ᤋᤥᤗᤡᤱᤛᤥᤔᤢ 7

ᤘᤍᤵᤔᤠ ᤌᤠᤅᤧᤒᤠ

1ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤏᤢᤜᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱ ᤁᤧᤖᤧᤰ ᤘᤠᤗᤠᤎᤠᤀᤥ ᤗᤠᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤌᤠ᤺ᤰᤁᤥ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥ ᤂᤧᤏᤧ᤹ ᤛᤠᤶᤕᤥᤒᤠ ᤏᤡᤏᤧᤀᤠᤱ ᤘᤠ᤹॥ 2ᤁᤧᤖᤧᤰ ᤐᤖᤡᤰᤗᤧᤴ ᤛᤢᤳᤌᤥᤒᤠ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤁᤢᤃᤠᤵ ᤏᤢᤛᤡ ᤌᤰᤛᤠᤜᤠ᤹. ᤜᤧᤰᤁᤩᤠᤱ ᤛᤢᤳᤌᤥᤒᤠ ᤔᤣ᤺ᤶᤒᤠ ᤌᤰᤛᤠᤜᤠ᤹ᤗᤠᤶᤒᤠ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤁᤢᤃᤠᤵ ᤌᤡᤰ. 3ᤜᤧᤰᤁᤩᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤖᤡᤰ ᤐᤖᤡᤰᤐᤠ ᤐᤢᤛᤠᤜᤠ᤹ᤀᤥᤗᤠᤶᤔᤠᤱ ᤁᤢᤃᤠᤵ ᤏᤢᤛᤡ ᤋᤠᤖᤧᤛᤧ᤹॥ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤌᤰᤛᤠᤜᤠ᤹ ᤏᤢ ᤐᤢᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤋᤠᤖᤧᤛᤧ᤹॥ 4ᤀᤠᤸᤗᤀᤠᤱᤎᤥ ᤏᤢᤛᤡ ᤕᤧᤴ ᤀᤣᤃᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤱᤃᤠ᤹ ᤗᤡᤒᤥᤱ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤐᤠᤱᤃᤧᤴᤍᤡᤱ ᤘᤜᤡᤵᤔᤠᤴ ᤌᤠᤖ ᤕᤠ᤺ᤴᤍᤢᤱ᤹॥ ᤀᤠᤱᤃᤠ᤹ ᤆᤥᤃᤢᤱᤛᤡᤱᤒᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤐᤠᤎᤢᤱᤛᤠᤜᤠ᤹ ᤔᤧᤰᤂᤢᤱᤛᤡᤱ᤹॥”

5ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤈᤠ᤺ᤱ ᤆᤥᤃᤢᤒᤠ ᤜᤧᤰᤁᤣᤀᤣ ᤏᤢᤜ᤺ᤸᤗᤧ ᤁᤧᤖᤧᤰ ᤆᤥᤃᤢ॥

6ᤏᤢᤜᤴ ᤁᤡᤵ ᤋᤢᤰᤛᤡ ᤋᤱᤒᤣ ᤁᤧᤖᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤍᤵᤔᤠ ᤌᤠᤅᤧᤀᤠᤱ ᤘᤕᤧ॥ 7ᤜᤧᤰᤁᤩᤠᤱ ᤏᤢᤜᤴ. ᤁᤢᤔᤣ᤺ᤳᤋᤡᤴ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹. ᤜᤧᤰᤁᤩᤠᤱ ᤁᤢᤶᤒᤠᤱᤗᤡᤜᤠ᤹ ᤘᤍᤵᤔᤠ ᤁᤧᤃᤧᤵᤐᤠ ᤆᤫᤠ᤺ᤳᤋᤥᤏᤢ ᤜᤡᤱᤔᤠᤖᤧ ᤗᤠᤃᤡ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ #ᤔᤳᤋᤡ ᥈᥊:᥉᥎-᥉᥏; ᤗᤢᤁᤠ ᥇᥍:᥈᥍ 8ᤛᤢᤳᤌᤥ ᤌᤰᤛᤠᤜᤠ᤹ ᤏᤢ ᤛᤢᤳᤌᤥ ᤔᤣ᤺ᤶᤒᤠ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤧᤀᤢ᤺ᤱᤛᤡᤒᤠ ᤁᤧᤖᤧᤰ ᤌᤰᤛᤠᤜᤠ᤹. 9ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤀᤡᤱᤈᤠ᤺ᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤁᤢᤃᤠᤵ ᤁᤢᤃᤠᤵ. ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤌᤰᤛᤠᤜᤠ᤹ ᤏᤢᤜ᤺ᤴᤏᤢ ᤘᤠᤗᤠᤎᤠᤀᤥ ᤔᤧᤍᤩᤧ॥ 10ᤜᤧᤰᤁᤩᤠᤱ ᤏᤢᤛᤡ ᤕᤧᤴ ᤁᤧᤖᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤍᤵᤔᤠ ᤘᤜᤡ᤺ᤳᤋᤡᤴ ᤌᤩᤧ॥

11ᤏᤢᤜᤴ ᤁᤡᤵ ᤋᤢᤰᤛᤡ ᤋᤱᤒᤣ ᤁᤧᤖᤧᤒᤠ ᤏᤡᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤏᤢᤛᤡ ᤕᤧᤴ ᤁᤧᤖᤧᤸᤗᤧ ᤕᤶᤒᤕᤶᤒᤠ ᤔᤢᤜᤡ᤺ᤰᤛᤥ ᤂᤠᤜᤡ᤺ᤰᤛᤥᤀᤥ ᤘᤠᤒᤢᤴᤜᤠ᤹ ᤑᤰᤋᤧᤗ᤺ᤴᤍᤧ. ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤘᤍᤵᤔᤠᤸᤗᤧᤴ ᤗᤠᤶᤎᤣ᤺ᤵᤐᤠᤜᤠ᤹ ᤜᤖᤧ॥ #᥈ ᤐᤋᤪᤢ ᥉:᥌ 12ᤜᤧᤰᤁᤩᤠᤱ ᤗᤡᤒᤥᤱ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤘᤜᤡᤳ ᤌᤩᤧᤀᤠᤱ ᤐᤳᤇᤧ॥

13ᤜᤠᤒᤠ ᤂᤧᤴ ᤕᤧᤴᤏᤥ ᤏᤢᤜᤴ. ᤁᤢᤔᤣ᤺ᤳᤋᤡᤴ ᤂᤢᤏᤧ᤹ ᤁᤢᤛ᤻ᤛᤠ ᤛᤣᤔ. ᤜᤠᤔ ᤏᤢ ᤕᤧᤐᤧᤍᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤱᤗᤡᤜᤠ᤹ ᤘᤠᤗᤠᤎᤠ ᤛᤡᤃᤠᤱ ᤔᤧᤗᤠᤛᤧ॥ 14ᤂᤧᤱᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤋᤠᤶᤓᤢᤱ ᤌᤰᤛᤠᤜᤠ᤹. ᤁᤧᤖᤧᤰ ᤜᤡᤶᤎᤰᤛᤠᤜᤠ᤹. ᤂᤠᤶᤔᤥ ᤁᤧᤀᤢ᤺ᤱᤛᤡᤱᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤐᤢᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ ᤗᤡᤴ ᤁᤢᤀᤡᤛᤡᤰ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ 15ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤁᤢᤃᤠᤵ ᤁᤢᤃᤠᤵ ᤏᤢᤜᤀᤥ ᤔᤧᤍᤩᤧᤀᤠᤱ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ 16ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤀᤡᤱᤈᤠ᤺ᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤘᤠᤗᤠᤎᤠᤀᤥ ᤁᤧᤗᤠ᤺ᤵᤐᤠ ᤌᤰᤛᤠᤐᤢᤛᤠᤜᤠ᤹ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠᤀᤣ ᤔᤧᤍᤩᤧ॥ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤘᤠᤗᤠᤎᤠ᤺ᤸᤗᤧ ᤗᤠᤶᤎᤣᤳᤋᤡᤴ ᤛᤢᤒᤢ॥

17ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤡᤒᤥᤱ ᤕᤧᤴ ᤌᤠᤖᤡᤰ ᤆᤰᤔᤧᤸᤗ᤹ᤀᤣ ᤘᤍᤵᤔᤠ ᤁᤧᤖᤧᤀᤠᤱ ᤏᤧᤛ᤻ᤛᤧ॥ ᤆᤫᤠ᤺ᤳᤋᤡᤴ ᤐᤥᤖᤧᤀᤠᤱ ᤘᤠᤗᤠᤎᤠᤴ ᤂᤠᤶᤒᤣ᤺ᤰᤔᤥᤏᤢ ᤌᤠ᤺ᤱᤎᤠ᤺ᤱ ᤐᤱᤔᤠ ᤜᤣ᤺ᤰᤋᤢ॥ 18ᤆᤫᤠ᤺ᤳᤋᤡᤴ ᤐᤥᤖᤧᤀᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤁᤥ ᤛᤎᤧᤰ ᤋᤡᤶᤛᤧ ᤜᤧᤰᤁᤩᤠᤱ ᤘᤠᤗᤠᤎᤠᤴ ᤆᤫᤠ᤺ᤳ ᤛᤶᤎᤠᤱ ᤌᤠ᤺ᤱᤎᤠ᤺ᤱ ᤐᤥᤃᤧ॥ 19ᤆᤫᤠ᤺ᤳᤋᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠ᤹ᤖᤡᤰ ᤕᤖᤡᤰ ᤐᤥᤖᤧ ᤜᤧᤰᤁᤩᤠᤱ ᤋᤠᤱᤛᤠᤰᤐᤠᤸᤗᤧ ᤁᤢᤛᤡ᤺ᤰᤋᤥᤒᤠ ᤁᤣ᤺ᤶᤁᤣ᤺ᤶᤒᤠ ᤁᤧᤖᤧᤰ ᤁᤥ᤺ᤰᤔᤠᤜᤠ᤹ ᤆᤫᤠ᤺ᤳᤋᤡᤸᤗᤧ ᤛᤢ᤺ᤵᤋᤢ॥ 20ᤆᤫᤠ᤺ᤳᤋᤡᤴ ᤐᤥᤖᤧ ᤌᤠᤅᤧ ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ ᤏᤢᤛᤡ ᤔᤡᤋᤖ ᤌᤠᤖᤡᤰ ᤗᤢᤵᤋᤢ॥ 21ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤧᤖᤧᤰ—ᤐᤢᤛᤠᤜᤠ᤹. ᤜᤡᤶᤎᤰᤛᤠᤜᤠ᤹. ᤋᤠᤶᤓᤢᤱ ᤌᤰᤛᤠᤜᤠ᤹. ᤂᤠᤶᤔᤥ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧ॥ 22ᤛᤧᤱᤛᤧᤱᤒᤠ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ ᤔᤧᤛᤩᤧ॥ 23ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ—ᤔᤧᤴᤇᤠᤶ ᤕᤠᤵᤔᤡ. ᤌᤰᤛᤠ. ᤁᤢᤳᤇᤡᤱ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤐᤢᤜᤠ᤹ ᤂᤰᤐᤧᤳ ᤔᤧᤛᤩᤧ॥ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤗᤠᤶ ᤔᤧᤔᤧᤃᤧ. ᤏᤢᤜᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤘᤠᤗᤠᤎᤠᤀᤥ ᤁᤧᤕᤠᤰᤐᤠᤜᤠ᤹ᤖᤰ ᤔᤧᤜᤡᤅᤧ॥

24ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤡᤵ ᤌᤡᤰᤁᤠᤱ ᤅᤠᤒᤥᤱ ᤕᤧᤴ ᤌᤠᤖᤡᤰ ᤆᤫᤠ᤺ᤳᤋᤡᤴ ᤏᤧᤛ᤻ᤛᤧ॥

Currently Selected:

ᤋᤥᤗᤡᤱᤛᤥᤔᤢ 7: LIFOTNT

Highlight

Copy