Lucas 9
9
Jesús rsë'le'e bënni useed kie' tzajtixhjë'ke yëla rnabe' kie' Dios
(Mt 10:5-15; Mr 6:7-13)
1Jesús butzaage chin'nu'ke bënni useed kie', len bnëëdzje kieke yëla wak len yëla rnabe' naar lubiije yugute' bë' xëwi len lu'un'ke baya'. 2Psë'le'e leke tzajtixhjë'ke yëla rnabe' kie' Dios len lu'un'ke bënni we'. 3Gudxe leke:
—Kati tzu'uli nëëz tibi gua'li, keg xuyaag, keg bzuud, keg yët'xhtiil, keg dumi len ti gua'li ye tu kë' xha'li. 4Biti'i yu'u ga gdxin'li, na'z suáli na' gdxin'r dza uza'li. 5Len xhki tu yëdz ti le'en'de lazi'ke lbi'ili guluroj na', len gulkuib bexhtë nua' ni'a'li, le ni glui' ki ti gulazi'ke lbi'ili.
6Gularooje leke, len yajake yugute' yëdz we'en'du, yajtixhjë'ke diidza kub dxia'a len gulu'un'ke bënni te'i'de.
Ti nëëz'de Herodes nuxh nake Jesús
(Mt 14:1-12; Mr 6:14-29)
7Herodes bënni rnabe' yëdz xhën byëën'de diidza ki yugute' le ruune Jesús, ati gukgan'de, koma la'ke tanáke ki Juan chi bubaane lu yëla gut, 8ye la'ke tanáke Elías chi bului'lau'e, ye la'ke tanáke nuxh'lke bënni'a glui'ke diidza ulaaz kie' Dios zia'at chi bubaane lu yëla gut. 9Ati Herodes gne':
—Kuin'kza gnabe'i'da ki luchuuge ikje Juan. ¿Nuxhkz nake bënni ni, biiz ryëën'da ka tanáke kie'?
Lena'a Herodes rzu'rbë'e gle'i'de Jesús.
Jesús rga'we bunach zian
(Mt 14:13-21; Mr 6:30-44; Jn 6:1-14)
10Kati bënni gbaaz kie' guludxiine, gulagixhji'de Jesús le gluune. Le' pche'e leke ga yubl tu yëdz nazi' lei' Betsaida. 11Ati kati bunach gulanëëz'de, yajak'leene le'; len Jesús gxhi'e leke len be'leene leke diidza ki yëla rnabe' kie' Dios len buune bënni we'.
12Kati chi za rdzë', yajake ga zue' Jesús Chin'nu'ke bënni useed kie' len gle'ke le':
—Busë'la bunach ni, naar lu'ueak'laadxi'ke len tzajtiilj'ke le la'we yëdz ga'la ni, koma ga zuaaru ni nutunu nakua'.
13Jesús gudxe leke:
—Gulunëëdzj lbi'ili le la'we.
Leke gulubi'e diidza:
—Ga'yu'z yët'xhtiil len chop'ba bël de'ba kietu, keg la tzajë'u'tu le la'we.
14Koma ga'yu' mil'ke bënni nak'ke. Ati Jesús gudxe bënni useed kie':
—Gulgun ga labë'ke chi'un ueaj'ke.
15Leke guluzenaage na' gluune ga labë'ke yugute'ke. 16Na' Jesús gxhi'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje len bnëëdzje kieke bënni useed kie' naar lagis'ke kiegak bunach'a. 17Bunach gla'we tzka glëëlj'de, len ye chin'nu bdë'ë guk tzka le buga'an.
Pedro gne' ki Jesús nake Cristo
(Mt 16:13-19; Mr 8:27-29)
18Tu dza kati Jesús zue' tuuze rui'leene diidza Dios, len bënni useed kie' nakua'leene le', bnaab'de leke:
—¿Bixh taná bunach nuxh naka neda?
19Leke gulubi'e diidza:
—La'ke tanáke naku Juan bënni pkiile nis bunach, ye la'ke tanáke naku Elías, len ye la'ke tanáke nuxh'lke bënni'a glui'ke diidza ulaaz kie' Dios zia'at chi bubaane lu yëla gut.
20—Jesús bnaab'de leke: —Ati lbi'ili, ¿Bixh rnaali nuxh naka neda?.
Len Pedro bubi'e diidza:
—Naku le' Cristo kie' Dios.
Jesús rgixhjë'e ki yëla gut kie'
(Mt 16:20-28; Mr 8:30—9:1)
21Ati Jesús gudxe leke ki nutunu lagixhji'de le ni. 22Len gudxe leke:
—Le' Xi'ine bënni rala ktzaag'tzke, len ti layaazlaadxi'ke le' bënni guul tuzeajni'i'de bënni Judea, bënni tunabe'i'de pxuuz len bënni useed xhba kie' Dios. Uludëëd'de le', san na' gak tson dza ubaane lu yëla gut.
23Gdëëd ni gudxe yugute'ke:
—Xhki nu bënni re'en'de gake bënni useed kia', rala gzal'laadxe'e kuine, gue'e yaag kruuz kie' tu tu dza len giid'leene neda. 24Koma bënni re'en'de usle' yëla naban kie', unitie' ley; san bënni gatie' nia'a kia' neda, usle' yëla naban kie'. 25¿Gaxh de gun kie' bënni gaki kie' gdu yëdz'lyu xhki nitie' u gunditji kuine? 26Xhki nu rutui'i neda len rutui'i xhtiidza'a, lekz'ka' le' Xi'ine bënni utui'i'de le' kati wëëde lu yëla ba kie' len lu yëla ba kie' Xuuze len kieke bënni gbaaz la'ay kie'. 27Le nak'te rnia' la'ke bënni nakua'ke ni, ti lat'gake xhki ku lale'i'de zia'a yëla rnabe' kie' Dios
Lau'rue'e Jesús ptza'
(Mt 17:1-8; Mr 9:2-8)
28Gdëëd ka xuunu dza be'e diidza ni, Jesús greene tu gia'a zaje'leene diidza Dios, zjak'leene le' Pedro, Santiago len Juan. 29Tzal rui'leene diidza Dios, lau'rue'e ptza' len laari nakue' guk xhiila'z len rep'yës'lni'; 30Len gulului'lau'ke chope' bënni tui'leene le' diidza. Nak'ke Moisés len Elías, 31nuli'iji leke yeni xhën'te len tui'ke diidza ka uze'e Jesús lu yëdz'lyu ni, le rala gak Jerusalén. 32Zala Pedro len bënni'a dzaage'a rak'tzka chigas'ke, gulana'se len gulale'i'de yëla ba kie' Jesús len grope' bënni'a nakua'ke len le'. 33Kati bënni'a guluza'ke ga zue' Jesús, Pedro gudxe le':
—Bënni useed, ¡dxia'a'kza zuaaru ni! Gun'ru tson yu'u we'en'du: tu kiu', tu kie' Moisés len ye tu kie' Elías.
Ati Pedro ti nëëz'de bixh diidza rue'e. 34Tzal rue'e diidza tu buaj yajxua leke, len kati chi dzë'ë'ke le'i buaj'a glaadxi'de. 35Na' lu buaj'a byën chi'i le gna: «Bënni Xi'ina ni rdzag'laadxa'ne: guluzenaag'de.»
36Kati byën chi'i ni, Jesús bga'ane tuuze. Ati leke guluka'chi'tzka'ke le ni len nutunu gulagixhji'de le gulale'i'de.
Jesús ru'uune'bi tuubi bi kuidi yu'u lebi bë' xëwi
(Mt 17:14-20; Mr 9:14-29)
37Bueikj dza'a, kati guludinie lu gia'a, bënni zian gularooje yajtzaag'ke le' Jesús. 38Len ladj bunach'a tue' bënni pchis chi'e gudxe le':
—Bënni useed, guk'leemi bi kia' ni, lazdui'bi zuaabi kia'; 39tu bë' xëwi rzën leebi, len run ga guskua'bi len rxiiz leebi len rbia bdxina ziidi rua'a'bi, rsaka'zi' leebi len ti re'e'ni ksan leebi. 40Chi gutayui'kda'ne bënni useed kiu' lubiije bë' xëwi'a, ati leke ti glake.
41Jesús bubi'e diidza:
—¡Lbi'ili bënni ti nayajle' len ti run'li le dxia'a! ¿Gaxhkz sua' ka'tekz sua'leena lbi'ili len kxikji'da lbi'ili? Yajxi'bi ni bi kiu'a.
42Kati chi za'bi ga'la, bë' xëwi'a bzal leebi lyu len gzulau rxiiz leebi yubl ka; ati Jesús gdil'leene bë' xëwi'a, buune'bi bi ni len bunëëdzje'bi len xuuz'bi. 43Len yugute'ke gulubaan'de ki yëla xhën kie' Dios.
Jesús rgixhjë'e burop lzu ki yëla gut kie'
(Mt 17:22-23; Mr 9:30-32)
Tzal yugute'ke tubaan'de le ruune Jesús, le' gudxe bënni useed kie':
44—Guluzenaag dxia'a le ni len ti gal'laadxi'li: Le' Xi'ine Bënni uludëëde le' lu naa'ke bunach.
45Ati leke ti gulayajni'i'de le rne', koma ti nayaalji ikj'lau'ke naar layajni'i'de, lekz'ka' taadx'de lunaab'de Jesús gsaalj'la'a'ne ley kieke.
¿Nuxh nak'r blou?
(Mt 18:1-5; Mr 9:33-37)
46Na' bënni useed kie' gulazulau'ke tadil'e diidza nuxh'lke lakgake bënni blou. 47Kati guk'be'i'de Jesús le rza' ikj'laadxi'dau'ke, gde'le'e'bi tuubi bi'dau' bze'bi kuiti le'e 48Len gudxe leke:
—Bënni rzi'e'bi bi'dau' ni, neda rzi'e; len bënni rzi'e neda, rzi'e lekz'ka' nu nusë'la neda. Lena'a bënni'a ti ryaazlaadxi'li'ne, bënni'a nak're blou.
Bënni tibi ruune kieeru, rak'leen're ro'u
(Mr 9:38-40)
49Juan gudxe le':
—Bënni useed, ble'i'tu'ne tue' bënni rubiije bë' xëwi lu lou'; len gu'uni'tu gzaaga'tu'ne, koma ti za'leene ro'u.
50Jesús bubi'e diidza:
—Ti gzaaga'li'ne, koma bënni'a tibi ruune kieeru, rak'leen're ro'u.
Jesús rdil'leene Santiago len Juan
51Kati chi zua ga'la gdxin dza Jesús rala ubeene yewayuba, beene tzutzu laadxe'e len glu'e nëëz ziije Jerusalén. 52Psë'le'e bënni gbaaz lanëëre, tzjake tu yëdz we'en ki Samaria naar tzajtiilj'ke ga jga'ane; 53ati bënni yëdz Samaria ti gle'en'de lazi'ke le', koma gulak'be'i'de ki ziije Jerusalén. 54Kati bënni useed kie', Santiago len Juan gulale'i'de le ni, gle'ke le':
—Xan, ¿Re'en'du gnabe'tu wëtj gi' za' yewayuba, len gnit'lau leke?
55Ati Jesús bueikje len gdil'leene leke. 56Na' yajake ye tu yëdz we'en.
Bënni te'en'de tzjak'leene Jesús
(Mt 8:19-22)
57Tzal dzë'ë'ke nëëz tue' bënni gudxe Jesús:
—Xan, rzelaadxa'a sa'leena li' ga'ti'teez tziiju.
58Jesús bubi'e diidza:
—Bëëza zua bloj giaj kiek'ba, len bua' tazuuba zua liidx'kba; san le' Xi'ine Bënni ti de tu latj ga gasie'.
59Jesús gudxe ye tue':
—Dia' len neda.
Ati le' bubi'e diidza:
—Xan, ben latj zia'a xuuza jka'cha'a'ne.
60Jesús bubi'e diidza:
—Be'ke latj bënni nat'a luka'chi'ke bënni nat kieke; li' yajtixhjë yëla rnabe' kie' Dios:
61Ye tue' gudxe le':
—Xan, re'en'da sa'leena li', ben'z latj tzajzei'kdane diidza bënni nakua'ke liidxa.
62Jesús bubi'e diidza:
—Bënni rga'ane'ba beedx len ryue' zga kuudzu'le, ti nake bach tzaazie lu yëla rnabe' kie' Dios
Currently Selected:
Lucas 9: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
