ᤜᤡᤒᤪᤢ 9
9
ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤀᤥᤒᤠ ᤛᤧᤘᤠ ᤆᤥ᤺ᤰᤔᤠᤴ
1ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤋᤃᤡᤛᤔᤠ ᤔᤠᤱᤜᤢᤵᤐᤥ ᤛᤧᤘᤠ ᤆᤥ᤺ᤰᤔᤠ ᤌᤡᤶᤜᤠ᤹ ᤘᤕᤧ. ᤜᤧᤰᤁᤩᤠᤱ ᤀᤡᤰᤛᤠᤀᤥ ᤛᤣᤛᤣᤒᤠ ᤋᤧᤴᤏᤠᤱ ᤏᤧᤛ᤻ᤛᤧᤖᤥ॥ 2ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤏᤧᤳᤇᤡ ᤕᤠᤰᤑᤠ ᤏᤧᤛ᤻ᤛᤧ॥ ᤂᤧᤵᤔᤥ ᤌᤡᤰᤛᤡᤃᤣ᤺ᤰᤛᤔᤠ ᤕᤠᤰᤑᤠᤀᤥ ᤛᤣᤔᤡᤕᤢᤱᤍᤧᤴ. ᤆᤵᤋᤧᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤜᤠ᤹ ᤏᤧᤛ᤻ᤛᤧ॥ ᤁᤴ ᤋᤧᤴᤏᤡᤴ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥ 3ᤜᤧᤰᤁᤩᤠᤱ ᤂᤧᤵᤔᤥ ᤑᤥ᤺ᤴᤍᤠᤎᤡᤰ ᤐᤳᤇᤧ॥ ᤂᤧᤴ ᤑᤥ᤺ᤴᤍᤠ᤺ᤸᤗᤧ ᤌᤣ᤺ᤰᤋᤢᤒᤠ ᤏᤡᤛᤡᤃᤣᤰᤐᤠ ᤕᤠᤰᤑᤠ᤺ᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥ 4ᤂᤧᤵᤔᤥ ᤛᤠᤶᤔᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤎᤡᤰ ᤏᤢ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧᤴ ᤛᤴᤍᤥᤰᤁᤡᤴ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤴᤍᤥᤰ ᤛᤡᤃᤠᤱ ᤔᤴᤏᤠ#᥏:᥊ ᤔᤴᤏᤠ—ᤀᤡᤛᤪᤠᤀᤡᤗᤡᤜᤠ᤹ ᤀᤣ᤺ᤰᤛᤠᤍᤧᤴᤏᤥ ᤗᤠᤶᤍᤡᤰ ᤔᤧᤈᤥᤃᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤰᤐᤥᤗᤠᤶ ᤌᤡᤰᤕᤠ᤺ᤴᤎᤰ ᤔᤴᤏᤠ ᤔᤧᤵᤔᤏᤠᤒᤠ ᤁᤢᤈᤠ ᤌᤩᤧᤖ ᤕᤠ᤺ᤴᤍᤢ॥ ᤂᤧᤱᤜᤠ᤹ᤖᤧ ᤂᤧᤴ ᤔᤡᤛᤠᤰ ᤔᤧᤍᤠᤱᤄᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤠᤱ ᤛᤠ᤺ᤱᤃᤠᤜᤡᤶᤔᤥ ᤛᤠᤶᤔᤩᤠᤱ ᤂᤵᤐᤩᤠᤀᤥ ᤔᤧᤕᤠᤰᤋᤢᤀᤠᤱ ᤛᤣᤛᤣ ᤛᤴᤍᤢᤰ ᤛᤡᤃᤠᤱ ᤔᤧᤕᤢᤰᤂᤢ॥ ᤁᤧᤕᤠᤰᤐᤠ ᤛᤠᤶᤔᤩᤠᤱ ᤂᤵᤐᤩᤠ᤺ᤴ. ᤁᤢᤑᤧᤰᤔᤣ᤺ᤳ ᤁᤧᤒᤵᤐᤠ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤡᤴ ᤏᤢ ᤌᤡᤒᤥᤱ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤒᤵᤐᤠ ᤔᤠᤱᤜᤢᤵᤐᤡᤸᤗᤧᤴ ᤗᤢᤱᤛᤠᤵᤜᤠ᤹ ᤕᤠᤃᤧᤖᤥ॥ 5ᤂᤧᤴ ᤛᤴᤍᤥᤰ ᤛᤶᤍᤠᤱ ᤁᤖᤢᤒ ᤔᤧᤵᤔᤏᤠᤒᤠ ᤔᤡᤔᤡᤍᤡᤱᤃᤧᤴ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤒᤪᤡ᤺ᤵᤐᤠᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤋᤧᤴᤏᤡᤴ ᤀᤡ᤺ᤵᤋᤧᤳᤇᤢᤀᤠᤱ ᤕᤧᤒᤧᤳᤇᤡᤖᤥ॥ ᤁᤖ ᤀᤠᤸᤗᤥ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤀᤠᤏᤡᤃᤣ ᤏᤢ᤺ᤖᤡᤰᤁᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤗᤥ॥
6ᤀᤠᤸᤗ ᤁᤠᤰ ᤁᤴ ᤐᤠ᤺ᤴᤜᤠ᤹ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤌᤡᤰᤕᤠ᤺ᤴᤎᤰ ᤂᤧᤴ ᤗᤠᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤔᤧᤗᤠᤛᤧ॥ 7ᤁᤖ ᤛᤡᤃᤠᤱ ᤗᤧᤵᤔᤠᤱᤒᤠ ᤁᤠᤰᤏᤢ᤺ᤸᤗᤧ ᤛᤣᤛᤣ ᤋᤧᤴᤏᤥᤃ ᤔᤠᤏᤡᤱᤘᤠ᤹ᤑᤢᤛᤠᤶᤒᤧᤴᤗᤰ ᤋᤱᤒᤣᤖᤧ ᤌᤡᤰᤗᤧᤱ ᤔᤠᤰᤂᤡ᤹ᤏᤢ ᤗᤠᤛᤧᤖᤥ॥ ᤂᤧᤴ ᤔᤠᤰᤂᤡ᤹ᤀᤡᤱᤃ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤕᤥᤖᤧ ᤗᤠᤃᤡ ᤏᤢ ᤔᤏᤠᤜᤠ᤹ᤖᤧ ᤔᤧᤴᤏᤡ ᤔᤧᤸᤗᤧᤀᤣ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤥ᤺ᤴᤍᤢᤖᤥ॥ 8ᤛᤣᤛᤣᤔᤠᤱᤅᤡᤸᤗᤧ ᤁᤴ ᤁᤠᤰ ᤐᤠ᤺ᤴᤗᤠᤶᤒᤠ ᤗᤠᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤡᤴ ᤏᤧᤖ ᤌᤠᤖᤡᤰ ᤛᤡᤃᤠᤱᤛᤔᤠ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤗᤠ᤺ᤵᤔᤠ ᤗᤠᤶᤔᤡᤴ ᤔᤧᤜᤖᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥
9ᤁᤱᤃ ᤀᤠᤀᤡᤴ ᤋᤠ᤺ᤴᤍᤡᤰᤐᤠ ᤕᤧᤶᤔᤡᤴ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤔᤡᤰᤛᤣ᤺ᤴᤗᤥ॥ ᤂᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥᤴᤍᤢᤒᤠ ᤆᤥᤓᤠ᤹ᤀᤡᤴ ᤏᤢ ᤛᤡᤍᤢᤱᤈᤓᤠᤜᤠ᤹ᤖᤧ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤔᤧᤴᤈᤥᤃᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤀᤠᤎᤠᤰᤗᤥ॥ 10ᤂᤧᤴ ᤐᤠ᤺ᤴᤜᤠ᤹ᤃ ᤆᤠᤔᤠ ᤌᤢᤱᤔᤠ ᤏᤢ ᤐᤖᤡᤰᤐᤖᤡᤰᤐᤠ ᤛᤢᤳᤌᤥ ᤆᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤘᤠᤜᤵᤛᤡᤱᤔᤠ ᤌᤡᤶᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤱᤜᤠ᤹ᤃ ᤏᤠᤛᤡᤱᤃᤧᤴ ᤌᤰᤁᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥᤱᤒᤠ ᤌᤡᤶᤜᤠ᤹ ᤘᤕᤧᤖᤥ॥
ᤂᤪᤡᤛ᤻ᤋᤧᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤛᤡᤍᤢᤱᤈᤓᤠ
11ᤂᤪᤡᤛ᤻ᤋᤧᤴ ᤃ ᤁᤧᤖᤧᤰ ᤋᤩᤧ ᤆᤢᤖᤧᤒᤠ ᤏᤢᤒᤠ ᤐᤠ᤺ᤴᤜᤠ᤹ᤖᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ᤃ ᤐᤕᤶ ᤕᤶᤒᤠ ᤏᤢ ᤁᤢᤛᤠᤱ ᤁᤧᤗᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧᤖᤥ॥ ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤒᤠ ᤔᤣ᤺ᤴᤗᤥ. ᤐᤠ᤺ᤵᤔᤠᤀᤣ ᤐᤥᤱᤅᤡᤸᤗᤧ ᤂᤧᤱᤃ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧᤴᤏᤠᤱ ᤔᤣ᤺ᤴᤗᤥ॥ 12ᤂᤢᤏᤧ᤹ᤃ ᤔᤧᤴᤍᤠᤰ ᤏᤢ ᤐᤡᤳ ᤔᤠᤰᤂᤡ᤹ᤀᤡᤴ ᤔᤣ᤺ᤴ. ᤁᤖ ᤂᤢᤏᤧ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤛᤧ ᤂᤧᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤒᤠᤅᤣ ᤁᤢᤔᤠᤰᤂᤡ᤹ᤀᤡᤴ ᤋᤥ᤺ᤴᤍᤢᤖ ᤗᤠᤛᤧᤖᤥ॥ 13ᤔᤧᤴᤍᤠᤰ ᤏᤢ ᤁᤢᤶᤒᤠᤒᤠ ᤐᤡᤳ ᤔᤠᤰᤂᤡ᤹ᤀᤡᤸᤗᤧ ᤛᤠᤱᤔᤠᤀᤠᤱ ᤜᤧᤰᤁᤩᤠᤱ ᤁᤖ᤺ᤱ ᤐᤡᤵᤔᤠ᤺ᤴ ᤀᤥ᤹ᤔᤠᤀᤠᤱ ᤁᤧᤗ᤺ᤶᤒᤠ ᤂᤠᤵᤐᤢ᤺ᤸᤗᤧ ᤀᤠᤛᤢᤳᤌᤥ ᤔᤏᤠᤜᤠ᤹ ᤆᤢ᤺ᤵᤔᤠᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤁᤡᤴ ᤛᤢᤳᤌᤥ ᤐᤥᤱᤏᤧ ᤑᤠ᤹ᤃᤪ 14ᤂᤧᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤰᤂᤩᤠᤰ ᤕᤖᤡᤰ ᤛᤢᤳᤌᤥ ᤀᤠᤈᤥᤰ᥄ ᤂᤢᤏᤧ᤹ ᤔᤧᤴᤏᤢᤵᤔᤏᤠᤒᤠ ᤛᤣᤛᤣᤔᤠᤱᤗᤠᤶ ᤁᤢᤛᤠᤱ ᤁᤧᤗᤒᤠ ᤛᤡᤍᤢᤱᤈᤓᤠ ᤐᤥᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤋᤥ᤺ᤴᤇᤡᤱᤗᤥ॥ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤡᤔᤧᤴᤏᤥ ᤁᤧᤍᤣ᤹ᤒᤠ ᤕᤠ᤺ᤶᤒᤰᤗᤠᤶ ᤀᤠᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤆᤥᤃᤢ᤹ᤖᤥ॥ 15ᤒᤠ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤗᤰᤁᤡᤴ ᤀᤢ᤺ᤳᤋᤢᤛᤡᤒᤠᤜᤠ᤹ᤖᤧ ᤔᤧᤄᤥᤛᤢᤖ ᤑᤠ᤹ᤀᤠᤱ ᤂᤪᤡᤛ᤻ᤋᤧᤴ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤗᤠᤕᤥᤗᤠᤶ ᤂᤧᤱᤜᤠ᤹ ᤌᤧ᤹ᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤛᤩᤧᤒᤠᤖᤥ॥ 16ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤡᤀᤠᤸᤗᤧ ᤀᤠᤕᤠᤱᤛᤠᤁᤢᤴᤎᤣᤴ ᤂᤢᤏᤧ᤹ ᤂᤥᤛᤢ᤹ ᤑᤠ᤹ᤀᤠᤱ ᤆᤥᤃᤢᤒᤠ ᤛᤠᤵᤗᤠ ᤔᤢᤴᤎᤣ᤺ᤱᤃ. ᤂᤧᤴ ᤁᤧᤛᤠᤵᤐᤧᤴ ᤛᤡᤀᤠᤱᤗᤰ ᤐᤷᤔᤠᤱᤃᤡ ᤐᤥᤱᤗᤥ॥ 17ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤡᤱᤘᤧᤳ ᤘᤠ᤹ᤖ ᤌᤠᤖᤡᤰ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠ ᤔᤧᤒᤥᤱᤏᤧᤸᤗᤥ. ᤁᤖ ᤔᤏᤠᤴ ᤛᤡᤀᤠᤱᤗᤰ ᤛᤧᤰᤂᤠ ᤐᤥᤱᤗᤥ॥ 18ᤒᤠ ᤂᤧᤸᤗᤧᤆᤥᤃᤢᤸᤗᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴᤏᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣ ᤌᤠᤖᤡᤰ ᤛᤧᤰᤂᤠ ᤔᤧᤒᤥᤱᤏᤧᤸᤗᤥ॥ 19ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤐᤡᤖᤢᤛᤡᤀᤠᤱ ᤂᤧᤸᤗᤧ ᤜᤡᤛᤐ ᤛᤡᤱᤒᤥᤖᤠ᤺ᤰ ᤏᤢ ᤜᤧ᤺ᤰᤁᤧᤗ᤹ᤒᤠ ᤛᤧᤔᤢᤖᤡᤰᤁᤡᤴ ᤆᤫᤠ᤺ᤳᤋᤥ ᤑᤢᤵᤔᤏᤠᤒᤠ ᤐᤡᤳᤛᤠᤳ ᤏᤢ ᤔᤧᤴᤍᤠᤰ ᤔᤠᤰᤂᤡ᤹ᤀᤥ ᤏᤡ᤺ᤵᤛᤢᤀᤠᤱ ᤛᤠᤶᤕᤥᤌᤡᤶ ᤛᤠᤵᤗᤠ ᤏᤢ ᤁᤠᤰ ᤔᤏᤠᤛᤶᤍᤠᤱ ᤛᤠᤰᤂᤢᤖᤥ॥ 20ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤔᤠᤱᤜᤢᤵᤐᤡᤴ ᤛᤧᤰᤂᤠ ᤁᤧᤈᤥ᤺ᤰᤐᤠ ᤔᤠᤰᤂᤡ᤹ᤀᤡᤴ ᤜᤠᤒᤠ ᤁᤴᤗᤥ॥”#ᤗᤠ ᥈᥊:᥎ 21ᤜᤧᤰᤁᤣᤗ᤹ᤖᤡᤰᤁᤣ ᤔᤥᤛᤠ᤺ᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤏᤢ ᤛᤧᤘᤠ ᤆᤥ᤺ᤰᤔᤠᤸᤗᤧ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤠᤰ ᤛᤠᤔᤠᤑᤢᤔᤠ ᤛᤶᤍᤠᤱ ᤔᤠᤰᤂᤡ᤹ᤀᤡᤴ ᤛᤠᤰᤂᤢᤖᤥ॥ 22ᤛᤧᤰᤂᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤕᤖᤡᤰ ᤐᤠ᤺ᤴᤜᤠ᤹ᤃ ᤔᤠᤰᤂᤡ᤹ᤖᤧ ᤛᤢᤳᤌᤥ ᤐᤥᤱᤗᤥ. ᤜᤧᤰᤁᤩᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣᤃ ᤗᤠᤕᤥᤴ ᤗᤧᤵᤔᤡ ᤔᤧᤒᤥᤱᤏᤧᤸᤗᤥ॥
23ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤜᤧᤰᤋᤱᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤡᤜᤠ᤹ ᤛᤣᤛᤣᤛᤢᤳᤌᤥ ᤆᤥ᤺ᤰᤔᤠ ᤐᤥ᤺ᤰᤂᤧ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤀᤣ ᤛᤢᤳᤌᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤧᤴᤏᤢ᤺ᤸᤗᤧ ᤏᤢᤒᤠ ᤛᤡᤍᤢᤱᤈᤓᤠᤴ ᤆᤠᤜᤠᤒᤠ ᤆᤥᤃᤧ॥ 24ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤒᤡ ᤁᤢᤀᤡᤛᤡ᤺ᤰᤐᤠ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠ ᤛᤣᤛᤣᤒᤠ ᤋᤧᤴᤏᤥ ᤔᤧᤗᤠᤛᤧᤴ. ᤁᤖ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡᤀᤣ ᤀᤠᤏᤡ᤹ ᤗᤠᤃᤡ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤛᤧᤖᤥ॥ 25ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤋᤱᤒᤣ ᤌᤵᤔᤣ ᤌᤰᤛᤠ ᤔᤠᤰᤂᤡ᤹ᤏᤢ ᤗᤠᤛᤧᤒᤠ ᤁᤢᤀᤡᤛᤡᤰ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤛᤧᤸᤗᤧ ᤂᤢᤏᤧ᤹ ᤀᤧᤳᤗᤧᤱ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥᤱᤛᤧ ᤔᤧᤗᤠᤛᤧᤴᤗᤥ॥ 26ᤔᤣ᤺ᤴᤏᤡᤸᤗᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱᤎᤥ ᤂᤢᤏᤧ᤹ ᤕᤖᤡᤰᤗᤧᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠ ᤁᤧᤒᤥᤱᤒᤠ ᤘᤕᤧ. ᤁᤖ ᤂᤢᤏᤧ᤹ᤃ ᤁᤴ ᤁᤢᤏᤢᤵᤔᤠ ᤕᤧᤶᤔᤥ ᤕᤖᤡᤰᤗᤧ ᤂᤢᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤔᤠᤛᤡ ᤑᤠ᤹ᤀᤠᤱ ᤌᤡᤰᤗᤧᤱᤔᤠᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥ 27ᤔᤧᤴᤇᤠᤶ ᤕᤠᤵᤔᤡ ᤁᤧᤖᤧᤰ ᤌᤡᤰᤗᤧᤱᤃ ᤛᤡᤔᤠ ᤐᤥᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤥ ᤕᤧᤵᤔᤠ ᤐᤥᤱᤒᤠ ᤁᤢᤀᤡᤛᤡᤰ 28ᤂᤪᤡᤛ᤻ᤋᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ ᤁᤢᤛᤧ ᤌᤡᤰᤗᤧᤱᤔᤥ ᤛᤡᤍᤢᤱᤈᤓᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤠᤶᤔᤥ ᤕᤢ᤺ᤸᤗᤧ ᤀᤠᤏᤡ᤹ ᤗᤠᤕᤥᤜᤠ᤹ ᤁᤢᤛᤧᤃ ᤔᤣ᤺ᤴ. ᤁᤖ ᤂᤢᤏᤧ᤹ ᤁᤢᤕᤢᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠᤜᤠ᤹ ᤛᤧᤴᤗᤵ ᤐᤡᤛᤧᤏᤧ ᤕᤢ᤺ᤖᤥ॥
Currently Selected:
ᤜᤡᤒᤪᤢ 9: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
