Juan 5

Jesús ru'uune tue' bënni nat'zie' ki yëdz Betzatá

1Gdëëd le ni, gyu'u tu lni kieke bënni Judea ati Jesús budxiine Jerusalén. 2Lu yëdz ni ga'la ra puert kiek'ba bëku'xhiila, zua tu biaj le ze ga'yu' nchiil ki, len lu diidza hebreo nazi' lei' Betzatá. 3Na' nakua'tzka'ke bënni we', bënni lau chul, bënni natzj len bënni nat'zi'ke de'ke lyu. 4Koma tue' gbaaz la'ay kie' Dios rëtje bat bat ra biaj'a len rxiizie' nis'a ati bënni rde'li'de ryaazie zia'a lu nis'a kati ru'uudx rxhiiz, ru'ueake ki biti baya' le nape. 5Ladj'ke'a zue' tue' bënni chi guk chi'xhuunu'urua' iz re'i'de. 6Kati Jesús ble'i'de le' de' na' len gnëëz'de gakati chi guk re'i'de, bnaab'de le':

—¿Re'en'du ueaku?

7Bënni we' ni bubi'e diidza:

—Xan, nutunu zua' kia' ku'u neda lu nis'a kati rxhiiz. Tzatza re'en'da tzaazia bënni yubl ryaazie zia'a ka neda.

8Jesús gudxe le':

—Gyas, butuub xhto'u len gze'i.

9Na'teez bënni ni bueak'tie', butuube xhte'e len gzulau'e rze'e. San le nak dza tu'ueak'laadxi'ke bënni Judea, 10bënni Judea gle'ke bënni'a bueake:

—Na'dza nak kati tu'ueak'laadxi'ke bënni Judea; ti de lsenz gu'u xhto'u.

11Bënni ni bubi'e kieke diidza:

—Bënni'a buune neda, gne': “Butuub xhto'u len gze'i.”

12Leke gulunaab'de le':

—¿Nuxh bënni'a gudxe li': “Butuub xhto'u len gze'i”?

13San bënni ni ti nëëz'de nuxha' bun le', koma Jesús bga'chi'ze ka tzka'ti'ga bunach zian'a nakua'k ni'. 14Gdëëd'a Jesús budzaage le' lu gdou', len gudxe le':

—Na'a chi nu'ueaku, tir guunu dula naar ku gyali'i le gak kiu'.

15Bënni ni zuwëëje len gdixhji'de bënni Judea ki Jesús buune le'. 16Lena'a bënni Judea tulaag'yuudxe Jesús, koma dza tu'ueak'laadxi'ke bënni Judea ruune yugu le ni. 17Ati Jesús gudxe leke:

—Xuuza chi ben'tekze dxin, ati lekz'ka' neda ruuna dxin.

18Lena'a bënni Judea taze'laadxir'ke ludëëd'de le', koma ti rzenaage guune ka rala gak dza tu'ueak'laadxi'ke bënni Judea, ati lekz'ka' le rnëëzi kuine Dios kati rne' ki Dios nake xuuze.

Yëla rnabe' kie' Xi'ine Dios

19Jesús gudxe leke: «Le nak'te rea' lbi'ili ki Xi'ine Dios ti gunn guune le rnaaz kie'; le rle'iz'de ruune Xuuze ruune. Yugute' le ruune Xuuze lekz'ka' Xi'ine Dios ruune. 20Koma Xuuze nadxi'i'de Xi'ine len rlui'de le' yugute' le ruune; len ului'de le' le nak'r le xhën, le gun ga yubaani'li. 21Koma ka ruune Xuuze ruspaane bënni nat len rnëëdzje kieke yëla naban, lekz'ka' Xi'ine rnëëdzje yëla naban kieke bënni Le' re'en'de gnëëdzje. 22Len Xuuze nutunu ki rchuug'be'e, san nunëëdzje kie' bënni Xi'ine gdu yëla wak ki kchuug'be'e, 23Naar yugute'ke lunëëdzje bala'an kie' Xi'ine Dios ka tunëëdzje kie' Xuuze. Bënni ti rnëëdzje bala'an kie' Xi'ine Dios, lekz'ka' ti rnëëdzje bala'an kie' Xuuze nu nusë'la Le'.

24»Le nak'te rea' lbi'ili ki bënni rzenaage le rnia' len rajle'e ki nu nusë'la neda, nape yëla naban tzalzu; len ti nabaage'e xhgia', koma chi gdëëde ki yëla gut zga yëla naban. 25Le nak'te rea' lbi'ili ki za' dza len na'a nak, kati bënni nat layëën'de chi'e Xi'ine Dios; len bënni layëën'de ley ulazi'ke yëla naban. 26Koma ka Xuuze nape yëla wak gnëëdzje yëla naban lekz'ka' nuune kie' Xi'ine gape yëla wak gnëëdzje yëla naban, 27ati nunëëdzje kie' yëla rnabe' ki kchuug'be'e, koma le' nake Le' Xi'ine Bënni. 28Ti yubaani'li ki le ni, koma za' dza kati bënni nat layëën'de chi'e 29len lurooje lu ba. Bënni gluune le dxia'a lubaane lu yëla gut naar lazi'ke yëla naban; san bënni gluune le ku nak, lubaane lu yëla gut naar labaaga'ke xhgia'.

Le runn'be' ki yëla rnabe' kie' Jesús

30»Neda ti gun guuna le gnaaz kia'. Rchuug'be'a ka Xuuza rnabe'i'de neda, len le rchuug'be'a nak dxia'a, koma ti re'en'da guuna le ryaazlaadxa'a neda, Xuuz'ru Dios nusë'le'e neda len guuna le ryaazlaadxe'e Le'. 31Xhki neda rdujxaka'lau'a larakz kia', le ni ti yui'i. 32San zue' ye tue' rdujxaka'lau'e nia'a kia', len nëëz'da dxia'a ki le rdujxaka'lau'e'a yui'i. 33Lbi'ili psë'lak'li'ne bënni tzajnaab'kde Juan, len le' yajxaka'lau'e nia'a ki yëla li. 34San neda ti rxhënilaadxa'a le tujxaka'lau'ke bënni. Rnia' le ni naar gde'li'li yëla ruslá. 35Juan guke ka tu gi' le raaxh len run lni, len lbi'ili gu'uni'li uzi'li ley xhbei tuchi'iz. 36San napa le rdujxaka'lau kia' len zaki'i'r ka le dujxaka'lau'e Juan. Le neda ruuna, nak le Xuuz'ru Dios re' neda guuna, len runn'be' ki Le' nusë'le'e neda. 37Xuuz'ru Dios nusë'le'e neda len lekz'ka' rdujxaka'lau'e kia', zala lbi'ili ti nayëëni'li chi'e len ti nale'i'li'ne, 38len ti rnëëdzj'li latj xhtiidze'e zua' len lbi'ili koma ti rajle'li'ne bënni'a nusë'le'e Xuuz'ru Dios. 39Lbi'ili rseed'li Diidza La'ay gaazludzë' koma run'li lëëz udzëëli'li na' yëla naban tzalzu; ati zala Diidza La'ay rdujxaka'lau kia', 40lbi'ili ti re'eni'li giid'leen'li neda naar gap'li yëla naban'a.

41»Neda ti nayaadzji'da ki bunach layaazlaadxi'ke neda. 42Ati numbe'a lbi'ili len nëëz'da ki ti zua len lbi'ili yëla nadxi'i kie' Dios. 43Neda za'a lu le' Xuuza len lbi'ili ti rzi'li neda, nar'la za'tze bënni yubl ruune le rnaaz kie' lbi'ili uzi'li'ne bënni'a. 44¿Nakxh'kz gak tzajle'li, xhki rgiilj'zli gun xhën lza'a'li len ti rugiilj'li gun'li'ne xhën Dios lazdui? 45Tza gaki'li ki neda gdxia' lbi'ili xhgia' lau'e Xuuza; kuin'kze Moisés gdxie' lbi'ili xhgia', bënni'a lbi'ili nuxhënilaadxi'li'ne. 46Nar'la lbi'ili rajle'li'ne Moisés, utzajle'li neda lekz'ka', koma Moisés bzooje kia'. 47San xhki ti rajle'li le bzooje le', ¿Nakxh gak tzajle'li le rea' lbi'ili?»

Currently Selected:

Juan 5: PZD

Highlight

Copy