Hechos 18

Pablo lu yëdz Corinto

1Gdëëd guk le ni, Pablo brooje Atenas len gyiije Corinto. 2Ni' budzaage tue' bënni Judea le' Aquila, len ze'e yëdz Ponto. Len zia'a bdxin'gaaze zuze'e Italia dzaage'nu nguul kie' Priscila, koma Claudio bënni rnabe'e Roma gnabe'e ki yugute'ke bënni Judea lurooje yëdz Roma. Pablo yajyue leke 3ati koma leke nap'ke larakz dxin le nape Pablo, le tuune nak yu'u laari, na' bga'an'leene leke naar luune dxin tuuz. 4Ati tza tza tu'ueak'laadxi'ke Bënni Judea Pablo riije lu yu'u useed kieke, ati raje'leene leke diidza naar layajle'ke ley bënni Judea ley bënni ti nak'ke bënni Judea.

5Kati Silas len Timoteo guladxiine za'ke Macedonia, Pablo nui'laadxi'tzke rgixhjë'e xhtiidze'e Xan'ru, len rlui'de bënni Judea ki Jesús nake le' Cristo. 6San leke gulazulau'ke tudabaaga'ke lau'e len tutzag'yuudxe le' diidza; ati Pablo gdxiibe xhe' lau'ke le ti gulazi'ke le', len gudxe leke:

—Larakz ikj'li ubia xhgia' kieeli; neda tir gak'lu'na'a lbi'ili. Na'dza kie'la'a tziija len bënni ti nak'ke bënni Judea.

7Burooje lu yu'u useed ni len gyiije liidxe bënni le' Ticio Justo, bënni riijilaadxe'e Dios len zue' kuiti yu'u useed ni. 8Ati Crispo, bënni blou ki yu'u useed ni, len tzka'ke bënni nakua'ke liidxe gulayajle'ke Xan'ru. Len lekz'ka' zian'ke bënni Corinto, kati gulayëën'de xhtiidze'e Xan'ru, gulayajle'ke len guludiile nis. 9Tu dzë', Xan'ru blui'lau'e len Pablo len gudxe le': «Ti gaadx'du; gyaj'leen, len ti ksaanu gui'u xhtiidza'a. 10Koma neda sa'leena li' len nutunu gunn bi guuni li', koma bunach zian nakik'de kia' lu yëdz ni.» 11Lena'a Pablo bga'ane Corinto tu iz yu gatzj, len rseed'de bunach xhtiidze'e Dios.

12San dza kati gnabe'e Galión lu yëdz Acaya, bënni Judea gulutzaag lza'a'ke len guludabaaga'ke Pablo; ati guluche'ke le' yulau'i 13len gle'ke bënni rnabe'e:

—Bënni ni rde' run'gan'de bunach naar layiijilaadxi'ke Dios, na'dza'l ka rna xhba kietu.

14Pablo chi ziije gui'e diidza, kati Galión gudxe bënni Judea:

—Nar'la nak bil xhgia' u bil'le le ku nak dxia'a beene, neda ubë'a gzenaag'da lbi'ili bënni Judea; 15san na'a le ni nak xhtiidza'li, lake bënni laadz'li, len xhba kieeli, gulkueki'xhbei lbi'ili, koma neda ti re'en'da gutza'a lu diidza bixhj ni.

16Len bubiije leke yulau'i. 17Na' yugute'ke gulazëëne Sóstenes, bënni blou ki yu'u useed'a, len na'teez glutie' le', nchiil yulau'i'a. San tibi pki'i le' Galión le ni.

Pablo rudxiine Antioquía

18Ye zian'r dza bga'ane Pablo Corinto. Chi nak ka' bzeide leke diidza bënni bë'chi'ru, ati dzaage Priscila len nguul kie' Aquila, gulayaazie lu barku zjake yu Siria. Len lu yëdz Cencreas kati zia'a tzaazie lu barku pchuuge gdu gitza ikje, naar guune le chi nuxënelaadxe'e Dios rala guune. 19Kati guladxiine Éfeso, Pablo pka'ane Priscila len Aquila ati gyiije lu yu'u useed, len yajtil'e diidza len bënni Judea tudzaage ni'. 20Leke glatayui'de le' jga'an'leene leke ye chop tson dza, san le' ti gu'un'de, 21na' bzeide leke diidza len gudxe leke: «Xhki Dios gunne lsenz, wëëda le yubl duyua' lbi'ili.»

Gdëëd ni gyaazie lu barku len ziije Éfeso. 22Kati bdxiine Cesarea, gyiije Jerusalén yajyue dxin'lau'i kieke bënni'a nayajle'ke, len chi nak ka' gyiije Antioquía.

Pablo riije yëdz Galacia len Frigia

23Gdëëd gzue' ni' zian dza, brooje le yubl yajtëëde tu tu yëdz ki Galacia len Frigia, len ptipe'laadxi'ke bënni'a nayajle'ke.

Apolo rgixhjë'e xhtiidze'e Dios lu yëdz Éfeso

24La dza niiz bdxiine yëdz Éfeso tue' bënni Judea le' Apolo, len nake bënni yëdz Alejandría. Nabe'i'tzki'de rue'e diidza len numbe'tzke Diidza La'ay kie' Dios. 25Chi nazeed'de lu nëëz kie' Xan'ru, len gdu laadxe'e rseed'de bunach ka nak kie' Jesús, zala le nanëëz'z'de nak ka pkiile nis Juan. 26Apolo gzulau'e rue'e diidza yaalj lu yu'u useed; san kati Priscila len Aquila gulayëën'de le', guluche'ke le' kiizi len guluseed'de le' nakxh'tek nak nëëz kie' Dios. 27Kati Apolo gu'un'de tziije lu yëdz Acaya, bënni bë'chi'ru glak'leene le' len guluzooje tu gich kieke bënni'a tayajle'ke len nakua'ke ni' naar lazi'ke le' dxia'a. Kati bdxiine yëdz Acaya, guk'leen'tzke bënni'a lu yëla rak'len kie' Dios chi nayajle'ke. 28Koma lau'ke yugute'ke rzua'zake'e len bënni Judea len diidza le ti runn ludabaaga'ke, len rguune dxin Diidza La'ay kie' Dios naar rlui'de leke ki Jesús nake le' Cristo.

Currently Selected:

Hechos 18: PZD

Highlight

Copy