Yezhanq 4

Yezsuz Daj Yah Ndaw Saxmaxliqyaq Ux Laemh Kauq

1 Yezsuz ruxndeq dij goanz Fahliqsaiq ruxnyinz gannaeh cohsaenz dix miz lai nyeuz cohsaenz Yezhanq, ruxnyinz hax dix saeh cohsaenz dix hoak diauq zauh soiq naeh. 2Gaj laemh zaeh maz mboq zawh ndang'hoz Yezsuz saeh gawz hoak diauq zauh soiq naeh, zawh cohsaenz dix haeggaj saeh cohsaenz dix hoak diauq zauh soiq naeh. 3Dix zoq ni mbanj Yaeuhdaq, daeuq dauh bae mbanj Zazliqliq. 4Dauh bae mbanj Zazliqliq dix baenz gvaq zoah mbanj Saxmaxliqyaq. 5Yaq dix zoq bae, bae taeng mbanj Saxmaxliqyaq aen chaenh ux, minxzwh rongx hoak Ciqzaz, dih naeh yuq zawj mbamq namh Yaqgowh aeu hawj lug zaiz dix Yezsowh naeh.#Zwz Nduq 33:19; 48:22; Yezsuzyaq 24:32. 6Dih naeh miz aen mboq ux rongx hoak aen mboq Yaqgowh. Yezsuz daeqloh moih gvaq, zoq naengh haenz mboq. Gau gaengnaeh zawh teq baenz ngaiz ux naeh.

7Miz yah Saxmaxliqyaq ux daeuj daek naemx. Yezsuz daj dix hax: "Aeu naemx hawj gux dex ndut umq ux mah." 8Laemh gau gaengnaeh, cohsaenz dix mwz ndaw chaenh swx gaenqjin. 9Yah Saxmaxliqyaq naeh daj Yezsuz hax: "Mawz zawh puj Yaeuhtaiq, baenzrawz daj gux yah Saxmaxliqyaq ux aeu naemx ndut mux?" Laemh zwz naeh puj Yaeuhtaiq mboq daj dij goanz Saxmaxliqyaq bae'dauh. 10Yezsuz yaeng dix: "Jixzawh mawz haeuz ruxndeq sowh gaenq dij Sen aeu hawj dij goanz daengzhwx naeh, goj haeuz ruxndeq goanz daj mawz hax ‘Aeu naemx hawj gux dex ndut umq ux mah’ naeh zawh gawz, mawz zoq vanz dix yaq eh, dix goj toj aeu naemx zaeu hawj mawz yaq eh." 11Yah gaengnaeh hax: "Cuh aj, mawz mboq miz sowh gaenq aeu daek naemx naeh, aen mboq naeh goj ndaek mawh. Mawz bae rawz aeu naemx zaeu maz ah? 12Puj jeq rownz piu Yaqgowh aeu aen mboq naeh leux hawj piu. Hoakri dix daj luglan dix, doihdo dix daengzle zawh ndut naemx aen mboq naeh. Dix naengz mboq rux aeu naemx zaeu hawj piu. Gaj mawz hax mawz rux aeu naemx zaeu hawj gux. Mawz naengz haen nyeuz dix, dwx nyeuz dix maj?" 13Yezsuz yaeng: "Gawz ndut sowh naemx naeh, gawz goj naengz rux daeuq yaeg, 14gaj jixzawh gawz ndut sowh naemx gux aeu hawj naeh, zoq mboq rux yaeg daengznauq. Sowh naemx gux aeu hawj naeh yuq ndaw dix daj dih naemx og dungzlumj, lae uad'uad, hawj dix ndaej aen mingh daengznauq naeh." 15Yah gaengnaeh hax: "Cuh aj, vanz mawz aeu sowh naemx naeh hawj gux, hawj gux mboq yaeg naemx, goj mboq ndaej daeuq daeuj inxnaeh daek naemx."

16 Yezsuz hax: "Mawz mwz rongx po mawz, yaq daeuq daeuj inxnaeh." 17Yah gaengnaeh daj dix hax: "Gux mboq miz po." Yezsuz hax: "Mawz hax mawz mboq miz po dauq mboq loang. 18Mawz ndaej miz haj goanz po, gaj goanz gannaeh mawz miz naeh mboq zawh po mawz. Gaemz kauq mawz hax naeh zawh zaeh." 19Yah gaengnaeh hax: "Cuh aj, gux lez ndaej og, mawz zawh puj zawxkauq dij Sen. 20Puj jeq Saxmaxliqyaq rownz piu zauh yuq bo naeh biangz dij Sen, gaj puj Yaeuhtaiq su hax Yezluqsaxlaengx zux zawh dih biangz dij Sen." 21Yezsuz yaeng: "Yah nyingz aj, gux haxdoq mawz swhlit, zaekgaj taeng zwz yah, taeng zwz naeh gaenqsu biangz Dez ndaw fax, mboq zawh yuq bo naeh, goj mboq zawh yuq Yezluqsaxlaengx. 22Gaenqsu biangz dij Sen, gaj gaenqsu mboq ruxnaj dix. Gaenqpiu biangz dij Sen gaj gaenqpiu ruxnaj dix. Baenzzaqrawz mah? Dij Sen aeu puj Yaeuhtaiq jeuq dij goanz. 23Gaj zaekgaj taeng zwz yah, gannaeh zoq zawh, gawz nganq kauqjing aeu zaw biangz Dez ndaw fax, gawz zux suanq zawh sowh puj biangz dij Sen naeh zaeh. Unj Dez ndaw fax zawx hawj sowh dij goanz naeh hoak puj biangz dix. 24Dij Sen zawh minghkoan, gawz biangz dix zoq baenz nganq kauqjing aeu zaw biangz dix." 25Yah gaengnaeh hax: "Gux ruxndeq Mihsaiqyaq goanz goj rongx hoak Jizduz naeh rux daeuj. Dix daeuj zwzrawz, dix toj aeu daengzle haxdoq piu." 26Yezsuz hax: "Goanz gannaeh daj mawz hax kauq naeh zoq zawh dix."

27Sowh gaunaeh, cohsaenz Yezsuz dauh daeuj. Paenqdix leztaen Yezsuz daj yah gaengnaeh hax kauq, zoq sawz taeuq, gaj mboq miz gawz cham: "Mawz aeu gaeng?" Rux: "Mawz baenzzaqrawz daj yah naeh hax kauq?"#4:27 Zwzndai puj zaiz puj Yaeuhtaiq mboq daj puj nyingz Saxmaxliqyaq hax kauq. 28Yah gaengnaeh jizzaz aen doangj dix, daeq mwz ndaw chaenh, daj goanzlai hax: 29"Gaenqsu bae lez, miz goanz ux, gux ndaej hoak gaeng raeuh dix goj hax og daeuj nauq, goanz naeh lau zawh Jizduz max?" 30Goanzlai zoq og ndaw chaenh bae, bae dih Yezsuz naeh.

31Gau gaengnaeh, cohsaenz Yezsuz daj Yezsuz hax: "Lazbix, jin mah." 32Yezsuz hax: "Gaenqgux miz gaenqjin jin, zawh sowh gaenq gaenqsu mboq ruxndeq naeh." 33Cohsaenz Yezsuz goanz lej daj goanz hax: "Gawz aeu gaeng hawj dix jin maznoax?" 34Yezsuz hax: "Biak kauq laux nemz gux daeuj naeh, hoak najgaengx dix ndae, gaenq naeh zoq zawh gaenq jin gux eh. 35Gaenqsu mboq zawh hoakzaqnaeh hax mawx: ‘Naengz miz siq ndown tem zux taeng zwz caeu.’ Gaj gux haxdoq su, ngangh to su lez bae doq ndaw naz, kaeujpyaek haeuz baenz jin yah, baenz caeu yah. 36Puj caeu kaeujpyaek haeuz ndaej vaenzriangz, sowh kaeujpyaek paenqdix caeu naeh miz daengznauq. Hoakzaqnaeh puj ndaem daj puj caeu zaemh faengz. 37Kauq daenh bwnz leuz: ‘Goanz ux ndaem, goanz ux caeu.’ Gaemz kauq naeh zawh zaeh. 38Gux nemz su bae caeu sowh kaeujpyaek su mboq ndaej ndaem naeh. Sowh puj ndaem naeh kux, gaenqsu bae caeu, gaenqsu zawh ndaej laeng paenqdix."

39Vaenz gaengnaeh yah gaengnaeh mwz haxdoq daenh, haxdoq daenh dix ndaej taen Yezsuz baenzzaqrawz raeuh, dix hax: "Gux ndaej hoak gaeng raeuh goanz naeh goj hax og maz nauq." Baenzzaqnaeh, doaklaeng aen chaenh gaengnaeh, dij goanz Saxmaxliqyaq miz goanz lai taeuq sinq Yezsuz. 40Yaq paenqdix daeuj dih Yezsuz naeh, vanz dix daj paenqdix zaemh ndowj, Yezsuz zoq yuq dih gaengnaeh ndowj song vaenz. 41Cholaeng kauq Yezsuz, puj sinq Yezsuz zoq gajfa miz lai. 42Paenqdix daj yah gaengnaeh hax: "Gannaeh gaenqpiu sinq, mboq zawh cholaeng suq kauq mawz hax naeh, zawh gaenqpiu haeggaj ndaej biak dix hax, gannaeh piu zoq ruxndeq dix zawh Zaeuj daeuj jeuq dij goanz dawj fax naeh zaeh."

Yezsuz Ya Lug zaiz Laux Saeq Ux Ndae

43-44 Yezsuz ndaej hax: "Pujzawxkauq dij Sen yuq goakrownz hoakri mboq miz gawz zaenzzungq goah." Baenzzaqnaeh gvaq song vaenz yaq, Yezsuz ni dih puj Saxmaxliqyaq, daeq maz naj, maz mbanj Zazliqliq. 45Zwz dij goanz Zazliqliq mwz ndaw Yezluqsaxlaengx jin Jeng Gvaq naeh, paenqdix ndaej taen sowh saeh Yezsuz hoak naeh, baenzzaqnaeh, Yezsuz maz taeng Zazliqliq yaq, dij goanz dih naeh zaemz dix taeuq. 46Yezsuz daeuq bae ndaw Zazliqliq longq Zaznah naeh, zoq zawh dih koax daekgoanq dix hawj naemx byenqbaenz laeuj naeh. Miz goanz puj saeq ux, lug zaiz dix yuq ndaw longq Zazbowhnungh baenzchaej. 47Lug zaiz dix zaekgaj tai, dix ruxnyinz Yezsuz daeq mbanj Yaeuhdaq daeuj taeng mbanj Zazliqliq, zoq mwz dih Yezsuz naeh, vanz Yezsuz bae ya lug zaiz dix. 48Yezsuz daj dix hax: "Jixzawh gaenqsu lez mboq taen sowh saeh ndaw fax naeh, gaenqsu zoq mboq sinq zaeh zaeh." 49Goanz saeq gaengnaeh hax: "Cuh aj, jixzawh mawz mboq daj gux bae kvaiq, lug gux toj tai mboqyaq, vanz mawz daj gux zaemh bae mah." 50Yezsuz haxdoq dix: "Dauh bae ndeh, lug zaiz mawz zaeu mwznaj ndaej eh." Goanz gaengnaeh sinq gaemz kauq Yezsuz daj dix hax naeh, zoq dauh bae. 51Gau dix dauh bae naeh, paenq koij dix daeq maz raep dix, haxdoq dix lug zaiz dix ndae yaq. 52Dix zoq cham puj koij dix, lug dix daeq zwzrawz rowngh maz. Paenqdix hax: "Vaenzvaz ngaiz yaq yih denx, nowx ndaed dix zoq zumx maz." 53Dix zoq ruxndeq gau gaengnaeh zoq zawh gau Yezsuz daj dix hax: "lug zaiz mawz zaeu mwznaj ndaej eh" naeh. Hoakri dix daj daengz rownz dix nauq zoq sinq Yezsuz zawh Zaeuj. 54Baez naeh zawh baez daih ngih Yezsuz yuq ndaw Zazliqliq hoak sowh saeh ndaw fax naeh, zawh dix daeq ndaw Yaeuhdaq dauh daeuj yaq hoak.

Currently Selected:

Yezhanq 4: ZHN

Highlight

Copy