧᤀᤠᤱ ᤒᤠ ᤂᤧᤴ ᤋᤧᤴᤏᤥ ᤔᤧᤗᤢᤵᤋᤢᤖᤥ (ᤋᤥᤗᤡᤱ ᥉᥉:᥇᥏. ᥊᥎:᥈᥈; ᤕᤜᤥ ᥈᥊:᥉᥈)॥ 6ᤂᤧᤵᤔᤥ ᤕᤠᤁᤢᤒᤖᤧ ᤋᤕᤢᤒᤠ ᤘᤠᤒᤠᤰᤁᤡᤴ ᤏᤧᤛ᤻ᤛᤧ॥ ᤕᤧᤛᤢᤴ ᤗᤠᤶᤍᤡ᤺ᤰᤁᤥᤗᤠᤶ ᤏᤠᤛ᤻ᤛᤧᤀᤠᤱ ᤗᤧᤴᤍᤡᤰ ᤂᤧᤴ ᤘᤠᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤕᤢᤱᤛᤡᤱ॥
7ᤛᤵᤑᤠᤀᤠᤱ ᤛᤠᤔᤖᤡᤕᤠᤒᤠ ᤔᤧᤴᤇᤢᤔᤠ᤹ᤎᤡᤰ ᤆᤫᤠ᤺ᤳ ᤑᤠ᤺ᤳᤇᤧ ᤂᤧᤵᤔᤥ ᤋᤩᤧ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤫᤠ᤺ᤳᤇᤡᤰ ᤌᤢᤱᤔᤠ ᤐᤡᤖᤠᤱᤅᤧᤏᤠ॥” 8ᤂᤧᤵᤔᤥᤃ ᤕᤧᤛᤢᤴ ᤗᤰ ᤘᤕᤧ. ᤌᤣᤀᤠᤱᤓᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤠᤔᤠ ᤌᤢᤱᤔᤠ ᤀᤡᤱᤛᤧ ᤐᤠᤱᤈᤢᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤖᤥ॥
9ᤂᤧᤴ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤕᤜᤢᤍᤡᤏᤧ. ᤀᤡᤱᤃᤠ᤹ᤃ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤫᤠ᤺ᤳ ᤌᤢᤱᤔᤠ ᤀᤡᤱᤃᤠ᤹ ᤁᤧᤏᤠ᤺ᤰᤁᤠᤒᤠᤒᤣ᥅” (ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤕᤜᤢᤍᤡᤜᤠ᤹ ᤏᤢ ᤛᤠᤔᤖᤡᤗᤢᤶᤔᤥ ᤋᤱᤈᤢᤶ ᤜᤥ᤺ᤵᤋᤧᤖᤥ)॥#᥊:᥏ ᤛᤠᤔᤖᤡᤜᤠ᤹ ᤁᤢᤈᤧᤰ ᤕᤜᤢᤍᤡ ᤔᤧᤜᤥᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤛᤢᤛᤡᤱᤔᤠ ᤌᤡᤶ ᤜᤥ᤺ᤵᤋᤧ॥ ᤂᤧᤸᤗᤧᤆᤥᤃᤢᤸᤗᤧ ᤁᤢᤈᤧᤰ ᤕᤜᤢᤍᤡᤜᤠ᤹ᤖᤧ ᤛᤠᤔᤖᤡᤜᤠ᤹ ᤀᤠᤛᤢᤳᤌᤥ ᤔᤧᤈᤥᤰ ᤑᤠ᤹ᤀᤠᤱ ᤔᤧᤈᤡ᤺ᤳᤋᤢᤛᤡᤖᤥ॥
10ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤏᤢ ᤂᤧᤏᤧ᤹ ᤆᤫᤠ᤺ᤳ ᤁᤧᤏᤠ᤺ᤰᤐᤧᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤕᤧᤸᤗᤧᤃ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤠᤱᤏᤠ ᤁᤧᤏᤠ᤺ᤰᤋᤢᤀᤠᤱ ᤂᤧᤴ ᤜᤡᤱᤔᤴᤗᤧᤴ ᤆᤫᤠ᤺ᤳᤋᤡᤴ ᤁᤧᤒᤡᤖᤧᤒᤠᤔᤧᤴ॥”
11ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤆᤫᤠ᤺ᤳ ᤐᤠ᤺ᤰᤔᤧᤴ ᤏᤢ ᤀᤡᤍᤠ᤺ᤰᤁᤡᤴᤏᤠᤱ ᤁᤧᤱᤃᤳᤋᤢᤴ. ᤘᤠᤒᤠᤰᤁᤡᤴᤏᤠᤱ ᤁᤣ᤺ᤶ. ᤜᤧᤰᤁᤣ᤺ᤸᤗᤧ ᤀᤠᤳᤋᤡᤏᤢ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤋᤠ᤺ᤵᤔᤠ ᤁᤧᤛᤢᤰᤋᤢᤒᤣ᥅ 12ᤜᤧᤰᤁᤣ᤺ᤸᤗᤧ ᤂᤧᤏᤧ᤹ᤃ ᤀᤠᤏᤡᤃᤣ ᤋᤠᤰᤌᤧᤒᤠ ᤕᤠᤁᤢᤒᤧᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤀᤣ ᤁᤴ ᤘᤠᤒᤠᤰᤁᤡᤴ ᤀᤠᤏᤡᤃᤣ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤒᤠ ᤁᤵᤔᤥᤗᤠᤶᤒᤠᤀᤣ ᤂᤢᤏᤧ᤹ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤠᤗᤢᤵᤜᤠ᤹ᤖᤧᤀᤠᤱ ᤆᤫᤠ᤺ᤳ ᤔᤧᤎᤢᤅᤢᤖᤥ॥”
13ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤴ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳ ᤁᤧᤎᤢᤱᤒᤠᤜᤠ᤹ᤃ ᤕᤠᤶᤔᤥ ᤂᤢᤏᤡ᤹ ᤘᤠᤔᤡ᤺ᤰᤗᤥ. 14ᤁᤖ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳ ᤁᤧᤎᤢᤱᤒᤠᤴ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴ॥ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳᤋᤡᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤍᤠᤍᤡᤱ ᤁᤧᤒᤢᤶᤒᤠ ᤘᤠᤒᤢᤴ ᤜᤧᤰᤁᤣ ᤂᤢᤏᤧ᤹ᤀᤥ ᤐᤥᤱᤗᤥ॥”
15ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤴ ᤆᤫᤠ᤺ᤳᤋᤡᤴ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤘᤠᤔᤧᤔᤡ᤺ᤰᤏᤧᤴᤗ ᤜᤧᤰᤁᤩᤠᤱ ᤀᤧᤳᤗᤧᤱ ᤀᤡᤱᤃᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤁᤵᤔᤥ ᤋᤠᤔᤠ ᤔᤧᤒᤥᤱᤏᤧᤴᤗᤖᤥ॥”
16ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤁᤧᤕᤧᤶᤒᤠ᤹ᤀᤡᤴ ᤁᤵᤔᤥ ᤀᤢ᤺ᤳᤋᤧ ᤋᤠᤖᤧ᤹॥”
17ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥᤵᤗᤥ॥”
ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥᤵᤗᤥ ᤗ᤹ᤖᤡᤰ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢ᤹ᤖᤥ॥ 18ᤛᤧᤰᤂᤠᤀᤣ ᤀᤢᤴᤇᤣ᤺ᤴᤇᤠ ᤅᤠᤛᤡ ᤁᤧᤕᤧᤶᤒᤠ᤹ ᤔᤧᤒᤥ᤺ᤰᤂᤧ ᤔᤧᤈᤢᤖᤧᤀᤠᤱ ᤘᤠ᤹॥ ᤀᤠᤸᤗᤥ ᤀᤠᤳᤋᤡᤴ ᤔᤏᤠ᤺ᤴᤏᤢ ᤂᤧᤏᤧ᤹ ᤁᤧᤘᤠ᤹ ᤂᤧᤴᤏᤠᤱ ᤛᤧᤰᤂᤠ᤺ᤸᤗᤧ ᤁᤧᤕᤧᤶᤒᤠ᤹ ᤔᤣ᤺ᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥᤵᤗᤥ ᤁᤧᤒᤠ᤺ᤳᤋᤢᤒᤠᤴ ᤛᤧᤰᤂᤠᤀᤣᤖᤥ॥”
19ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤏᤧ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤧ᤹ᤖᤥ॥ 20ᤀᤠᤏᤡᤃᤣ ᤛᤠᤔᤖᤡ ᤋᤠᤰᤌᤧᤒᤠᤜᤠ᤹ᤖᤧ ᤁᤵᤔᤥ ᤃᤣᤖᤡᤈᤡᤔ ᤁᤥ᤺ᤰᤔᤠᤀᤥᤀᤣ ᤛᤧᤘᤠ ᤔᤧᤈᤥᤃᤢ. ᤁᤖ ᤂᤡᤏᤡ᤹ ᤕᤜᤢᤍᤡᤜᤠ᤹ᤖᤧ ᤛᤧᤘᤠ ᤆᤥ᤺ᤰᤔᤠ ᤋᤧᤴᤏᤡᤱᤃ ᤕᤖᤢᤛᤗᤧᤶᤗᤰ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶᤗᤥ॥”
21ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗ ᤛᤢᤕᤧᤶᤔᤡᤴ ᤋᤠᤖ ᤐᤳᤗᤥ ᤗ᤹ᤖᤡᤰ ᤀᤡᤱᤃᤠ᤹ ᤔᤧᤳᤏᤧᤒᤠ ᤐᤠ᤺ᤴᤏᤡᤴ ᤏᤛᤠᤴ ᤆᤥᤃᤧ᤹ᤀᤥ॥ ᤂᤧᤴ ᤕᤧᤶᤔᤥ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥ᤺ᤰᤛᤧ ᤂᤡᤏᤡ᤹ ᤁᤴ ᤁᤥ᤺ᤰᤔᤠᤀᤥ ᤀᤡᤃᤪ ᤕᤖᤢᤛᤗᤧᤶᤔᤥ. ᤀᤠᤳᤋᤥᤀᤠᤱ ᤁᤧᤶᤒᤣᤃᤡᤴᤗᤥ॥ 22ᤂᤡᤏᤡ᤹ ᤛᤠᤔᤖᤡᤜᤠ᤹ᤖᤧ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ ᤜᤠᤒᤠ ᤂᤧᤴ ᤛᤧᤘᤠ ᤁᤧᤈᤥᤃᤢᤶ. ᤁᤖ ᤀᤠᤏᤡᤃᤣ ᤕᤜᤢᤍᤡᤜᤠ᤹ᤖᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤴ ᤛᤧᤘᤠ ᤆᤥᤃᤢᤶᤒᤧ᤹. ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ᤗᤠᤶᤔᤣ ᤛᤧᤴᤗᤵᤐᤡᤴ ᤋᤠᤖᤥ॥ 23ᤁᤖ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠ ᤏᤢ ᤛᤣᤛᤣᤔᤠᤱᤗᤠᤶ ᤛᤧᤘᤠ ᤆᤥ᤺ᤰᤔᤠ ᤕᤧᤶᤔᤡᤴ ᤋᤠᤖ ᤐᤳ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤡᤴ ᤀᤠᤸᤗᤥᤛᤠ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤋᤱᤒᤠ ᤁᤢᤈᤧᤰ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤥ᤺ᤳᤋᤢᤛᤡ᤹ᤖᤥ॥ 24ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤕᤠᤶᤛᤠᤶᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤛᤧᤰᤂᤠ᤺ᤸᤗᤧ ᤛᤣᤛᤣᤔᤠᤱᤗᤠᤶ ᤛᤧᤘᤠ ᤆᤥ᤺ᤰᤔᤠ ᤐᤥᤱᤗᤥ॥”
25ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤧᤳᤋᤢ. “ᤔᤛᤡᤜ᤺ᤴ#᥊:᥈᥋ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠᤴ ᤑᤠ᤹ᤀᤡᤴ ᤜᤡᤒᤪᤢ ᤐᤠ᤺ᤴᤏᤥ “ᤔᤛᤡᤜ” ᤐᤥᤱ ᤜᤧᤰᤁᤩᤠᤱ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤂᤪᤡᤛ᤻ᤋ” ᤐᤥᤱ॥ ᤋᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤛᤢᤱᤗᤥ. (ᤂᤢᤏᤧ᤹ᤀᤣ ᤂᤪᤡᤛ᤻ᤋ ᤔᤧᤔᤧᤳᤋᤢ᤹ᤖᤥ) ᤂᤢᤏᤧ᤹ ᤋᤠ᤺ᤸᤗᤧ ᤁᤴ ᤁᤠᤰ ᤐᤠ᤺ᤴᤜᤠ᤹ ᤕᤠᤵᤔᤡ ᤐᤥᤎᤰ ᤆᤥᤃᤢ ᤐᤡᤖᤡᤃᤧᤖᤥ॥”
26ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤏᤢ ᤋᤠ᤹ᤁᤧᤈᤧᤱᤒᤠᤴᤏᤣ ᤂᤢᤏᤧ᤹ᤖᤥ॥”
27ᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤃᤧᤖᤧ ᤔᤧᤍᤩᤧ॥ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤋᤠ᤹ᤈᤧᤱᤏᤢ ᤕᤢᤅᤧᤒᤠ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤌᤣ᤺ᤴ ᤆᤠᤜᤠᤒᤠ ᤁᤧᤈᤥᤃᤧᤒᤣ᥅ ᤀᤡᤃᤪ ᤌᤣᤀᤠᤱ ᤂᤧᤴᤏᤢ ᤋᤠ᤹ᤁᤧᤈᤧᤱᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤴᤍᤥᤛᤢᤴᤗᤥ॥ 28ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ᤺ᤴ ᤂᤧᤵᤔᤥᤀᤣ ᤕᤢᤰᤂᤢᤎᤀᤠᤱ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤐᤣ ᤜᤧᤰᤁᤩᤠᤱ ᤁᤠᤰ ᤐᤠᤱᤈᤢᤶᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. 29“ᤀᤥᤔᤧᤳᤋᤧᤶᤔᤧ᤹. ᤔᤏᤠᤎᤡᤰᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤠᤰ ᤀᤠᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤠᤱᤗᤥ॥ ᤑᤧᤖᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠᤴ ᤂᤢᤏᤧ᤹ᤀᤣᤃ ᤔᤣ᤺ᤶᤒᤡ᥅” 30ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤐᤠᤱᤈᤢᤶᤔᤥᤗᤠᤶ ᤔᤧᤗ᤺ᤴᤍᤧᤀᤠᤱ ᤕᤧᤛᤢᤴ ᤘᤕᤧᤒᤠ ᤋᤧᤴᤏᤥ ᤔᤧᤒᤣᤖᤥ॥
31ᤀᤠᤸᤗ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ “‘ᤛᤡᤰᤛᤠᤶᤒᤣ. ᤆᤠ ᤆᤧ᤹ᤀᤥ’” ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥
32ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤳᤋᤢᤱᤒᤠ ᤀᤠᤈᤠᤔᤠ ᤆᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥”
33ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤛᤣ᤺ᤴᤔᤧᤍᤥᤛᤡᤱ. “ᤔᤧ᤺ᤶᤒᤧ. ᤂᤢᤏᤧ᤹ ᤜᤠ᤺ᤳᤗᤧ ᤁᤢᤈᤠ ᤜᤢ᤹ᤖᤢᤒᤣ᥅”
34ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤢ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢ᤺ᤵᤔᤠᤴᤏᤣ ᤀᤡᤱᤃᤠ᤹ ᤀᤠᤈᤠᤔᤠ ᤆᤠᤖᤥ॥ 35ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤶ. ‘ᤀᤠᤸᤗ ᤗᤠ ᤗᤡᤛᤡ ᤀᤣᤃᤠᤱ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤠᤖᤥ॥’ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ‘ᤂᤡᤏᤡ᤹ ᤔᤡᤰ ᤜᤴᤍᤧᤶᤔᤧ᤹ᤀᤠᤱ ᤀᤥᤔ᤺ᤕᤧᤶᤔᤧ᤹. ᤁᤠᤰ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤠ ᤋᤢᤶᤛᤧᤀᤠᤱ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥’ 36ᤜᤧᤰᤁᤩᤠᤱ ᤁᤧᤛᤢᤶᤒᤠᤸᤗᤧ ᤂᤢᤏᤧ᤹ ᤁᤢᤏᤠᤶᤕᤠᤰ ᤂᤥᤛᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧ ᤗᤠᤃᤡ ᤐᤥᤃᤢᤃᤧᤴ ᤁᤢᤈᤠᤴ ᤔᤧᤛᤢᤵᤛᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤠ ᤏᤢ ᤆᤠ ᤁᤧᤛᤢᤶᤒᤠ ᤏᤧᤵᤔᤠᤱ ᤛ᤺ᤳᤇᤡᤖᤥ॥ 37ᤜᤧᤰᤁᤣᤗ᤹ᤖᤡᤰ ‘ᤌᤡᤰᤁᤡᤸᤗᤧ ᤕᤠ᤹ᤖᤡ᤺ᤶᤒᤠᤴ ᤜᤣ᤹ᤖᤢ ᤘᤣ᤹ᤛᤔᤠᤸᤗᤧ ᤆᤠ ᤛᤢᤵᤛᤢ᤹’ ᤐᤠ᤺ᤵᤔᤏᤠᤒᤠᤴ ᤛᤧᤰᤂᤠᤀᤣᤖᤥ॥ 38ᤀᤡᤱᤃᤠ᤹ᤀᤠᤱ ᤂᤡᤏᤡ᤹ ᤆᤠ ᤁᤧᤴᤜᤣ᤹ᤖᤢᤶᤔᤡᤴᤒᤥ ᤐᤥᤃᤢᤃᤧᤴ ᤁᤢᤈᤠ ᤛᤢᤶᤛᤧ ᤐᤠᤱᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤘᤣ᤹ᤜᤠ᤹ᤖᤧ ᤕᤠᤶᤒᤢᤎᤡᤰ ᤔᤧᤈᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤕᤠᤶᤒᤢᤎᤡᤰᤗᤧᤴ ᤀᤡᤴᤎᤠ᤺ᤱᤅᤡᤴ ᤂᤡᤏᤡ᤹ ᤁᤧᤄᤥᤛᤢᤶᤔᤠᤱ ᤘᤠ᤹ᤖᤥ॥”
39ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤠᤰ ᤀᤠᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤆᤧᤰᤋᤠᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤐᤠᤱᤈᤢᤶᤗᤠᤶ ᤁᤧᤍᤠᤒᤠ ᤕᤖᤡᤰ ᤛᤠᤔᤖᤡᤜᤠ᤹ᤖᤧ ᤕᤧᤛᤢᤴ ᤏᤛᤠᤴ ᤔᤧᤈᤥᤃᤢᤖᤥ॥ 40ᤛᤠᤔᤖᤡᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤍᤩᤧᤀᤠᤱ ᤀᤠᤏᤡᤃᤧᤏᤢ ᤌᤡᤰᤕᤧᤴ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤵᤔᤥ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤖᤥ॥ 41ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤏᤛᤠᤏᤡᤒᤠ ᤔᤧᤒᤥ᤺ᤰᤂᤧᤖᤥ॥
42ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤏᤠᤒᤠᤸᤗᤧᤖᤰ ᤕᤧᤛᤢᤴ ᤏᤛᤠᤴ ᤆᤥ᤺ᤰᤔᤏᤠᤒᤠ ᤔᤣ᤺ᤴ. ᤁᤖ ᤀᤠᤸᤗᤥᤃ ᤀᤠᤏᤡᤃᤣ ᤀᤠᤒᤠᤅᤣ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ ᤂᤧᤵᤛᤢᤶᤒᤠ ᤜᤧᤰᤁᤩᤠᤱ ᤁᤴ ᤔᤏᤠ᤺ᤱᤃ ᤛᤧᤰᤂᤠᤛᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤛᤧᤴᤗᤵᤍᤠᤱᤒᤠ ᤑᤠ᤹ᤀᤠᤱ ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧ ᤏᤛᤠᤴ ᤆᤥ᤺ᤰᤔᤏᤠᤒᤠᤖᤥ॥”
ᤛᤢᤜᤠᤱᤕᤢᤰᤐᤠᤸᤗᤧ ᤁᤢᤛ᤻ᤛᤠᤴ ᤕᤧᤛᤢᤖᤧ ᤘᤣ᤺ᤴᤍᤢ᤹
43ᤜᤧᤰᤁᤩᤠᤱ ᤕᤧᤛᤢᤴ ᤏᤡᤕᤧᤴ ᤀᤣᤃᤠᤱ ᤀᤠᤒᤠᤅᤣ ᤁᤢᤗᤠᤈᤣ᤹ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤌᤠᤛᤡᤱᤗᤥ॥ 44(ᤀᤠᤸᤗ ᤕᤧᤛᤢᤖᤧ ᤀᤠᤒᤠᤅᤣ ᤀᤰᤂᤣᤗ᤹ᤖᤡᤰ ᤋᤃᤡ ᤐᤠ᤺ᤳᤋᤢᤀᤠᤱ ᤘᤕᤧ “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤂᤢᤏᤧ᤹ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤔᤡᤱᤛᤥ ᤀᤡᤱᤎᤠᤱ ᤔᤧᤶᤒᤡᤖᤢᤴᤗᤥ॥”) 45ᤕᤧᤛᤢᤴ ᤃᤠᤗᤡᤗ ᤁᤧᤖᤧᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢᤖᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤘᤕᤧᤖᤥ॥
46ᤂᤢᤏᤧ᤹ ᤕᤠᤶᤔᤥ ᤃᤠᤗᤡᤗᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤐᤣ॥ ᤂᤧᤵᤔᤥ ᤂᤢᤏᤧ᤹ ᤆᤫᤠ᤺ᤳᤋᤡᤴ ᤆᤧᤸᤗᤧᤰᤛᤣ᤹ ᤌᤡ᤺ ᤆᤥᤃᤢᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤗᤳᤇᤠ ᤛᤢᤜᤠᤱᤕᤢᤰᤐᤠᤸᤗᤧ ᤁᤢᤛ᤻ᤛᤠᤴ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤛᤠ᤹ᤖᤡᤰ ᤋᤢᤃᤧᤀᤠᤱ ᤏᤧᤛ᤻ᤛᤧᤖᤥ॥ 47ᤂᤧᤸᤗᤧ ᤕᤧᤛᤢᤴ ᤕᤜᤢᤍᤡᤕᤠᤗᤠᤶ ᤃᤠᤗᤡᤗᤀᤥ ᤁᤧᤖᤧ ᤋᤩᤧ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤵᤔᤥ ᤁᤢᤍᤢᤶᤛᤧ ᤐᤣ॥ ᤂᤧᤸᤗᤧ ᤕᤧᤛᤢᤴ ᤋᤢᤔᤢ ᤜᤧᤰᤁᤩᤠᤱ ᤁᤐᤷᤏᤜᤢᤶᤔᤥ ᤕᤧ᤹ᤀᤠᤱ ᤛᤡᤔᤠᤗᤡᤱᤎᤥ ᤁᤧᤃᤧᤵᤐᤠᤀᤠᤱ ᤁᤧᤏᤧᤒᤠ ᤀᤠᤛ᤻ᤛᤠᤴ ᤘᤣ᤺ᤴᤍᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤖᤥ॥
48ᤕᤧᤛᤢᤖᤧ ᤂᤧᤴ ᤛᤢᤜᤠᤱᤕᤢᤰᤐᤧᤴ ᤔᤧᤳᤋᤢ. “ᤂᤡᤏᤡ᤹ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤴᤏᤡᤀᤣ ᤌᤠᤖᤡᤰ ᤀᤠᤵᤑᤠᤸᤗᤧᤀᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ॥”
49ᤂᤧᤴ ᤛᤢᤜᤠᤱᤕᤢᤰᤐᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠᤴ ᤔᤧᤴᤇᤡᤀᤣᤛᤠ ᤕᤧ᤹ᤀᤥ॥”
50ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤥ. ᤁᤧᤛ᤻ᤛᤠᤴ ᤜᤡᤱᤗᤥ॥”
ᤜᤧᤰᤁᤩᤠᤱ ᤂᤧᤸᤗᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤏᤛᤠᤴ ᤆᤥᤃᤢᤀᤠᤱ ᤌᤠᤛᤡᤱᤗᤥ॥ 51ᤗᤠᤶᤔᤥ ᤂᤧᤴ ᤐᤣᤖ ᤐᤳᤇᤧᤸᤗᤧ ᤁᤢᤓᤠ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤍᤢᤔᤢᤀᤠᤱ “‘ᤁᤧᤛ᤻ᤛᤠᤴ ᤘᤣ᤺ᤳᤋᤧᤖᤥ’” ᤔᤧᤔᤧᤳᤋᤢ॥ 52ᤜᤧᤰᤁᤩᤠᤱ ᤀᤠᤳᤋᤡᤴ ᤕᤧᤶᤔᤥ ᤘᤣ᤺ᤳᤋᤧᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤏᤥᤃᤵ ᤔᤧᤒᤡᤖᤢ. “ᤔᤡ᤺ᤵᤔᤠ ᤁᤢᤔᤢᤰ ᤌᤡᤰ ᤔᤢᤰᤋᤧᤀᤠᤱ ᤘᤕᤧᤸᤗᤧ ᤋᤢᤰᤔᤠᤸᤗᤧ ᤗᤧᤖᤢᤖᤥ॥” 53ᤜᤧᤰᤁᤣ᤺ᤸᤗᤧ ᤁᤧᤍᤢᤰᤐᤠᤸᤗᤧ ᤁᤢᤶᤒᤠᤖᤧ ᤔᤡ᤺ᤵᤔᤠ ᤁᤧᤛ᤻ᤛᤠᤴ ᤜᤡᤱᤗᤥ ᤗ᤹ᤖᤡᤰ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤕᤧᤶᤔᤥᤀᤣ ᤁᤧᤍᤢᤰᤐᤧᤴ ᤘᤣ᤺ᤳᤋᤧᤒᤠ ᤏᤡᤱᤘᤠ᤹ ᤂᤥᤛᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰᤗᤧ ᤕᤧᤛᤢᤴ ᤏᤛᤠᤴ ᤔᤧᤈᤥᤃᤢᤖᤥ॥
54ᤁᤱᤃ ᤕᤧᤛᤢᤴ ᤕᤜᤢᤍᤡᤕᤠᤗᤠᤶ ᤃᤠᤗᤡᤗᤀᤥ ᤋᤩᤧᤀᤠᤱ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤘᤕᤧᤖᤥ॥
Currently Selected:
ᤕᤢᤜᤢᤴᤏᤠ 4: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
