Lucas 24

1Bayën ziil kati rugie'la' seman yajak'nu nguul ni ga de ba kie' Jesús, len nuak'nu le rla' xhixh lea chi nukëëzk'nu. 2Kati guladxin'nu gulale'i'nu ki giaj'a nusiaj ra baa chi na'dua; 3len gulayaaz'nu, san ti guludzëëli'nu'ne Xan'ru Jesús. 4Na' nakua'nu tubaani'nu kati gulale'i'nu'ne chope' bënni rep'yës'lni' xha'ke nakua'ke kuiti le'ek'nu. 5Glaadxi'tzki'nu len guluzechu lyu't ikjk'nu; ati bënni'a gle'ke'nu:

—¿Bixhkia' rugiilj'li'ne bënni ban ladj'ke bënni nat? 6Ti zue' ni, chi bubaane lu yëla gut. Gultzajnei le gudxe lbi'ili kati ni zue' lu yëdz Galilea, 7ki Le' Xi'ine Bënni rala ludëëde le' lu naa'ke bënni dula len lude'e le' lu yaag kruuz, len kati gak tson dza ubaane lu yëla gut.

8Na'ar lek'nu gyajneik'nu diidza be'e Jesús, 9len kati guludxin'nu yajak'nu ra baa, dera lea gulale'i'nu gulagixhji'nu'ne bënni chi'niaj'ke gbaaz kie' Jesús len bënni'a ye la'ke. 10Nguul'a gulagixhji'nu'ne diidza kub ni bënni gbaaz'a nak'knu María Magdalena, Juana, María xhne'e Santiago len ye la'knu nguul. 11Len bënni gbaaz ni glaki'de ki chi tui'nu diidza chëxh len ti gulayajle'ke'nu.

12Ati Pedro rxiti'ze gyiije ra baa; len kati byue' le'i, ble'i'de laari na'z nakua'. Na' bëëje liidxe rubaan'de ki lea guk'a.

Lu nëëz Emaús

(Mr 16:12-13)

13La dza na'z, chop'ke bënni useed zjake tu yëdz nazi' lei' Emaús le de zitu ki Jerusalén. 14Zjake tui'ke diidza ki yugute' le chi guk. 15Tzal tui'ke diidza len tunaabi lza'a'ke, kuin'kze Jesús gbiige'e ga'la len gzulau'e yu'u'leene leke nëëz. 16Len zala tale'i'de le', ti benn lumbe'ke nuxha'. 17Jesús bnaab'de leke:

—¿Bixhkz diidza rui'li tzal yu'u'li nëëz?

—Bayechi'da yajsua'ke 18len tue' bënni le' Cleofás bubi'e diidza:

—¿Naru tuuzu li' bënni yëdz zitu nadxiinu Jerusalén len ti nëëz'du le guk ni' nas niij ni?

19Le' bnaabe:

—¿Bixh guk?

—Gle'ke le':

—Ka guk kie' Jesús bënni Nazaret, guke bënni be'e diidza ulaaz kie' Dios, len yëla wak xhën beene dxin len be'e diidza lau'e Dios len lau'ke yugute'ke bënni; 20len ka gluune bënni pxuuz len bënni tunabe'i'de netu gulunëëdzje le' naar guluchuug'be'e ki gatie' len lude'e le' lu yaag kruuz. 21Netu nun'tu lëëz le' gake bënni usle' gdu yëdz Israel, san na'a guk tson dza glak yugute' le ni. 22Ati ba'ay bayën la'knu nguul lza'a'tu guluspaani'nu netu koma yajak'nu ra ba kie' 23len ti guludzëëli'nu'ne, guludxin'nu nu'yu'u tanaanu ki gulale'i'nu'ne gbaaz la'ay kie' Dios len gle'ke'nu ki Jesús yu'u yëla naban kie'. 24Gdëëd ni lez la'ke bënni lza'a'tu yajake ra ba len yajxaka'ke ka'teez gulanaanu nguul'a, san ti gulale'i'de Jesús. 25Na'ar Jesús gudxe leke:

—¡Nayaadzji'tzki'li yëla nayajni'i len kann'z rajle'li yugute' le gulanake bënni glui'ke diidza ulaaz kie' Dios! 26¿Naru ku ben bayuudx ktzaage le' Cristo yugute' le ni, na'ar si'e yëla ba?

27Na'ar gzulau'e rgixhji'de leke yugute' diidza le nayooj'gak kie' lu Diidza La'ay, gzulau'e len gich le bzooje Moisés len bdxin'tie' len gich le guluzooje bënni glui'ke diidza ulaaz kie' Dios.

28Kati guladxiine lu yëdz ga zjake, Jesús beene lua' ziaj're zitu. 29San leke guludayë'li'de le' jga'ane, tanáke:

—Bga'an len netu, koma chi nadzë', chi za' rchul.

Jesús gyaazie nu'yu'u len bga'an'leene leke. 30Kati chi rë'ke ga rala la'we gde'le'e yët'xhtiil len buudx be'e yëla dexhken Dios, bxhuuxhje len bnëëdzje kieke. 31Na'teez buaalj lau'ke len gulumbe'e Jesús, san Le' bunit'ze ka' lau'ke. 32Len gle' lza'a'ke:

—¿Naru lena'a buzaka'laadxi'ru tzal rui'leene ro'u diidza len rseedx'la'a'ne Diidza La'ay'a?

33Len tirbi gulabëëze, gulugie'le'e nëëz zawake Jerusalén ga nakua'ke bënni chi'niaj'ke gbaaz kie' Jesús len ye la'ke bënni nakua'ke len leke. 34Bënni ni gle'ke leke:

—Blii, leel bubaane lu yëla gut Xan'ru, len chi blui' lau'e ble'i'de le' Pedro.

35Na'ar bënni chop'ke ni gulagixhjë'ke le guk kieke la nëëz len ka guk gulumbe'e Jesús kati bxhuuxhje yët'xhtiil'a.

Jesús blui' lau'e len bënni useed kie'

(Mt 28:16-20; Mr 16:14-18; Jn 20:19-23)

36Ni nakua'ke tui'ke diidza ni kati Jesús dusue gatzj'lau'i ga nakua'ke len bliidz'tzawi'e leke, gne':

—Yëla rë'dxi sua len lbi'ili.

37Leke glaadxi'tzki'de len taki'de ki pxin'a tale'i'de. 38Ati Jesús gudxe leke:

—¿Bixhkia' rungaadxi kuin'li? ¿Bixhkia' ti rajle'li gdu ikj'laadxi'dau'li? 39Guluyu' ni'a' na'a, needa'a, gulukan' neda len guluyu' dxia'a, tu pxin ti nua' beela' len ti yu'u dxit, ka rle'i'li nak kia' neda.

40Kati gne' ka', blui'de leke ni'a' ne'e. 41Ati le ti ru'uudx layajle'ke tzka tudziij'de len tubaan'de, Jesús bnaab'de leke:

—¿Ba de kieeli le gaag'ru?

42Len gulunëëdzje'ba kie' lati'ba bël neegi', 43len le' gxhi'e len lau'ke ka gda'we. 44Gdëëd ni gudxe leke:

—Le ni guk kia' ni, nak le gdixhjë'a kati ni zua'leena lbi'ili: ki rala gak kia' ka'teez nayoj lu gich le bzooje Moisés, le nayoj lu gich kieke bënni glui'ke diidza ulaaz kie' Dios len le nayoj lu gich la'ay ki Salmos.

45Na'ar buseedx'la'a'ne kieke Diidza La'ay'a. 46Len gudxe leke:

—Nayoj ki le' Cristo rala gatie' len kati gak tson dza ubaane lu yëla gut. 47Len lu le' Le' rala gnëëzi yugute' yëdz ki rala lubi'i'laadxi'ke len Dios naar si'xhëëne xhtu'la'ke. Jerusalén sulau'li 48lbi'ili tzajxaka'lau'li le ni. 49Len neda ksë'la'a kieeli le Xuuza pxënelaadxi'li. San lbi'ili guluga'an yëdz Jerusalén niiz, tzal gdxin kieeli yëla wak za' yewayuba.

Jesús Rubeene yewayuba

(Mr 16:19-20)

50Gdëëd ni Jesús pche'e leke yajake yëdz Betania len pchise ne'e len ben'la'aye leke. 51Len tzal run'la'aye leke gzulau'tie' rubeene yewayuba 52Leke buudx gulayiijilaadxi'ke Le' ye'wake Jerusalén len yëla rudziiji. 53Len nakua'tekze lu gdou' tagu'e ba Dios.

Currently Selected:

Lucas 24: PZD

Highlight

Copy