Hechos 20

Pablo riije Macedonia len Grecia

1Kati buudx gdëëd gyu'u ruzbë' ni, Pablo bliidze bënni'a tayajle'ke Xan'ru naar be'leene leke diidza. Chi nak ka' bzeide leke diidza len gyiije Macedonia. 2Gyiije yugute' yëdz'du nakua' ni' len rtip'laadxi'tzke bënni bë'chi'ru len xhtiidze'e; chi nak ka' bdxiine Grecia, 3ni' bga'ane tson beu'. Chi zuakz kie'le'e barku naar tziije Siria, kati gnëëz'de ki bënni Judea chi rë'nis'ke le' naar lazëëne le'. Lena'a bugie'le'e nëëz zuwëëje le yubl zga Macedonia. 4Ati yajak'leene le' Sópatro bënni xi'ine Pirro ki yëdz Berea; Aristarco, Segundo bënni Tesalónica, Gayo bënni yëdz Derbe, Timoteo, Lekz'ka' Tíquico len Trófimo, bënni nak'ke ki gia'a yeego ki Asia. 5Bënni bë'chi'ru ni gulanëëre len gulabëëze netu yëdz Troas. 6Ati netu gdëëd'r lni ki kati ta'we yët'xhtiil lea ti yu'u le rzaaxh ley, broj'tu yëdz Filipos lu barku, len kati guk ga'yu' dza yajxhënk'tu'ne yëdz Troas, ati ni' bga'an'tu gaadx dza.

Pablo riije yëdz Troas

7Dza kati rugie'la' seman budzaag'tu naar gaag'tu yët'xhtiil'a ka pseed'de ro'u Xan'ru, len Pablo rui'leene diidza bënni'a tayajle'ke, ati run'te kie' bayuudx grooje dza yubl'a, lena'a be'leen'tekze leke diidza bdxin'te laadxi'yeel. 8Len nudzaag'tu yu'u zua xhtza' ga nuga'la'tzka'ke gi'; 9ati tuubi bi'i kuidi bi leebi Eutico rë'bi ra bentan. Ati le' Pablo xhtzei be'tzke diidza na' gdëëd yeel lau'bi bi'i ni, len kati chi ras'bi, gbixh'bi le bunn yu'u zua xhtza'; len nat'te'bi guluchise'bi. 10Na' Pablo bdinie, yajxue'bi len bniide'bi, ati gudxe bënni bë'chi'ru:

—Ti gaadxi'li; rna'bi.

11Chi nak ka' Pablo bubeene le yubl, bxhuuxhje yët'xhtiil'a, gda'we len psiuudxe be'leene leke diidza len bdxin'te gyeni. Na' buze'e. 12Ati bi'i kuidi'a, rna'bi zuche'ke'bi, ati le ni ptip'tzka'laadxi'ke.

Pablo rdxiine yëdz Mileto

13Netu gnëër'tu len gyu'u'tu barku len bdxin'te'tu yëdz Aso len ni' glëëz'tu'ne Pablo ka chi nun'tu diidza, koma le' gde'le'e nëëz yu. 14Kati chi budzaag'tu'ne lu yëdz Aso, le' gyu'u'leene netu lu barku len gyaj'tu yëdz Mitilene. 15Broj'tu ni', ati dza yubl'a gdëëd'tu ga'la yëdz Kio, len dza yubl'a bdxin'tu ra nis ki yëdz Samos. Len ye tu dza ka' gyu'u'tu nëëz ati bdxin'tu yëdz Mileto. 16Ben'tu ki koma Pablo tir gu'un'de tzei'de zi' Asia, lena'a tir gyiije Éfeso, koma rake ziuub gdxiine Jerusalén, ati ka nak le gunn, chi zue' ni' kati kie'la lni ki Pentecostés.

Diidza le rui'leene Pablo len bënni guul tuzeajni'i'de Éfeso

17Kati zue' yëdz Mileto Pablo bliidze bënni guul tuzeajni'i'de ki dxin'lau'i kieke bënni'a nayajle'ke yëdz Éfeso. 18Kati guladxiine gudxe leke: «Lbi'ili nëëzi'li ka chi gzu'glëëza kati zia'a gzulau'za riida yëdz ki Asia ni. 19Gdu nëëz chi gzua'leena lbi'ili ruuna xhchiine Xan'ru len yëla nëxhj'laadxi, chi grëëdxa, len chi gdëëd'tzka bagi'i nia'a ki le te'en'de lusaka'ke neda bënni Judea. 20San ti psaana kixhji'da lbi'ili le nak dxia'a kieeli, len pseed'da lbi'ili lau'i lau ka' len lekz'ka' liidx'xhlatj'li. 21Ley bënni nak'ke bënni Judea ley bënni ti nak'ke chi guudx'ka'ne lubi'i'laadxi'ke len Dios len layajle'ke len Xan'ru Jesús. 22Ati na'a ziija Jerusalén, ka rnabe'i'de neda le' Bë' La'ay kie' Dios, len ti nëëz'da bixh rbëëz neda ni'. 23Tuuz le chi nëëz'da nak ki yugute' yëdz ga riija, le' Bë' La'ay kie' Dios rne' ki rbëëz neda liidx'gia len le zian'te yëla rtzaag. 24San tibi ruuni neda ki yëla naban kia', naar gunn ksiuudxa xhchiina len yëla ruzakalaadxi'i, len guuna le nuzue' lu na'a Xan'ru Jesús le nak tzajtixhjë'a diidza kub dxia'a ki yëla nadxi'i kie' Dios.

25»Len na'a nëëz'da dxia'a ki tir yule'i'li neda tzka'li chi gdixhji'da lbi'ili yëla rnabe' kie' Dios 26Lena'a re'en'da kixhji'da lbi'ili ki tirbi xhgia' nabaaga'a kieeli, 27koma chi gdixhji'da lbi'ili gdu ka nak le Dios chi nuune guune, len tibi pka'chi'da lbi'ili. 28Lena'a, gulun'chi'i kuin'li len gulun'chi'i dxin'lau'i kieke bënni'a nayajle'ke, ga nuzue' lbi'ili le' Bë' La'ay kie' Dios naar gun'chi'li dxin'lau'i kieke bënni'a nayajle'ke Dios, le Le' gu'uwe len xhchën'kze. 29Nëëz'da ki kati neda wëëja uliide bënni yubl ka bëku'zuuga znia', len ule'en'de luznit'lau'ke dxin'lau'i kieke bënni'a nayajle'ke. 30Len ladj'kz'li layas'ke la'ke bënni lazi'ye'ke naar bënni'a tayajle'ke'a tzjak'leen'ke leke. 31Gulgui'laadxi; gultzajnei ki gdu tson iz ni, chi be'leena lbi'ili diidza reel len te'dza len nutzaag'tzka kieeli.

32»Na'a, bë'cha'a, rka'ana lbi'ili lu ne'e Dios len lu yëla rak'len kie'. Le' nape yëla wak guune ga xën'li lu yëla rajle' kieeli len gunne yugute' le nuxëne'laadxi'ke bënni Le' grëe'. 33Tibi xhdumi'li len tibi xha'li gzelaadxa'a. 34San, nëëzi'kz'li dxia'a lbi'ili ki len na'a ni beena dxin ki yugu le byaadzj kia' len kieke bënni gulakua'leene neda. 35Chi pseedi'tzki'da lbi'ili ki ka' rala gun'li dxin len gak'leen'li'ne bënni nayaadzji'kde, tzajnei'li xhtiidze'e Xan'ru Jesús le gne': “Bixhgabar'ke bënni tunëëdzje ka bënni tazi'e.”»

36Buudx gne' ki, Pablo bzechu xhiibe len yugute'ke glui'leene diidza Dios. 37Yugute'ke gulabëëdxe, guluniida lza'a'ke len gla'we bxhidu Pablo. 38Len guluwi'i'ni'tzki'de, koma gudxe leke ki tir lule'i'de le'. Chi nak ka' yajak'leene le' ra barku'a.

Currently Selected:

Hechos 20: PZD

Highlight

Copy