Marcos 15

Jesús rdxiine lau'e Pilato

(Mt 27:1-2,11-14; Lc 23:1-5; Jn 18:28-38)

1Kati gyeni ziil'a, guludzaage bënni tunabe'i'de pxuuz len bënni guul tuzeajni'i'de len bënni useed xhba kie' Dios: yugute'ke bënni tabeki'xhbei'de lu gdou'. Gluuga'ke Jesús len guluche'e Le' lau'e Pilato. 2Pilato bnaab'de Le':

—¿Ati Li' naku Bënni Rnabe' kieke bënni Judea?

—Li' buudx gnou' —bubi'e diidza Jesús

3Koma bënni tunabe'i'de pxuuz le zian tudxie' le' xhgia'. 4Pilato yubl bnaab'de Le':

—¿Bixhkia' ti rubi'u diidza? Le zian tudxie' Li' xhgia'.

5Ati Jesús ti bubi'e diidza; Lena'a Pilato bubaani'tzki'de.

Tuchuug'be'e ki gatie' Jesús

(Mt 27:15-31; Lc 23:13-25; Jn 18:38—19:16)

6Lu lni ni, Pilato rsaane tue' bënni nadzuune liidx'gia, bënni'a lunaabe bunach ksaane. 7Nadzuune liidx'gia tue' bënni le' Barrabás dzaage ye la'ke bënni guludëëd'de bunach kati guludabaaga'ke yëdz. 8Guladxiine bunach'a na' gulazulau'e tunaab'de Pilato ki guune le naleeb'de ruune. 9Pilato bubi'e kieke diidza:

—¿Re'eni'li ksaana'ne Bënni Rnabe' kieke bënni Judea?

10Koma guk'be'i'de ki pxuuz'a lu yëla rdi'i kieke Le' guludëëde Le' lu ne'e. 11San bënni tunabe'i'de pxuuz gulutzatze bunach'a naar lunaabe lusane Barrabás. 12Pilato bnaab'de leke:

—¿Bixh re'eni'li guuna len bënni'a rnaali kie' Bënni Rnabe' kieke bënni Judea?

13Guluskua'ke gulubi'e diidza:

—¡Bde'e lu yaag kruuz!

14Pilato gudxe leke

¿Bixh dula nuune?

San leke yubl guluskua'ke:

—¡Bde'e lu yaag kruuz!

15Ati koma Pilato re'en'de jga'ane dxia'a lau'ke bunach, psaane Barrabás; len gdëëd gnabe'e lagiine Jesús, bdëëde Le' lu naa'ke naar lude'e Le' lu yaag kruuz.

16Bënni raja'ke gdil guluche'ke Jesús la'chi rayu'u ki yulau'i le nazi' lei' pretorio, len gulutzaage yugute'ke bënni rajake gdil. 17Guluxua'ke kuudze'e tu laari gach le zaki'i'tzki, gluune tu #15:17 Le ni gluune naar luxhiidx'de Le', koma bënni tunabe'ke tudxia'ke ikj'ke tu breegi oro u plata len laari le tuxua ikj'kebreegi yëtzi len guludxie' ikje. 18Chi nak ka guluskua'ke:

—¡Xhën'te nake Bënni Rnabe' kieke bënni Judea!

19Ati tagiine ikje len tu gba'ay, tuchiije Le' xhëëna len tuzechu xhiib'ke tuune lua' tui'ke Le' bala'an. 20Buudx gulutitj'de Le' guluguáke laari gach'a guluxua'ke kuudze'e, gulugakue' Le' xha'kze len guluche'ke Le' naar lude'e Le' lu yaag kruuz.

Tude'e Jesús lu yaag kruuz

(Mt 27:32-44; Lc 23:26-43; Jn 19:17-27)

21Tue' bënni yëdz Cirene le' Simón nake xuuze Alejandro len Rufo, zuze'e dxin gixi. Len kati gdëëde na' guludayë'li'de le' gue'e yaag kruuz kie' Jesús.

22Guluche'ke Jesús tu latj nazi' lei' Gólgota (le ni re'e'ni gna': «Latj ki Dxit Ikji bunach»); 23len gulunëëdzje kie' nup uva nuchixhi'kde mirra, ati Jesús ti gui'e ley. 24Na' gulude'e Le' lu yaag kruuz. Len bënni raja'ke gdil gulukitj'ke le gunn'be' nuxh'lke la'la'ke xhe' Jesús ati ka' lanëëz'de bixh la'la'ke tu tu'ke.

25Gdu rdëëd xhsiil gulude'e Le' lu yaag kruuz. 26Lu blaag guluzooje bixhkia' gbaage'e xhgia': «Bënni Rnabe' kieke bënni Judea.» 27Lekz'ka' gulude'e lu yaag kruuz chope' bënni gban, tue' gulude'e le' kuiti'le'e yubeel len ye tue' gulude'e le' kuiti'le'e yëëgl. 28[Ati ka' guk ka'teez nayoj lu Diidza La'ay, le rna: “Gulusake'e le' ka tusaka'ke bënni dula”.] 29Bënni tadëëde na' tu'ta'ke ikj'ke len gulutzag'yuudxe Le' diidza, tanáke:

—¡Li', bënni'a rkin'je gdou', len na' rak tson dza rulisu ley, 30buslá kuinu len bëtj lu yaag kruuz'a!

31Lekz'ka' bënni tunabe'i'de pxuuz len bënni useed xhba kie' Dios tutitj'de Le'. Tanáke:

—Bënni yubl busle', san ti rake usle' kuine 32¡Utzajle'ru'ne ka nak gle'i'ru'ne Cristo bënni rnabe' Israel wëtje lu yaag kruuz'a!

Ati lekz'ka' bënni'a da'ke kuiti'le'e lu yaag kruuz'a gulutzag'yuudxe Le' diidza.

Jesús ratie'

(Mt 27:45-56; Lc 23:44-49; Jn 19:28-30)

33Ka gyu'u wagbiidz bdxin'te gdu rdëëd xhwë kchul gdu yëdz'lyu. 34Larakz ur'a, zidzj bisku'e Jesús: «Eloí, Eloí, ¿lemá sabactani?» (Le ni re'e'ni gna': «Dios kia', Dios kia', ¿Bixhkia' psanlaadxu'u neda?»)

35La'ke bënni nakua'ke na' gulayëën'de Le' len gulanake:

Guluzenaag'tzka, Elias bënni'a be'e diidza ulaaz kie' Dios rliidze.

36Na' tue' kieke bënni'a rxiti'ze yajspise tu laari lu nup uva zi, beege'e ley lu yaag gy len bze' kie' Jesús naar gi'i'je ley, gne':

—Gulkëëz'gaar, gyu'tzka'ru xhki wiide Elias duzëtje Le' lu yaag kruuz'a.

37Ati Jesús bisku'e zidzj len gutie'. 38Len laari nuga'la'ke lu gdou' chop'di'il brëëza, le gde'la' ra'al bdxin'te dxi'it. 39Bënni'a rnabe'i'de bënni raja'ke gdil ze' lau'e Jesús, kati ble'i'de ki Jesús chi gutie', gne':

—Leel nake bënni ni Xi'ine Dios.

40Lekz'ka' nakua'knu la'knu nguul tuyuunu zitu'z: na' nutza'knu María Magdalena, Salomé len María xhne'e Santiago bënni zelau len José. 41Nguul ni zak'leen'nu'ne Jesús len glak'leen'nu'ne kati le' gzue' Galilea. Lekz'ka' nakua'nu na' ziank'nu nguul yajak'leen'nu'ne Jerusalén.

Tuka'che'e Jesús

(Mt 27:57-61; Lc 23:50-56; Jn 19:38-42)

42Chi rdzë' len nak dza'a tupa'a'ke kieke, ki kie'la dza tu'ueak'laadxi'ke bënni Judea, 43lena'a José bënni yëdz Arimatea len nabaabe lu dxin'lau'i blou kieke bënni Judea, bënni ni lekz'ka' rbëëze yëla rnabe' kie' Dios, pchuug'laadxe'e yaje'leene diidza Pilato len bnaabe ue'e Jesús. 44Pilato bubaan'de ki chi gutie' Jesús, bliidze bënni'a rnabe'i'de bënni raja'ke gdil naar gnaab'de le' gaka chi guk gutie'. 45Kati bënni'a rnabe'i'de bënni raja'ke gdil gdixhji'de le', Pilato bunëëdzje Jesús len José. 46Na' José gu'uwe tu laari dxia'a'te le zaki'i'tzki, bzëtje Jesús len pchël'de Le' lu laari'a. Chi nak ka glu'e Le' lu ba narë'ën le'e giaj, len psiije baa len giaj. 47María Magdalena len María xhne'e José tuyuunu gaxh tagu'e Le'.

Currently Selected:

Marcos 15: PZD

Highlight

Copy