ᤋᤥᤗᤡᤱᤛᤥᤔᤢ 23
23
ᤛᤠᤖᤠᤴ ᤔᤠᤛᤡᤱ᤹
1ᤛᤠᤖᤠᤴ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤏᤢᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ॥ 2ᤛᤠᤖᤠᤴ ᤁᤏᤠᤏ ᤗᤠᤈᤣ᤹ᤒᤠ ᤁᤡᤷᤕᤋ-ᤀᤷᤒᤠᤀᤥ ᤛᤩᤧ (ᤂᤧᤴ ᤋᤧᤴᤏᤡᤴ ᤜᤧᤒᤪᤥ᤺ᤴᤏᤠᤱ ᤔᤧᤔᤧᤳᤋᤢ᤹)॥ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤧᤸᤗᤧ ᤛᤠᤖᤠᤴ ᤔᤧᤖᤡᤱ ᤌᤰᤋᤢ ᤜᤧᤰᤁᤩᤠᤱ ᤜᤠ᤺ᤵᤋᤢ॥
3ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤴ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤸᤗᤧ ᤁᤢᤒᤣᤛᤠᤱᤗᤠᤶ ᤐᤥᤃᤧᤀᤠᤱ ᤕᤧᤶᤛᤡᤱ. ᤜᤧᤰᤁᤩᤠᤱ ᤜᤡᤳᤋᤡᤜᤠ᤹ ᤔᤧᤳᤋᤢᤛᤡ. 4“ᤂᤡᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤗᤳᤇᤠ ᤘᤧᤵᤔᤡᤒᤠᤀᤠ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤀᤥᤒᤠᤀᤠ॥ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤀᤠᤔᤣ᤺ᤳᤋᤡᤸᤗᤧ ᤁᤢᤈᤣᤴ ᤗᤢᤵᤔᤠᤖᤧ ᤗᤠᤃᤡ ᤁ᤹ᤕᤥ ᤗᤠᤈᤣ᤹ᤎᤡᤰ ᤀᤡᤱᤔᤠ ᤀᤠᤱᤃᤠ᤹ ᤕᤠᤵᤔᤡ ᤀᤠᤒᤡᤖᤧ᤹. ᤜᤧᤰᤁᤣᤗ᤹ᤖᤡᤰ ᤁᤧᤛᤡᤔᤠ ᤀᤠᤜᤡᤶᤛᤠᤔᤧᤴ ᤀᤠᤱᤃᤠ᤹ ᤂᤧᤵᤔᤥ ᤏᤢᤖᤡᤰᤁᤠᤱ ᤗᤢᤵᤔᤠ ᤛᤢᤰᤋᤢᤱᤗ॥” #ᤜᤡᤒᤪᤢ ᥇᥇:᥏.᥇᥉; ᤛᤣ᤺ᤰᤕᤢᤰ ᥍:᥇᥌
5ᤜᤡᤳᤋᤡᤜᤠ᤹ᤖᤧ ᤀᤒᤪᤠᤜᤠᤶᤔᤡᤴ ᤏᤥᤃᤵ ᤔᤧᤒᤡᤖᤢ. 6“ᤀᤠᤍᤠᤱᤒᤣ. ᤀᤠᤄᤧᤵᤛᤧ᤹ᤀᤥ॥ ᤂᤧᤏᤧ᤹ᤃ ᤀᤠᤏᤡᤃᤣ ᤗᤢᤶᤔᤥ ᤔᤢᤰᤁᤧᤃᤢᤒᤠ ᤜᤠᤱᤛᤠᤏᤧᤖᤥ. ᤀᤠᤏᤡᤃᤣ ᤀᤡ᤺ᤵᤐᤢᤱᤜᤠ᤹ᤀᤥ ᤁᤧᤛᤣ᤺ᤰᤛᤣ᤺ᤰᤐᤠ ᤛᤣᤃᤧ᤹ᤀᤠᤱ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤁᤧᤔᤣ᤺ᤳᤋᤡᤴ ᤂᤧᤵᤔᤥ ᤗᤢᤵᤋᤧ᤹ᤀᤥ॥ ᤀᤠᤏᤡᤃᤣ ᤀᤠᤳᤋᤡᤸᤗᤧᤀᤠᤱ ᤂᤢᤴᤇᤡ᤹ ᤀᤡᤐᤢᤱᤅᤥ ᤂᤧᤏᤧ᤹ ᤁᤧᤔᤣ᤺ᤳᤋᤡᤸᤗᤧ ᤁᤢᤛᤡᤘᤧᤳ ᤁᤢᤎᤰᤁᤡᤴ ᤔᤧᤸᤗᤢᤵᤐᤧ᤹ ᤔᤧᤔᤧᤳᤋᤠᤛᤡᤃᤧᤸᤗᤥ॥”
7ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤴ ᤐᤥᤃᤧᤀᤠᤱ ᤂᤧᤱ ᤗᤠᤈᤣ᤹ᤒᤠ ᤔᤏᤠ ᤜᤡᤳᤋᤡᤜᤠ᤹ ᤛᤧᤘᤠ ᤔᤧᤳᤋᤢᤛᤡ॥ 8ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤔᤣ᤺ᤳᤋᤡᤸᤗᤧ ᤁᤢᤛᤡᤘᤧᤳ ᤁᤢᤎᤰᤁᤡᤴ ᤁᤵᤔᤥ ᤗᤢᤵᤔᤠ ᤕᤠᤵᤔᤡ ᤑᤠ᤺ᤰᤔᤠ ᤂᤡᤏᤡ᤹ ᤏᤡᤱᤘᤠ᤹ ᤘᤠ᤹ᤏᤧ ᤑᤠᤃᤪ. ᤀᤠᤱᤃᤠ᤹ ᤕᤠᤵᤔᤡ ᤀᤠᤄᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤛᤥᤜᤥᤖᤗᤧ ᤁᤢᤛ᤻ᤛᤠ ᤀᤣᤐᤪᤥ᤺ᤴᤏᤧᤴ ᤀᤠᤱᤃᤠ᤹ ᤀᤠᤗᤠᤃᤡ ᤐᤣᤗᤡ ᤀᤠᤓᤠᤰᤋᤧ ᤀᤠᤒᤡᤖᤧ᤹ᤀᤥ॥ 9ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤈᤣ᤹ ᤔᤰᤐᤣᤗᤠᤒᤠ ᤑᤢᤰᤁᤢᤴ ᤀᤠᤱᤃᤠ᤹ ᤀᤡᤱᤔᤠ ᤐᤡᤀᤠᤖ. ᤂᤧᤴ ᤁᤢᤒᤩᤠᤱᤛᤡ᤺ᤸᤗᤧ ᤁᤢᤕᤠᤀᤥ ᤏᤧ᤹᤺॥ ᤁᤧᤖᤧᤰᤗᤧ ᤂᤡᤏᤡ᤹ ᤋᤃᤠᤱ ᤂᤧᤴ ᤋᤧᤴᤏᤡᤴ ᤁᤧᤒᤢ᤹ᤒᤠ ᤁᤢᤔᤧᤴᤏᤥ ᤗᤳᤇᤠ ᤀᤡ᤺ᤵᤐᤢᤱᤗᤧ ᤗᤠᤃᤡ ᤀᤠᤱᤃᤠ᤹ ᤐᤡᤀᤠᤖ॥”
10ᤂᤧᤴ ᤕᤧᤶᤔᤥ ᤀᤣᤐᤪᤥ᤺ᤴᤏᤧᤴ ᤜᤡᤳᤋᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤀᤣ ᤕᤢᤅᤧᤃᤖᤧ॥ ᤜᤧᤰᤁᤩᤠᤱ ᤁᤢᤕᤧᤰᤕᤰᤁᤡᤸᤗᤧ ᤗᤠᤶᤎᤣ᤺ᤵᤐᤥ ᤋᤃᤠᤱ ᤁᤧᤈᤢᤶᤒᤠ ᤁᤧᤖᤧᤰ ᤜᤡᤳᤋᤡᤜᤠ᤹ᤖᤧ ᤔᤧᤄᤧᤵᤛᤢᤖ ᤀᤣᤐᤪᤥ᤺ᤴᤏᤧᤸᤗᤧ ᤀᤒᤪᤠᤜᤠᤶᤔᤧᤴ ᤏᤥᤃᤵ ᤐᤡᤖᤢ. 11“ᤔᤣ᤺ᤴᤗᤥ ᤀᤠᤍᤠᤱᤒᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ ᤀᤠᤱᤃᤠ᤹ ᤂᤧᤴ ᤐᤩᤠᤱᤛᤡᤴ ᤏᤢ ᤂᤧᤵᤔᤥ ᤁᤧᤏᤧᤒᤠ ᤑᤢᤰᤁᤢᤴᤏᤠᤱ ᤐᤡᤏᤧ॥ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱᤅᤣ ᤀᤠᤱᤃᤠ᤹ ᤂᤧᤴ ᤐᤡᤏᤧ॥ ᤂᤧᤏᤧ᤹ ᤂᤧᤵᤔᤥᤀᤣ ᤁᤧᤛᤡᤔᤠ ᤁᤧᤜᤡᤶᤛᤠᤔᤧᤴ ᤗᤢᤵᤋᤧ᤹ᤀᤥ॥”
12ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤕᤠᤶᤔᤥ ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤛᤡ॥ 13ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤂᤢᤏᤧ᤹ ᤀᤣᤐᤪᤥ᤺ᤴᤏᤧᤴ ᤔᤧᤳᤋᤢ. “ᤂᤧᤵᤛᤧ᤹. ᤀᤠᤱᤃᤠ᤹ ᤂᤧᤴ ᤐᤩᤠᤱᤛᤡ᤺ᤸᤗᤧ ᤁᤧᤒᤢ᤹ᤒᤠ ᤁᤢᤔᤧᤴ ᤐᤡᤏᤧᤖᤥ॥ ᤂᤧᤴ ᤂᤧᤏᤧ᤹ ᤋᤠ᤺ᤰᤋᤧ᤹ᤀᤥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤛᤡᤔᤠ ᤀᤠᤜᤡᤶᤛᤠᤔᤧᤴ ᤗᤢᤵᤔᤠ ᤂᤥᤛᤢᤱᤗᤖᤥ॥”
14ᤀᤣᤐᤪᤥᤏᤧᤸᤗᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. 15“ᤀᤠᤍᤠᤱᤒᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ ᤐᤩᤠᤱᤛᤡ᤺ᤸᤗᤧ ᤁᤢᤔᤧᤴᤏᤧᤱᤃ ᤁᤡᤵ ᤗᤡᤛᤡ ᤕᤢᤵᤐᤠᤕᤠᤱᤗᤥ. ᤁᤖ ᤀᤠᤴᤇᤡ᤹ ᤗᤢᤶᤔᤥ ᤂᤧᤴ ᤕᤠᤱᤅᤡᤴ ᤌᤣᤛᤡᤰᤁᤠᤱᤏᤡᤒᤣ᥅ ᤁᤧᤛᤡᤔᤠᤸᤗᤧ ᤁᤢᤎᤰᤁᤡᤴ ᤂᤧ᤹ᤕᤥ ᤗᤢᤵᤋᤧ᤹ᤀᤥ॥”
16ᤀᤣᤐᤪᤥᤏᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤒᤪᤠᤜᤠᤶᤔᤧᤴ ᤋᤧᤴᤍᤧᤀᤠᤱ ᤂᤧᤴ ᤕᤧᤶᤔᤥ ᤛᤠᤔᤠᤐᤢᤔᤠ ᤁᤧᤀᤡᤱᤒᤠ ᤁᤧᤛᤱᤒᤠ ᤗᤧᤱᤜᤱᤒᤠᤜᤠ᤹ᤖᤧ ᤔᤧᤕᤠᤅᤢᤒᤠ ᤀᤡᤛᤡ᤺ᤰ ᤐᤠᤛᤠᤱᤃᤠᤀᤥ ᤁᤡᤵ ᤗᤡᤛᤡ ᤕᤢᤵᤐᤠᤕᤠᤱ ᤌᤠᤱᤛᤢᤀᤠᤱ ᤂᤢᤏᤧ᤹ ᤐᤡᤖᤢ॥
17ᤀᤰᤂᤣᤗ᤹ᤖᤡᤰ ᤔᤰᤐᤣᤗᤠᤀᤥ ᤁᤧᤏᤧᤒᤠ ᤔᤔᤪᤣ ᤁᤢᤒᤣᤛᤠᤱᤒᤠ ᤀᤣᤐᤪᤥᤏᤧᤸᤗᤧ ᤁᤢᤒᤩᤠᤱᤛᤡᤴ ᤏᤢ ᤂᤧᤵᤔᤥ ᤁᤧᤏᤧᤒᤠ ᤑᤢᤰᤁᤢᤴ ᤜᤧᤰᤁᤩᤠᤱ ᤛᤡᤱᤒᤢᤱᤜᤠ᤹ᤀᤠᤱ ᤜᤠ᤹ᤕᤠᤰ 18ᤕᤧᤰᤕᤰᤁᤥᤒᤠ ᤗᤠᤶᤎᤣ᤺ᤵᤐᤥ ᤁᤧᤈᤢᤶᤒᤠ ᤁᤧᤖᤧᤰ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤀᤣᤐᤪᤥᤏᤧᤸᤗᤧ ᤀᤒᤪᤠᤜᤠᤶᤔᤡᤴ ᤁᤢᤕᤢᤰᤁᤥ ᤐᤡᤖᤢ॥
19ᤂᤧᤴ ᤀᤣᤃᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤔᤣᤳ ᤛᤠᤖᤠᤴ ᤁᤏᤠᤏ ᤗᤠᤈᤣ᤹ᤀᤥ ᤁᤧᤏᤧᤒᤠ ᤔᤔᤪᤣ (ᤜᤣᤒᤪᤥᤏ) ᤁᤢᤒᤣᤛᤠᤱᤒᤠ ᤔᤰᤐᤣᤗᤠ ᤐᤩᤠᤱᤛᤡᤀᤥᤒᤠ ᤑᤢᤰᤁᤢᤀᤥ ᤗᤢᤵᤋᤢ॥ 20ᤀᤰᤂᤣᤗ᤹ᤖᤡᤰ ᤂᤧᤴ ᤐᤩᤠᤱᤛᤡᤴ ᤏᤢ ᤂᤧᤵᤔᤥᤒᤠ ᤑᤢᤰᤁᤢᤴ ᤜᤡᤳᤋᤡᤜᤠ᤹ᤖᤥᤗᤠᤶ ᤀᤡ᤺ᤵᤐᤢᤱᤍᤧᤴᤗᤧ ᤗᤠᤃᤡ ᤀᤒᤪᤠᤜᤠᤶᤔᤡᤸᤗᤧ ᤁᤢᤗᤠᤈᤣ᤹ ᤛᤡᤱᤒᤢᤱ ᤐᤥ᤺ᤰᤂᤧᤖ ᤔᤧᤈᤥᤃᤢᤖᤥ॥
Currently Selected:
ᤋᤥᤗᤡᤱᤛᤥᤔᤢ 23: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
