Hechos 16

Bi'i Timoteo riaj'leemi leke Pablo len Silas

1Pablo bdxiine yëdz Derbe len yëdz Listra, ni yajxa'ke'bi tuubi bi'i nayajle'bi leebi Timoteo, xhna'bi rak nguul Judea len nayajle'nu ati xuuz'bi rak bënni griego. 2Bënni bë'chi'ru ki yëdz Listra len ki yëdz ki Iconio diidza dxia'a tui'ke kieebi. 3Pablo gu'un'de ki bi'i Timoteo tziaj'leemi le', ati beene ga guluchuuge rui'i ga'ldia' kieebi ka naleeb'kde tuune bënni Judea, naar ti ladza'a ikj'ke bënni Judea nakua'ke lu yëdz ni, koma yugute'ke nëëzi'kde ki xuuz'bi rak bënni griego. 4Yugute' yëdz ga tadëëde, tagixhji'de bënni bë'chi'ru le rala luune ka na' gulanake bënni gbaaz kie' Xan'ru len bënni guul tuzeajni'i'de ki dxin'lau'i kieke bënni'a nayajle'ke Jerusalén. 5Lena'a dxin'lau'i kieke bënni'a nayajle'ke gulakua'k tzutzu lu yëla rajle' kieke, len dza len dza tayaane bënni tayajle'ke.

Le blui'de le Dios Pablo

6Le' Bë' La'ay kie' Dios ti be'e leke latj lagixhjë'ke xhtiidze'e Xan'ru lu yëdz ki Asia, ati guladëëde gia'a yeego ki Frigia len Galacia, 7len guladxiine ra bza' ki yu Misia. Ni' gle'en'de layaazie lu yu ki Bitinia, san Le' Bë' La'ay kie' Jesús ti be'e leke latj. 8Lena'a tu guladëëd'ze lu yu ki Misia, len yajake ra nis xhën ki Troas ga tadxin barku. 9Ni' tu dzë' Dios blui'de le' tue' bënni yëdz Macedonia, ze' ratayui'de le' rne': «Gdëëd yëdz Macedonia len guk'leen netu.» 10Na'teez buudx ble'i'de le ni Pablo, bpa'a'tu kietu tziaj'tu Macedonia, le guk'be'i'tu ki Dios rliidze netu tzajtixhjë'tu diidza kub dxia'a ni.

Tagixhjë'ke xhtiidze'e Dios lu yëdz Filipos

11Gyaaz'tu lu barku lu yëdz Troas len tu nëëz gyaj'tu zga yëdz Samotracia, len dza yubl'a bdxin'tu Neápolis. 12Ni' gza'tu gyaj'tu Filipos, latj ga nuun'kde kieke bënni Roma, tu yëdz blou ki yu Macedonia. Ni' gzua'tu chop tson dza. 13Dza Tu'ueak'laadxi'ke Bënni Judea broj'tu lu yëdz'a gyaj'tu ra yeego, ga guki'tu ki bënni Judea raje'leen'ke diidza Dios. Grë'tu len gdixhji'ktu'nu diidza kub dxia'a nguul guludzaag'nu ni'. 14Tuunu nguul ni leenu Lidia; nguul yëdz Tiatira len ruti'nu laari gach le zaki'i'tzki. Nguul ni riijilaadxi'nu'ne Dios ati Le' gdaane ikj'laadxi'dau'nu len bzenaag'nu diidza le rue'e Pablo. 15Bdiil'nu nis, len lekz'ka' yugute'ke bënni nakua'ke liidx'nu, len chi nak ka' gutayui'nu lau'tu:

—Xhki leel ba rlui' lbi'ili ki nayajle'a'ne Xan'ru, gultza' jga'an'li liidxa.

Len bdayë'li'nu netu jga'an'tu.

16Tu lyas, kati ziaj'tu zaje'leen'tu'ne diidza Dios, dutzaag'bi netu tuubi bi'i nguul yu'u leebi bë' xëwi le run ga rne'ya'a'bi. Len rumi ga ra'ta'tzka kieke dumi bënni xami tzka rne'ya'a'bi. 17Bi'i nguul ni gzulau'bi za'leemi netu dzaag'tu'ne Pablo, le ruskua'bi:

—¡Bënni ni tuune dxin kie' Dios, len tagixhji'de lbi'ili nakxh gak ulaali!

18Ki'tekz bemi zian dza, kati Pablo bdza'a ikje, len bueikje len gudxe bë' xëwi'a lea yu'u lebi:

—Lu le' Jesucristo, rnabe'i'da li' yurooju.

Len na'teez bë' xëwi'a buroj lebi.

19San kati bënni xami'a gulak'be'i'de ki tir nak'bi bach gnëëdzj'bi kieke dumi, gulazëëne Pablo len Silas len guluche'ke leke nchiil ki ye'i, lau'ke bënni tunabe'ke. 20Guluzua'ke leke lau'ke bënni tuchuug'be'e, len gulanake:

—Bënni Judea ni tun'tzke ruzbë' lu yëdz kieeru ni, 21len tuseed'de bunach, le ro'u ti runn si'ru len gun'ru koma nak'ru bënni yëdz Roma.

22Na' bunach zian guludabaaga'ke leke, ati bënni'a tuchuug'be'e gulunabe'ke luleikje xha'ke len lagiine leke len gba'ay. 23Buudx gulagiine leke xhtzei, gulagu'u'ke leke liidx'gia len gulunabe'ke bënni'a nak'lu'ne'e liidx'gia'a ki gun'chi'tzke leke. 24Bënni ni buudx gulunabe'i'de le', glu'e leke xhbëëdxi'it liidx'gia'a len psëëne ni'a'ke lu yu len yaag.

25San laadxi'yeel'a tzal Pablo len Silas tui'leene diidza Dios len tul'e wil kie' Dios, len bënni'a ye la'ke dzë'ë'ke liidx'gia'a tayëën'de leke, 26gdëëd'tzka tu utit xhën le pxiiz xhliibi liidx'gia'a. Na'teez gulayaalj zura puert ki liidx'gia'a, len yugute'ke bënni'a dzë'ë'ke liidx'gia'a guluweedx du gia'a lea naaga'ke. 27Kati bënni'a run'chi'e liidx'gia'a bubaane ati ble'i'de ki yugute' puert ki liidx'gia'a nayaalj'k, gliije gia'tuchi kie' ki gdëëd'de kuine, koma guki'de ki yugute'ke bënni'a dzë'ë'ke liidx'gia'a chi gulaxhunj'ke. 28Ati Pablo bisku'e le':

—¡Tibi guundu kuinu, ki ni zua'tu yugute'tu!

29Na' bënni'a run'chi'e liidx'gia ni bnaabe gi', len rxiti'ze gyaazie len yëla raadxi bzechu ikje lyu't xhni'e Pablo len Silas. 30Chi nak ka' bubiije leke len bnaab'de leke:

—Bënni, ¿Bixh rala guuna ki yula'?

31Leke gulubi'i'ke diidza:

—Gyajle'e Xan'ru Jesús, len ulou' len lekz'ka' luláke bënni nakua'ke liidxu.

32Len gulagixhji'de le' xhtiidze'e Xan'ru dzaage bënni nakua'ke liidxe. 33Na'teez chi'dzë'ël'a, bënni'a run'chi'e liidx'gia'a gdiibe we' kieke'a, len chi nak ka' le' len yugute'ke bënni nakua'ke liidxe guludiile nis. 34Buche'e leke liidxe len bnëëdzje le la'we, ati le' len yugute'ke bënni nakua'ke liidxe tudziiji'tzki'de le gulayajle'ke len Dios.

35Gyeni ziil'a, bënni'a tuchuug'be'e gulusë'le'e la'ke bënni tun'chi'ke yëdz'a tzajyu'ke bënni'a run'chi'e liidx'gia'a ki yusaane Pablo len Silas. 36Bënni'a run'chi'e liidx'gia'a gudxe Pablo:

—Bënni'a tuchuug'be'e chi gulunabe'ke ki yusaana lbi'ili; na'a gunn waj'li len yëla rë'dxi.

37Ati Pablo gudxe bënni'a tun'chi'ke yëdz'a:

—Netu nak'te nabaab'tu yëdz Roma, gdin'li netu lau'i lau ka' len keg bi grë'xhbei kietu, len glu'u'li netu liidx'gia; ¿Ati na'a baga'chi'z ka' re'eni'li usan'li netu? ¡Ti gak! Leke rala liide ki lubiaj'ke netu.

38Bënni'a tun'chi'ke yëdz'a gulagixhji'de le ni bënni tuchuug'be'e, ati bënni ni bengaadxi leke kati gulayëën'de ki bënni ni nabaab'ke yëdz Roma. 39Na' yajake bënni'a tuchuug'be'e yajnaab'kde yëla rzi'xhën Pablo len Silas, len gulubiije leke len glatayui'de leke lurooje lu yëdz ni. 40Kati gulurooje liidx'gia'a Pablo len Silas ye'wake liidx'nu Lidia len buudx yajyu'ke bënni bë'chi'ru len gulutipe'laadxi'ke, guluza'ke ni'.

Currently Selected:

Hechos 16: PZD

Highlight

Copy