Евангелле паводле Яна Раздзел 4
Раздзел 4
1Калі затым Госпад даведаўся, што фарысеі чулі, што Ісус здабывае больш вучняў і больш хрысціць, чым Ян, –
2 #
1Кар. 1:17
хоць Сам Ісус не хрысціў, але вучні Яго, –
3дык пакінуў Юдэю і вярнуўся зноў у Галілею.
4 #
Лк. 17:11
А выпала Яму ісці праз Самарыю.
5 #
Род. 33:19; Еш. 24:32 Прыйшоў тады ў самарыцянскі горад Сіхар, непадалёк ад паселішча, якое даў Якуб Язэпу, свайму сыну;
6і была там крыніца Якуба. І Ісус, змучаны дарогай, сядзеў пры крыніцы; было каля шостай гадзіны.
7У той час прыйшла жанчына з Самарыі браць ваду. Кажа ёй Ісус: «Дай мне напіцца»;
8бо вучні Яго пайшлі ў горад, каб купіць ежы.
9 #
Эздр. 4:5; Нэгэм. 4:1, 2; Мц. 10:5; Лк. 9:52 Кажа тады Яму жанчына самарыцянка: «Як жа Ты, юдэй, просіш вады ў мяне, самарыцянкі?» Бо юдэі не маюць зносін з самарыцянамі.
10 #
Рым. 5:15; 2Кар. 9:15; Адкр. 21:6 Адказаў Ісус і сказаў ёй: «Калі б ты ведала дар Божы ды Хто ёсць Той, Хто цябе просіць: “Дай мне піць”, ты, напэўна, прасіла б Яго, і Ён даў бы табе жывой вады».
11Кажа Яму жанчына: «Госпадзе, не маеш нават чым зачэрпаць, а студня глыбокая; адкуль тады маеш жывую ваду?
12Ці ж Ты большы за бацьку нашага Якуба, які нам даў гэтую студню, з якой сам піў, і сыны яго, і скаціна яго?»
13Адказаў ёй Ісус і сказаў: «Кожны, хто п’е гэтую ваду, зноў смагнуць будзе;
14а хто нап’ецца вады, якую Я яму дам, ужо не будзе смагнуць навекі, але вада, якую Я яму дам, станецца ў ім крыніцай вады, што бруіцца ў жыццё вечнае».
15 #
1Ян. 5:20; Рым. 6:23 Кажа Яму жанчына: «Госпадзе, дай мне гэтае вады, каб я не адчувала смагі, ды не прыходзіла сюды за вадой».
16Кажа ёй Ісус: «Ідзі, пакліч мужа свайго і прыйдзі сюды».
17Адказала жанчына і сказала Яму: «Я не маю мужа». Кажа ёй Ісус: «Добра ты сказала: “Я не маю мужа”,
18бо мела ты пяць мужоў, а гэты, якога цяпер маеш, не ёсць твой муж. Гэта ты праўду сказала».
19 #
Лк. 7:16
Кажа Яму жанчына: «Госпадзе, бачу, што Ты – прарок.
20Бацькі нашы на гэтай гары пакланяліся, а вы кажаце, што ў Ерузаліме месца, дзе належыць пакланяцца».
21 #
1Цім. 2:8
Кажа ёй Ісус: «Павер Мне, жанчына, што надыходзіць час, калі ані на гэтай гары, ані ў Ерузаліме будзеце пакланяцца Айцу.
22 #
Лк. 24:47; Рым. 9:4 Вы пакланяецеся таму, чаго не ведаеце; а мы пакланяемся таму, што ведаем, бо ад юдэяў збаўленне.
23 #
Мц. 18:20; Рым. 12:2 Але надыходзіць час, ды ўжо надышоў, што праўдзівыя паклоннікі будуць пакланяцца Айцу ў Духу і ў праўдзе, бо і Айцец шукае такіх, што паклоняцца Яму.
24 #
Рым. 12:2; 2Кар. 3:17 Бог ёсць Дух, і тыя, што пакланяюцца Яму, павінны пакланяцца ў Духу і ў праўдзе».
25Кажа Яму жанчына: «Ведаю, што прыйдзе Месія, значыць Хрыстос; калі Ён прыйдзе, усё нам аб’явіць».
26 #
Мц. 26:63; Мк. 14:61 Кажа ёй Ісус: «Гэта Я, Той, Які з табою размаўляе».
27Неўзабаве прыйшлі вучні Яго і дзівіліся, што Ён размаўляе з жанчынаю; але ніхто не сказаў: «Пра што пытаеш?» або «Пра што з ёй гаворыш?»
28Жанчына ж пакінула збанок свой і паспяшыла ў горад, і кажа тым людзям:
29«Ідзіце і пабачце Чалавека, Які мне сказаў усё, што я толькі зрабіла; ці гэта не Сам Хрыстос?»
30Дык выйшлі з горада і пайшлі да Яго.
31Тым часам вучні прасілі Яго, кажучы: «Рабі, еж».
32Але Ён сказаў ім: «Я маю ежу, пра якую вы не ведаеце».
33Казалі тады вучні між сабой: «Няўжо нехта прынёс Яму есці?»
34 #
Мц. 26:39; Геб. 10:9 Кажа ім Ісус: «Мая ежа – каб выконваць волю Таго, Хто паслаў Мяне, і каб скончыць справу Яго.
35 #
Мц. 9:37; Лк. 10:2 Ці ж вы не кажаце: “Яшчэ чатыры месяцы, і пачнецца жніво”? Вось, кажу вам: падыміце вочы вашы і паглядзіце на прасторы, якія яны ўжо белыя да жніва.
36 #
Рым. 6:22; 1Тэс. 2:19 Ужо жнец атрымоўвае плату і збірае плод на жыццё вечнае, каб і сейбіт, і жнец разам радаваліся.
37І гэтым спраўджваецца слова: адзін сее, а іншы збірае.
38 #
1Пёт. 1:12
Я паслаў вас жаць тое, над чым вы не працавалі; іншыя працавалі, а вы ўвайшлі ў працу іх».
39І многа самарыцянаў з горада таго паверыла ў Яго дзеля слоў жанчыны, якая сведчыла: «Ён мне сказаў усё, што я толькі зрабіла».
40І, калі да Яго прыйшлі самарыцяне, прасілі Яго, каб у іх пабыў; дык прабыў Ён там два дні.
41 #
Лк. 4:32
Ды многа болей уверыла дзеля слоў Яго.
42 #
1Ян. 4:14
Жанчыне ж казалі: «Ужо не дзеля твайго аповеду верым; але дзеля таго, што пачулі і ведаем, што Ён – сапраўды Збаўца свету, Хрыстос».
43 #
Мц. 4:12; Мк. 1:14 А па двух днях пайшоў Ён адтуль у Галілею;
44 #
Мц. 13:57; Мк. 6:4; Лк. 4:24 хоць Сам Ісус сведчыў, што прарок не мае пашаны ў сваёй бацькаўшчыне.
45Калі затым прыйшоў у Галілею, галілейцы прынялі Яго, бо бачылі ўсё, што Ён ўчыніў у Ерузаліме ў дзень свята; бо і яны прыходзілі на свята.
46Ісус ізноў прыйшоў у Кану Галілейскую, дзе зрабіў ваду віном. І быў там нейкі ўрадовец, якога сын хварэў у Кафарнаўме;
47ён, калі пачуў, што Ісус з Юдэі прыйшоў у Галілею, пайшоў да Яго і прасіў Яго, каб прыйшоў і аздаравіў сына яго; а ён ужо канаў.
48 #
Рым. 15:18; 1Кар. 1:22; 2Тэс. 2:8 Сказаў яму Ісус: «Калі не ўбачыце знакаў і цудаў, не паверыце».
49Кажа Яму ўрадовец: «Госпадзе, прыйдзі перш, чым сын мой памрэ».
50 #
Мц. 8:13
Кажа яму Ісус: «Ідзі. Сын твой жыве». Паверыў той чалавек слову, якое яму сказаў Ісус, і пайшоў.
51А калі быў яшчэ ў дарозе, паслугачы яго выйшлі насустрач яму, каб сказаць, што сын яго жыве.
52Спытаўся іх тады пра пару, у якую яму палягчэла. Дык сказалі яму: «Учора а сёмай гадзіне спынілася ў яго гарачка».
53Дык даведаўся бацька, што гэта быў той час, у які сказаў яму Ісус: «Сын твой жыве», і паверыў ён ды ўвесь дом яго.
54І гэты другі знак учыніў Ісус, калі прыйшоў з Юдэі ў Галілею.
Currently Selected:
Евангелле паводле Яна Раздзел 4: ББЧ
Highlight
Share
Copy
Want to have your highlights saved across all your devices? Sign up or sign in
© МХРБ «Біблейскае таварыства ў Рэспубліцы Беларусь», 2017
