Luhzaz 23

Yezsuz Zoah Daenh Goangz Mwz Hawj Bihlazdoz

1Boangx goanz naeh daengzle zowz Yezsuz mwz dih Bihlazdoz, laux saeq gvanx mbanj naeh. 2Yaq hoakzaqnaeh gauq dix: "Goanz naeh coak puj Yaeuhtaiq piu, mboq jinx kae coiq hawj laux hongz Kaixsax, naengz rongx hoakri zawh Jizduz, zawh laux hongz ux." 3Bihlazdoz cham Yezsuz: "Mawz zawh laux hongz puj Yaeuhtaiq vah?" Yezsuz yaeng dix: "Zawh gaemz mawz hax naeh." 4Bihlazdoz haxdoq sowh goanz gvanx puj mbud dij Sen naeh daj daengzle: "Gux cha mboq zoah goanz naeh hoak loang gaeng." 5Gaj paenqdix gajfa tip, hax: "Dix daeq ndaw Zazliqliq maz taengdeg inxnaeh, yuq daengz mbanj Yaeuhdaq zau daengzle, coak daenh mboq biak kauq puj saeq."

Yezsuz Zoah Daenh Goangz Mwz Hawj Laux hongz Cizlih

6 Bihlazdoz daeh ruxnyinz gaemz naeh zoq cham: "Gaenqdix zawh dij goanz ndaw Zazliqliq vah?" 7Laemh zwz naeh mbanj Zazliqliq zawh dih laux hongz Cizlih gvanx, yaq laemh le vaenz gaengnaeh laux hongz Cizlih goj yuq ndaw Yezluqsaxlaengx. Bihlazdoz zoq aeu Yezsuz soangq bae hawj Cizlih. 8Cizlih leztaen Yezsuz dix zoq faengz taeuq. Unj, dix ndaej ruxnyinz suq saeh Yezsuz naeh, dix zawx taen Yezsuz ndowj taeuq eh, ngwz Yezsuz hoak sowh saeh mboq sanz taen naeh hawj dix lez. 9Yaq dix cham Yezsuz lai taeuq, gaj Yezsuz gaemz rawz goj mboq yaeng. 10Sowh goanz gvanx puj mbud dij Sen naeh daj sowh lauxswz zau Sw Dij Sen naeh, paenqdix tip taeuq, dwnq maz gauq Yezsuz. 11Cizlih daj bin dix qiz Yezsuz, daeu'uaj Yezsuz, aeu sowj yawz sowj ndae hawj dix nungh, zowz dix mwz dih Bihlazdoz naeh. 12Koax daekgoanq, Cizlih daj Bihlazdoz dungzhwnq taeuq, gaj vaenz gaengnaeh, doiqdix byenqbaenz dungzbownh.

Yezsuz Zoah Panq Yuq Ndaw Maexngamzchaz Tai

13 Bihlazdoz rongx sowh goanz gvanx puj mbud dij Sen naeh, puj saeq puj Yaeuhtaiq, dij goanz dihnaeh maz, 14daj paenqdix hax: "Gaenqsu gaemh goanz naeh maz dih gux inxnaeh, hax dix coak daenh, gux haeuz yuq doqnaj su jinj dix sowh gaenqsu gauq naeh, gaj cha mboq zoah dix ijrawz hoak loang, 15daengz Cizlih goj cha mboq zoah dix hoak loang gaeng, daeuq aeu dix soangq maz dih gux inxnaeh. Hoakzaqnaeh lez maz, dix mboq hoak gaeng saeh hoj tai. 16Baenzzaqnaeh gux daz hwt dix, dup dix, mbeh'ej zoangq dix eh." 17#23:17 Mbangj bwnz miz gaemz naeh: Zwzndai, nanghgaj taeng sowh zwz Jeng Gvaq naeh, Bihlazdoz zoq biak daengzle zoangq goanz puj kaenglauz ux. 18Goanzlai caqsiq zaemh rongx: "Kaj goanz naeh, zoangq Bazlazbaz hawj piu!" 19Laemh goanz Bazlazbaz naeh dix yaix daenh mboq biak kauq puj saeq Loahmax, luanq kaj dij goanz, gaenqdix zoah aeu mwz kaeng ndaw lauz. 20Bihlazdoz zawx zoangq Yezsuz, dix zoq daeuq daj paenqdix hax mbaedmawq. 21Gaj daengzle gajfa rongx chungndae, paenqdix hax: "aeu dengdinz doag dix mwz maexngamzchaz! Aeu dengdinz doag dix mwz maexngamzchaz!" 22Bihlazdoz mbaed daih sam daj paenqdix hax: "Goanz naeh hoak loang gaeng mux? Gux cha mboq zoah dix hoak loang gaeng hoj tai. Baenzzaqnaeh gux hwt dix, dup dix, yaq zoangq dix." 23Paenqdix goq rongx rongx, yaix Bihlazdoz aeu dengdinz doag Yezsuz mwz maexngamzchaz, daengzle rongx uax uax gvaq, gaj mboq hawj gaj mboq yaq. 24Bihlazdoz haxdoq daengzle dix hoakzaq gaemz daengzle hax naeh, 25zoangq goanz paenqdix vanz, goanz yaix daenh mboq biak kauq puj saeq Loahmax daj luanq kaj goanz zoah aeu mwz kaeng naeh, gaj hoakzaq gaemz paenqdix hax naeh doiq Yezsuz.

Yezsuz Zoah Daenh Aeu Dengdinz Doag Mwz Maexngamzchaz

26Gau zowz Yezsuz bae naeh, Cizmaenh goanz ndaw Guxliqnaiq naeh daeq ka'mowngz maz, gvaq zoah dihnaeh. Paenqdix zoq jenj dix, aeu maexngamzchaz nyaengx mwz now dix, hawj dix baz nowngzlaeng Yezsuz. 27Miz goanz raengh taeuq nowngzlaeng Yezsuz, puj nyingz loah'ej haej dix vauhvauh. 28Yezsuz ueqlaeng bae daj paenqdix hax: "Lugnyingz ndaw Yezluqsaxlaengx aj, laek haej laeng gux, haej laeng hoakri daj lug hoakri. 29Unj zaekgaj taeng zwz miz saeh dwx naeh yah, dij goanz rux hoakzaqnaeh hax mboqyaq, paenqdix hax: ‘Sowh puj naengz mboq sanz rungj lug naeh, sowh puj naengz mboq sanz bazlug naeh, sowh puj naengz mboq sanz zowngx lug eng naeh, gaenqsu faengz yah.’ 30Taeng zwz naeh, dij goanz daj bo dwx hax: ‘Laemx daeuj dip ndang piu!’ Daj bo ix hax: ‘Moak piu!’#23:30 Gaemz kauq naeh haeuz yuq Sw Hoahciz'az 10:8. 31Sowh saeh naeh paenqdix hoak bae doq sowh maex naengz zaeu naeh, haenx, sowh maex choj naeh paenqdix rux hoakzaqrawz hoak mux?"

32Paenqdix goj zowz mwz song goanz puj mbowq, aeu daj Yezsuz zaemh yuq now maexngamzchaz kaj. 33Mwz taeng dih ux, rongx hoak Goahgoahtaz,#23:33 "Goahgoahtaz" zoq zawh hax: "dih miz nduk to dij goanz naeh." zoq yuq dihnaeh aeu dengdinz dog Yezsuz mwz maexngamzchaz, goj aeu dengdinz dog song goanz puj hoak loang mwz maexngamzchaz, goanz ux yuq baih qensa, goanz ux yuq baih qensaix, dangq goanz dangq yuq now zaq maexngamzchaz ux. 34Bin maz ipqen, baen ndangnungh Yezsuz.#23:34 Mbangj bwnz naengz miz gaemz naeh: 34Yezsuz hax: "Dez aj, paenqdix mboq ruxndeq hoakri hoak gaeng, yangq gaenq hoakloang paenqdix!" Sowh bwnz ndowj nyeuz daengzle naeh mbangj bwnz mboq miz gaemz naeh. 35Goanzlai in yuq haenz lez, puj saeq kosaemj dix, hax: "Dix jeuq ndaej daenh, jixzawh dix zawh Jizduz, zawh goanz dij Sen lowg naeh, haeggaj jeuq hoakri ndeh!" 36Bin goj daeq mwz baihnaj daeu'uaj dix, aeu laeujpaed hawj dix ndut,#Lownx 69:21. 37hax: "Jixzawh mawz zawh laux hongz puj Yaeuhtaiq, jeuq hoakri mawz ndeh!" 38Now to Yezsuz miz kvaix ux hoakzaqnaeh laiz: "Goanz naeh zawh laux hongz puj Yaeuhtaiq."

39Song goanz puj hoak loang zoah aeu dengdinz doag mwz maexngamzchaz naeh, miz goanz ux kosaemj Yezsuz, hax: "Mawz zawh Jizduz wzmax? Jeuq hoakri mawz daj piu ndeh!" 40Goanz gaengnaeh zoq hwt goanz hax Yezsuz naeh, hax: "Mawz goj zaemh zoah aeu dengdinz doag mwz maexngamzchaz zaekgaj tai, naengz mboq mbu dij Sen maj? 41Gaenqraeuz zoah aeu dengdinz doag mwz maexngamzchaz zawh hohdih, unj gaenqraeuz hoak gaenqndog zoq miz gaenqndog. Gaj goanz naeh mboq sanz hoak loang saek yowngh." 42Dix daeuq daj Yezsuz hax: "Yezsuz aj, mawz ndaej hoak hongz goh mawz zwzrawz, vanz mawz nyen ndaej gux." 43Yezsuz daj dix hax: "Gux haxdoq mawz swhlit, vaenznaeh mawz ndaej daj gux zaemh mwz dih faengz ndaw fax naeh yah."

Gau Yezsuz Tai Naeh

44Daeq zangnaw swh'owq denx mwz taeng zang'vaenz sanz denx, gaj dih gaj ndaem nauq, 45tang'vaenz mboq rux rungh, yuq ndaw rownz dij Sen kvaix paeng riz yaz ruk dij Sen naeh, riag baenz song lit.#23:45 Yuq Yezluqsaxlaengx, yuq rownz dij Sen miz kvaix paeng riz ux yuq ruk dij Sen. Kvaix paeng naeh aeu dingz mboq hawj dij goanz ndonj mwz ndaw dix. Ndaw dix mizgaj puj mbud dij Sen goanz saeq dwx nyeuz daengzle naeh bi ux hawj mwz mbaed ux daeb daengzle mbud dij Sen. 46Yezsuz caqsiq rongx: "Dez aj, gux aeu minghkoan gux nyaengx mwz ndaw mungz mawz yah."#23:46 Gaemz kauq naeh haeuz yuq Sw Lownx 31:5. Hax gaemz naeh, zoq kaedzaw. 47Miz goanz leanhzangx ux,#23:47 Goanz leanhzangx ux gvanx baeg goanz bin Loahmax. leztaen Yezsuz hoakzaqnaeh kaedzaw, zoq biangz dij Sen, hax: "Goanz naeh zawh sowh puj gaeng goj gaemz hax mboq miz naeh zaeh!" 48Sowh dij goanz yuq haenz lez naeh, leztaen baenzzaqnaeh, zoq haej, yuqraix daengz dup baeg'aek saw, dauh mwz. 49Sowh puj daj Yezsuz dungzcuh naeh, sowh puj nyingz nowngz Yezsuz daeq Zazliqliq maz naeh, yuq gvae lez sowh saeh naeh.

Aeu Yezsuz Mwz Moak Ndaw Ngomz Mohbujreuh

50Ndaw hoiq puj Yaeuhtaiq miz goanz ux minxzwh rongx hoak Yezsowh, goanz naeh zawh puj ndae, gaemz hax mboq miz. 51Dix zawh dij goanz mbanj Yaeuhdaq, longq Yaqliqmaxtaiq naeh, dix gaj zwz gaj ngwz goh dij Sen daeuj. Gau dij goanz ndaw hoiq puj Yaeuhtaiq daz kaj Yezsuz naeh, dix mboq nowngz goj mboq hoak.#23:51 Dij Goanz Ndaw Hoiq Puj Yaeuhtaiq daengzle miz jiatsip laux. Paenqdix zoanzmaenh gvanx puj Yaeuhtaiq hoakzaqrawz kvej dij Sen. 52Dix mwz dih Bihlazdoz naeh, vanz Bihlazdoz aeu Yezsuz hawj dix peuj. 53Dix aeu Yezsuz daeuj, aeu kvaix paeng banq si ix ix ux toq, Yezsowh miz aen ngomz mohbujreuh ux, dix zoq aeu Yezsuz mwz nyaengx ndaw aen ngomz naeh, aen ngomz naeh naengz mboq sanz aeu puj tai nyaengx. 54Vaenz gaengnaeh zawh Cinzqiz'ux, zawh Vaenz Doxnyaengx, zaekgaj taeng Vaenz Cednoiq. 55Sowh puj nyingz daj Yezsuz daeq Zazliqliq zaemh maz naeh goj nowngz Yezsowh mwz. Paenqdix goj leztaen aen ngomz mohbujreuh Yezsuz, daj ndang Yezsuz hoakzaqrawz nyaengx. 56Paenqdix dauh mwz, dox gaenqhom daj yuz hom nyaengx, Vaenz Cednoiq, paenqdix hoakzaq Sw Dij Sen yaix naeh, cednoiq.

Currently Selected:

Luhzaz 23: ZHN

Highlight

Copy