Hechos 5

Dula kie' Ananías len Safira

1San gzue' tue' bënni le' Ananías len dzaage'nu Safira nguul kie', beti'e tu xhyue'. 2Bënni ni beene diidza dzaag len nguul kie', ati bga'an'leene lati dumi'a ati ye lati bzue' lu naa'ke bënni gbaaz kie' Xan'ru. 3Pedro gudxe le':

—Ananías, ¿Bixhkia' bnëëdzju latj gnabe'i'de li' bënni xëwi len guune ga siye'i'du'ne Bë' La'ay kie' Dios ati bga'an'leenu lati dumi'a tzka le gulagiixhj'ke xhyu'a? 4¿Naru keg kiu' naki yu ni? Ati buudx beti'u, ¿Naru keg kiu' naki dumi'a? ¿Bixhkia'kza gdiilj'laadxu'u guunu ki? Dios'a gxhiye'i'du'ne, keg bunach'a.

5Buudx byëën'de diidza ni Ananías gbixe ati gutie'. Len yugute'ke bënni gulanëëz'de glaadxi'tzki'de. 6Na' gliid'bi bi'i kuidi, len gulutuli'bi'ne laari len yajka'chik'bi'ne.

7Ka tson ur gdëëd kati gyaaz'nu nguul kie' Ananías, len keg nëëzi'nu bixh guk. 8Pedro bnaab'de'nu:

—Gdixhji'i neda, ¿Ba gxhi'li tzka'z'a rnaali'a yu ni?

Lenu bubi'i'nu diidza:

—Ja' tzka gxhi'tu.

9Pedro gudxe'nu:

—¿Bixhkia'kza ben'li diidza dzaag si'be'li'ne Bë' La'ay kie' Xan'ru? Na' zuwak'bi bi yajka'chik'bi'ne bënni kiu' ati na'a lekz'ka' utzajka'chik'bi li'.

10Na'teez Safira gbixh'nu len gut'nu xhni'e Pedro. Kati gulayaaz'bi bi kuidi ni, gulale'i'bi'nu chi nat'nu len glua'bi'nu zajka'chik'bi'nu kuiti le'e bënni kieenu. 11Len yugute'ke bënni gdou'a, len bënni gulanëëz'de lea guk'a, glaadxi'tzki'de.

Le zian yëla wak xhën len le tunn'be tak

12Le zian yëla wak xhën len le tunn'be tak lau'ke bunach lu naa'ke bënni gbaaz kie' Xan'ru; len yugute'ke tudzaage lu Nchiil kie' Salomón. 13Ati bënni'a ye la'ke'a ti tuwaaxhj'de ladzaage leke, san yugute'ke bunach nuzua'ke leke ga xhën. 14Ley bënni ley nguul gulayaane tzka'ke bënni gulayajle'ke Xan'ru, 15Len tabiaj'ke bënni we'a la nëëz, tuxuáke leke lu blaag len lu da'a, naar kati Pedro tëëde zala xhuul kieeze tzajxua leke. 16Lekz'ka' bënni yëdz ga'la tadxiine Jerusalén nua'ke bënni we', len bënni rsaka'zi' leke bë' xëwi; len yugute'ke tu'ueake.

Tulaag'ke bënni gbaaz kie' Xan'ru

17San le' pxuuz blou len bënni'a nak'ke saduceos nakua'leene le', glake xhayeel, 18ati gulazëëne bënni gbaaz kie' Xan'ru len gulagu'e leke liidx'gia. 19San chi'dzë'ël'a tue' gbaaz la'ay kie' Xan'ru psaalje liidx'gia'a len bubiije leke, ati gudxe leke: 20«Gultziaj, gultzajsé lu gdou' len gulkixhji'de bunach diidza ki yëla naban» 21Ka nak diidza gulayëën'de'a, bayën bueikj dza'a gulayaazie lu gdou' len gulazulau'e tuseed'de.

Na' le' pxuuz blou'a len bënni'a nakua'ke len le' gululiidze bënni guul tuzeajni'i'de naar lakua'ke dxin'lau'i blou, len gulunabe'ke ki tzajxi'ke lu liidx'gia'a bënni gbaaz kie' Xan'ru. 22San kati bënni'a tun'chi'ke gdou'a guladxiine liidx'gia'a ti guludzëël'de leke. Lena'a guluweikje dudixhjë'ke, 23tanáke:

—Liidx'gia'a dxia'a'tit nayeyj, ati bënni'a rajake gdil nakua'ke tui'laadxi'ke ley ra puert'a; san kati psaalj'tu, nutunu budzëëli'tu le'i.

24Kati gulayëën'de le ni, bënni xan'ke bënni'a tun'chi'ke gdou' len bënni pxuuz blou'a tunaabi lza'a'ke gaxh'te gdxin lea rak'a. 25Na'teez bdxiine tue' bënni gudxe leke:

—Bënni'a lbi'ili glu'uk'li'ne liidx'gia, lu gdou' nakua'ke tuseed'de bënni yëdz.

26Bënni xan'ke bënni'a tun'chi'ke gdou'a dzaage bënni lze'e yajdiilj'ke leke; san tibi gulusaka'ke leke koma glaadxi'de bunach'a ka gna lulaadxi'ke leke giaj. 27Kati guludxiine'a guluche'ke leke lu dxin'lau'i blou'a, ati pxuuz blou'a gudxe leke:

28—Netu bzaaga'tu lbi'ili naar nuturnu kseedi'li le rak kie' bënni'a. ¿Ati bixh ben'li lbi'ili? Chi nudu nuzeeli diidza ni Jerusalén len ka' ni re'eni'li gdxia'li netu xhgia' ki yëla gut kie' bënni'a. 29Pedro len bënni'a ye la'ke gbaaz kie' Xan'ru gulubi'e diidza:

—Run'r bayuudx gzenaagi'tu'ne Dios ka bunach. 30Le' Dios kieke xuuz'xhtau'ru guul buspaane lu yëla gut Jesús, larakz bënni'a lbi'ili bdëëdi'li'ne bda'li'ne lu yaag kruuz. 31Dios bzue' Le' ga xhën kuiti le'e yubeel, len beene le' Bënni Blou len Bënni Rusle', naar bënni Israel lubi'i'laadxi'ke len Dios len lazi'ke yëla rzi'xhën ki xhtu'la'ke. 32Len le ni netu rdujxaka'lau'tu len lekz'ka' le' Bë' La'ay kie' Dios, le Dios rsë'le'e kieke bënni tuzenaagi'de Le'.

33Kati gulayëën'de le ni, guladze'itzki'de len gle'en'de ludëëd'de leke. 34San ladj'ke bënni'a tunabe'ke'a yu'e tue' bënni fariseo le' Gamaliel len nake bënni useed xhba kie' Dios len gdu yëdz tui'ke le' bala'an. Bënni ni gzui'de len gnabe'e labiaj'ke tuchi'i rayu'u bënni gbaaz kie' Xan'ru. 35Len chi nak ka' gudxe bënni'a tunabe'ke:

—Bënni Israel, re'e'ni gyuuli dxia'a bixh gun'li kieke bënni ni. 36Gultzajnei le guk zia'a kati gyase Teudas len bnëëzi kuine xhën len ka tap'gayua'ke bënni yajta'ke le'. San bënni ni guludëëd'de le' len bënni'a yajta'ke le' glas'laz'ze ka' ati na' buudx. 37Gdëëd ni, dza kati gulayaazie lu gich bunach, gyase Judas bënni Galilea len beene ga yajta'ke le' la'ke; san lekz'ka' guludëëd'de le' len yugute'ke bënni yajta'ke le' glas'laz'ze ka'. 38Le rak na'a, neda rzeajni'i'da lbi'ili ki ksank'li'ne bënni ni len tibi guunik'li'ne. Koma xhki le ni, nak le tun'ke bënni bunach unit'lau ka'az; 39san xhki nak le ruune Dios, nutunu gunn uznit'lau. Re'e'ni gyuuli ka gna chi rdil'li len Dios.

Leke guluzenaag'de le'. 40Ati gululiidze bënni gbaaz kie' Xan'ru len gulagiine leke ati guluzage'e ki tir lui'ke diidza lu Le' Jesús, chi nak ka' gulusan'ke leke. 41Bënni gbaaz kie' Xan'ru tudziiji'tzki'de gulurooje ga nakua'ke bënni'a tunabe'ke, koma Dios be'e leke latj lutzaage nia'a ki le' Jesús. 42Yugu dza tuseed'de bunach len tagixhjë'ke diidza kub dxia'a kie' Jesús le' Cristo lu gdou' len yu'u yu'u.

Currently Selected:

Hechos 5: PZD

Highlight

Copy