Marcos 16

Nai Jesus mori suli siil

(Mateus 28:1-8; Lucas 24:1-12; João 20:1-10)

1Nii ada siil, leolbaan Sabdu, roo Judeu room ni leolbaan oid arohan. Arfiil leol mata duu soub, Maria ois aldeia Madala, Maria kiid selu (Tiago ni ina) nor Salome laa aal mina megi. Deslaa nii ada siil, room naha laa fois mina megi la Jesus ni maet isi, tuir roo Judeu room lisan. 2Nii leolbaan Domingu, rae fuu buti, room ubu teul laa nii rate too. 3-4Nii saal fusu, room kase la loor dega, “Orsiid seen fee naha tulun iit oid duud sai haut tuu ois rate gugu? Iit ubu teul duud haut too ba leob, deslaa haut too tuu tus-tus.”

Mahee arfiil room raat nii hati kidura, room fei haut too muda la seri telo soub. 5I room tafae la nii Jesus ni rate lala. Mahee room hleeh tus-tus, deslaa room eot maen ulkoil iid medei bael her room lima doloo. Ura ni hena manaru i buti tus-tus. 6I maen too tafaar la room dega, “Iim ba leob matau! Au taad iim maa nae Jesus ois aldeia Nazaré, iid bae fee roo loet nii kruus. Ura ba nei nii uri soub. Deslaa Ura mori siil soub! Maa iim fei rasik hati kiid bae room haat Jesus ni maet isi la too, mamu telo soub! 7Mahee iim suli hur-huur laab! I iim laa nee taad la Pedro nor Jesus ni eskolanti room selu dega, Jesus mori siil soub. Ura nii saal la Galileia. Depois room hii asour Jesus nii la-ura, tuir naam bae fee Ura promete soub la room. Agora, iim suli laab.”#Mateus 26:32; Marcos 14:28

8Deslaa room matau raat todood, room flaer enene i suli hur-huur. Nii saal, room ba nee taad la roo iid, deslaa room matau tus-tus.

Nai Jesus atuud lolo la Maria ois aldeia Madala#16:9 16:9-20: Eskritura tero Gregu seir muna faklau, uri Novidadi Kode toom Marcos remata nii versikulu 8. Eskritura tero Gregu seir hlai manaru, remata nii versikulu 20.

(Mateus 28:9-10; João 20:11-18)

9Nii leolbaan Domingu belebuus, artuub bae fee Jesus atuud lolo muun la fee Maria ois aldeia Madala. Hiin ura, muna Jesus asai espiritu klao liim-nai-ruu ois ura ni hua-lala. 10Maria fei telo Jesus, Maria suli enene laa nee taad la room bae fee muna toom Jesus too. Raat nii la-ura, roo haigaa hii hua-lala muit nor sero bael, deslaa room anoin Jesus ni mate. 11I Maria nee taad la room enlaa Jesus mori siil soub i ura fei Jesus nor ni mata rasik, mahee room ba fiar.

Nai Jesus atuud lolo des la ni eskolanti ubu ruu

(Lucas 24:13-35)

12Faklau telo ura, Jesus ni eskolanti ubu ruu lolai laa nii aldeia kiid. Nii saal fusu, Jesus atuud lolo la room, mahee Jesus ahe foi telo soub. 13Entaun room ubu ruu suli siil, oid laa nee sai la room taha dega, “Iim fliik laed maa! Hina tilu kani, aem saak loor nor Jesus nii saal.”

Mahee ba nei artuub iid fee fiar la room.

Nai Jesus nee orden oid nee sai Nai Maromak ni Novidadi Kode

(Mateus 28:16-20; Lucas 24:36-49; João 20:19-23; Apostlu room ni Istori 1:6-8)

14Faklau telo, Jesus atuud lolo la Ni eskolanti ubu saguul-resi-iid, arfiil room aa bael. Jesus kase la room nor teor-hua sio dega, “Iim uri, ulu hatu sio tus-tus! Roo seirgaa tafaar soub la iim dega, Au mori siil soub ois maet. Room eot Au nor room mata rasik, mahee iim ba fiar manhati.”

15I Jesus dega la room, “Iim laa nii mundu tema oid nee sai Au Novidade Kode uri la roo haigaa.#Apostlu room ni Istori 1:8 16Seen fee fiar ma Au, i saraen, Nai Maromak hii salva ura, i ura meit hii mori nor Nai Maromak toon la toon nii lalehan. Mahee seen fee ba fiar, Nai Maromak hii kastigu ura, i ba sium ura nii lalehan. 17I roo bae fee fiar ma Au, room hii sium kbiit ois Nai Maromak oid fun milagre man toeh sai espiritu klao oid Au gala. I Nai Maromak hii fun room kase nor teor selu bae fee muna room ba taad. 18I se room fael sohai bae fee nei veneno ka room eun saal veneno, room hii ba eot naam iid. I arfiil room tuul lima la roo moras, roo moras hii sai kode.”

Nai Jesus sae la lalehan

(Lucas 24:50-53; Apostlu room ni Istori 1:9-11)

19Arfiil Nai Jesus kase telo meit nor Ni eskolanti room, Nai Maromak asae Ura la lalehan. I Ura medei nii Nai Maromak ni lima seri doloo.#Apostlu room ni Istori 1:9-11

20Faklau telo, Jesus ni eskolanti room fun tuir Ura ni orde. Room laa nii mundu tema, oid nee sai enlaa Jesus ni Novidade Kode. Nai Maromak meit nee kbiit la room oid fun milagre tuir naam bae fee Jesus tafaar soub la room. Manura, roo leob fei soub dega Novidade Kode ura doloo didi.

Currently Selected:

Marcos 16: BMGM

Highlight

Copy